ምዕራፍ 97 · 14 ደቂቃ ንባብ · 18 ደቂቃ ማዳመጥ
ለወላጆች ስለ መታዘዝ
ስብከት 96
ለወላጆች ስለ መታዘዝ
«ልጆች ሆይ፥ በሁሉ ለወላጆቻችሁ ታዘዙ።»
ቆላስይስ 3:20
1. በሰው አእምሮ ውስጥ ከተፈጥሮ ጋር የተወለዱ መሠረታውያን እውነቶች አሉን የሚለው ጥያቄ ለብዙ ዓመታት የክርክር ርዕስ ሆኖ ቆይቷል። ነገር ግን በነፍስ ውስጥ በተፈጥሮ የተተከሉ ተግባራዊ መሠረታውያን እውነቶች ካሉ፣ «ወላጆቻችንን ልናከብር ይገባናል» የሚለው ከሌሎቹ ሁሉ በፊት ማለት ይቻላል ይህ ስያሜ እንደሚገባው በሁሉም ወገን ዘንድ የታመነ ነው። እጅግ ጥንታውያን ደራስያን ከእነዚያ ሁሉን አቀፍ መሠረታውያን እውነቶች መካከል ቈጥረውታል፤ እጅግ አረመኔ በሆኑ ሕዝቦች መካከል በሚኖሩ ኋላቀሮች ዘንድ እንኳ እንደሚገኝ ጥርጥር የለውም። በአውሮፓና በእስያ ስፋት ሁሉ፣ በአፍሪካ በረሓዎችና በአሜሪካ ጫካዎች ውስጥ ልንከታተለው እንችላለን። በሠለጠኑ ሕዝቦች ዘንድ ደግሞ ያነሰ ሳይሆን የበለጠ ጎልቶ ይታያል። መጀመሪያ ለብዙ ዘመናት የመንግሥት፣ የትምህርትና የጨዋነት እንዲሁም የሃይማኖት መቀመጫ በነበሩት በምሥራቅ የዓለም ክፍሎች እንዲሁ ነበር። ከዚያም በኋላ በግሪክ መንግሥታት ሁሉና በመላው የሮማ ግዛት እንዲሁ ነበር። በዚህ ረገድ፣ የተጻፈ «ሕግ የሌላቸው» ሰዎች «ለራሳቸው ሕግ» እንደ ሆኑና «በልባቸው የተጻፈውን የሕግ ሥራ»፣ ማለትም የሕጉን ፍሬ ነገር፣ «እንደሚያሳዩ» ግልጽ ነው።
2. እግዚአብሔርም ፈቃዱን ለሰው በገለጠበት ስፍራ ሁሉ ይህ ሕግ የዚያ መገለጥ ክፍል ሆኖአል። በዚያም እንደ ገና ተገልጦአል፣ እጅግ ሰፍቶአል፣ በብርቱም ሁኔታ ጸንቶአል። በአይሁድ መገለጥ ይህን ሕግ በግልጽ የሚጥሱ በሞት ይቀጡ ነበር። ቡሩክ ጌታችንም ሊሽረው ሳይሆን ሊፈጽመው ከመጣባቸው ሕጎች አንዱ ይህ ነበር። ስለዚህም ጸሐፍትንና ፈሪሳውያንን በወጋቸው ስለ ሻሩት በብርቱ ገሠጻቸው፤ ግዴታውም ለዘመናት ሁሉ የሚዘልቅ መሆኑን በግልጽ አሳየ። ቅዱስ ጳውሎስ ለኤፌሶን ሰዎች (ኤፌሶን 6:1)፦ «ልጆች ሆይ፥ ለወላጆቻችሁ በጌታ ታዘዙ» ብሎ፣ ደግሞም ለቆላስይስ ሰዎች፦ «ልጆች ሆይ፥ በሁሉ ለወላጆቻችሁ ታዘዙ» (ቆላስይስ 3:20) ብሎ የሚያስተላልፈው የዚሁ ሕግ ፍሬ ነገር ነው።
3. ሐዋርያው ይህን ግዴታ በሦስት እጥፍ ማበረታቻ እንደሚያጸናው ልብ ማለት ይገባል። አንደኛ፦ ለኤፌሶን ሰዎች «ይህ የሚገባ ነውና» ብሎ ይጨምራል፤ የምሕረት ብቻ ሳይሆን የፍትሕም ምሳሌ ነው። ከሚገባቸው አያልፍም፤ ከእነርሱ ስለ ተቀበልነው ሕልውናችን ራሱ ልንከፍላቸው የሚገባን ዕዳ ነው። ሁለተኛ፦ «ይህ ለጌታ ደስ የሚያሰኝ ነውና»፤ ለሥጋችን አባቶች ክብርና መታዘዝ ብንሰጥ ለታላቁ የሰዎችና የመላእክት አባት በተለየ ሁኔታ ደስ የሚያሰኝ ነው። ሦስተኛ፦ «የተስፋ ቃል ያለባት ፊተኛይቱ ትእዛዝ» ናት፤ በመፈጸምዋ ልዩ ተስፋ የተያያዘባት የመጀመሪያዋ ትእዛዝ ናት፤ ይኸውም፦ «መልካም እንዲሆንልህ፥ አምላክህ እግዚአብሔር በሚሰጥህ ምድር ዕድሜህ እንዲረዝም» የሚል ነው። ይህ ተስፋ ከረጅም ዕድሜ ጋር ጤንነትንና ምድራዊ በረከቶችንም እንደሚያጠቃልል በአብዛኛው ተረድተውታል። ይህም ለአይሁድ ሥርዓት ብቻ ሳይሆን ለክርስቲያኖች ሥርዓትም እንደሚመለከት ቍጥር የሌላቸው ማስረጃዎችን አይተናል፤ የመፈጸሙም ብዙ አስደናቂ ምሳሌዎች እስከ ዛሬ ድረስ ይገኛሉ።
ነገር ግን «ልጆች ሆይ፥ በሁሉ ለወላጆቻችሁ ታዘዙ» የሚለው ቃል ትርጓሜው ምንድር ነው? በእግዚአብሔር ርዳታ፣ በመጀመሪያ ልገልጠው፣ ከዚያም በእናንተ ላይ ልተገብረው እጥራለሁ።
