ምዕራፍ 69 · 17 ደቂቃ ንባብ · 22 ደቂቃ ማዳመጥ
የእግዚአብሔር ምክር ጥበብ
ስብከት 68
የእግዚአብሔር ምክር ጥበብ
«የእግዚአብሔር ባለ ጠግነትና ጥበብ እውቀቱም እንዴት ጥልቅ ነው!»
ሮሜ 11:33።
1. አንዳንዶች የእግዚአብሔር ጥበብና እውቀቱ አንድና ያው ነገር ናቸው ብለው ይረዳሉ። ሌሎች ደግሞ የእግዚአብሔር ጥበብ በቀጥታ የሚያመለክተው የነገሮችን ሁሉ ፍጻሜ መወሰኑን እንደ ሆነ፣ እውቀቱ ደግሞ ለእነዚያ ፍጻሜዎች ያዘጋጃቸውንና የሚያደርሱ ያደረጋቸውን መንገዶች እንደ ሆነ ያምናሉ። የመጀመሪያው ይበልጥ ተፈጥሯዊ ማብራሪያ ይመስላል፤ የእግዚአብሔር ጥበብ በሰፊው ትርጉሙ ሲወሰድ አንዱን እንደሚያጠቃልል ሌላውንም፣ ፍጻሜዎቹን እንደሚያጠቃልል መንገዶቹንም ማጠቃለል አለበትና።
2. እንግዲህ የእግዚአብሔር ኃይል እንደ ተገለጠ ጥበቡም በፍጥረቱ በብዛት ተገልጧል፤ በላይ በሰማይና በታች በምድር ያሉትን ሥራዎቹን ሁሉ በማበጀቱና በማሰናዳቱ፣ ሁሉንም ለተፈጠሩበት ለየራሳቸው ፍጻሜ በማስማማቱ ተገልጧል፤ ስለዚህም እያንዳንዳቸው ከሌሎቹ ተለይተው ሲታዩ መልካም ናቸው፤ ሁሉም በአንድነት ግን እጅግ መልካም ናቸው፤ ሁሉም እርስ በርሱ በተያያዘ አንድ ሥርዓት ውስጥ ሆነው፣ አስተዋይ ፍጥረቶቹ ደስተኞች በመሆናቸው የእግዚአብሔርን ክብር ለማስገኘት በአንድነት ይተባበራሉ።
3. ይህ ጥበብ በአጭር ለሚያዩ ሰዎች እንኳ (ከፍ ባለ ማዕረግ ላሉ መናፍስት ደግሞ እጅግ አብልጦ) በመላው ፍጥረተ ዓለምና በእያንዳንዱ ክፍሉ አፈጣጠርና አቀማመጥ እንደሚገለጥ፣ እንዲሁ በመጠበቃቸው፣ ይኸውም «ሁሉን በስልጣኑ ቃል እየደገፈ» በመኖሩ እኩል ይገለጣል። የፈጠረውን ሁሉ በማያቋርጥ አገዛዝ በማስተዳደሩም ከዚህ ባላነሰ ሁኔታ ጎልቶ ይታያል። ጥበቡ የሰማይ አካላትን እንቅስቃሴ እንዴት በሚያስደንቅ ሁኔታ ይመራል! በጠፈር ያሉትን ከዋክብት ሁሉ፣ የማይንቀሳቀሱ የሚመስሉትንም ሆነ የሚዞሩትን፣ ከየምሕዋራቸው ግን ፈጽሞ የማይወጡትን! በሰማይ መካከል ያለችውን ፀሐይ! ሊለካ በማይችለው የጠፈር ሜዳ ውስጥ ወደ ሁሉም አቅጣጫ የሚወረወሩትን እነዚያን አስደናቂ አካላት፣ ጅራታም ከዋክብትን! የዚህን የታችኛውን ዓለም፣ የዚህን «የፍጥረት ቅንጣት» የሆነችውን ምድር ክፍሎች ሁሉ እንዴት ይቆጣጠራል! ስለዚህ ሁሉ ነገር አሁንም በመጀመሪያ እንደ ነበረ «በየጊዜያቸው ያማሩ» ናቸው፤ በጋና ክረምት፣ የዘር ጊዜና መከርም በሥርዓት እርስ በርሳቸው ይከታተላሉ። በእርግጥም ሁሉ ነገር ፈጣሪውን ያገለግላል፤ «እሳትና በረዶ፥ አመዳይና ጉም፥ ነፋስና ዐውሎ ቃሉን ይፈጽማሉ»፤ ስለዚህ «አቤቱ ገዢያችን ጌታ፥ ስምህ በምድር ሁሉ ላይ እንዴት ግሩም ነው!» ብንል ይገባናል።
4. የእግዚአብሔር ጥበብ በሕዝቦች፣ በመንግሥታትና በነገሥታት አገዛዝም እንዲሁ ጎልቶ ይታያል፤ እንዲያውም ወሰን የሌለው ነገር ደረጃ ይኖረዋል ማለት የሚቻል ከሆነ፣ ይበልጥ ጎልቶ ይታያል። ሕይወት የሌለው ፍጥረት በሙሉ ፈጽሞ ተገብሮና ያለ እንቅስቃሴ በመሆኑ፣ ፈቃዱን ምንም ሊቃወም አይችልምና። ስለዚህ በተፈጥሮው ዓለም ሁሉ ነገር በእኩልና ባልተቋረጠ ሩጫ ይቀጥላል። በሥነ ምግባሩ ዓለም ግን ነገሩ ፈጽሞ ሌላ ነው። በዚህ ክፉ ሰዎችና ክፉ መናፍስት መለኮታዊውን ፈቃድ ዘወትር ይቃወማሉ፤ ስፍር ቍጥር የሌለው ሥርዓት አልበኝነትንም ይፈጥራሉ። ስለዚህ በዚህ ስፍራ የእግዚአብሔር ጥበብና እውቀት ባለ ጠግነት ሁሉ የሚሠራበት ሙሉ መድረክ አለ፤ የሰዎችን ክፋትና ስንፍና ሁሉ፣ የሰይጣንንም ተንኰል ሁሉ በማክሸፍ የራሱን የከበረ ዓላማ — የጠፋውን የሰው ልጅ መዳን — ወደ ፊት ያራምዳልና። በእርግጥ ይህን በፍጹም ውሳኔና በማይቋቋመው በራሱ ኃይል ቢያደርገው ኖሮ፣ ምንም ጥበብ አያሳይም ነበር። ጥበቡ የሚገለጠው ግን ሰውን ተፈጥሮውን በማያጠፋ፣ የሰጠውንም ነጻነት በማይወስድበት መንገድ በማዳኑ ነው።
