በልዩ ልዩ አጋጣሚዎች የተሰበኩ ስብከቶች
የእግዚአብሔርን ቃል ስለ መበረዝ

ምዕራፍ 137 · 8 ደቂቃ ንባብ · 10 ደቂቃ ማዳመጥ

የእግዚአብሔርን ቃል ስለ መበረዝ

ስብከት 136

የእግዚአብሔርን ቃል ስለ መበረዝ 148148በ1728 ገደማ የተሰበከ

«የእግዚአብሔርን ቃል ቀላቅለው እንደሚሸቃቅጡት እንደ ብዙዎቹ አይደለንምና፤ በቅንነት ግን ከእግዚአብሔር እንደ ተላክን በእግዚአብሔር ፊት በክርስቶስ ሆነን እንናገራለን።»

2ኛ ቆሮንቶስ 2:17።

[1.] ሰባኪ በሚሰሙት ሰዎች ዘንድ እንዲሳካለት ስለ ቅንነቱ ካለ አጠቃላይ መልካም አመለካከት የበለጠ የሚረዳው ነገር እንደሌለ ብዙዎች አስተውለዋል። ከዚህ የበለጠ የማሳመን ኃይል የሚሰጠው ነገር የለም፤ በሰሚዎቹ ዘንድ የበለጠ ትኩረትን ወይም ለመታረም የበለጠ ዝንባሌን የሚፈጥር ነገርም የለም። በግልጥ በዓይኑ ፊት ከያዘው ዓላማ በቀር በመናገሩ ሌላ ዓላማ እንደሌለው፣ ያንንም ዓላማ ለማግኘት የሚወስዳቸውን እርምጃዎች ሁሉ እንዲያዩ ፈቃደኛ እንደ ሆነ በእውነት ሲያምኑ፣ — የሚፈልገውም ነገር ሆነ የሚፈልግበት መንገድ መልካም እንደ ሆነ ጽኑ ግምት ሊሰጣቸው ግድ ነው።

[2.] ነገር ግን ይህን እምነት በልባቸው እንዴት ማሳደር እንደሚቻል ጥያቄው እርሱ ነው። እነርሱ ራሳቸው ልብ ካላሉት፣ ቅንነታችንን እንዲያስተውሉ እንዴት እናደርጋቸዋለን? የተለመደ ቢሆንም አንድ መልካም መንገድ በግልጥና ያለ መሸፋፈን መናዘዝ ነው። በእነዚህ ምስክርነቶች ውስጥ ከልብ በሚወጡበት ጊዜ ወደ ሌሎች ልብ አጥብቆ ሰርጎ የሚገባ አንድ ነገር አለ። የሚሰሟቸው ማንኛውም ዓይነት ልግስና ያላቸው ሰዎች ሊያምኗቸው ግድ እንደ ሆነባቸው ሆኖ ይሰማቸዋል፤ የማያምኗቸውም እንኳ አለማመናቸውን እንዳይገልጡ በጥበብ ይገደዳሉ፤ ምክንያቱም፣ — ማንኛውም ሰው ይበልጥ ታማኝ በሆነ መጠን ሌላውን ለመጠርጠር ያለው ዝንባሌ ያንሳል፣ የሚለው የታወቀ ሕግ ነውና። ከዚህም የሚከተለው ግልጥ ነው፦ ያለ ማስረጃ የባልንጀራውን ቅንነት የሚጠራጠር ሁሉ፣ የእርሱን ልብ በራሱ ልብ ሐሰተኛነት እንደሚመዝን ተገቢ የሆነ ማስረጃ ይሰጣል።

[3.] አንድ ሰው የሚሠራባቸውን መርሆዎች በግልጥና ያለ መሸፋፈን ገልጦ ሳለ፣ ሌላው ያለ ማስረጃ ታማኝነት እንደሚጎድለው ቢጠረጥረው፣ ማንም ሰው የዚህን ተጠራጣሪ ታማኝነት ለመጠርጠር አይፈተንምን? በእርግጥ ራሱ የእግዚአብሔርን ቃል የሚበርዝ ወይም ቢበረዝ የሚመኝ ሰው ካልሆነ በቀር፣ ቅዱስ ጳውሎስን ይህን ያደርጋል ብሎ፣ ወይም ከእርሱ በኋላ ይህን የልግስና መግለጫውን የሚጠቀመውን ማንንም በቀላሉ ሊጠረጥር የሚችል የለም፦ «የእግዚአብሔርን ቃል ቀላቅለው እንደሚሸቃቅጡት እንደ ብዙዎቹ አይደለንምና፤ በቅንነት ግን ከእግዚአብሔር እንደ ተላክን በእግዚአብሔር ፊት በክርስቶስ ሆነን እንናገራለን።»