I. 1. በመጀመሪያ፣ እነዚህን ቃላት ልገልጥ እጥራለሁ፤ ይህንም የማደርገው በተለይ የሚረዱአቸው ሰዎች እጅግ ጥቂቶች ስለሚመስሉ ነው። ዓለምን ዙሪያውን ተመልከቱ፤ የአሕዛብን ሳይሆን የክርስቲያንን ዓለም፣ እንዲያውም የተሐድሶውን ክፍል ተመልከቱ፤ መጻሕፍትን በራሳቸው ቋንቋ ከያዙት መካከል ተመልከቱ፤ ስለዚህ ነገር እንኳ የሰማ የሚመስል ማን አለ? እዚህም እዚያም አንድ ልጅ ከፍርሃት ወይም ምናልባት ከተፈጥሮ ፍቅር የተነሣ ወላጁን ይታዘዛል። ነገር ግን በእግዚአብሔር ፊት ካለባቸው ግዴታ የተነሣ አባቶቻቸውንና እናቶቻቸውን የሚታዘዙ ስንት ልጆች ታገኛላችሁ? ይህንስ ግዴታ በልጆቻቸው ልብ ውስጥ እንደሚገባ የሚያስጨብጡ ስንት ወላጆች ታገኛላችሁ? ከወላጆችም ከልጆችም እጅግ አብዛኞቹ ስለ ጉዳዩ ሁሉ ፈጽሞ የማያውቁ ይመስለኛል። ስለ እነዚህ ስል በተቻለኝ መጠን ግልጽ አደርገዋለሁ፤ ቢሆንም ለመረዳት ፈቃደኞች ያልሆኑት ግሪክ ወይም ዕብራይስጥ ብናገር ከሚረዱት አብልጠው የምናገረውን እንደማይረዱት በሚገባ አውቃለሁ።
2. ሐዋርያው ወላጆች ሲል አባቶችንም እናቶችንም ማለቱ እንደ ሆነ በቀላሉ ትገነዘባላችሁ፤ ሁለቱንም ወደሚጠቅሰው ወደ አምስተኛው ትእዛዝ ይመራናልና። የሰው ሕጎች በዚህ ረገድ ቢለያዩም፣ የእግዚአብሔር ሕግ ልዩነት አያደርግም፤ ነገር ግን ሁለቱንም እንድንታዘዝ አንድ ዓይነት ግዴታ ይጥልብናል።
3. ነገር ግን ወላጆቻችንን እንዴት እንደምንታዘዝ ከመመልከታችን በፊት፣ እስከ መቼ እንታዘዛቸዋለን ብሎ መጠየቅ ይቻላል። ልጆች የሚታዘዙት ብቻቸውን መሮጥ እስኪችሉ፣ ትምህርት ቤት እስኪገቡ፣ ማንበብና መጻፍ እስኪችሉ፣ ወይም የወላጆቻቸውን ያህል እስኪረዝሙ፣ ወይም የማስተዋል ዕድሜ እስኪደርሱ ብቻ ነውን? ይልቁንም የሚታዘዙት [ሌላ ምርጫ ስለሌላቸው ብቻ፣] መደብደብን ስለሚፈሩ ብቻ፣ ወይም ያለዚያ ምግብና ልብስ ማግኘት ስለማይችሉ ብቻ ከሆነ፣ እንዲህ ያለው መታዘዝ ምን ይጠቅማል? ያለ እነርሱ መኖር በሚችሉበት ጊዜ፣ ከእነርሱም ምንም ተስፋ በማያደርጉበትና ምንም በማይፈሩበት ጊዜ ወላጆቻቸውን የሚታዘዙ ብቻ ከእግዚአብሔር ምስጋናን ያገኛሉ።
4. «ነገር ግን ለአካለ መጠን የደረሰ ወንድ ወይም ያገባች ሴት ከዚያ በኋላም ወላጆቻቸውን የመታዘዝ ግዴታ አለባቸውን?» ጋብቻን በተመለከተ፣ ወንድ አባቱንና እናቱን ትቶ ከሚስቱ ጋር መተባበር እንዳለበት፣ በዚያው አመክንዮም ሴት አባቷንና እናቷን ትታ ከባሏ ጋር መተባበር እንዳለባት እውነት ቢሆንም (ከዚህም የተነሣ የትዳር ግዴታ የልጅነትን ግዴታ [ቦታ] የሚወስድባቸው አንዳንድ ልዩ ሁኔታዎች ሊኖሩ ይችላሉ)፣ ጋብቻ አጠቃላዩን የልጅነት ግዴታ እንደሚሽር ወይም እንደሚያቃልል ከመጽሐፍም ከአመክንዮም ልማር አልቻልሁም። ሀያ አንድ ዓመት በመኖራችን ምክንያት መሻሩ ወይም መቅለሉ ደግሞ ይልቁን አይታይም። እኔ በራሴ ጉዳይ እንዲህ ተረድቼው አላውቅም። ከሠላሳ ዓመት በላይ በኖርሁ ጊዜ፣ አሥር ዓመት ልጅ ሳለሁ ከአባቴ ጋር በነበረኝ ዝምድና ልክ እንደዚያው እንደ ቆምሁ ራሴን እቈጥር ነበር። በአርባና በሃምሳ ዓመት መካከል በነበርሁ ጊዜም፣ ተገቢ በሆነው ነገር ሁሉ እናቴን ለመታዘዝ፣ የሕፃናት መራመጃ ገመድ [ወይም የተንጠለጠለ እጅጌ ያለው ካፖርት] በለበስሁበት ጊዜ እንደነበረብኝ ያህል ፈጽሞ የተገደድሁ እንደ ሆንሁ እቈጥር ነበር።