5. ነገር ግን የእግዚአብሔር ጥበብና እውቀት ባለ ጠግነት ከሁሉ ይበልጥ ጎልቶ የሚታየው በቤተ ክርስቲያኑ ነው፤ ከዘሮች ሁሉ እንደምታንሰው እንደ ሰናፍጭ ቅንጣት በመትከሉ፣ የጨለማ ኃይላት ሁሉ ያልተቋረጠ ተቃውሞ ቢኖርም ታላቅ ዛፍ እስክትሆን ድረስ በመጠበቁና ዘወትር በማሳደጉ ነው። ሐዋርያው ይህን በትክክል ብዙ ልዩ ልዩ (πολυποίκιλος σοφία) የእግዚአብሔር ጥበብ ብሎ ይጠራዋል። ይህ ጥበብ በአሠራሩ በሺህ መንገዶች የተለያየ እንደ ሆነና ወሰን በሌለው ልዩነት ራሱን እንደሚገልጥ የሚያመለክት ያልተለመደ ገላጭ ቃል ነው። እነዚህን ነገሮች ከሁሉ የላቁት «መላእክቱ ሊመለከቱ ይመኛሉ»፤ ነገር ግን ፈጽሞ ሊረዱአቸው አይችሉም። ሐዋርያው «ፍርዱ እንዴት የማይመረመር ነው!» የሚለውን ያንን ብርቱ ቃለ አጋኖ የሚናገረው በዋናነት እነዚህን በማሰብ ይመስላል። ምክሩና ዕቅዱ ሊመረመር የማይቻል ነው፤ «ለመንገዱም» — ይኸውም እነርሱን ለሚፈጽምበት — «ፍለጋ የለውም!» ሊደረስበት የማይቻል ነው! መዝሙረኛው እንዳለው፦ «መንገዱ በጥልቅ ውኆች ውስጥ ነው፥ ፍለጋውም አይታወቅም።»
6. ነገር ግን ከዚህ ጥቂቱን ሊገልጥልን ወደደ፤ እርሱም የገለጠውን አጥብቀን በመያዝ፣ በዚያውም የእግዚአብሔርን ቃልና ሥራ በአንድነት በማነጻጸር፣ ከመንገዱ ከፊሉን ልናስተውል እንችላለን። ይህን ብዙ ልዩ ልዩ ጥበብ ከዓለም መጀመሪያ ጀምሮ፣ ከአዳም እስከ ኖኅ፣ ከኖኅ እስከ ሙሴ፣ ከሙሴም እስከ ክርስቶስ ድረስ በተወሰነ መጠን ልንከታተለው እንችላለን። እኔ ግን አሁን (ያለፉትን ዘመናት የቤተ ክርስቲያን ታሪክ በጥቂቱ ከነካሁ በኋላ) ይህን የምመለከተው እርሱ በዚህ ዘመን፣ ባለፉት ሃምሳ ዓመታት ውስጥ፣ ደግሞም በዚህች ትንሽ የዓለም ማዕዘን፣ በብሪታንያ ደሴቶች ብቻ ከሠራው አንጻር ብቻ ነው።
7. ዘመኑ ሲፈጸም፣ ልክ ወሰን ለሌለው ጥበቡ መልካም መስሎ በታየው ጊዜ፣ እግዚአብሔር በኵሩን ወደ ዓለም አመጣው። ያን ጊዜም የቤተ ክርስቲያኑን መሠረት ጣለ፤ ምንም እንኳ እስከ በዓለ ሃምሳ ቀን ድረስ በግልጽ ባትታይም። ያን ጊዜም የከበረች ቤተ ክርስቲያን ነበረች፤ አባሎቿ ሁሉ — «በሁሉም መንፈስ ቅዱስ ሞላባቸው»፤ «አንድ ልብ አንዲትም ነፍስ ነበሩአቸው»፤ «በሐዋርያትም ትምህርትና በኅብረት እንጀራውንም በመቍረስ በየጸሎቱም ይተጉ ነበር»። በኅብረት፤ ይኸውም ሁሉን በአንድነት በማድረግ፤ ካለው አንድ ነገር ስንኳ ማንም የራሱ እንደ ሆነ ሳይቈጥር
የበጉ የዋሃንና ቅን ተከታዮች፣
በአንድነት ኖሩ፣ አሰቡ፣ ተናገሩም፤
ሁሉም አንድ ልብና አንድ ነፍስ ነበሩ፣
ሁሉንም ያነሣሣው ፍቅር ብቻ ነበረ።
8. ነገር ግን ይህ የደስታ ሁኔታ ብዙም አልቀጠለም። ሐናንያንና ሰጲራን ተመልከቱ፤ በገንዘብ ፍቅር ምክንያት («የክፋት ሁሉ ሥር» በሆነው) በጋራ ንብረት ኅብረት ላይ የመጀመሪያውን ስብራት ሲያደርሱ! ሐዋርያት ራሳቸው በኢየሩሳሌም ያለችውን ቤተ ክርስቲያን እየመሩ ሳሉ እንኳ በአንድ ወገን አድልዎንና ፍትሕ የጎደለውን ለሰው ፊት ማድላት፣ በሌላው ወገን ደግሞ ቂምንና ማጕረምረምን ተመልከቱ! በቤተ ክርስቲያን ክፍሎች ሁሉ የተገኙትን፣ በሐዋርያት ሥራ ብቻ ሳይሆን በቅዱስ ጳውሎስ፣ በያዕቆብ፣ በጴጥሮስና በዮሐንስ መልእክቶችም የተመዘገቡትን አሳዛኝ እድፍና የፊት መጨማደድ ተመልከቱ። ከዚህ የበለጠ ሙሉ ዘገባ በራእይ መጽሐፍ ውስጥ አለን፤ በዚህም መሠረት፣ ጌታችን መልእክቶቹን የላከላቸው የየአካባቢው አብያተ ክርስቲያናት (ከሰምርኔስና ከፊልድልፍያ በቀር ሁሉም) ከነበሩበት ሁኔታ ተነሥተን የቤተ ክርስቲያንን አጠቃላይ ሁኔታ ልንገምት ብንችል (ያለ ጥርጥር እንችላለንም)፣ የክርስቲያን ቤተ ክርስቲያን በመጀመሪያው መቶ ዘመን እንኳ፣ ቅዱስ ዮሐንስ ከምድር ገና ሳይወሰድ እንኳ፣ በምን ዓይነት ሁኔታ ላይ ነበረች! ከዚህም ጊዜ ጀምሮ ለአንድ ሺህ አራት መቶ ዓመታት፣ ታሪክ ሁሉ እንደሚያሳየው፣ ከሃይማኖት ኃይልም ሆነ መልክ ምንም ያህል እስከማይቀር ድረስ እየባሰና እየባሰ ተበላሸች።
