ምዕራፍ 99 · 14 ደቂቃ ንባብ · 19 ደቂቃ ማዳመጥ
የታመሙትን ስለ መጠየቅ
ስብከት 98
የታመሙትን ስለ መጠየቅ
«ታምሜ ጠይቃችሁኛልና።»
ማቴዎስ 25:36።
1. የጸጋ መንገዶችና የእግዚአብሔር ሥርዓቶች አንድ ዓይነት ትርጉም ያላቸው ቃላት እንደ ሆኑ በአብዛኛው ይታሰባል። በዚያ አገላለጽ በተለምዶ የምንለው የአምልኮ ሥራዎች የሚባሉትን ነው፤ ይኸውም መጽሐፍ ቅዱስን መስማትና ማንበብ፣ የጌታን እራት መቀበል፣ የጉባኤና የግል ጸሎት፣ እንዲሁም ጾም ነው። እነዚህም የእግዚአብሔርን ጸጋ ወደ ሰዎች ነፍስ የሚያደርሱ የተለመዱ መተላለፊያዎች እንደ ሆኑ የተረጋገጠ ነው። ነገር ግን የጸጋ መንገዶች እነዚህ ብቻ ናቸውን? እግዚአብሔር ለሚወዱትም ሆነ ለሚፈሩት ጸጋውን ብዙ ጊዜ፣ አዎን፣ በተለምዶ የሚያደርስበት ከእነዚህ በቀር ሌላ መንገድ የለምን? በእርግጥ ከአምልኮ ሥራዎች ጋር የምሕረት ሥራዎችም አሉ፤ እነርሱም እውነተኛ የጸጋ መንገዶች ናቸው። በተለይም በጤናማ ዓይን ለሚፈጽሟቸው እንዲህ ናቸው። ቸል የሚሉአቸውም አለዚያ ሊቀበሉት ይችሉ የነበረውን ጸጋ አይቀበሉም። አዎን፣ በቸልታቸው ሲጸኑም የተቀበሉትን ጸጋ ያጣሉ። አንድ ጊዜ በእምነት ብርቱዎች የነበሩ ብዙዎች አሁን ደካሞችና ልባቸው የዛለ የሆኑት ከዚህ የተነሣ አይደለምን? ሆኖም ከእግዚአብሔር ሥርዓቶች አንዱንም ቸል ስለማይሉ ያ ድካም ከየት እንደሚመጣ አያስተውሉም። ነገር ግን ቅዱስ ጳውሎስ ስለ እውነተኛ አማኞች ሁሉ የተናገረውን በቁም ነገር ቢያስቡበት ከየት እንደሚመጣ ባዩ ነበር፦ «እኛ ፍጥረቱ ነንና፤ እንመላለስበት ዘንድ እግዚአብሔር አስቀድሞ ያዘጋጀውን መልካሙን ሥራ ለማድረግ በክርስቶስ ኢየሱስ ተፈጠርን።» (ኤፌሶን 2:10።)
2. በዚህ መመላለስ በጸጋ አስቀድመን የዳንንበት ያ እምነት እንዲቀጥል፣ እንዲሁም የዘላለምን መዳን ለማግኘት እጅግ አስፈላጊ ነው። እነዚህ የታላቁ ዳኛ የራሱ ቃላት እንደ ሆኑ በቁም ነገር ብናስብ በዚህ ልንጠራጠር አንችልም፦ «እናንተ የአባቴ ቡሩካን፥ ኑ፤ ዓለም ከተፈጠረበት ጊዜ ጀምሮ የተዘጋጀላችሁን መንግሥት ውረሱ። ተርቤ አብልታችሁኛልና፥ ተጠምቼ አጠጥታችሁኛልና፥ እንግዳ ሆኜ ተቀብላችሁኛልና፥ ታርዤ አልብሳችሁኛልና፥ ታምሜ ጠይቃችሁኛልና፥ ታስሬ ወደ እኔ መጥታችኋልና።» (ማቴዎስ 25:34።) «እውነት እላችኋለሁ፥ ከሁሉ ከሚያንሱ ከእነዚህ ወንድሞቼ ለአንዱ እንኳ ስላደረጋችሁት ለእኔ አደረጋችሁት።» ይህ በምሕረት ሥራዎች መጽናት ለመዳን አስፈላጊ እንደ ሆነ ካላሳመናችሁ፣ የሁሉ ዳኛ በግራ ላሉት የሚለውን አስቡ፦ «እናንተ ርጉማን፥ ለሰይጣንና ለመላእክቱ ወደ ተዘጋጀ ወደ ዘላለም እሳት ከእኔ ሂዱ። ተርቤ አላበላችሁኝምና፥ ተጠምቼ አላጠጣችሁኝምና፥ እንግዳ ሆኜ አልተቀበላችሁኝምና፥ ታርዤ አላለበሳችሁኝምና፥ ታምሜ ታስሬም አልጠየቃችሁኝምና። ከሁሉ ከሚያንሱ ከእነዚህ ለአንዱ ስላላደረጋችሁት ለእኔ ደግሞ አላደረጋችሁትም።» እንግዲህ ከዚህ ብቻ የተነሣ እንኳ ቢሆን ከእግዚአብሔር ተለይተው «ወደ ዘላለም ቅጣት» «ሊሄዱ» ግድ እንደ ሆነ ታያላችሁ።
3. ይህ ታላቅ እውነት ይህን ያህል ጥቂት መታወቁ፣ ወይም ቢያንስ እግዚአብሔርን በሚፈሩት ሰዎች አኗኗር ላይ ይህን ያህል ጥቂት ተጽዕኖ ማሳደሩ እንግዳ ነገር አይደለምን? ይህ መግለጫ እውነት ቢሆን፣ የምድር ሁሉ ዳኛ በቅን ቢናገር፣ እንደ አቅማቸውና እንደ አጋጣሚያቸው የተራቡትን የሚያበሉ፣ የተጠሙትን የሚያጠጡ፣ የተራቆቱትን የሚያለብሱ፣ እንግዳውን የሚረዱ፣ በወኅኒ ያሉትን የሚጠይቁ እነዚያ፣ እነዚያም ብቻ «የዘላለሙን መንግሥት ይወርሳሉ»። ይህን የማያደርጉትም «ለሰይጣንና ለመላእክቱ ወደ ተዘጋጀ ወደ ዘላለም እሳት ይሄዳሉ»።
4. ለአሁን ንግግሬን ከእነዚህ ነጥቦች በአንዱ ብቻ ልወስን አስባለሁ፤ እርሱም የታመሙትን መጠየቅ ነው፤ ይህ ጤነኞች የሆኑ ሁሉ በብዙም ሆነ በጥቂት ደረጃ ሊፈጽሙት የሚችሉት ግልጽ ግዴታ ነው፤ ሆኖም እግዚአብሔርን እንወዳለን በሚሉት እንኳ ሳይቀር በሁሉም ዘንድ ማለት ይቻላል ቸል ተብሏል። ስለዚህም ነገር እንዲህ ብዬ እጠይቃለሁ፦