5. ነገር ግን «ልጆች ሆይ፥ በሁሉ ለወላጆቻችሁ ታዘዙ» በሚለው ውስጥ የተካተተው ምንድር ነው? በእርግጥ የመታዘዝ የመጀመሪያው ነጥብ፣ ታላቅም ይሁን ታናሽ፣ አባታችሁ ወይም እናታችሁ የሚከለክሉትን ምንም አለማድረግ ነው። የወላጅ ክልከላ ሕሊና ያለውን ልጅ ሁሉ እንደሚያስር ከዚህ የበለጠ ግልጽ ነገር የለም፤ ይህም የተከለከለው ነገር በእግዚአብሔር በግልጽ የታዘዘ ካልሆነ በቀር ነው። ይህም ብቻ አይደለም፤ ጉዳዩን ጥቂት ወደ ፊት ማራመድ ይቻላል፦ ርኅሩኅ ወላጅ በግልጽ ሊከለክለው የማይፈልገውን ነገር ፈጽሞ ላይወደው ይችላል። በዚህ ጊዜ የልጁ ግዴታ ምንድር ነው? ያ አለመውደድ እስከ ምን ድረስ መከበር አለበት? ከክልከላ ጋር እኩል ቢሆንም ባይሆንም፣ ነውር የሌለባት ሕሊና እንዲኖረው የሚወድ ሰው ያለ ጥርጥር በአስተማማኙ ወገን ሊቆምና ምናልባት ክፉ ሊሆን የሚችለውን ሊርቅ ይገባዋል። ወላጆቻችሁ እንደማይወዱት የምታውቁትን ምንም አለማድረግ በእርግጥ ከሁሉ የሚበልጥ መንገድ ነው። በሌላ መንገድ ማድረግ ርኅሩኅ ሕሊና ያለው ሰው ሊርቀው የሚወደውን የአለመታዘዝ ደረጃ የሚያመለክት ይመስላል።
6. በዚህ ትእዛዝ ውስጥ የተካተተው ሁለተኛው ነገር፦ የእግዚአብሔርን ትእዛዝ የሚቃረን እስካልሆነ ድረስ፣ ታላቅም ይሁን ታናሽ፣ አባታችሁ ወይም እናታችሁ የሚያዙትን ሁሉ አድርጉ የሚለው ነው። በዚህም እግዚአብሔር ሉዓላውያን ነገሥታት እንኳ የሌላቸውን ሥልጣን ለወላጆች ሰጥቶአል። ለምሳሌ የእንግሊዝ ንጉሥ ሉዓላዊ ገዥ ነው፤ ነገር ግን የአገሩ ሕግ እንዳደርገው ካላዘዘኝ በቀር ትንሿን ነገር እንኳ እንዳደርግ ሊያዝዘኝ ሥልጣን የለውም፤ ሕጉን ከማስፈጸም በቀር ሥልጣን የለውምና። የንጉሡ ፈቃድ ለተገዢው ሕግ አይደለም። የወላጅ ፈቃድ ግን ለልጁ ሕግ ነው፤ ልጁም የእግዚአብሔርን ሕግ የሚቃረን ካልሆነ በቀር ለዚያ ፈቃድ ሊገዛ በሕሊናው የታሰረ ነው።
7. የመናፍስት አባት ይህን ትእዛዝ የሰጠው በሚደነቅ ጥበብ ነው፤ ይኸውም ልጆች የራሳቸው ኃይልና ማስተዋል እስኪኖራቸው ድረስ የወላጆች ኃይል የልጆቻቸውን የኃይል ጕድለት፣ የወላጆችም ማስተዋል የማስተዋል ጕድለታቸውን እንደሚሞላ፣ እንዲሁ ራሳቸውን ለመምራት ጥበብና ልምድ እስኪያገኙ ድረስ የወላጆች ፈቃድ የልጆቻቸውን ፈቃድ ሊመራ [ይገባዋል] ዘንድ ነው። ስለዚህ ልጆች ሊማሩት የሚገባቸው የመጀመሪያው ነገር ይህ ነው፦ — ወላጆቻቸውን መታዘዝ፣ በሁሉም ለፈቃዳቸው መገዛት እንዳለባቸው። ምክንያቱን ከመረዳታቸው ከረጅም ጊዜ በፊት፣ እንዲያውም የሃይማኖትን መሠረታውያን እውነቶች ማናቸውንም መረዳት ከመቻላቸው ከረጅም ጊዜ በፊት በዚህ ሊለማመዱ ይችላሉ። ስለዚህም ቅዱስ ጳውሎስ ወላጆችን ሁሉ ልጆቻቸውን «በጌታ ምክርና በተግሣጽ» እንዲያሳድጉአቸው ያዝዛል። ፈቃዳቸው በገና ሕፃንነታቸው እንኳ በተገቢ ተግሣጽ ሊሰበር ይችላልና፤ ትምህርትን ለመቀበል የሚችሉት ግን ከዚያ ብዙ ጊዜ በኋላ ነው። ስለዚህ ከሁሉ የመጀመሪያው ነጥብ ይህ ነው፦ ከአእምሮአቸው የመጀመሪያ ንጋት ጀምሮ ፈቃዳቸውን አጐንብሱ፤ ለፈቃዳችሁም እንዲገዙ በማለማመድ በሰማያት ለሚኖር አባታቸው ፈቃድ እንዲገዙ አዘጋጁአቸው።
8. ነገር ግን የስድስት ወይም የስምንት ዓመት ልጆች እንኳ ቢሆኑ ስለዚህ ምንም የሚያውቁ እንዴት ጥቂቶችን እናገኛለን! በእርግጥም የሚያስተምራቸው ከሌለ እንዴት ሊረዱት ይችላሉ? ወላጆቻቸው፣ አባትም እናትም፣ ስለ ጉዳዩ እንደ እነርሱ ፈጽሞ የማያውቁ አይደሉምን? ሃይማኖተኛ ከሆኑ ሰዎች መካከል እንኳ ስለዚህ ትንሽ ግንዛቤ ያለው ማንን ታገኛላችሁ? የዚህንስ ማስረጃ በገዛ ዓይናችሁ አላያችሁምን? አባት ወይም እናት «ልጄ ሆይ፥ ይህን ወይም ያን አድርግ» ባሉ ጊዜ በዚያ አልተገኛችሁምን? ልጁ ያለ ምንም ይሉኝታ ቁርጥ አድርጎ «አላደርግም» ብሎ መለሰ። ወላጁም ምንም ሳያስተውል በዝምታ ያልፈዋል። እርሱ ወይም እርሷስ በዚህ ጨካኝ ማቀማጠል ልጃቸውን በወላጆቹ ላይ በግልጽ በማመፅ በእግዚአብሔር ላይ ለማመፅ እያሠለጠኑት እንደ ሆነ አያዩምን? ስለዚህም «ለሰይጣንና ለመላእክቱ ወደ ተዘጋጀ ወደ ዘላለም እሳት» እያሠለጠኑት ነው! ይህን በሚገባ ቢያስቡ ኖሮ የተሻለ ትምህርት እስኪያስተምሩትና ያን ዲያብሎሳዊ መልስ ዳግመኛ ከመስጠት ፈጽሞ እንዲፈራ እስኪያደርጉት ድረስ አይበሉም፣ አይጠጡም፣ አይተኙምም ነበር።