9. ይሁን እንጂ የሲኦል ደጆች ፈጽሞ እንዳላሸነፉአት የተረጋገጠ ነው። እግዚአብሔር ዘወትር ለራሱ ዘርን አስቀርቷል፤ በመንፈስና በእውነት የሚሰግዱለትን ጥቂቶችን። ሁልጊዜ ቍጥርንም ኃይልንም ከጎናቸው የሚያደርጉት ባለ ጠጎችና የተከበሩ ክርስቲያኖች ከጊዜ ወደ ጊዜ መናፍቃን የሚል ስም ለጥፈው ያወገዙአቸው እነዚሁ ሰዎች ራሳቸው አልነበሩምን ብዬ ብዙ ጊዜ ተጠራጥሬአለሁ። ምናልባትም በእነርሱ የነበረው መልካም ነገር በክፉ እየተነገረበት፣ በሌላ ሁኔታ ሊሆኑ ይችሉ የነበረውን ያህል በሰፊው ጠቃሚ እንዳይሆኑ የተከለከሉት በዋናነት በዲያብሎስና በልጆቹ በዚህ ተንኰል ይሆናል። እንዲያውም ያ የመናፍቃን አለቃ ሞንታኑስ በሁለተኛው መቶ ዘመን ከነበሩት እጅግ ቅዱሳን ሰዎች አንዱ አልነበረምን ብዬ ተጠራጥሬአለሁ። በእርግጥም የአምስተኛው መቶ ዘመን የመናፍቃን አለቃ (ለብዙ ዘመናት በብዛት ጭቃ ቢለቀለቅበትም) ቅዱስ አውግስጢኖስን ራሱን እንኳ ሳይቀር ከዚያ ዘመን እጅግ ቅዱሳን ሰዎች አንዱ አልነበረም ብዬ አላረጋግጥም። (እንዴት ያለ ድንቅ ቅዱስ! እንደ ጆርጅ ፎክስ ራሱ በትዕቢት፣ በቍጣ፣ በምሬትና በነቃፊነት የተሞላ፣ የተቃወሙትንም ሁሉ በአፉ የሚሳደብ!) የጴላጊዮስ እውነተኛ ኑፋቄ ከዚህ ያልበለጠም ያላነሰም እንደ ነበረ በእውነት አምናለሁ፤ ይኸውም ክርስቲያኖች በእግዚአብሔር ጸጋ (ያለ እርሱ አይደለም፤ ይህን ተራ ስም ማጥፋት እንደ ሆነ እቈጥረዋለሁ) «ወደ ፍጻሜ» መሄድ እንደሚችሉ፤ ወይም በሌላ አነጋገር «የክርስቶስን ሕግ ፈጽሙ» የሚለውን መፈጸም እንደሚችሉ ማመን ነው።
«ቅዱስ አውግስጢኖስ ግን እንዲህ ይላል፦» — የአውግስጢኖስ ስሜት በጋለ ጊዜ ቃሉ ከገለባ ያህል ዋጋ የለውም። ምሥጢሩም ይህ ነው፤ ቅዱስ አውግስጢኖስ በጴላጊዮስ ላይ ተቈጥቶ ነበር፤ ስለዚህ ያለ ፍርሃትም ያለ እፍረትም (እንደ ልማዱ) ስሙን አጠፋ፣ ሰደበውም። ቅዱስ አውግስጢኖስም ያን ጊዜ በክርስቲያን ዓለም ውስጥ ከጊዜ በኋላ አርስጣጣሊስ እንደ ሆነው ነበር፤ ለማንኛውም አባባል ከኢፕሴ ዲክሲት ሌላ ምንም ማስረጃ አያስፈልግም ነበር፤ «ቅዱስ አውግስጢኖስ ተናግሮታል።»
10. ወደ ነገሩ ልመለስ፤ ዓመፅ እንደ ጎርፍ ቤተ ክርስቲያንን በሸፈነ ጊዜ፣ የጌታ መንፈስ በእርሱ ላይ ዓላማን አነሣ። ሀብትም ኃይልም፣ በዚያን ጊዜም ወዳጆች የሌሉትን አንድ ድሃ መነኩሴ አስነሣ፤ እርሱም በመላው ዓለም ላይ፣ በሮም ጳጳስና በተከታዮቹ ሁሉ ላይ፣ ጦርነት እንዳወጀ ያህል ተነሣ። ነገር ግን ይህች ትንሽ ድንጋይ በእግዚአብሔር የተመረጠች በመሆኗ፣ ብዙም ሳትቆይ ታላቅ ተራራ ሆነች፤ የአውሮፓን ሰፊ ክፍል እስክትሸፍን ድረስም እየበዛች ሄደች። ነገር ግን ሉተር ወደ ቤቱ ከመጠራቱ በፊት እንኳ የብዙዎች ፍቅር ቀዝቅዞ ነበር። በአንድ ወቅት በመልካም ይሮጡ የነበሩ ብዙዎች ከተሰጣቸው ቅዱስ ትእዛዝ ወደ ኋላ ተመለሱ፤ እንዲያውም በአንድ ወቅት የእምነትን ኃይል የቀመሱት አብዛኞቹ በእምነትና በበጎ ሕሊና ነገር መርከባቸው ተሰበረ። ሉተር የሞተበት የዚያ ሕመም (የኩላሊት ጠጠር ሕመም) መንስኤ ይህን ማየቱ እንደ ነበረ ይታሰባል፤ እርሱም እነዚህን አሳዛኝ ቃላት ከተናገረ በኋላ ሞተ፦ «ኃይሌን በከንቱ ጨረስሁ! በስሜ የሚጠሩት በአስተሳሰብና በአምልኮ ሥርዓት በእርግጥ ተሐድሰዋል፤ በልባቸውና በሕይወታቸው፣ በዝንባሌያቸውና በተግባራቸው ግን ከጳጳሱ ተከታዮች ቅንጣት ያህል አይሻሉም!»
