ለእግዚአብሔር ያደረች ነፍስ በቅዱስ ቍርባን ከክርስቶስ ጋር አንድ ለመሆን በሙሉ ልቧ መናፈቅ

ደቀ መዝሙሩ፦

ክርስቶስ ሆይ፥ አፍቃሪ ለሚወደው እንደሚናገር፣ ወዳጅም ከወዳጁ ጋር እንደሚነጋገር፣ አንተ ለእኔ እኔም ለአንተ ብቻ እንድንነጋገር፣ አንተን ብቻህን ለማግኘት፣ ልቤን በሙሉ ለአንተ ለመክፈት፣ ነፍሴ እንደምትመኘው በአንተ ደስ ለመሰኘት፣ በማንም እንዳልታወክ፣ በምንም ፍጥረት እንዳልነቃነቅና እንዳልጨነቅ ይሰጠኝ።

በቅዱስ ቍርባንና ቅዳሴን ዘወትር በመቀደስ ሰማያዊውንና ዘላለማዊውን ማጣጣም እየተማርሁ ከአንተ ጋር ፈጽሜ አንድ እንድሆን፣ ልቤንም ከተፈጠሩ ነገሮች ሁሉ እንዳርቅ ይህን እለምናለሁ፤ ይህንም እመኛለሁ።

ጌታ አምላክ ሆይ፥ ራሴን ፈጽሜ ረስቼ ከአንተ ጋር ፈጽሜ አንድ የምሆነውና በአንተ የምዋጠው መቼ ነው? አንተ በእኔ እኔም በአንተ? እንዲህ ሆነን በአንድነት እንድንኖር ስጠን። በእውነት አንተ ከአእላፋት የተመረጥህ ውዴ ነህ፤ ነፍሴም በሕይወቷ ዘመን ሁሉ በአንተ መኖር ደስ ይላታል። በእውነት አንተ የሰላሜ መያዣ ነህ፤ በአንተ ታላቅ ሰላምና እውነተኛ ዕረፍት አለ፤ ያለ አንተ ግን ድካምና ኀዘን ወሰን የሌለውም ጕስቍልና አለ።

በእውነት አንተ የተሰወርህ አምላክ ነህ። ምክርህ ከኃጥኣን ጋር አይደለም፤ ንግግርህ ይልቁንም ከትሑታንና ከየዋሆች ጋር ነው።

ጌታ ሆይ፥ ለልጆችህ ጣፋጭነትህን ለማሳየት እጅግ ጣፋጭ በሆነው እንጀራ፣ ከሰማይ በወረደ እንጀራ ልትመግባቸው ራስህን ዝቅ የምታደርግ፣ መንፈስህ ምንኛ ቸር ነው! በእውነት አንተ አምላካችን ራስህን ለዕለት መጽናናታቸውና ልባቸውን ወደ ሰማይ ለማንሣት እንዲበሉህና በአንተ ደስ እንዲሰኙ ለምትሰጣቸው ለታማኞች ሁሉ በስፍራ ሁሉ እንደምትገኝ፣ እንዲሁ አምላኩ ወደ እርሱ የቀረበለት እንደዚህ ያለ የታደለ ሌላ ሕዝብ የለም።

በእርግጥ እንደ ክርስቲያን ሕዝቦች የከበረ ሌላ ሕዝብ ማን ነው? እግዚአብሔር በክቡር ሥጋው ሊመግባት ወደ እርስዋ እንደሚመጣው ለእግዚአብሔር ያደረች ነፍስ ከሰማይ በታች እንደዚህ የተወደደ ፍጥረት ማን ነው? የማይነገር ጸጋ ሆይ! ድንቅ ትሕትና ሆይ! ለሰው በተለየ ሁኔታ የተሰጠህ ልክ የሌለህ ፍቅር ሆይ!

ስለዚህ ፍቅር፣ ስለዚህ ወሰን የሌለው ጸጋ ለእግዚአብሔር ምን እመልሳለሁ? ልቤን ከእርሱ ልብ ጋር አጥብቄ በማዋሐድ ፈጽሜ ለአምላኬ ከማቅረብ የበለጠ ደስ የሚያሰኘው ምንም ልሰጠው አልችልም። ያን ጊዜ ነፍሴ ከእግዚአብሔር ጋር ፍጹም አንድ ስትሆን ውስጣዊ ሰውነቴ ሁሉ ደስ ይለዋል። ያን ጊዜም፦ «ከእኔ ጋር ልትሆን ብትወድ እኔ ከአንተ ጋር እሆናለሁ» ይለኛል። እኔም፦ «አቤቱ፥ ከእኔ ጋር ለመኖር ራስህን ዝቅ አድርግ። እኔ በደስታ ከአንተ ጋር እሆናለሁ። ልቤ ከአንተ ጋር አንድ እንዲሆን ይህ አንድ ምኞቴ ነው» ብዬ እመልስለታለሁ።