I. የታመሙትን መጠየቅ ምንን ያጠቃልላል?
II. እንዴት ሊፈጸም ይገባል? — እንዲሁም፣
III. በማን?
I. በመጀመሪያ፣ የዚህ ግዴታ ባሕርይ ምንድር ነው? «የታመሙትን መጠየቅ» ምንን ያጠቃልላል? ብዬ እጠይቃለሁ።
1. የታመሙት ስል በአልጋ ላይ የተኙትን ወይም በጠባቡ ትርጉም የታመሙትን ብቻ ማለቴ አይደለም። ይልቁንም በአእምሮም ሆነ በሥጋ በመከራ ውስጥ ያሉትን ሁሉ እጨምራለሁ፤ ይህም ደጎች ቢሆኑ ወይም ክፉዎች፣ እግዚአብሔርን ቢፈሩም ባይፈሩም ነው።
2. «ነገር ግን በአካል ሄደን ልንጠይቃቸው ያስፈልጋልን? ከሩቅ ሆነን ልንረዳቸው አንችልምን? እርዳታውን ራሳችን ይዘን ከምንሄድ ይልቅ ብንልክላቸው ያው ዓላማ አይፈጸምምን?» ብዙዎች የታመሙትን በአካል ሊያገለግሉ በማይችሉበት ሁኔታ ውስጥ ናቸው፤ ይህ በእውነት ሁኔታቸው በሆነበት ደግሞ እርዳታ መላካቸው፣ ሊጠቀሙበት የሚችሉት ብቸኛ መላ በመሆኑ፣ ያለ ጥርጥር በቂ ነው። ነገር ግን ይህ በትክክል የታመሙትን መጠየቅ አይደለም፤ ሌላ ነገር ነው። መጠየቅ ብለን የምንተረጕመው ቃል በቀጥተኛ ትርጉሙ መመልከት ማለት ነው። ይህ ደግሞ፣ በሚገባ እንደምታውቁት፣ ከእነርሱ ጋር ካልተገኛችሁ በቀር ሊሆን አይችልም። ስለዚህ እርዳታ መላክ እነርሱን ከመጠየቅ ፈጽሞ የተለየ ነገር ነው። እንግዲህ የመጀመሪያው ሊደረግ ይገባዋል፤ ሁለተኛው ግን ሳይደረግ ሊቀር አይገባውም።
«ነገር ግን ወደ ታመሙት ሐኪም እልካለሁ፤ እርሱም ከእኔ ይልቅ ሊጠቅማቸው ይችላል።» በአንድ በኩል ይችላል፤ ከሥጋቸው ጤና አንጻር ከእናንተ የበለጠ ሊጠቅማቸው ይችላል። ነገር ግን ወሰን በሌለው መጠን እጅግ ከምትበልጠው ከነፍሳቸው አንጻር ከእናንተ የበለጠ ሊጠቅማቸው አይችልም። ቢችልም እንኳ ይህ እናንተን ከኃላፊነት አያድናችሁም፤ የእርሱ መሄድ የእናንተን ግዴታ አይፈጽምም። በገዛ ዓይናችሁ ካላያችኋቸው በቀር ያው መልካም ነገር ለእናንተ አይሆንም። ካላያችኋቸው የጸጋ መንገድን ታጣላችሁ፤ ከዚህ ሕመምና ስቃይ ለሚያድናችሁ፣ ጤናችሁንና ብርታታችሁንም ለሚያቆይላችሁ ለእግዚአብሔር ያላችሁን ምስጋና የምታበዙበትን ግሩም መንገድ ታጣላችሁ፤ እንዲሁም ለተጨነቁት ያላችሁን ርኅራኄ፣ በጎ ፈቃዳችሁንና ማኅበራዊ ስሜቶቻችሁን ሁሉ የምታበዙበትን መንገድ ታጣላችሁ።
3. ባለ ጠጎች በአጠቃላይ ለድሆች ይህን ያህል ጥቂት ርኅራኄ ያላቸው አንዱ ታላቅ ምክንያት እነርሱን እጅግ አልፎ አልፎ ብቻ ስለሚጠይቋቸው ነው። በተለምዶ እንደሚባለው፣ የዓለም አንዱ ክፍል ሌላው ምን መከራ እንደሚቀበል የማያውቀው ከዚህ የተነሣ ነው። ብዙዎቹ የማያውቁት ማወቅ ስለማይፈልጉ ነው፤ ከማወቅ መንገድ ገለል ይላሉ፤ ከዚያም ሆን ብለው የመረጡትን አለማወቅ ለልባቸው ድንዳኔ ምክንያት አድርገው ያቀርባሉ። ብዙ ሀብት የነበረው አንድ ሰው እንዲህ አለ፦ «ጌታዬ፣ በእውነት እኔ እጅግ ርኅሩኅ ሰው ነኝ። እውነቱን ልንገርህ ግን፣ በዓለም ላይ የተቸገረ አንድም ሰው አላውቅም።» ይህ እንዴት ሆነ? እንግዲህ ከመንገዳቸው ለመራቅ በሚገባ ተጠንቅቆ ነበር፤ ከእነርሱም አንዱን ሳያስበው ቢያገኘው «ገለል ብሎ አለፈ»።