11. በዚያው ጊዜ ገደማ እግዚአብሔር ታላቋን ብሪታንያን ሊጎበኝ ወደደ። በንጉሥ ስምንተኛው ሄንሪ ዘመነ መንግሥት ጥቂቶች፣ በተከታዮቹ ሦስት ዘመነ መንግሥታት ደግሞ ብዙዎች የእውነተኛ፣ መጽሐፍ ቅዱሳዊ ክርስትና እውነተኛ ምስክሮች ነበሩ። የእነዚህም ቍጥር በተከታዩ መቶ ዘመን መጀመሪያ እጅግ በዛ። በ1627 ደግሞ በእንግሊዝ በተለያዩ ክፍሎች፣ እንዲሁም በስኮትላንድና በሰሜን አየርላንድ፣ አስደናቂ የመንፈስ መፍሰስ ሆነ። ነገር ግን እግዚአብሔርን በሚፈሩትና በሚወዱት ላይ ሀብትና ክብር ከፈሰሰበት ጊዜ ጀምሮ ልባቸው ከእርሱ መራቅ፣ ከአሁኑም ዓለም ጋር መጣበቅ ጀመረ። ስደቱ እንደ ቆመ፣ ድሆቹ፣ የተናቁትና የተሰደዱት ክርስቲያኖች ሥልጣን ለብሰው በምቾትና በብልጽግና እንደ ተቀመጡ፣ የሁኔታ ለውጥ የመንፈስ ለውጥን አመጣ። ሀብትና ክብር ብዙም ሳይቆዩ የተለመደውን ውጤታቸውን አስገኙ። ዓለምን ስላገኙ ፈጥነው ዓለምን ወደዱ፤ ከእንግዲህ ሰማይን አልናፈቁም፤ ይልቁንም በምድር ነገሮች ላይ እየባሰ ተጣበቁ። ስለዚህም በጥቂት ዓመታት ውስጥ፣ እነርሱን በሚገባ የሚያውቃቸውና የሚወዳቸው፣ በሰዎችና በልማዶቻቸው ላይም ነቀፋ የሌለበት ፈራጅ የሆነ አንድ ሰው (ዶ/ር ኦወን)፣ የሃይማኖትን ሕይወትና ኃይል ሁሉ እንዳጡ፣ እንደ መንገድ ጭቃ ይንቁአቸው ከነበሩት ሰዎች ጋር ፈጽሞ በአንድ መንፈስ እንደ ሆኑ በጥልቅ አዘነላቸው።
12. በምድሪቱ የቀረው ጥቂት ሃይማኖት ደግሞ በንጉሣዊው ሥርዓት መመለስ ጊዜ፣ በእንግሊዝ ዙፋን ላይ ከተቀመጡት እጅግ ክፉ መሳፍንት በአንዱና በአውሮፓ ከሁሉ እጅግ በረከሰው ቤተ መንግሥት ሌላ የሞት ቍስል ደረሰበት። አለማመንም አሁን በኃይል ገባ፤ ምድሪቱንም እንደ ጎርፍ ሸፈነ። በዚያውም ልክ የብልግና ዓይነት ሁሉ አብሮት መጣ፤ እስከ መቶ ዘመኑም መጨረሻ እየበዛ ሄደ። በንግሥት አን ዘመነ መንግሥት ይህን ጎርፍ ለመግታት አንዳንድ ደካማ ሙከራዎች ተደርገው ነበር፤ ነገር ግን እስከ 1725 ገደማ ድረስ እየበዛ ሄደ፤ በዚያን ጊዜ አቶ ሎው «ስለ ክርስቲያናዊ ፍጽምና የተጻፈ ተግባራዊ ድርሰት» የተባለውን፣ ብዙም ሳይቆይ ደግሞ «ወደ ትጉና ቅዱስ ሕይወት የቀረበ ጥብቅ ጥሪ» የተባለውን መጽሐፉን አሳተመ። በዚህም ዘሩ ተዘራ፤ ፈጥኖም አደገ፤ ወደ ኦክስፎርድ፣ ወደ ለንደን፣ ወደ ብሪስቶል፣ ወደ ሊድስ፣ ወደ ዮርክ፣ በጥቂት ዓመታትም ውስጥ ወደ አብዛኛው የእንግሊዝ፣ የስኮትላንድና የአየርላንድ ክፍል ተስፋፋ።
13. ታዲያ የእግዚአብሔር ጥበብ ይህን ታላቅ ሥራ ለመፈጸም የተጠቀመው በምን መንገድ ነበር? የሰው ጥበብ ፈጽሞ ሊያስበው የማይችለውን ዓይነት ሠራተኞች ወደ መከሩ ገፍቶ አወጣ። ብርቱውን ለማሳፈር ደካማውን ነገር፣ ጥበበኞችንም ለማሳፈር ሞኙን ነገር መረጠ። ልምድም፣ ትምህርትም፣ ብልሃትም የሌላቸውን ጥቂት ወጣቶች፣ ድሆችና ያልተማሩ ሰዎችን መረጠ፤ ነገር ግን ልባቸው ቅን የሆነ፣ ለእግዚአብሔር የተሰጡ፣ በእምነትና በቅንዓት የተሞሉ፣ ክብርን፣ ትርፍን፣ ተድላን፣ ምቾትንም የማይፈልጉ፣ ነፍሳትን ማዳን ብቻ የሚፈልጉ፤ ችግርንም፣ ሥቃይንም፣ ስደትንም፣ ሰው ሊያደርግባቸው የሚችለውን ማንኛውንም ነገር የማይፈሩ፤ እንዲያውም ሩጫቸውን በደስታ ይፈጽሙ ዘንድ ነፍሳቸውን በእነርሱ ዘንድ እንደማትከብር የሚቈጥሩ ነበሩ። እግዚአብሔር በእነርሱ ቃል ከጨለማ ወደሚደነቅ ብርሃኑ የጠራቸው ሕዝብም የዚያው መንፈስ ሰዎች ነበሩ፤ ከእነርሱም ብዙዎቹ በእግዚአብሔር እርስ በርሳቸው እጅ ለእጅ ለመበረታታት በአንድነት ለመሰብሰብ ብዙም ሳይቆዩ ተስማሙ። እነዚህም ደግሞ ልባቸው ቅን፣ ለእግዚአብሔር የተሰጡ፣ ለበጎ ሥራም የሚቀኑ ነበሩ፤ ክብርንም፣ ሀብትንም፣ ተድላንም፣ ምቾትንም፣ ከፀሐይ በታች ያለውንም ማንኛውንም ነገር አይመኙም ነበር፤ የሚመኙት የእግዚአብሔርን መልክ በሙላት ማግኘትንና ከእርሱ ጋር በክብር መኖርን ብቻ ነበር።
14. ነገር ግን እነዚህ ወጣት ሰባኪዎች በዕድሜ እያደጉ ሲሄዱ ሁሉም በጸጋ አላደጉም። ከእነርሱ አንዳንዶቹ በእርግጥ በሌላ እውቀት አደጉ፤ በእግዚአብሔር እውቀት ግን በዚያው መጠን አላደጉም። ቅንነታቸው ቀነሰ፣ ለእግዚአብሔር ያላቸው ሕያውነት ቀነሰ፣ ለእርሱም የነበራቸው መሰጠት ቀነሰ። ለእግዚአብሔር የነበራቸው ቅንዓት ቀነሰ፤ ስለዚህም በአገልግሎቱ ያላቸው ትጋትና ጥንቃቄ ቀነሰ። አንዳንዶቹ የእግዚአብሔርን ምስጋና ብቻ ሳይሆን የሰዎችን ምስጋና መሻት ጀመሩ፤ አንዳንዶቹ በተንከራታች ሕይወት ደክመው ምቾትንና ጸጥታን መፈለግ ጀመሩ። አንዳንዶቹ ደግሞ እንደ ገና የሰዎችን ፊት መፍራት፣ በጥሪያቸው ማፈር፣ ራሳቸውን ለመካድ፣ ዕለት ዕለትም መስቀላቸውን ለመሸከምና «እንደ ኢየሱስ ክርስቶስ በጎ ወታደሮች ሆነው መከራን ለመቀበል» ፈቃደኞች አለመሆን ጀመሩ። እነዚህ ሰባኪዎች በደከሙበት ስፍራ ሁሉ የድካማቸው ብዙ ፍሬ አልነበረም። ቃላቸው እንደ ቀድሞው ኃይል አልለበሰም፤ የመንፈስን መግለጥ አልያዘም። በግል ንግግራቸውም ያው የመንፈስ መዛል ነበረ። ከእንግዲህ ወዲህ «በጊዜውም አለጊዜውም» የሚተጉ፣ «ሰውን ሁሉ እየገሠጹ ሰውንም ሁሉ እየመከሩ»፣ «በሁሉ መንገድ አንዳንዶችን ያድኑ ዘንድ» የሚጥሩ አልነበሩም።