9. እናንተ እግዚአብሔርን የምትፈሩ ወላጆች ሆይ፥ ይህን ጉዳይ ከእናንተ ጋር ጥቂት ወደ ፊት ልመርምር። እግዚአብሔርን የምትፈሩ ከሆናችሁ፣ ዕድሜው ከአንድ ዓመት በላይ የሆነ ልጅ የከለከላችሁትን «አደርጋለሁ»፣ ወይም ያዘዛችሁትን «አላደርግም» እንዲልና ሳይቀጣ እንዲያልፍ እንዴት ለመፍቀድ ትደፍራላችሁ? ዳግመኛ እንዲህ ለማለት እንዳይደፍር ወዲያውኑ ለምን አታቆሙትም? ለልጃችሁ አንጀት፣ ምንም ርኅራኄ የላችሁምን? ስለ መዳኑ ወይም ስለ ጥፋቱ ምንም ግድ የላችሁምን? በፊታችሁ ቢረግም ወይም ቢምል ምንም ሳታስተውሉ ትተዉታላችሁን? አለመታዘዝ እንደ መርገምና እንደ መማል እርግጠኛ የኩነኔ መንገድ ነው። አቁሙት፤ በእግዚአብሔር ስም ከመጀመሪያው አቁሙት። «በትርን ቈጥባችሁ ልጁን አታበላሹ።» የነብር ልብ ከሌላችሁ በቀር ልጃችሁን ለገዛ ፈቃዱ፣ ማለትም ለዲያብሎስ፣ አሳልፋችሁ አትስጡት። ለእናንተ ሕመም ቢሆንባችሁም፣ ዘራችሁን ከአንበሳው ጥርስ ንጠቁት። እንዳይጠፉ እንዲገዙ አድርጉአቸው። ነፍሳቸውን ታድኑ ዘንድ ፈቃዳቸውን ስበሩ።
10. ይህን ነጥብ በበቂ ሁኔታ እንዴት እንደማጸናው አላውቅም። በአእምሮአችሁ ይበልጥ እንዲጸና፣ ከጥቂት ዓመታት በፊት በዚሁ ጉዳይ ላይ ታትሞ ከነበረ ደብዳቤ ጥቂቱን እንድጨምር ፍቀዱልኝ፦ —
«የልጆችን አእምሮ ለመቅረጽ መጀመሪያ መደረግ ያለበት ፈቃዳቸውን ማሸነፍ ነው። ማስተዋላቸውን ማስተማር ጊዜ የሚወስድ ሥራ ነው፤ በዝግታም ደረጃ በደረጃ መሄድ አለበት፤ ፈቃድን ማስገዛት ግን በአንድ ጊዜ መደረግ ያለበት ነገር ነው፤ በቶሎ በተደረገም መጠን የተሻለ ነው። በጊዜው ማረምን ቸል በማለታችን የተነሣ ልጆቹ እምብዛም ሊሸነፍ የማይችል እልኸኝነት ያዳብራሉ፤ ለልጆቹ እንደሚያሠቃይ ለእኛም የሚያሠቃይ ጽኑ ቅጣት ሳንጠቀምም ፈጽሞ አይሸነፍም። ስለዚህ ቸሮችና የሚያቀማጥሉ ተብለው የሚታሰቡትን፣ ኋላ መሰበር እንዳለባቸው እያወቁ ልጆቻቸው ልማዶችን እንዲያዳብሩ የሚፈቅዱትን ወላጆች ጨካኞች እላቸዋለሁ።
«የልጆችን ፈቃድ በጊዜ ማሸነፍ ላይ አጥብቄ እሟገታለሁ፤ ምክንያቱም ለሃይማኖታዊ አስተዳደግ ብቸኛው መሠረት ይህ ነው። ይህ በሚገባ ሲደረግ፣ ልጁ የራሱ ማስተዋል እስኪበስል ድረስ በወላጁ አመክንዮ ሊመራ ይችላል።
«ይህን ጉዳይ ገና ልተወው አልችልም። የገዛ ፈቃድ የኃጢአትና የመከራ ሁሉ ሥር እንደ ሆነ፣ እንዲሁ በልጆች ውስጥ ይህን የሚያሳድግ ማንኛውም ነገር የኋላ ጐስቋላነታቸውንና ሃይማኖት አልባነታቸውን ያረጋግጣል፤ የሚገታውና የሚገድለው ማንኛውም ነገር ደግሞ የወደፊት ደስታቸውንና እግዚአብሔርን መምሰላቸውን ያሳድጋል። ሃይማኖት የራሳችንን ሳይሆን የእግዚአብሔርን ፈቃድ ከማድረግ በቀር ሌላ ምንም እንዳልሆነ፣ የገዛ ፈቃድም ለጊዜያዊና ለዘላለማዊ ደስታችን ታላቅ እንቅፋት በመሆኑ ለእርሱ የሚደረግ ማንኛውም ማቀማጠል ቀላል ነገር እንደማይሆን፣ እርሱን መካድም ፈጽሞ ከንቱ እንደማይሆን ብናስብ ይህ ይበልጥ ግልጽ ይሆናል። መንግሥተ ሰማያት ወይም ሲኦል በዚህ ብቻ ላይ የተመሠረተ ነው። ስለዚህ በልጆቹ ውስጥ ይህን ለማስገዛት የሚተጋ ወላጅ ነፍስን በማዳን ከእግዚአብሔር ጋር አብሮ ይሠራል። የሚያቀማጥለው ወላጅ ግን የዲያብሎስን ሥራ ይሠራል፤ ሃይማኖትን የማይቻል፣ መዳንንም የማይደረስበት ያደርጋል፤ ልጁንም ነፍሱንና ሥጋውን ለዘላለም ለማስኰነን በእርሱ ዘንድ ያለውን ሁሉ ያደርጋል!