[4.] ይህ ማለት ግን ሐዋርያው፣ ወንጌልን በመስበክ የሚከተሉት ሰዎች ከሚሹት ባልበለጠ መጠን፣ ሰዎች በቃሉ ብቻ ፈጽመው እንዲታመኑ ይሻል ማለት አይደለም፤ ከዚያ በኋላ ቃሉን ለማጽናት ወደ ሥራው ይጠቁማልና። በዚህም እርሱን መምሰል የሚችሉ ሰዎች ቅንነታቸውን እንዲያምኑ ሰዎችን መለመን አያስፈልጋቸውም። ከቃላችን ጋር ሥራችንም ማኅተሙን የያዘ ከሆነ፣ ሁለቱ አብረው እጅግ ጮክ ብለውና በግልጥ ስለሚናገሩ፣ አድሎ የሌለበት ሰው ሁሉ በቅንነት እንደ ሆነ በክርስቶስ ሆነን እንደምንናገር፣ ይህንም በማድረጋችን ተልእኮውን በተሸከምነው በዚያ አምላክ ፊት እንዳለን እንደምናስብ ሊያስተውል ግድ ነው።

[5.] ሐዋርያው በተቃራኒው ድርጊት፣ የእግዚአብሔርን ቃል በመበረዝ፣ የሚከሳቸው ሰዎች አይሁድ የነበሩ ይመስላሉ፤ እነርሱም ኢየሱስ ክርስቶስ እንደ ሆነ፣ ወንጌሉም መለኮታዊ እንደ ሆነ እየመሰከሩ፣ ከሙሴ ሕግና ከራሳቸው ወጎች ጋር በመቀላቀል በረዙት። ይህንንም ሲያደርጉ ዋነኛ ዓላማቸው ክርስቶስን የጥቅም ማግኛ ማድረግ ነበር፤ ይህም በመሆኑ ያሰቡትን ዓላማ፣ እንዲሁም ያንን ለማግኘት የተጠቀሙበትን መንገድ የመደበቅ ግዴታ ጣለባቸው። በተቃራኒው የሰው ልጆችን መልካም ነገር የሚያስቡ ሰዎች ሐሳባቸውን ለመደበቅ በምንም መንገድ አይጨነቁም። በመናገራችን የምናስበው ጥቅም ለራሳችን ከሆነ፣ በስውር መያዙ ብዙ ጊዜ ይጠቅመናል። የምናስበው ጥቅም ለሌሎች ከሆነ ግን፣ ይፋ ማድረጉ ዘወትር ይጠቅመናል፤ የእግዚአብሔርን ቃል የሚበርዙት እነማን እንደ ሆኑ፣ በቅንነትም የሚሰብኩት እነማን እንደ ሆኑ በግልጥ የሚታወቅባቸውን የመለያ ምልክቶች ይፋ ማድረግም ለራሳችንም ለሌሎችም ይጠቅማል።