15. ነገር ግን አንዳንድ ሰባኪዎች ከፊተኛው ፍቅራቸው እንደ ወደቁ፣ ከሕዝቡም ብዙዎቹ እንዲሁ ወደቁ። እነርሱም ደግሞ ከየአቅጣጫው ጥቃት ደረሰባቸው፤ በብዙ ዓይነት ፈተና ተከበቡ፤ ከእነርሱም ብዙዎቹ ሁሉን ድል አድርገው «በወደዳቸው በእርሱ ከአሸናፊዎች የበለጡ» ሲሆኑ፣ ሌሎቹ ግን ለዓለም፣ ለሥጋ ወይም ለዲያብሎስ ስፍራ ሰጡ፤ እንዲሁም «ወደ ፈተና ገቡ»፤ አንዳንዶቹ በአንድ ጊዜ «መርከብ አለ መሪ እንደሚጠፋ፥ በእምነት ነገር ጠፉ»፤ አንዳንዶቹ ደግሞ በዝግታና በማይታወቅ ደረጃ። ጥቂት ያልሆኑትም የኑሮ አስፈላጊ ነገሮች ስለ ጐደሉባቸው በዓለም አሳብ ተዋጡ፤ ብዙዎችም ወደ «የሌላውም ነገር ምኞት» ተመልሰው ወደቁ፤ ይህም «መልካሙን ዘር አነቀው፥ የማያፈራም ሆነ»።
16. ነገር ግን ከፈተናዎች ሁሉ እንደ «የባለጠግነት ማታለል» የእግዚአብሔርን ሥራ በሙሉ የመታ የለም፤ ለዚህም በእነዚህ ባለፉት ሃምሳ ዓመታት ውስጥ ሺህ አሳዛኝ ማስረጃዎችን አይቻለሁ። በእርግጥም አታላዮች ናቸው! ምንም ያህል እንደሚጎዱት ማን ያምናልና? ሆኖም በስድሳ ዓመታት ውስጥ፣ እኔ መፍረድ እስከምችለው ድረስ፣ ድሆች ቢሆኑ ኖሮ ሊሆኑ ከሚችሉት ይልቅ ቅድስናቸው ያላነሰ ስድሳ ባለ ጠጎችን፣ ምናልባትም የዚያን ቍጥር እኩሌታ እንኳ፣ አላወቅሁም። በባለጠግነት ስል በሺህ የሚቈጠር ፓውንድን ሳይሆን፣ ለኑሮ ምቾት ከሚያስፈልገው በላይ የሆነውን ማንኛውንም ገንዘብ ማለቴ ነው። ስለዚህ ለራሱና ለቤተሰቡ ምግብና ልብስ ያለው፣ ዕዳ ውስጥ ሳይገባ ደግሞ ትርፍ ያለው ሰው ባለ ጠጋ እንደ ሆነ እቈጥረዋለሁ። በዚህ ሁኔታ ውስጥ ካሉት ሰዎች በዚህ ያልተጎዱ፣ ካልጠፉም፣ ስንቶቹ ናቸው? ሆኖም ማን ማስጠንቀቂያ ይቀበላል? «ባለ ጠጎች ሊሆኑ የሚፈልጉ በጥፋትና በመፍረስ ሰዎችን በሚያሰጥምና በሚያሰንፍ በሚጎዳም በብዙ ምኞትና በፈተና በወጥመድም ይወድቃሉ» የሚለውን ያንን የሐዋርያውን አስፈሪ ቃል ማን በቁም ነገር ያስተውለዋል? እግዚአብሔር በቅርቡ ኃይሉን ባሳወቀባቸው በለንደን፣ በብሪስቶል፣ በኒውካስል፣ በመንግሥቱ ውስጥ ባሉ በትላልቅ የንግድ ከተሞች ሁሉ የዚህን ስንት አሳዛኝ ምሳሌዎች አይተናል! በአንድ ወቅት ልባቸው ቅን የነበረ፣ ከእግዚአብሔር በቀር ምንም የማይመኙ የነበሩት ስንቶቹ አሁን «የሥጋ ምኞትን» እያረኩ እንደ ሆነ ተመልከቱ፤ የስሜት ሕዋሳታቸውን፣ በተለይም የመቅመስ ስሜታቸውን ለማስደሰት እየተጉ፣ የመቅመስን ተድላ በተቻለ መጠን ለማስፋት እየጣሩ! እናንተስ ከእነዚያ ቍጥር አይደላችሁምን? በእርግጥ ሰካራሞች አይደላችሁም፤ ሆዳሞችም አይደላችሁም፤ ነገር ግን በአንድ ዓይነት ሥርዓት ያለው ሥጋዊ ተድላ ራሳችሁን አታስደስቱምን? መብልና መጠጥ የሕይወታችሁ ታላቅ ተድላ አይደሉምን? የደስታችሁ ዋነኛ ክፍል አይደሉምን? እንዲህ ከሆነ ቅዱስ ጳውሎስ «ሆዳቸው አምላካቸው ነው» ከተባለላቸው መካከል ስፍራ ይሰጣችሁ ነበር ብዬ እፈራለሁ! ከእነርሱ ስንቶቹ አሁን እንደ ገና «የዓይን አምሮትን» እያረኩ ነው! የአሳባቸውን ተድላ ለማስፋት በሥልጣናቸው ያለውን መንገድ ሁሉ እየተጠቀሙ! በታላቅነት ባይሆን — ይህ ገና ከአቅማቸው በላይ ነውና — በአዳዲስ ወይም በሚያማምሩ ነገሮች! እናንተስ ደስታን በሚያምርና በተዋበ ልብስ ወይም የቤት ዕቃ ውስጥ አትፈልጉምን? ወይስ በአዲስ ልብስ፣ ወይም በመጻሕፍት፣ ወይም በሥዕሎች፣ ወይም በአትክልት ቦታዎች? «ታዲያ በእነዚህ ነገሮች ምን ጉዳት አለ?» ጉዳቱ ይህ ነው፤ «የዓይን አምሮትን» ያረካሉ፤ በዚህም ያጠነክሩታል፣ ያበዙታልም፤ ለእግዚአብሔር እየባሰ የሞታችሁ፣ ለዓለም ደግሞ እየባሰ ሕያዋን ያደርጓችኋል። ስንቶች «የኑሮ ትዕቢትን» እያረኩ ነው! ከሰዎች የሚገኘውን ክብር እየፈለጉ! ወይም «በምድር ላይ መዝገብ» እየሰበሰቡ! በታማኝነትና በሕሊና የቻሉትን ሁሉ ያተርፋሉ። አላስፈላጊ ወጪን ሁሉ በመቍረጥ፣ በትጋት ላይ ቍጠባን በመጨመር የቻሉትን ሁሉ ይቈጥባሉ። እስከዚህ ድረስ ሁሉ ትክክል ነው። ይህ እግዚአብሔርን የሚፈራ ሁሉ ግዴታ ነው። ነገር ግን የቻሉትን ሁሉ አይሰጡም፤ ይህ ከሌለ ደግሞ አሳባቸው እየባሰ ምድራዊ መሆኑ የግድ ነው። ፍቅራቸው እየባሰ ከአፈር ጋር ይጣበቃል፤ ከእግዚአብሔርም ጋር ያላቸው ኅብረት