«ስለዚህ ይህን አጥብቄ ከመድገም ልቆጠብ አልችልም፦ — ፈቃዳቸውን በጊዜ ስበሩ፤ ብቻቸውን መሮጥ ከመቻላቸው በፊት፣ አጥርተው መናገር ከመቻላቸው በፊት፣ ምናልባትም ጭራሽ መናገር ከመቻላቸው በፊት ይህን ታላቅ ሥራ ጀምሩ። ምንም ያህል ድካም ቢያስከፍል፣ እልኸኝነታቸውን አሸንፉ፤ ልጁን ማስኰነን ካልፈለጋችሁ ፈቃዱን ስበሩ። ይህን ቸል እንዳትሉ፣ እንዳታዘገዩትም አጥብቄ እለምናችኋለሁ! ስለዚህ (1.) ልጅ ከአንድ ዓመቱ ጀምሮ በትርን እንዲፈራና በለስላሳ እንዲያለቅስ ይማር። ለዚህም (2.) የሚያለቅስለትን ምንም ነገር አያግኝ፤ ታላቅም ይሁን ታናሽ፣ ፈጽሞ ምንም ነገር አያግኝ፤ ያለዚያ የገዛ ሥራችሁን ታፈርሳላችሁ። (3.) በማንኛውም ሁኔታ፣ ከዚያ ዕድሜ ጀምሮ፣ ይህን ለማስፈጸም አሥር ጊዜ በተከታታይ ብትገርፉት እንኳ፣ እንደ ታዘዘው እንዲያደርግ አድርጉት። ይህን ማድረግ ጭካኔ ነው ብሎ ማንም አያሳምናችሁ፤ ጭካኔው አለማድረጉ ነው። ፈቃዱን አሁን ስበሩ፤ ነፍሱም በሕይወት ትኖራለች፤ ምናልባትም ለዘላለም ይባርካችኋል።»
11. በተቃራኒው ደግሞ ለልጆች የገዛ ፈቃዳቸውን የምትሰጥና ከሕፃንነታቸው ጀምሮ አንገታቸውን የማታጐነብስ ያቺ የተረገመች ቸርነት የምታስከትለው ውጤት እንዴት የሚያስፈራ ነው! ብዙ ሃይማኖተኛ ወላጆች ምንም ሃይማኖት የሌላቸውን ልጆች የሚያሳድጉት በዋነኛነት በዚህ ምክንያት ነው፤ ባደጉ ጊዜ ለወላጆቻቸው ምንም ግድ የሌላቸው፣ ምናልባትም የሚንቁአቸውና ዓይኖቻቸውን ለማውጣት የተዘጋጁ ልጆች ናቸው! ይህ ለምን ሆነ? ፈቃዳቸው ከመጀመሪያው ስላልተሰበረ አይደለምን? — በሁሉ ወላጆቻቸውን እንዲታዘዙና ለእግዚአብሔር ፈቃድ እንደሚገዙ ለፈቃዳቸው እንዲገዙ ከገና ሕፃንነታቸው ጀምሮ ስላልተለማመዱ አይደለምን? — የወላጆቻቸው ፈቃድ ለእነርሱ የእግዚአብሔር ፈቃድ እንደ ሆነ፣ እርሱንም መቃወም በእግዚአብሔር ላይ ማመፅና ለኃጢአተኝነት ሁሉ በር መክፈት እንደ ሆነ ከአእምሮአቸው የመጀመሪያ ንጋት ጀምሮ ስላልተማሩ አይደለምን?