[I. 1.] የእግዚአብሔርን ቃል የሚበርዝ ሰው የመጀመሪያውና ታላቁ ምልክት በቃሉ ውስጥ የሰውን ድብልቅ ማስገባቱ ነው፤ ወይም የሌሎችን ስሕተቶች [ኑፋቄዎች]፣ ወይም የገዛ አእምሮውን ቅዠቶች። ይህን ማድረግ ቃሉን እስከ መጨረሻው ደረጃ መበረዝ ነው፤ ለዲያብሎስ አፍ ብቻ የሚገባቸውን ርኩሳን ሕልሞች ከእግዚአብሔር ቃላት ጋር መቀላቀል ነው! ይሁን እንጂ ይህ እጅግ ብዙ ጊዜ ስለ ተደረገ፣ የተፈለሰፈ ወይም ተቀባይነት ያገኘ ማንኛውም የተሳሳተ [የኑፋቄ] አስተያየት ቅዱሳት መጻሕፍት እርሱን ለመከላከል ሳይጠቀሱ የቀሩበት ጊዜ የለም ለማለት ይቻላል። [2.] ማታለሉ እጅግ ግልጥ በሆነ ጊዜ፣ ለእርሱ የተጠቀሰውም ጥቅስ ተቃራኒውን እንደሚደግፍ ወይም ከጉዳዩ ጋር ምንም ግንኙነት እንደሌለው እጅግ ግልጥ ሆኖ በታየ ጊዜ፣ ቃሉን የሚበርዙበት ሁለተኛ መንገድ፣ ማለትም ከሐሰተኛ ትርጓሜዎች ጋር ማቀላቀል፣ በአብዛኛው ተግባር ላይ ውሏል። ይህም አንዳንድ ጊዜ ቃላቱን በስሕተት በመጥቀስ፣ አንዳንድ ጊዜም በትክክል ጠቅሶ የተሳሳተ ትርጉም በመስጠት ይደረጋል፤ ይህም ትርጉም ወይ የተጐተተና ተፈጥሯዊ ያልሆነ፣ ወይ ቃላቱ በተወሰዱበት ስፍራ ከጸሐፊው ሐሳብ እንግዳ የሆነ ነው፤ ምናልባትም በዚያው ስፍራ ካለው ሐሳቡ ወይም በሌላ የጽሑፎቹ ክፍል ከሚናገረው ጋር የሚቃረን ነው። ይህም በቀላሉ ይፈጸማል፤ ማንኛውም ክፍል ከቀደሙትም ሆነ ከተከተሉት ቁጥሮች ተለይቶ ብቻውን ሲጠቀስ በቀላሉ ይጣመማል። በዚህ መንገድ ብዙ ጊዜ አንድ ትርጉም ያለው ሊመስል ይችላል፤ ከፊቱ ያለውንና ከኋላው የሚከተለውን ስናስተውል ግን በእውነት ፈጽሞ ተቃራኒ ትርጉም እንዳለው ግልጥ ይሆናል። ይህን ባለማስተዋል ምክንያት፣ የሚሰብኩትን በዚህ መንገድ ለመበረዝ፣ በቀላሉም እንዲዋጥ አልፎ አልፎ አሳማኝ የሚመስል ማብራሪያ ለመጨመር በቂ ክፋትና ተንኮል ባላቸው ሰዎች እጅ በወደቁ ጊዜ ሁሉ፣ ያልተጠነቀቁ ነፍሳት በትምህርት ነፋስ ሁሉ ወዲያና ወዲህ ለመንሳፈፍ የተጋለጡ ናቸው።

[3.] የእግዚአብሔርን ቃል የሚበርዙ ሦስተኛው ዓይነት ሰዎች፣ ከቀደሙት ከሁለቱ ባነሰ ደረጃ ቢሆንም፣ በቃሉ ላይ በመጨመር ሳይሆን ከእርሱ በማጉደል የሚበርዙት ናቸው፤ ለስላሳ ነገሮችን ብቻ ለመተንበይ ሲጣጣሩ ከመንፈሱ ወይም ከይዘቱ የሚያጐድሉ፣ ስለዚህም የሚሰብኩትን ከሰሚዎቹ ጣዕም ጋር ለማስማማት የሚያለዝቡትና የሚያስጌጡት ናቸው። ይህንንም የተሻለ ለማድረግ፣ ምንም ማስጌጥ የማይቀበሉትን ክፍሎች በአብዛኛው ይተዋሉ። ለዓላማቸው የማይታጠፉትን፣ ወይም ባሉበት ስፍራ የነገሡትን ክፋቶች እጅግ በግልጥ የሚነኩትን ግትር ጥቅሶች እጃቸውን ታጥበው ይርቋቸዋል። እነዚህንም በይበልጥ ለስላሳና ታዛዥ በሆኑ፣ ለማስቀየም ቶሎ በማይጋለጡ ጥቅሶች ይለውጧቸዋል። በአጠቃላይ በኃጢአተኞች ላይ ስለ ታወጀው መከራና ጭንቀት አንድም ቃል መነገር የለበትም፤ እግዚአብሔር እውነተኛ ከሆነ ራሳቸው ያወቋቸውን ብዙ የተለዩ በደሎች ስለሚጠብቀው ስለማይጠፋው እሳትማ ጭራሽ አይነገርም። ራሳቸውን በሰዎች ዘንድ ተወዳጅ ለማድረግ የሚጣጣሩ ሰዎች እነዚህን ስሱ ክፍሎች ያለ አደጋ ሊነኳቸው አይችሉም፤ ቢነኳቸውም እጅግ በጥንቃቄና ብልህ ማምለጫ በእጃቸው አስቀምጠው መሆን አለበት። ነገር ግን ከእጃቸው በራቁ ሰዎች ላይ፣ ከሚሰሟቸውም ማንም ይፈጽማቸዋል ብለው በማያስቡአቸው ኃጢአቶች ላይ ያለ ስጋት ሊያንጐደጕዱ ይችላሉ። ራሱ በማይመለከተው ድርጊት መጋለጡን ሲሰማ ማንም ልቡ አይነካም። ነገር ግን ምቱ ቤቱ ሲደርስ፣ የራሱንም ጉዳይ ሲነካ፣ ያን ጊዜ ባይወቀስ እንኳ ይከፋዋል፣ ወይም ይቈጣል፣ ትዕግሥቱም ያልቅበታል።