4. በአጎራባች አገር ያሉ ከፍተኛ ማዕረግ ያላቸው ሰዎች እንኳ ሳይቀሩ ያላቸው መንፈስና ጠባይ ከዚህ ምንኛ የተቃረነ ነው! በፓሪስ ከተማ የመጀመሪያ ደረጃ መኳንንት የሆኑ ሴቶች፣ አዎን፣ የንጉሣውያን ቤተሰብ ደም ያላቸው ልዕልቶች፣ የታመሙትን፣ በተለይም በታላቁ ሆስፒታል ያሉትን ሕሙማን ዘወትር ይጠይቃሉ። ችግራቸውን ለማቃለል የሚጠነቀቁ ብቻ አይደሉም (ከተሰጣቸው በላይ የሚያስፈልጋቸው ነገር ቢኖር)፤ ነገር ግን በሕመም አልጋቸው አጠገብ ያገለግሏቸዋል፣ ቍስላቸውን ያሽጋሉ፣ እጅግ የተናቁትንም አገልግሎቶች ይፈጽሙላቸዋል። ድሆች ሆኑ ባለ ጠጎች፣ ተራ ሰዎች ሆኑ የተከበሩ፣ ለእንግሊዛውያን እነሆ ምሳሌ! ለብዙ ዓመታት የፈረንሳውያንን ሞኝነት አብዝተን ቀድተናል፤ ለአንድ ጊዜ እንኳ የክርስቲያን ዓለም ሁሉ ሊከተለው የሚገባውን ጥበባቸውንና በጎ ምግባራቸውን እንቅዳ። በእንግሊዝ ያሉ የተከበሩ ሴቶች፣ ወይም ቆንቴሶቹ እንኳ፣ እነዚያን የንጉሣውያን ደም ያላቸውን ልዕልቶች ለመምሰል አያፍሩ! ለሰው ልጅ ባሕርይ ክብር የሚሰጥ ልማድ እነሆ። በፈረንሳይ ተጀመረ፤ ነገር ግን በዚያ እንዳያበቃ እግዚአብሔር ይጠብቅ!
5. እነዚያን በእውነት የተከበሩ ሴቶች፣ እነርሱ እንደሚያደርጉት ራሳችሁን ዝቅ በማድረግና ለታመሙት እጅግ ዝቅተኛ አገልግሎቶችን በመፈጸም እንድትመስሉ ቅምጥልነታችሁ ባይፈቅድላችሁ እንኳ፣ ራሳችሁን ያን ያህል ሳታዋርዱ የሚያስፈልጋቸውን ሁሉ ልትሰጧቸው ትችላላችሁ። እንዲሁም መንፈሳዊ ጕድለታቸውን በመሙላት የበለጠ ግሩም የሆነ እርዳታ ልትሰጡ ትችላላችሁ፤ ይኸውም (እንዲህ ያለ ትምህርት ቢያስፈልጋቸው) የሃይማኖትን የመጀመሪያ መሠረታዊ ትምህርቶች በማስተማር፣ በኃጢአት ምክንያት ከእግዚአብሔር ቍጣና እርግማን በታች ያሉበትን አደገኛ ሁኔታ ለማሳየት በመጣር፣ ወደ «የዓለምን ኃጢአት የሚያስወግድ የእግዚአብሔር በግ» በመጠቆም ነው። ከዚህ አጠቃላይ ትምህርት በተጨማሪ በሥጋ ሕመም፣ በአእምሮ ጭንቀት ያሉትን ለማጽናናት ብዙ አጋጣሚ ሊኖራችሁ ይችል ነበር፤ ልባቸው የዛለውን ለማበርታት፣ የደከሙትንና የታከቱትን ለማነቃቃት፣ ያመኑትንም ለማነጽና «ወደ ፍጽምና» እንዲሄዱ ለማበረታታት አጋጣሚዎችን ታገኙ ነበር። ነገር ግን እነዚህን ነገሮች በገዛ ራሳችሁ ልታደርጉ ይገባችኋል፤ በወኪል ሊደረጉ እንደማይችሉ ታያላችሁ። ወይም በሌላ ሰው በኩል ለታመሙት ያንኑ እርዳታ መስጠት ትችላላችሁ እንበል፤ ለራሳችሁ ያንኑ ጥቅም ልታጭዱ አትችሉም፤ በአካል ብትረዷቸው ኖሮ ልታገኙት ትችሉ የነበረውን በትሕትና፣ በትዕግሥት፣ በመንፈስ ርኅራኄና ለተጨነቁት በማዘን የሚገኘውን ያንን ዕድገት ልታገኙ አትችሉም። እንዲሁም «እያንዳንዱ እንደ ራሱ ድካም መጠን የራሱን ደመወዝ ይቀበላል» በሚባልበት በጻድቃን ትንሣኤ ያንኑ ብድራት አትቀበሉም።