II. 1. ለጥቅሱ ማብራሪያ ይህ ይበቃል፤ ወደ አተገባበሩ እቀጥላለሁ። በመጀመሪያም ወላጆች ለሆናችሁ፣ በዚህም ልጆቻችሁን የማስተማር ኃላፊነት ላለባችሁ፣ ልናገር ፍቀዱልኝ። እነዚህን ነገሮች እናንተ ራሳችሁ ታውቃላችሁን? እናንተ በእነዚህ አስፈላጊ እውነቶች በሚገባ አምናችኋልን? በልባችሁስ ይዛችኋቸዋልን? ከገዛ ልጆቻችሁስ ጋር በተግባር አውላችኋቸዋልን? ትምህርትን መቀበል ከመቻላቸው በፊት በተግሣጽ አለማምዳችኋቸዋልን? ከገና ሕፃንነታቸው ጀምሮ ፈቃዳቸውን ሰብራችኋልን? ተፈጥሮንም ልማድንም በመቃወም አሁንም እንዲሁ ማድረጋችሁን ቀጥላችኋልን? ማስተዋላቸው መከፈት እንደ ጀመረ ይህን የምታደርጉበትን ምክንያት ገልጣችሁላቸዋልን? የእግዚአብሔርን ፈቃድ ለማስተዋል ችሎታ ያለው ፍጥረት ሁሉ ብቸኛ ሕግ አድርጋችሁ አመልክታችኋቸዋልን? በሁሉ እንዲታዘዙአችሁ የእግዚአብሔር ፈቃድ እንደ ሆነስ አሳይታችኋቸዋልን? ፈጽመው እስኪረዱት ድረስ ይህን ደጋግማችሁ ታስጨብጡአቸዋላችሁን? ወይ፣ በዚህ የፍቅር ድካም ፈጽሞ አትታክቱ! ድካማችሁም ሁልጊዜ ከንቱ አይሆንም።
2. ቢያንስ ስለ አለመታዘዛቸው በመሸለም አለመታዘዝን አታስተምሩአቸው። አስታውሱ! ስላለቀሱ ብቻ አንዳች ነገር በሰጣችኋቸው ቍጥር ይህን ታደርጋላችሁ። በዚህም ረገድ ፈጣን ተማሪዎች ናቸው፤ ስለ ማልቀሳቸው ብትሸልሙአቸው እንደ ገና በእርግጥ ያለቅሳሉ። ስለዚህ የሚያለቅሱለትን ምንም ነገር እንዳትሰጡአቸው ቅዱስ ደንብ ካላደረጋችሁት በቀር መጨረሻ የለውም። ይህን ለማድረግ አጭሩ መንገድ ደግሞ ጮኸው እንዲያለቅሱ ፈጽሞ አለመፍቀድ ነው። በዚህ በአንድ ነገር መታዘዝን አለማምዱአቸው፤ በሌሎቹም እንዲታዘዙ በቀላሉ ታመጡአቸዋላችሁ። ዛሬውኑ ለምን አትጀምሩም? ከሁሉ የሚበልጠው መንገድ የትኛው እንደ ሆነ በእርግጥ ታያላችሁ፤ ለልጃችሁም ለገዛ ነፍሳችሁም የሚሻለው እርሱ ነው። ታዲያ ለምን አትታዘዙም? ፈሪ ስለ ሆናችሁ ነው፤ ቁርጠኝነት ስለሚጎድላችሁ ነው። ይህም [ለመጀመርና በዚህ ለመጽናት ትንሽ ያልሆነ ቁርጠኝነት እንደሚጠይቅ ጥርጥር የለውም፤ በእርግጥም] ተፈጥሮ ከሰጠው ሁሉ የሚበልጥ ትንሽ ያልሆነ ትዕግሥት ይጠይቃል። ነገር ግን የእግዚአብሔር ጸጋ ይበቃችኋል፤ ኃይልን በሚሰጣችሁ በክርስቶስ ሁሉን ትችላላችሁ። ይህ ጸጋ ቁርጠኝነትን ብቻ ሳይሆን ትጋትንም ሊሰጣችሁ ይበቃል፤ ያለዚያ ስንፍና እንደ ፈሪነት ታላቅ እንቅፋት ይሆናል። ያለ ብዙ ድካም ልታሸንፉ አትችሉምና፤ በታከተ እጅ ምንም ሊደረግ አይችልም፤ ድከሙ፤ ፈጽሞ አትታክቱ፤ ትዕግሥት ሥራውን እስኪፈጽም ድረስ ሥርዓት በሥርዓት ላይ ጨምሩ።
3. ነገር ግን እንደ ስንፍና ወይም እንደ ፈሪነት ለማሸነፍ የሚከብድ ሌላ እንቅፋት አለ። እርሱም ማቀማጠል ይባላል፤ ብዙውን ጊዜም ፍቅር ተብሎ ይሳሳታል፤ ነገር ግን ወይ፣ ከፍቅር ምንኛ የራቀ ነው! እውነተኛ ጥላቻ ነው፤ ሥጋንም ነፍስንም በገሃነም ወደ ማጥፋት የሚያዘነብል እጅግ ጐጂ የሆነ ጥላቻ ነው! ወይ፣ ከእንግዲህ ለእርሱ ቦታ አትስጡ፤ ለአፍታም ቢሆን አትስጡ። በሙሉ ኃይላችሁ ተዋጉት! ለእግዚአብሔር ፍቅር ብላችሁ፣ ለልጆቻችሁ ፍቅር ብላችሁ፣ ለገዛ ነፍሳችሁ ፍቅር ብላችሁ!
