ከችኩል ፍርድ መራቅ

ትኵረትህን ወደ ራስህ መልስ፤ በሌሎች ሰዎች ሥራ ላይ ከመፍረድም ተጠንቀቅ፤ ሰው በሌሎች ላይ ሲፈርድ በከንቱ ይደክማልና፣ ብዙ ጊዜም ይሳሳታል፣ በቀላሉም ኃጢአት ይሠራል፤ በራሱ ላይ ሲፈርድና ራሱን ሲመረምር ግን ሁልጊዜ የሚጠቅም ነገር ያደርጋል።

ብዙ ጊዜ ነገሮች እኛ እንደምንፈልገው እንደ ሆኑ እንፈርዳለን፤ ከግል ስሜት የተነሣ እውነተኛው ማስተዋል በቀላሉ ይጠፋልና።

እግዚአብሔር ብቻ የምኞታችን ዓላማ ቢሆን ኖሮ፣ አሳባችንን የሚቃወም ሲገጥመን እንዲህ በቀላሉ ባልታወክን ነበር። ነገር ግን ብዙ ጊዜ ከውስጥ ተደብቆ የሚያደባ ወይም ከውጭ የሚደርስ ነገር ከእርሱ ጋር ይስበናል።

ብዙዎች ሳያውቁት በሚያደርጉት ነገር ሁሉ ራሳቸውን ይፈልጋሉ። ነገሮች እንደ ምኞታቸውና እንደ ፍላጎታቸው ሲሆኑ የልብ ሰላም እንኳ ያላቸው ይመስላሉ፤ ከፈለጉት በተለየ ሲሆን ግን ፈጥነው ይታወካሉ፤ ያዝናሉም። የስሜትና የአሳብ ልዩነት ብዙ ጊዜ ወዳጆችንና ትውውቅ ያላቸውን ሰዎች ይለያያል፤ የምንኵስና ሕይወት ያላቸውንና ለእግዚአብሔር ያደሩትን እንኳ።

የቆየ ልማድ በቀላሉ አይሰበርም፤ ማንም ከሚያየው አልፎ ሊመራ አይወድም።

ለኢየሱስ ክርስቶስ ከመገዛት በጎ ምግባር ይልቅ በአእምሮህ ወይም በትጋትህ ብትታመን፣ ብርሃን የበራለት ሰው የምትሆነው በጭንቅ ነው፤ ብትሆንም በዝግታ ነው። እግዚአብሔር ለእርሱ ፈጽመን እንድንገዛና በብርቱ ፍቅር ከሰው ጥበብ ሁሉ በላይ ከፍ እንድንል ይፈልጋል።