II. 1. በሁለተኛ ደረጃ፣ እንዴት ልንጠይቃቸው ይገባናል? ብዬ ለመጠየቅ እቀጥላለሁ። ይህ የፍቅር ድካም በምን ዓይነት ሁኔታ እጅግ ውጤታማ ሆኖ ሊፈጸም ይችላል? ለእግዚአብሔር ክብርና ለባልንጀራችን ጥቅም እጅግ በሚሆን መንገድ ይህን እንዴት ልናደርገው እንችላለን? ነገር ግን ወደ ሥራው ከመግባታችሁ በፊት ለእርሱ ፈጽሞ ብቁ እንዳልሆናችሁ በጥልቅ ልትረዱ ይገባችኋል፤ እጅግ ግሩም በሆነ መንገድ ለመፈጸም በቂ ጸጋም ሆነ በቂ ማስተዋል የላችሁም። ይህም ብርታትን ለማግኘት ወደ ብርቱው መቅረብ፣ ጥበብንም ለማግኘት ወደ ብርሃናት አባት፣ ወደ በጎ ስጦታ ሁሉ ሰጪ መሸሽ አስፈላጊ እንደ ሆነ ያሳምናችኋል፤ ሁልጊዜም «በሰው ውስጥ ጥበብን የሚሰጥ መንፈስ አለ፤ የቅዱሱም እስትንፋስ ማስተዋልን ይሰጣል» የሚለውን አስቡ። ስለዚህ ወደ ሥራው ልትገቡ በተዘጋጃችሁ ጊዜ ሁሉ በብርቱ ጸሎት የእርሱን እርዳታ ፈልጉ። ትዕቢት ወደ ልባችሁ ሾልኮ ቢገባ፣ ማንኛውንም ነገር ለራሳችሁ ብትሰጡ፣ ሌሎችን ለማዳን ስትጥሩ የገዛ ነፍሳችሁን እንዳታጠፉ፣ ሙሉ የትሕትና መንፈስ እንዲሰጣችሁ ወደ እርሱ ጩኹ። ከሥራው በፊትና በሥራው ሁሉ፣ ከመጀመሪያው እስከ መጨረሻው፣ ሸካራም ሆነ ለስላሳ፣ ደግም ሆነ ጨካኝ፣ የሚደርስባችሁ አያያዝ ምንም ቢሆን ፈጽሞ እንዳትቈጡ ወይም ተስፋ እንዳትቈርጡ፣ የማያቋርጥ የየዋህነትና የገርነት፣ የትዕግሥትና የመታገሥ ስጦታ ለማግኘት ልባችሁ እርሱን ይጠብቅ። በአንዳንዶቹ ጥልቅ አለማወቅ፣ በሌሎቹም ድንዛዜና አስገራሚ ሞኝነት አትናወጡ፤ በብስጭታቸው ወይም በእልኸኝነታቸው፣ የደከማችሁትን ድካም ሁሉ ካደከማችሁ በኋላ ባለመሻሻላቸው አትደነቁ፤ አዎን፣ ከእነርሱ አንዳንዶቹ ወደ ጥፋት ተመልሰው ከቀድሞው የባሱ ቢሆኑ አትደነቁ። አሁንም ምስክርነታችሁ በእግዚአብሔር ዘንድ፣ ደመወዛችሁም በልዑል ዘንድ ነው።
2. የታመሙትን ስለምትይዙበት የተለየ ዘዴ ራሳችሁን በአንዱ ላይ ማሰር አያስፈልጋችሁም፤ ይልቁንም ልዩ ልዩ ሁኔታዎች እንደሚጠይቁት የአካሄዳችሁን መንገድ ዘወትር ልትለዋውጡ ትችላላችሁ። ነገር ግን አብዛኛውን ጊዜ ስለ ውጫዊ ሁኔታቸው በመጠየቅ መጀመር መጥፎ አይሆንም። የኑሮ መሠረታዊ አስፈላጊ ነገሮች እንዳሏቸው፣ በቂ ምግብና ልብስ እንዳላቸው፣ አየሩ ቀዝቃዛ ከሆነ ማገዶ እንዳላቸው፣ አስፈላጊው አስታማሚ እንዳላቸው፣ ስለ ሥጋዊ ሕመማቸው በተለይም አደገኛ ዓይነት ከሆነ ተገቢ ምክር እንዳገኙ ልትጠይቁ ትችላላችሁ። ከእነዚህ በብዙዎቹ ረገድ ራሳችሁ አንዳች እርዳታ ልትሰጧቸው ትችሉ ይሆናል፤ እንዲሁም ከእናንተ ይበልጥ የሚችሉትን የአገልግሎታችሁን ጕድለት እንዲሞሉ ልታነሣሡ ትችላላችሁ። ስለ ራሳችሁ ጉዳይ «መለመንም አፍራለሁ» ብትሉ ተገቢ ነው፤ ስለ ድሆች መለመን ግን ፈጽሞ አትፈሩ፤ አዎን፣ በዚህ ጉዳይ የማይታክት ለማኝ ሁኑ፤ እምቢታን በቀላሉ አትቀበሉ። ያላችሁን ብልሃት ሁሉ፣ ማስተዋል ሁሉ፣ ተሰሚነት ሁሉ ተጠቀሙ፤ በዚያው ጊዜ የሰዎችን ሁሉ ልብ በእጁ በያዘው በእርሱ ታመኑ።
3. ከዚያም በገዛ እጃችሁ ልታደርጉላቸው የምትችሉት መልካም አገልግሎት እንዳለ በቀላሉ ታስተውላላችሁ። በእርግጥ ሊደረጉ ከሚያስፈልጉት ነገሮች አብዛኞቹን በዙሪያቸው ያሉት ከእናንተ ይልቅ በተሻለ ሊያደርጉት ይችላሉ። ነገር ግን በአንዳንዶቹ ከእነርሱ የበለጠ ችሎታ ወይም የበለጠ ልምድ ሊኖራችሁ ይችላል፤ ካላችሁም ቅምጥልነት ወይም ክብር በመንገዳችሁ እንቅፋት አይሁን። «ከሁሉ ከሚያንሱ ከእነዚህ ለአንዱ እንኳ ስላደረጋችሁት ለእኔ አደረጋችሁት» የሚለውን ቃሉን አስቡ፤ ለእርሱም ብላችሁ ለማድረግ ምንም ነገር ዝቅ ያለ አይምሰላችሁ። ስለ እርሱ ብላችሁ በመዋረዳችሁ ደስ ይበላችሁ!