4. ለወላጆች፣ በተለይም ለእናቶች፣ የምናገረው አንድ ቃል ደግሞ አለኝ። ሐዋርያው የሚናገረው ሁሉ ቢኖርም፣ ልጆቻችሁ «በወርቅ ወይም በዕንቁ ወይም ዋጋው ብዙ በሆነ ልብስ» ራሳቸውን «እንዲሸልሙ» በምሳሌነታችሁ ብታበረታቱአቸው፣ እናንተም እነርሱም አብራችሁ ወደ ጕድጓዱ ትወድቃላችሁ። ነገር ግን የተሻለ ምሳሌ ብትሆኑላቸውም እንኳ እነርሱ ይህን ቢያደርጉ፣ አሁንም የእነርሱ ብቻ ሳይሆን የእናንተም ጥፋት ነው፤ እናንተ ራሳችሁ የማትለብሱትን ጌጥ በትንሽ ልጃችሁ ላይ ባታደርጉ እንኳ (ይህ ፍጹም እብደት፣ በገዛ ክንዳችሁ ወይም ራሳችሁ ላይ ከማድረግም እጅግ የበለጠ ይቅርታ የማይገባው በሆነ ነበር)፣ ከሕፃንነታቸው ጀምሮ እንዲታዘዙአችሁ አላለማመዳችኋቸውም፤ ቢያንስ ከሁለት ዓመታቸው ጀምሮም የመታዘዝን ግዴታ አላስተማራችኋቸውም። ያለዚያ ታላቅም ይሁን ታናሽ ከፈቃዳችሁ ተቃራኒ የሆነ ምንም ነገር ለማድረግ ባልደፈሩ ነበር። ስለዚህ ቀለል ብላ የለበሰች እናት ያጌጠች ሴት ልጅ ባየሁ ቍጥር፣ እናቲቱ በዕውቀት ወይም በሃይማኖት የጐደለች መሆኗን ወዲያውኑ አያለሁ። ወይ የራሷን ወይም የልጇን ግዴታ አታውቅም፣ ወይም የምታውቀውን በተግባር አላዋለችም።
5. ይህን ጉዳይ ገና ልተወው አልችልም። ሃይማኖተኛ ወላጆች ምንም ሃይማኖት እንደሌላቸው ሁሉ ልጆቻቸው በዚያው የአለባበስ ሞኝነት ውስጥ እንዲሮጡ ሲፈቅዱ ሳይ ዘወትር አዝናለሁ። በእግዚአብሔር ስም፣ ከእናንተ ምሳሌ የፀጉር ስፋት ያህል እንኳ እንዲለዩ ለምን ትፈቅዱላቸዋላችሁ? «ምን ይደረግ፣ እነርሱ ማድረጋቸው አይቀርም?» ማድረጋቸው አይቀርም! የማን ጥፋት ነው? ከሕፃንነታቸው ጀምሮ ፈቃዳቸውን ለምን አልሰበራችሁም? ቢያንስ አሁን አድርጉት፤ ፈጽሞ ከመቅረት መዘግየት ይሻላል። ሁለት ዓመት ሳይሞላቸው መደረግ ነበረበት፤ በስምንት ወይም በአሥር ዓመታቸውም ሊደረግ ይችላል፣ ምንም እንኳ እጅግ በበለጠ ችግር ቢሆንም። ሆኖም አሁን አድርጉት፤ ያንንም ችግር ላለፈው ቸልተኝነታችሁ ተገቢ ዋጋ አድርጋችሁ ተቀበሉት። አሁን ቢያንስ ምንም ቢያስከፍል ሐሳባችሁን አስፈጽሙ። አፋችሁን አታለስልሱ፤ እንደ ሞኙ ዔሊ በብርቱ እጅ ከመግታት ይልቅ «ልጆቼ ሆይ፥ አይሆንም፤ የምሰማባችሁ ወሬ መልካም አይደለም» አትበሉ፤ ነገር ግን (በተቻለ መጠን በእርጋታ ቢሆንም) በጽናትና በቁርጠኝነት «እንዲህ እንዲሆን እፈልጋለሁ» ብላችሁ ተናገሩ፤ እንዳላችሁትም አድርጉ። የቀላል አለባበስ ፍቅርንና የጌጣጌጥ ጥላቻን በትጋት በውስጣቸው አስርጹ። ለራሳችሁ ቀላል አለባበስ ምክንያቱን አሳዩአቸው፤ ለእነርሱም እኩል ምክንያታዊ እንደ ሆነ አሳዩ። ስንፍናን፣ ፈሪነትንና ሞኝ ማቀማጠልን ተገዳደሩ፤ በማንኛውም ሁኔታ ሐሳባችሁን አስፈጽሙ፤ ነፍሳቸውን የምትወዱ ከሆናችሁ ልክ እንደ እናንተ ቀላል አድርጓቸው፤ እንዲሁም ጠብቁአቸው። እናንተ አያቶች ሆይ፥ በዚህ ነገር ሴቶች ልጆቻችሁን እንዳታሰናክሉ በእግዚአብሔር ፊት አዝዛችኋለሁ። እናቲቱ የከለከለችውን ማንኛውንም ነገር ለልጁ ለመስጠት አትድፈሩ። በወላጃቸው ላይ ከልጆቹ ጋር ፈጽሞ አትወግኑ፤ በፊታቸው ፈጽሞ አትንቀፉአት። ሥልጣኗን እንደሚገባችሁ ባታጠናክሩ እንኳ ቢያንስ አታዳክሙት፤ ነገር ግን ማስተዋል ወይም እግዚአብሔርን መምሰል የቀረላችሁ ከሆነ፣ በእውነተኛ ቸርነት ሥራ እርዱአት።
6. አሁን ደግሞ እናንተ ልጆች፣ በተለይም የሃይማኖተኛ ወላጆች ልጆች የሆናችሁ፣ ልናገራችሁ ፍቀዱልኝ። በእርግጥ በዓይናችሁ ፊት እግዚአብሔርን መፍራት ከሌለ፣ ለአሁኑ ከእናንተ ጋር ጉዳይ የለኝም፤ ነገር ግን ካለ፣ በእውነት እግዚአብሔርን የምትፈሩ ከሆናችሁና እርሱን ደስ ለማሰኘት ምኞት ካላችሁ፣ ትእዛዛቱን ሁሉ፣ በተለይም አምስተኛውን፣ ልትረዱ ትፈልጋላችሁ። እስከ ዛሬ ተረድታችሁት ታውቃላችሁን? አሁንስ በአባታችሁና በእናታችሁ ላይ ያለባችሁ ግዴታ ምን እንደ ሆነ ትረዳላችሁን? በመለኮታዊ ሥርዓት የእነርሱ ፈቃድ ለእናንተ ሕግ እንደ ሆነ ታውቃላችሁን፣ ቢያንስ ታስተውላላችሁን? እግዚአብሔር የሚጠይቀውን ለወላጆቻችሁ የመታዘዝን ስፋት አስባችሁ ታውቃላችሁን? «ልጆች ሆይ፥ በሁሉ ለወላጆቻችሁ ታዘዙ።» ከተከለከሉ ነገሮች በቀር ምንም የተለየ ነገር የለም። ግዴታችሁን እስከዚህ ስፋት ድረስ ፈጽማችሁታልን? ይህን ለማድረግ እንኳ አስባችሁ ታውቃላችሁን?
