ችግራችንን ለክርስቶስ መግለጥና ጸጋውን መለመን

ደቀ መዝሙሩ፦

እጅግ ቸር፣ እጅግ አፍቃሪ ጌታ ሆይ፥ አሁን በአምልኮ ልቀበልህ የምመኝህ አንተ፣ የምሠቃይበትን ድካምና ችግር፣ በምን ያህል ታላቅ ክፋትና ነውር እንደ ተጠላለፍሁ፣ ምን ያህል ጊዜም እንደምዝል፣ እንደምፈተን፣ እንደምረክስና እንደምታወክ ታውቃለህ።

እርዳታ ፍለጋ ወደ አንተ እመጣለሁ፤ መጽናናትንና ዕረፍትን ለማግኘት ወደ አንተ እጸልያለሁ። ሁሉን ለሚያውቅ፣ ውስጣዊ ሕይወቴ ሁሉ በፊቱ ግልጥ ለሆነ፣ ፍጹም አድርጎ ሊያጽናናኝና ሊረዳኝ ብቻውን ለሚችል ለእርሱ እናገራለሁ።

የትኞቹ መልካም ነገሮች እጅግ እንደሚያስፈልጉኝ፣ በበጎ ምግባርም ምን ያህል ድሀ እንደ ሆንሁ አንተ ታውቃለህ። እነሆ፥ ጸጋህን እየለመንሁ ምሕረትህንም እየተማጸንሁ ድሀና ራቁቴን በፊትህ ቆሜአለሁ።

የተራበውን ለማኝህን መግበው። ቀዝቃዛነቴን በፍቅርህ እሳት አቀጣጥለው። ዕውርነቴን በመገኘትህ ብርሃን አብራው። ምድራዊውን ነገር ሁሉ መራራ አድርግብኝ፤ ቅሬታንና መከራን ሁሉ ወደ ትዕግሥት፣ ዝቅተኛውን ፍጥረት ሁሉ ወደ ንቀትና ወደ መረሳት ለውጥልኝ። ልቤን በሰማይ ወዳለኸው ወደ አንተ አንሣው፤ በምድርም ላይ እንድባዝን አትተወኝ። ከዚህች ሰዓት ጀምሮ እስከ ዘላለም ድረስ አንተ ብቻ ለእኔ ጣፋጭ ሁን፤ አንተ ብቻ ምግቤና መጠጤ፣ ፍቅሬና ደስታዬ፣ ጣፋጭነቴና ፍጹም መልካሜ ነህና።

መገኘትህ ፈጽሞ ያንድደኝ፣ ይብላኝ፣ ወደ ራስህም ይለውጠኝ፤ ይኸውም በውስጣዊ አንድነት ጸጋና በሚነድደው ፍቅርህ አቅላጭ ኃይል ከአንተ ጋር አንድ መንፈስ እሆን ዘንድ ነው።

ተርቤና ተጠምቼ ከአንተ እንድሄድ አትተወኝ፤ ይልቁንም ለቅዱሳንህ ብዙ ጊዜና በሚያስደንቅ ሁኔታ እንዳደረግኸው በምሕረት አድርግልኝ።

ዘወትር የምትነድ ከቶም የማትጠፋ እሳት፣ ልብን የምታነጻና ማስተዋልን የምታበራ ፍቅር አንተ ስለ ሆንህ፣ ለራሴ እሞት ዘንድ በአንተ ፈጽሞ ብነድድ ምን ያስደንቃል?