4. እነዚህ ጥቃቅን የፍቅር ድካሞች ይበልጥ አስፈላጊ ወደ ሆኑ ነገሮች መንገዳችሁን ያቀኑላችኋል። ለሥጋቸው ግድ እንዳላችሁ ካሳያችሁ በኋላ ስለ ነፍሳቸው ለመጠየቅ ልትቀጥሉ ትችላላችሁ። በዚህም ሰፊ መስክ በፊታችሁ አለ፤ እግዚአብሔር የሰጣችሁን መክሊቶች ሁሉ የምትሠሩበት ስፍራ አላችሁ። እንዲህ ብላችሁ በመጠየቅ አትጀምሩምን? «እግዚአብሔር ዓለምን እንደሚገዛ፣ — መግቦቱም በሁሉ ላይ፣ በተለይም በአንተ ላይ እንደ ሆነ አስበህ ታውቃለህን? — እንግዲህ ያለ እርሱ እውቀት፣ — ወይም ለበጎህ ያለ እርሱ ዓላማ አንዳች ነገር ይደርስብሃልን? የምትቀበለውን መከራ ሁሉ ያውቃል፤ ሥቃይህን ሁሉ ያውቃል፤ ጕድለትህን ሁሉ ያያል። መከራህን በአጠቃላይ ብቻ ሳይሆን የመከራህን እያንዳንዱን ዝርዝር ሁኔታ ያያል። ከሰማይ ወደ ታች እየተመለከተ እነዚህን ነገሮች ሁሉ ለጥቅምህ እያዘጋጀ አይደለምን?» ከዚያም የሃይማኖትን አጠቃላይ መሠረታዊ ትምህርቶች ያውቅ እንደ ሆነ ልትጠይቁ ትችላላችሁ። ከዚያም በኋላ በፍቅርና በገርነት ሕይወቱ ከእነዚያ ጋር የሚስማማ እንደ ነበረ፤ ውጫዊና ያለ ኀፍረት ፊት ለፊት ኃጢአት የሚሠራ ኃጢአተኛ እንደ ነበረ ወይስ የሃይማኖት መልክ እንደ ነበረው መርምሩ። ቀጥሎም ስለ ኃይሉ፣ እግዚአብሔርን «በመንፈስና በእውነት» ስለ ማምለክ አንዳች የሚያውቅ እንደ ሆነ እዩ። የማያውቅ ከሆነ ያለ ቅድስና «ጌታን ሊያይ የሚችል የለም» እንዲሁም «ሰው ዳግመኛ ካልተወለደ በቀር የእግዚአብሔርን መንግሥት ሊያይ አይችልም» የሚለውን ልታስረዱት ጣሩ። የቅድስናን ባሕርይና የአዲስ ልደትን አስፈላጊነት ማስተዋል ሲጀምር፣ ያን ጊዜ «ወደ እግዚአብሔር ንስሐ መግባትንና በጌታችን በኢየሱስ ክርስቶስ ማመንን» አጥብቃችሁ ልታሳስቡት ትችላላችሁ።
5. ከእነርሱ አንዳንዶቹ እግዚአብሔርን መፍራት መጀመራቸውን ስታዩ፣ አንዱን ከሌላው በኋላ አንዳንድ ቀላል በራሪ ጽሑፎችን ብትሰጧቸው ተገቢ ይሆናል፤ ለምሳሌ «ለክርስቲያኖች የተሰጡ መመሪያዎች»፣ «አንተ የምትተኛ ንቃ» እና «የክርስትና ባሕርይና ዓላማ»። በሚቀጥለው ጉብኝት ምን እንዳነበቡ፣ — ምን እንደሚያስታውሱ፣ — ምንስ እንደሚያስተውሉ ልትጠይቁ ትችላላችሁ። ያን ጊዜም የሚያስተውሉትን አጽንታችሁ የምታስረዱበትና ቢቻል በልባቸው ላይ የምታትሙበት ጊዜ ይሆናል። እያንዳንዱን ስብሰባ በጸሎት መደምደማችሁን እርግጠኞች ሁኑ። ገና ያለ ተዘጋጀ ጸሎት መጸለይ ካልቻላችሁ፣ አቶ ስፒንክስ ወይም ሌላ ማንኛውም ቀናተኛ ጸሐፊ ካዘጋጇቸው ጸሎቶች አንዳንዶቹን ልትጠቀሙ ትችላላችሁ። ነገር ግን ይህን ማመንታት ጥሳችሁ በቶሎ ባለፋችሁ መጠን የተሻለ ነው። እግዚአብሔርን ለምኑ፤ እርሱም አፋችሁን ይከፍታል።
6. ከምትጠይቋቸው ድሆች ሁሉ ልታስተምሯቸው ከምትጥሩት ይበልጥ አስፈላጊ ትምህርቶች ጋር፣ በአብዛኛው እምብዛም የማያውቋቸውን ሁለት ተጨማሪ ነገሮች ብታስተምሯቸው የበጎ አድራጎት ሥራ ይሆናል፤ እነርሱም ትጋትና ንጽሕና ናቸው። አንድ ቀናተኛ ሰው «ንጽሕና ከእግዚአብሔርን መምሰል ቀጥሎ ነው» ብሏል። በእርግጥም የንጽሕና ጕድለት ለሃይማኖት ሁሉ ነውር ነው፤ የእውነትንም መንገድ እንዲሰደብ ያደርጋል። ያለ ትጋትም ለዚህ ዓለምም ሆነ ለሚመጣው ዓለም ብቁ አይደለንም። ስለ ሁለቱም «እጅህ ለማድረግ የምታገኘውን ሁሉ በኃይልህ አድርገው።»
III. 1. ልናስብበት የሚገባው ሦስተኛው ነጥብ፦ ይህ ግዴታ በማን ሊፈጸም ይገባዋል? የሚለው ነው። መልሱ ዝግጁ ነው፦ «ዓለም ከተፈጠረበት ጊዜ ጀምሮ የተዘጋጀላቸውን» የአባታቸውን «መንግሥት ሊወርሱ» በሚመኙ ሁሉ ነው። ጌታ እንዲህ ይላልና፦ «እናንተ የአባቴ ቡሩካን፥ ኑ፤ — መንግሥትን ውረሱ፤ — ታምሜ ጠይቃችሁኛልና።» በግራው ላሉትም፦ «እናንተ ርጉማን፥ ከእኔ ሂዱ፤ — ታምሜ አልጠየቃችሁኝምና።» ይህ የሚያደርጉት ሁሉ «ቡሩካን» እንደ ሆኑና «መንግሥትን እንደሚወርሱ»፣ እንዲሁም የማያደርጉት ሁሉ «ርጉማን» እንደ ሆኑና «ወደ ዘላለም እሳት እንደሚሄዱ» በግልጽ አያመለክትምን?