7. ከገዛ ነፍሳችሁ ጋር በታማኝነት ተመላለሱ። በዚህ ጉዳይ ሕሊናችሁ አሁን ንጹሕ ነውን? የአባታችሁን ወይም የእናታችሁን ፈቃድ እንደሚቃረን የምታውቁትን ምንም ነገር አታደርጉምን? (ምንም ያህል ብትፈልጉት) እርሱ ወይም እርሷ የሚከለክሉትን ማንኛውንም ነገር ፈጽሞ አታደርጉምን? በሕሊናችሁ እስከቻላችሁ ድረስ የማይወዱትን ሁሉ ትርቃላችሁን? በሌላ በኩል ወላጅ ያዘዘውን ሁሉ ለማድረግ ትጠነቀቃላችሁን? ደስ ልታሰኙአቸው፣ ሕይወታቸውን በተቻላችሁ መጠን ቀላልና አስደሳች ልታደርጉ ታስባላችሁን፣ ዘዴስ ትፈልጋላችሁን? እግዚአብሔርን በሁሉ ደስ ለማሰኘት ባላችሁ አጠቃላይ ጥንቃቄ ላይ ይህን የምትጨምሩ ማንም ብትሆኑ፣ አንተ በጌታ የተባረክህ ነህ! «አምላክህ እግዚአብሔር በሚሰጥህ ምድር ዕድሜህ ይረዝማል።»
8. ነገር ግን ስለዚህ ጉዳይ እምብዛም ግድ የሌላችሁ፣ በሁሉ ወላጆቻችሁን መታዘዝን የሕሊና ጉዳይ የማታደርጉ፣ ነገር ግን እንደ አጋጣሚው አንዳንድ ጊዜ የምትታዘዙአቸው አንዳንድ ጊዜም የማትታዘዙአቸው፣ የሚከለክሉትን ወይም የማይወዱትን ብዙ ጊዜ የምታደርጉ፣ እንድታደርጉ ያዘዙአችሁንም ቸል የምትሉ እናንተ ሆይ፥ ከእንቅልፍ ብትነቁ፣ ኃጢአተኛ መሆናችሁ ሊሰማችሁ ብትጀምሩ፣ ምሕረትንም ለማግኘት ወደ እግዚአብሔር መጮኽ ብትጀምሩ፣ ንስሐ ባልገባችሁበት ኃጢአት በደል ሥር ሳላችሁ መልስ ባታገኙ ይደንቃልን? ወላጆቻችሁን እስክትታዘዙ ድረስ ከእግዚአብሔር ምሕረትን እንዴት ልትጠብቁ ትችላላችሁ? ነገር ግን ባልተለመደ የምሕረት ተአምር ይቅር የሚለውን የእግዚአብሔር ፍቅር ቀምሳችሁ እንደ ሆነ እናስብ፤ ጽድቅን፣ ፍጹሙን የእግዚአብሔር ፍቅር፣ ብትራቡና ብትጠሙ እንኳ፣ በውጫዊ ኃጢአት፣ የታወቀውን የእግዚአብሔር ሕግ ሆን ብላችሁ በመተላለፍ፣ ወላጆቻችሁን ባለመታዘዝ እየኖራችሁ ሳላችሁ ልታገኙት፣ በእርሱም ልትጠግቡ ትችላላችሁ ተብሎ ሊጠበቅ ይቻላልን? ይልቁንም መንፈስ ቅዱሱን ከእናንተ አለመውሰዱ፣ መንፈሱን ዘወትር ብታሳዝኑትም አሁንም ከእናንተ ጋር መታገሉን መቀጠሉ የሚደንቅ አይደለምን? ወይ፣ ከእንግዲህ አታሳዝኑት! በእግዚአብሔር ጸጋ ከዚህች ሰዓት ጀምሮ በሁሉ ታዘዙአቸው! ወደ ቤት እንደ ደረሳችሁ፣ እግራችሁን በበሩ ውስጥ እንዳስገባችሁ፣ ፈጽሞ አዲስ መንገድ ጀምሩ! አባታችሁንና እናታችሁን በአዲስ ዓይን ተመልከቱ፤ በሰማያት የሚኖር አባታችሁን እንደሚወክሉ አድርጋችሁ እዩአቸው፤ ደስ ልታሰኙአቸው፣ ልትረዱአቸው፣ በሁሉም ልትታዘዙአቸው ጣሩ፣ ትጉ፣ በዚህም ደስ ይበላችሁ፤ እንደ ልጃቸው ብቻ ሳይሆን ስለ ክርስቶስ ብላችሁ እንደ አገልጋያቸው ሁኑ። ወይ፣ ያን ጊዜ እርስ በርሳችሁ እንዴት ትዋደዳላችሁ! ከዚህ በፊት ባልታወቀ ሁኔታ። እግዚአብሔር እናንተን ለእነርሱ፣ እነርሱንም ለእናንተ ይባርካል፤ በዙሪያችሁ ያሉ ሁሉ እግዚአብሔር በእውነት ከእናንተ ጋር እንዳለ ይሰማቸዋል። ብዙዎች አይተው እግዚአብሔርን ያመሰግናሉ፤ ፍሬውም እናንተም እነርሱም በአብርሃም እቅፍ ካረፋችሁ በኋላ ይኖራል።