እያነሰ ይሄዳል። ይህ የእናንተ ሁኔታ አይደለምን? ከእግዚአብሔር ምስጋና ይልቅ የሰዎችን ምስጋና አትፈልጉምን? እናንተስ ገንዘብ አታከማቹምን? ወይስ ቢያንስ «በምድር ላይ መዝገብ» ለመሰብሰብ አትመኙምን? አትጥሩምን? እንግዲያስ (ከራሳችሁ ነፍስ ጋር በታማኝነት ተነጋገሩ!) ለዓለም እየባሰ ሕያዋን፣ ስለዚህም ለእግዚአብሔር እየባሰ ሙታን አይደላችሁምን? ከዚህ ሌላ ሊሆን አይችልም። የቻላችሁትን ሁሉ እንደምታተርፉና እንደምትቈጥቡ፣ የቻላችሁትን ሁሉ ካልሰጣችሁ፣ ይህ የግድ ይከተላል። ገንዘባችሁ ከመቃብር በታች እንዳያሰጥማችሁ የሚከለክል ሌላ መንገድ ከሰማይ በታች የለም! «ማንም ዓለምን ቢወድ የአብ ፍቅር በእርሱ የለም»ና። ምንም ያህል በከፍተኛ ደረጃ በእርሱ ውስጥ ቢኖር እንኳ፣ ወደ ዓለም ፍቅር ቢንሸራተት፣ ይህ በሚገባበት ልክ በዚያው መጠን የእግዚአብሔር ፍቅር ከልቡ ይወጣል።
17. ምናልባትም በእነዚያ ቃላት ውስጥ ከዚህ ሁሉ የበለጠ ነገር ተይዟል፦ «ዓለምንና በዓለም ያሉትን አትውደዱ።» በዚህ «በዓለም ያሉትን» ከመውደድ ብቻ ሳይሆን ዓለምን ከመውደድም በግልጽ ተጠንቅቀናል። ዓለም ማለት እግዚአብሔርን የማያውቁ፣ የማይወዱትና የማይፈሩት ሰዎች ናቸው። እነዚህን በደስታ ወይም በመርካት ፍቅር መውደድ፣ ፍቅራችንን በእነርሱ ላይ ማድረግ፣ በዚህ ፈጽሞ ተከልክሏል፤ በዚያው ምክንያትም አስፈላጊ ሥራ ከሚጠይቀው በላይ ከእነርሱ ጋር መነጋገርም ሆነ መቀራረብ ተከልክሏል። ቅዱስ ያዕቆብ ከእነርሱ ጋር ወዳጅነትን ወይም መቀራረብን ምንዝርና ብሎ ለመጥራት አያመነታም፦ «አመንዝሮች ሆይ፥ ዓለምን መውደድ ለእግዚአብሔር ጥል እንዲሆን አታውቁምን? እንግዲህ የዓለም ወዳጅ ሊሆን የሚፈቅድ ሁሉ የእግዚአብሔር ጠላት ሆኖአል።» የእነዚያን ብርቱ ቃላት ትርጉም ለማምለጥ ወይም ለመሸሽ አትሞክሩ። ከእነርሱ ርቀን እንድንቆም፣ ከቅዱሳን ካልሆኑ ሰዎች ጋር አላስፈላጊ ግንኙነት እንዳይኖረን በግልጽ ይጠይቃሉ። አለዚያ ያለ ጥርጥር ወደ ዓለም መምሰል፣ ወደ መርሆቻቸው፣ ወደ መንፈሳቸውና ወደ ልማዶቻቸው እንንሸራተታለን። ጉዳት የሌላቸው ቢመስሉም ቃሎቻቸው ብቻ እንደ ነቀርሳ የሚበሉ አይደሉምና፤ እስትንፋሳቸው ራሱ ተላላፊ ነው፤ መንፈሳቸው በማይታወቅ ሁኔታ በመንፈሳችን ላይ ተጽእኖ ያደርጋል። «እንደ ውኃ ወደ አንጀታችን፥ እንደ ዘይትም ወደ አጥንታችን» ሾልኮ ይገባል።
18. ነገር ግን ባለ ጠጎች ሁሉ ከዓለማውያን ሰዎች ጋር ለመተዋወቅና ለመነጋገር ዘወትር ይፈተናሉ። እንዲሁም ለትዕቢት፣ ማሰብ ከሚገባቸው አልፈው ስለ ራሳቸው በትዕቢት ለማሰብ ዘወትር ይፈተናሉ። በጥቂቱ እንኳ በተሰደቡ ጊዜ ለበቀል በብርቱ ይፈተናሉ፤ መንገዱም በእጃቸው ስላለ፣ ፈተናውን የሚቋቋሙ ስንቶች ናቸው! ለስንፍና፣ ለታካችነት፣ ምቾትን ለመውደድ፣ ለልስላሴና ለቅምጥልነት፣ ራስን መካድንና መስቀልን መሸከምን ለመጥላት — ያለ እነርሱ በጸጋ ማደግ የማይቻለውን መጾምንና በማለዳ መነሣትን እንኳ ለመጥላት — ዘወትር ይፈተናሉ። እናንተ በንብረት ከበዛችሁ እነዚህ ነገሮች እንዲህ እንደ ሆኑ አታውቁምን? ከዓለማውያን ሰዎች ጋር ምንም መቀራረብ አትፈጥሩምን? ግዴታ ከሚጠይቀው በላይ ከእነርሱ ጋር አትነጋገሩምን? በትዕቢት አደጋ ውስጥ አይደላችሁምን? ከድሆችና ከቆሸሹ ጎረቤቶቻችሁ ራሳችሁን እንደምትሻሉ ከማሰብ? ስድብን ፈጽሞ አትቀየሙምን? እንዲያውም አትበቀሉምን? በክፉ ፈንታ ክፉን ፈጽሞ አትመልሱምን? ለታካችነት ወይም ምቾትን ለመውደድ ስፍራ አትሰጡምን? ራሳችሁን ትክዳላችሁን? ዕለት ዕለትስ መስቀላችሁን ትሸከማላችሁን? እንደ ቀድሞው ዘወትር በማለዳ ትነሣላችሁን? ለምን አትነሡም? ነፍሳችሁ እንደዚያን ጊዜ አሁንም የከበረች አይደለችምን? ምን ያህል ጊዜ ትጾማላችሁ? ይህ ለቀን ሠራተኛ እንደ ሆነ ለእናንተም ግዴታ አይደለምን? ነገር ግን በዚህ ወይም በሌላ በማንኛውም ነገር ብትጐድሉ ማን ይነግራችኋል? ከእናንተ አንዳች ነገር ተስፋ ከማያደርጉና ከማይፈሩ በቀር ግልጹን እውነት ሊነግራችሁ የሚደፍር ማን ነው? ማንም በግልጽ ሊነግራችሁ ቢደፍር ደግሞ ያን መሸከም ለእናንተ ምንኛ ከባድ ነው! ድሆች ከነበራችሁበት ጊዜ ይልቅ ተግሣጽንና ምክርን ለመቀበል እጅግ ያነሰ ፈቃደኞች አይደላችሁምን? ከእኔ እንኳ ተግሣጽን መሸከም ብትችሉ መልካም ነው፤ በጥቂት ቀናትም ውስጥ ከእንግዲህ አታዩኝም።
ስለዚህ እንደ ገና እላለሁ፤ የቻላችሁትን ሁሉ ካተረፋችሁና ከቈጠባችሁ በኋላ የቻላችሁትን ሁሉ ትሰጣላችሁን? አለዚያ ገንዘባችሁ ሥጋችሁን እንደ እሳት ይበላል፤ ወደ ታችኛውም ሲኦል ያሰጥማችኋል! «በምድር ላይ መዝገብ» ከመሰብሰብ ተጠንቀቁ! ይህ ለቍጣ ቀን ቍጣን ማከማቸት አይደለምን?