2. ስለዚህ ከዘላለም እሳት ለማምለጥና የዘላለሙን መንግሥት ለመውረስ የሚመኙ ሁሉ እንደ አቅማቸው ይህን ታላቅ ግዴታ ለመፈጸም እኩል ይመለከታቸዋል። ይህ እንደ ችሎታቸው በወጣቶችና በሽማግሌዎች፣ በባለ ጠጎችና በድሆች፣ በወንዶችና በሴቶች ላይ እኩል የተጣለ ግዴታ ነው። የገዛ ነፍሳቸውን ለማዳን የሚመኙ ከሆነ፣ ባልንጀሮቻቸውን ከመርዳት ነጻ ለመሆን የሚያበቃ ያህል ወጣት የሆነ ማንም የለም። (የኑሮ መሠረታዊ አስፈላጊ ነገሮች ካልጎደሏቸው በቀር) ሊያተርፉት በሚችሉት ጊዜ ሁሉ በመከራ ላሉት የመከራ ተካፋዮቻቸው እፎይታና መጽናናት ብዙም ሆነ ጥቂት አንዳች ነገር እንዲያደርጉ የማይጠሩ ያህል ድሆች የሆኑ ማንም የሉም።
3. ነገር ግን ከኑሮ ምቾቶች በላይ ያላቸው «በአሁኑ ዘመን ባለ ጠጎች የሆኑት» በተለየ ሁኔታ በእግዚአብሔር ወደዚህ የተባረከ ሥራ ተጠርተዋል፤ በቸሩ መግቦቱም ወደ እርሱ ተጠቍመዋል። ለእንጀራችሁ የመሥራት ግዴታ በላያችሁ ስለሌለ፣ ጊዜያችሁ በገዛ እጃችሁ ነው! ስለዚህ ከእርሱ ከፊሉን በየቀኑ ለዚህ የፍቅር ድካም ልትመድቡ ትችላላችሁ። የሚቻል ከሆነ የተወሰነ ሰዓት ቢኖራችሁ እጅግ የተሻለ ነው፤ (ማንኛውም ጊዜ፣ እንደሚባለው፣ ምንም ጊዜ አይደለምና፤) ያለ አስቸኳይ ግዴታም ያንን ጊዜ ለሌላ ሥራ አለማዋል ነው። እንዲሁም በኑሮ ደረጃችሁ ከብዙዎች የተለየ ብልጫ አላችሁ። በማዕረግ ከእነርሱ ስለምትበልጡ በዚያው ምክንያት የበለጠ ተሰሚነት አላችሁ። ከእናንተ በታች ያሉት በተፈጥሮ በአንድ ዓይነት አክብሮት ቀና ብለው ይመለከቷችኋል። ልትጠይቋቸው ዝቅ ማለታችሁም ለእናንተ የሚያደላ ቅድመ ዝንባሌ ይሰጣቸዋል፤ ይህም በጥሞና እንዲሰሟችሁና የምትሉትንም በፈቃደኝነት እንዲቀበሉ ያዘነብላቸዋል። ይህን ዝንባሌ ለሥጋቸው ብቻ ሳይሆን ለነፍሳቸውም ጥቅም እስከ መጨረሻው ተጠቀሙበት። ለዕውር ዓይን፣ ለአንካሳ እግር፣ ለመበለት ባል፣ ለድሀ አደጉም አባት ስትሆኑ፣ አሁንም ከፍ ያለውን ዓላማ፣ ይኸውም ነፍሳትን ከሞት ማዳንን በፊታችሁ እንድትይዙ፣ የምትሉትንና የምታደርጉትንም ሁሉ ለዚያ ታላቅ ዓላማ እንዲያገለግል እንድትደክሙ ተጠንቀቁ።
4. «ነገር ግን ድሆች ራሳቸው በዚህ ነገር ዕድል ወይም ፈንታ አላቸውን? የታመሙትን በመጠየቅ በምንም መንገድ ይመለከታቸዋልን? ለራሳቸው የኑሮ ምቾቶችን፣ ምናልባትም መሠረታዊ አስፈላጊ ነገሮችን እንኳ በጭንቅ የሚያገኙ ለሌሎች ምን ሊሰጡ ይችላሉ?» ባይኖራቸውም እንኳ የዚህን ግዴታ መፈጸም ከሚከተለው በረከት ፈጽሞ መገለል አያስፈልጋቸውም። እነርሱም እንኳ ያንን ግሩም ደንብ ሊያስታውሱ ይችላሉ፦ «ምቾቶቻችን ለባልንጀራችን አስፈላጊ ነገሮች፣ አስፈላጊ ነገሮቻችንም ለባልንጀራችን የመጨረሻ ጭንቀት ስፍራ ይልቀቁ።» አልፎ አልፎ «ሁለት ናስ» መስጠት የማይችሉ ያህል ድሆች የሆኑ ጥቂቶች ናቸው፤ መስጠት ባይችሉ ግን፣ የሚሰጡት ገንዘብ ባይኖራቸው፣ ይበልጥ ዋጋ ያለውን ነገር ሊሰጡ አይችሉምን? አዎን፣ ከብዙ ሺህ ወርቅና ብር ይበልጥ ዋጋ ያለውን ነገር። «በናዝሬቱ በኢየሱስ ክርስቶስ ስም» ብትናገሩ፣ የምትናገሩት ቃል ለነፍስ ጤና ለአጥንትም ቅልጥም ሊሆን አይችልምን? ምንም ልትሰጧቸው አትችሉምን? አይደለም፤ የእግዚአብሔርን ጸጋ በማካፈላችሁ ይህ ዓለም ሁሉ ከሚያወጣው የበለጠ ትሰጧቸዋላችሁ። ሂድ፣ ቀጥል፣ አንተ የድሃ መምህር ድሃ ደቀ መዝሙር! በሥጋው ወራት እርሱ እንዳደረገው አድርግ! አጋጣሚ ባገኘህ ጊዜ ሁሉ መልካም እያደረግህና ለዲያብሎስ የተገዙትን ሁሉ እየፈወስህ ዙር፤ ሰንሰለቱን አራግፈው ወዲያውኑ እንዲሸሹ አበረታታቸው፤ ወደዚያ
እስረኞችን ነጻ ወደሚያወጣው፣ የብረቱንም
የባርነት ቀንበር ከአንገታቸው ወደሚሰብረው።
ከሁሉም በላይ ጸሎታችሁን ስጧቸው። ከእነርሱ ጋር ጸልዩ፤ ስለ እነርሱም ጸልዩ፤ ማን ያውቃል፣ ነፍሳቸውን በሕይወት ታድኑ ይሆናል?
5. እግሮቻችሁ በጨለማ ተራሮች ላይ ሊሰናከሉ የቀረቡ፣ ሽማግሌዎች የሆናችሁ እናንተ፣ ከዚህ ሳትሄዱና ከእንግዲህ ሳትታዩ በፊት ጥቂት ተጨማሪ መልካም ነገር ልታደርጉ አትችሉምን? እንግዲህ አስቡ፦
ብታረጁ፣ ለመኖር ጊዜው አሁን ነው፤
ከጥቂቱ ሕይወት የተሻለውን ልታደርጉ፣
የመጨረሻውንም ዕጣ በጥበብ ልታስተዳድሩ!
ብዙ ዓመታት እንደ ኖራችሁ፣ ለሌሎች የሚጠቅም እውቀት እንዳገኛችሁ ተስፋ ይደረጋል። ብዙውን ጊዜ በውድ ዋጋ በተገዛ ልምድ የሚማሩትን የሰዎችን እውቀት በእርግጥ ይበልጥ አላችሁ። በቀረላችሁ ብርታት የምትተርፏትን ጥቂት ጊዜ ከእናንተ ይበልጥ ደካሞች የሆኑትን በማገልገል ተጠቀሙባት። ሽበታችሁ ሥልጣን ከመስጠትና ለምትናገሩትም ክብደት ከመጨመር አይቀርም። ትኩረታቸውን ለማብዛት ብዙ ጊዜ እንዲህ ልትሉ ትችላላችሁ፦
ወጣት ሆይ፣ እመነኝ፤ ጭንቀትን የተማርሁ ነኝና፣
ከስድሳ ዓመታት በላይ በሆነው ሸክምም በታች እቃትታለሁ።
እናንተ ራሳችሁ ብዙ ጊዜ መከራ ተቀባዮች ነበራችሁ፤ ምናልባትም አሁንም ናችሁ። ስለዚህ እናንተም እነርሱም ወደማትመለሱበት ስፍራ ከመሄዳችሁ በፊት፣ ለነፍሳቸውም ለሥጋቸውም የምትችሉትን እርዳታ ሁሉ ይበልጥ ስጧቸው።
6. በሌላ በኩል ደግሞ ወጣቶች የሆናችሁ እናንተ ለእናንተ ብቻ የተለዩ የሚመስሉ በርካታ ብልጫዎች አሏችሁ። በአጠቃላይ የመንፈስ ሙላትና የጠባይ ሕያውነት አላችሁ፤ ይህም በእግዚአብሔር ጸጋ ሌሎች ተስፋ የሚቈርጡባቸውን ብዙ መልካም ሥራዎች ለመጀመር ፈቃደኞችና ለመፈጸም ብቁዎች ያደርጋችኋል። እንዲሁም የሥጋ ጤናና ብርታት አላችሁ፤ በዚህም የታመሙትንና ኃይል የሌላቸውን ለመርዳት በተለየ ሁኔታ ብቁዎች ናችሁ። በመንገድ ላይ ይገኛሉ ተብለው የሚጠበቁትን መስቀሎች ለማንሣትና ለመሸከም ትችላላችሁ። እንግዲህ የሥጋችሁንና የአእምሮአችሁን ኃይል ሁሉ በመከራ ያሉትን ወንድሞቻችሁን በማገልገል ሥሩበት። በእንዲህ ያለ ክቡር አገልግሎት የምትሠሩበት ኃይል ስላላችሁ እግዚአብሔርን ባርኩ፤ መዳንን የሚወርሱትን ዘወትር በማገልገል «ፈቃዱን እንደሚያደርጉ» እንደ ሰማያውያን «አገልጋዮቹ» ሁኑ።
7. «ነገር ግን ሴቶችም እንደ ወንዶች በዚህ ክቡር አገልግሎት ድርሻ ሊኖራቸው አይችልምን?» ያለ ጥርጥር ይችላሉ፤ እንዲያውም ይገባቸዋል፤ ይህ ተገቢ፣ ትክክልና የታሰሩበት ግዴታቸው ነው። በዚህ ልዩነት የለም፤ «በክርስቶስ ኢየሱስ ወንድም ሴትም የለም»። በእርግጥ ለብዙዎች «ሴቶች መታየት እንጂ መሰማት የለባቸውም» የሚለው አባባል ለረጅም ጊዜ እንደ መመሪያ ሆኖ ቆይቷል። በዚህም መሠረት ብዙዎቹ ለአስደሳች መጫወቻነት ብቻ የተዘጋጁ ይመስል በዚያ ሁኔታ ያድጋሉ! ነገር ግን ይህ ለሴቶች ክብር መስጠት ነውን? ወይስ ለእነርሱ እውነተኛ ደግነት ነውን? አይደለም፤ ይህ እጅግ ጥልቅ ጭካኔ ነው፤ የሚዘገንን ግፍ ነው፤ ፍጹም የቱርኮች አረመኔነት ነው። ማስተዋልና መንፈስ ያላት ሴት እንዴት ለዚህ ልትገዛ እንደምትችል አላውቅም። በእጃችሁ የሚቻላችሁ ሁሉ የተፈጥሮ አምላክ የሰጣችሁን መብት አጽኑ። ለዚያ አስነዋሪ ባርነት ከእንግዲህ ወዲህ አትገዙ። እናንተም እንደ ወንዶች አስተዋይ ፍጡራን ናችሁ። እናንተም እንደ እነርሱ በእግዚአብሔር መልክ ተፈጥራችኋል፤ ያለመሞትን ለመውረስ እኩል ተስፈኞች ናችሁ፤ እናንተም ጊዜ እንዳገኛችሁ «ለሰው ሁሉ መልካም» እንድታደርጉ በእግዚአብሔር ተጠርታችኋል። «ለሰማያዊው ጥሪ የማትታዘዙ» አትሁኑ። አጋጣሚ ባገኛችሁ ጊዜ ሁሉ በተለይም ለድሀውና ለታመመው ባልንጀራችሁ የምትችሉትን መልካም ሁሉ አድርጉ። ከእናንተም እያንዳንዳችሁ ደግሞ «እንደ ራሳችሁ ድካም መጠን የራሳችሁን ደመወዝ ትቀበላላችሁ»።