ጌታ ሆይ፥ አስጠንቅቄአቸዋለሁ! ነገር ግን ማስጠንቀቂያውን ባይቀበሉ ከዚህ በላይ ምን ማድረግ እችላለሁ? ማድረግ የምችለው «ለልባቸው ምኞት አሳልፌ መስጠትና በገዛ አሳባቸው እንዲሄዱ መተው» ብቻ ነው!
19. ይህን ማስጠንቀቂያ ባለመቀበላቸው ከሜቶዲስቶች ብዙዎቹ አስቀድመው እንደ ወደቁ እርግጥ ነው፤ ብዙዎች በዚህ ጊዜ እንኳ እየወደቁ ናቸው፤ ገናም ብዙዎች እንደሚወድቁ፣ ከእነርሱም አብዛኞቹ ከእንግዲህ እንደማይነሡ ለመፍራት ታላቅ ምክንያት አለ!
ታዲያ ሁሉን የሚያውቅ ጥበበኛው አምላክ የሥራውን መፍረስ ለመጠገን የሚወስደው በምን መንገድ እንደ ሆነ ተስፋ ሊደረግ ይችላል? መቅረዙን ከዚህ ሕዝብ ወስዶ ለጸጋው ይበልጥ ታማኝ የሚሆን ሌላ ሕዝብ ካላስነሣ፣ ባለፈው ጊዜ ባደረገው በዚያው መንገድ ይቀጥል ይሆናል። እስከ አሁንም ድረስ መንገዱ ይህ ነበር፤ ከቀደሙት ሰባኪዎች አንዳንዶቹ ፊተኛውን ፍቅራቸውን በተዉ፣ የልብ ቅንነታቸውንና ቅንዓታቸውን ባጡ፣ ከሥራውም በራቁ ጊዜ፣ እነዚያ ቀድሞ የነበሩትን ሆነው የሚገኙ ወጣቶችን አስነሣ፤ በእነርሱም ፋንታ ወደ መከሩ ላካቸው። ከታማኝ ሠራተኞቹ ማንኛውንም ወደ አብርሃም እቅፍ ሊወስድ በወደደ ጊዜም እንዲሁ አደረገ። ስለዚህ ሄንሪ ሚላርድ፣ ኤድዋርድ ደንስተን፣ ጆን ማነርስ፣ ቶማስ ዋልሽ ወይም ሌሎች ከድካማቸው ባረፉ ጊዜ፣ ያንኑ አገልግሎት ለመፈጸም ፈቃደኞችና ብቁ የሆኑ ሌሎች ወጣቶችን ከጊዜ ወደ ጊዜ አስነሣ። ለሚመጣውም ጊዜ ያንኑ መንገድ የሚወስድ መሆኑ እጅግ የሚቻል ነው። በጌታ የሚሞቱትን ወይም እግዚአብሔር የሰጣቸውን መንፈሳዊ ሕይወት የሚያጡትን ሰባኪዎች ስፍራ ለእግዚአብሔር ሕያዋን በሆኑና ስለ እርሱ መክፈልንና መከፈልን ብቻ በሚመኙ በሌሎች ይሞላዋል።
20. እናንተ ቀድሞ የነበራችሁ ያው ሕይወት፣ ከእግዚአብሔር ጋር ያው ኅብረት፣ ለጉዳዩ ያው ቅንዓት፣ ለነፍሳትም ያው የሚነድድ ፍቅር የሌላችሁ ሰባኪዎች ሁሉ ይህን ስሙ! «ሙሉ ደመወዝን እንድትቀበሉ እንጂ የሠራችሁትን እንዳታጠፉ ለራሳችሁ ተጠንቀቁ።» ከእንግዲህ ዓላማውን እንዳትሸከሙ እግዚአብሔር በቍጣው እንዳይምል ተጠንቀቁ! የጸጋውን ቃል ከአፋችሁ ፈጽሞ እንዲወስድ እንዳይቈጣ! ይህን እርግጠኞች ሁኑ፤ ጌታ እናንተን አያስፈልገውም፤ የእርሱ ሥራ በእናንተ እርዳታ ላይ የተመሠረተ አይደለም። «ከነዚህ ድንጋዮች ለአብርሃም ልጆች ሊያስነሣለት እግዚአብሔር ይችላል» እንደ ተባለ፣ እንዲሁ ከእነዚያው እንደ ልቡ የሆኑ ሰባኪዎችን ሊያስነሣ ይችላል! ፍጠኑ! ከወዴት እንደ ወደቃችሁ አስቡ፤ ንስሐም ግቡ የቀደመውንም ሥራ አድርጉ!
21. እርሱ ያስነሣቸውን ሠራተኞች በወጣትነታቸው ምክንያት ብቻ ብትንቁ፣ ይህ የመከሩን ጌታ ፈጽሞ ወደ ጎን እንዲያስቀምጣችሁ አያስቈጣውምን? ከአርባ እስከ ሃምሳ ዓመታት በፊት እኛ መጀመሪያ በተላክን ጊዜ ይህ በእኛ ላይ በብዛት ይደረግ ነበር። አረጋውያንና ጥበበኞች ሰዎች «እነዚህ ወጣት ራሶች ምን ያደርጋሉ?» ብለው ጠየቁ። በተለይም በዚያን ጊዜ የነበሩት የለንደን ኤጲስ ቆጶስ እንዲሁ አሉ። ታዲያ እኛ የእነርሱን አነጋገር እንውሰድን? አይሁን! እርሱ ማንን እንደሚልክ፣ በራሱ ሥራ ማንን እንደሚቀጥር እኛ እናስተምረዋለንን? እንግዲህ ሰዎቹ እኛ ብቻ ነን? ጥበብስ ከእኛ ጋር ትሞታለችን? የእግዚአብሔር ሥራ በእኛ ላይ የተንጠለጠለ ነውን? እንዳይነጥቃችሁና የሚያድን እንዳይኖር በእግዚአብሔር ፊት ራሳችሁን አዋርዱ!