8. በጥንቲቱ ቤተ ክርስቲያን ለዚህ ሥራ በተለይ የተሾሙ
ሴቶች እንደ ነበሩ የታወቀ ነው። በእርግጥም ከሰማይ በታች ባለ በእያንዳንዱ የክርስቲያን ጉባኤ እንደነዚህ ያሉ አንድ ወይም ከዚያ በላይ ሴቶች ነበሩ። በዚያን ጊዜ ዲያቆናዊት ይባሉ ነበር፤ ይኸውም አገልጋዮች፣ የቤተ ክርስቲያንና የታላቁ ጌታዋ አገልጋዮች ማለት ነው። ፌቤን እንዲህ ያለች ነበረች፤ (ቅዱስ ጳውሎስ የጠቀሳት፣ ሮሜ 16:1፣) «በክንክራኦስ ባለች ቤተ ክርስቲያን አገልጋይ»። እውነት ነው፣ ከእነዚህ አብዛኞቹ በዕድሜ የገፉና በእግዚአብሔር ሥራ ብዙ ልምድ ያላቸው ሴቶች ነበሩ። ነገር ግን ወጣቶቹ ከዚያ አገልግሎት ፈጽሞ ተገልለው ነበርን? አይደለም፤ ያመኑትን የሚያውቁ ከሆኑና በኑሮአቸው ሁሉ ቅዱሳን በመሆን የልብ ቅዱሳን እንደ ሆኑ ካሳዩ መገለል አያስፈልጋቸውም። የአቶ ሎው ሚራንዳ፣ ከሥዕሏ ጋር የምትስማማ ከሆነች፣ እንደዚህ ያለች ዲያቆናዊት ነበረች። ሴት፣ ያውም ወጣት ሴት በመሆኗ የታመሙትንና ድሆችን መጠየቋንና መርዳቷን የሚቃወም ይኖራልን? ወጣቶች ከሆናችሁት አንዳችሁ የእርሷን ፈለግ ለመከተል ትመኛላችሁን? ደስ የሚያሰኝ መልክ፣ ተወዳጅ አቀራረብ አላችሁን? ለእግዚአብሔር ፈጽማችሁ የተሰጣችሁ ከሆናችሁ ይህ የበለጠ መልካም ነው። ዓይናችሁ ጤናማ ብትሆን ቃላችሁ ይበልጥ ጠልቆ እንዲወጋ እነዚህን ይጠቀምባቸዋል። ሌሎችን ስታገለግሉም ስንት በረከት ወደ ገዛ እቅፋችሁ ሊመለስ ይችላል! በዚህም ተፈጥሮአዊ ዋዘኝነታችሁ ሊጠፋ፣ ለከንቱ ነገሮች ያላችሁ ፍቅር ሊፈወስ፣ የተሳሳቱ ጠባዮቻችሁ ሊታረሙ፣ ክፉ ልማዶቻችሁም ተነቅለው እስኪወጡ ድረስ ሊደክሙ ይችላሉ፤ በሚመጣውም የሕይወታችሁ ሁኔታ ሁሉ የመድኃኒታችንን የእግዚአብሔርን ትምህርት ለማስጌጥ ትዘጋጃላችሁ። ብቻ ከሌላው ፆታ ጋር ብትጠይቁ ወይም ብትነጋገሩ፣ በአንዱ ወገን ወይም በሌላው ፍቅራችሁ እንዳይጠላለፍና በዚህም በበረከት ፈንታ መርገምን እንዳታገኙ እጅግ ተጠንቀቁ።
9. እንግዲህ ይህ ባለ ጠጎችና ድሆች፣ ወጣቶችና ሽማግሌዎች፣ ወንዶችና ሴቶች የተጠራንበት ግዴታ በመሆኑ፣ (ወላጆችም ልጆቻቸውን ጸሎታቸውን በመጸለይና ወደ ቤተ ክርስቲያን በመሄድ እንደሚያሠለጥኗቸው በዚህም ቢያሠለጥኗቸው መልካም ነበር፣) ሁላችንም ማለት ይቻላል በአጠቃላይ ስምምነት እንደሚመስል ቸል ያልነው ያለፈው ጊዜ ይበቃናል። ኦ፣ እያንዳንዳችን «ጌታ ሆይ፣ የቸልታ ኃጢአቶቼን ይቅር በለኝ!» ማለት እንዴት ያስፈልገናል! እንግዲህ በእግዚአብሔር ስም ከዛሬ ጀምሮ በአጠቃላይ ስምምነት እንጀምረው። እለምናችኋለሁም፣ ይህ በወኪል ልትፈጽሙት የማትችሉት ግዴታ እንደ ሆነ ከአእምሮአችሁ ፈጽሞ አይውጣ፤ ከአንድ ሁኔታ ብቻ በቀር፣ — በገዛ ሕመማችሁ ወይም ድካማችሁ ካልተሳናችሁ በቀር። በዚያ ሁኔታ ብቻ አለዚያ ልትሰጡ የምትችሉትን እርዳታ መላክ ይበቃል። ውድ ወንድሞቼ፣ ጀምሩ፣ አሁኑኑ ጀምሩ፤ አለዚያ አሁን የሚሰማችሁ ስሜት ይጠፋል፤ ምናልባትም ተመልሶ ላይመጣ ይችላል! ታዲያ ውጤቱ ምን ይሆናል? «እናንተ የአባቴ ቡሩካን፥ ኑ! — ታምሜ ጠይቃችሁኛልና» የሚለውን ቃል ከመስማት ይልቅ፣ «እናንተ ርጉማን፥ ከእኔ ሂዱ! — ታምሜ አልጠየቃችሁኝምና!» የሚለውን አስፈሪ ፍርድ ልትሰሙ ግድ ይሆንባችኋል።