22. እንግዲህ በአንድ ወቅት በመልካም ይሮጡ የነበሩ ሺህ የሚቈጠሩ ሕዝብ አንዱ ከሌላው ቀጥሎ «ወደ ጥፋት ባፈገፈጉ» ጊዜ፣ በእነዚህ አርባ አምስት ዓመታት የእግዚአብሔር ጥበብ የወሰደው መንገድ ምን እንደ ሆነ ቀጥለን እንመልከት። እንዲህ ነው፤ ከድሆቹ ማንም የተቀበሉት ዘር የማያፈራ እስኪሆን ድረስ በዓለማዊ አሳብ በተዋጠ ቍጥር፣ ከባለ ጠጎቹም ማንም ለዓለም ፍቅር፣ ለሞኝና ለጎጂ ምኞቶች፣ ወይም ከባለጠግነት ሊለዩ ከማይችሉት ስፍር ቍጥር ከሌላቸው ከእነዚያ ፈተናዎች ለማንኛውም ስፍራ በመስጠት ወደ ጥፋት ባፈገፈገ ቍጥር፣ እግዚአብሔር ከጊዜ ወደ ጊዜ እነርሱ ያጡትን መንፈስ የተሰጣቸውን ሰዎች ዘወትር አስነሥቷል፤ እንዲያውም ይህ ለውጥ በአብዛኛው በታላቅ ጥቅም ተደርጓል፤ የኋለኞቹ (በአብዛኛው) ከፊተኞቹ በቍጥር የበዙ ብቻ ሳይሆኑ፣ ከእነርሱ ምሳሌ ተምረው ይበልጥ ንቁዎች፣ ይበልጥ መንፈሳውያን፣ ይበልጥ ሰማያዊ አሳብ ያላቸው፣ ይበልጥ ቀናተኞች፣ ለእግዚአብሔር ይበልጥ ሕያዋን፣ በዚህ በታች ላለው ነገር ሁሉ ደግሞ ይበልጥ ሙታን ነበሩና።
23. እግዚአብሔርም ይመስገን፤ አሁን በመንግሥቱ በተለያዩ ክፍሎች ያንኑ ነገር እያደረገ እንደ ሆነ እናያለን። ከጽናታቸው በወደቁት ወይም በዚህ ቀን በመውደቅ ላይ ባሉት ስፍራ ከድንጋዮቹ ለአብርሃም ሌሎች ልጆችን ዘወትር ያስነሣል። ይህንንም በራሱ ፈቃድ በዚህም ሆነ በዚያ ስፍራ ያደርገዋል፤ ሕያው የሚያደርገውን መንፈሱን እንደ ወደደ በዚህ ወይም በሌላ ሕዝብ ላይ ያፈስሳል። በየዕድሜውና በየማዕረጉ ያሉትን፣ ጐበዛዝትንና ቈነጃጅትን፣ ሽማግሌዎችንና ሕፃናትን «ከጨለማ ወደሚደነቅ ብርሃኑ የጠራቸውን የእርሱን በጎነት እንዲናገሩ፥ የተመረጠ ትውልድ፥ የንጉሥ ካህናት፥ ቅዱስ ሕዝብ፥ ለርስቱ የተለየ ወገን» እንዲሆኑ እያስነሣ ነው። ታላቁ ተስፋ እስኪፈጸም ድረስ፣ «ውኃ ባሕርን እንደሚከድን ምድር የእግዚአብሔርን ክብር በማወቅ እስክትሞላ፤ እስራኤል ሁሉ እስኪድን፥ የአሕዛብ ሙላት እስኪገባ ድረስ» እንዲህ ማድረጉን እንደሚቀጥል የምንጠራጠርበት ምክንያት የለንም።
24. ታዲያ በብዙ ዓይነት ፈተና ሥር የሰመጡት ሁሉ ከእንግዲህ ሊነሡ እስከማይችሉ ድረስ ወድቀዋልን? ጌታ ሁሉንም ለዘላለም ጥሎአቸዋልን? ከእንግዲህስ አይለመንምን? የተስፋ ቃሉ ለዘላለም ፈጽሞ አልቋልን? ይህን እንድናረጋግጥ እግዚአብሔር አያድርገው! በእርግጥ ክህደታቸውን ሁሉ ሊፈውስ ይችላል፤ በእግዚአብሔር ዘንድ የሚሳነው ቃል የለምና። ደግሞስ ፈቃደኛ አይደለምን? እርሱ «እግዚአብሔር ነው እንጂ ሰው አይደለም፤ ስለዚህ ርኅራኄው አያልቅም»። ከከሃድያን ማንም ተስፋ አይቍረጥ። «ወደ እግዚአብሔር ተመለሱ፥ እርሱም ይምራችኋል፤ ወደ አምላካችንም ተመለሱ፥ ይቅርታን ያበዛልና።»
እስከዚያው ድረስ ጌታ አሁን ስፍራቸውን ለምትይዙት ለእናንተ እንዲህ ይላል፦ «ፍራ እንጂ የትዕቢትን ነገር አታስብ!» «እግዚአብሔር» ለታላላቅ ወንድሞችህ «ካልራራላቸው»፣ «ለአንተ ደግሞ እንዳይራራልህ ተጠንቀቅ!» በባርነት በሚያሠቃይ ፍርሃት ሳይሆን፣ ከእነዚያው ፈተናዎች በአንዱ፣ በዓለም አሳብም ቢሆን፣ በባለጠግነት ማታለልም ቢሆን፣ ወይም በሌላ ነገር ምኞት እንዳትወድቅ ፍራ። በሥጋ እስካላችሁ ድረስ ምናልባት በአሥር ሺህ በተለያዩ መንገዶች ትፈተናላችሁ፤ ነገር ግን መትጋትንና መጸለይን እስከቀጠላችሁ ድረስ «ወደ ፈተና» አትገቡም። ጸጋው እስከ አሁን በቂያችሁ ሆኗል፤ እስከ መጨረሻውም እንዲሁ ይሆናል።
25. ወንድሞች ሆይ፥ እግዚአብሔር በሰይጣን ተንኰልና ለዲያብሎስ ማታለልና ክፋት ስፍራ በሚሰጡ ሰዎች ታማኝነት ማጣት ምክንያት በፈረሰበት ስፍራ ሁሉ ይህን የጸጋ ሥራ በመጠገን በምድር ላይ የሚሠራበትን መንገድ በዚህ አጭርና አጠቃላይ ንድፍ ታያላችሁ። አሁን የራሱን ሥራ በዚህ መንገድ እያካሄደ ነው፤ እስከ ዘመን ፍጻሜም እንዲሁ ያደርጋል። በተፈጥሮው ዓለም እንደ ሆነ በመንፈሳዊውም ዓለም የአሠራሩ መንገድ ምንኛ በሚያስደንቅ ሁኔታ ግልጽና ቀላል ነው! ይኸውም የአሠራሩ አጠቃላይ ዕቅድ፣ የፈረሰውን ማንኛውንም ነገር የመጠገኑ ዕቅድ። ስፍር ቍጥር ስለሌላቸው ዝርዝር ነገሮች ግን አሁንም እንዲህ ብለን መጮኽ አለብን፦ «ጥልቀቱ እንዴት ነው! ምክሩ ምንኛ የማይመረመር ነው፥ ለመንገዱም ፍለጋ የለውም!»