እነዚህ በእግዚአብሔር ፊት ሳይሆን በሰዎች ፊት የሚሠሩ የቃሉ በራዦች መንገዶች ናቸው። እርሱ ልቦችን ይመረምራል፤ ከንፈሮች ብቻ የሚሳተፉበትንም አገልግሎት አይቀበልም። የእነርሱ ቃላት ግን ከሐሳባቸው ጋር ምንም ግንኙነት የላቸውም። ቢኖራቸውም አይመቻቸውም። እውነተኛ ሐሳባቸው አንድ ጊዜ ቢገለጥ ኖሮ ራሱን ውጤት አልባ ማድረጉ አይቀርም ነበርና። እውነት ነው፣ በክርስቶስ ወንጌል መልካም ነገርን ለማድረግ ያስባሉ፤ ነገር ግን ለራሳቸው እንጂ ለሌሎች አይደለም። ወንጌልን በመስበክ ቅንነትን የሚጠቀሙ ግን የራሳቸውን መልካም ነገር በሌሎች መልካም ነገር ውስጥ ይፈልጋሉ። ቅኖች እንደ ሆኑ፣ ተልእኮውንም በተሸከሙለት በእርሱ ፊት እንደ ተሾሙ መልእክተኞች እንደሚናገሩ፣ በድርጊታቸውና ከላይ በተገለጹት አስመሳዮች ድርጊት መካከል ካለው ቀጥተኛ ተቃርኖ በግልጥ ይታያል።

[II. 1.] በመጀመሪያ፦ የሚሰብኩት የገዛ ራሳቸውን ቃል ሳይሆን የላካቸውን የእርሱን ቃል እንደ ሆነ አስቡ። ያልተበረዘና ያልተቀላቀለ አድርገው ይሰብኩታል። «ማንም በእግዚአብሔር ቃል ላይ አንዳች ቢጨምር እግዚአብሔር በእርሱ የተጻፉትን መቅሠፍቶች ሁሉ ይጨምርበታል» ብለው የሚመሰክሩ ብቻ ሳይሆኑ በእውነትም ስለሚያምኑ፣ በጥቂቱ እንኳ ይህን ከማድረግ ይፈራሉ። ወንጌልን ከእነርሱ ዘንድ ታገኙታላችሁ፤ በውበቱ ያነሰ አቀራረብ ቢሆንም ንጹሕና እንዳለ ሆኖ፣ የሚያረክሰው የስሕተቶች [የኑፋቄ] ድብልቅ ወይም የሚያደናግረው የተሳሳተ ትርጓሜ ሳይኖርበት፤ [2.] በጥያቄ ውስጥ ካለው ስፍራ በፊት በሚገኘውና ከእርሱ በኋላ በሚከተለው ነገር እጅግ ተፈጥሯዊና ግልጥ በሆነ መንገድ ተብራርቶ፣ ለስሕተትም ሆነ ለመበረዝ እጅግ ባልተጋለጠው በእርግጠኛው መንገድ፣ ማለትም ያንኑ ነገር ይበልጥ በግልጥ የሚገልጡትን ተመሳሳይ ክፍሎች በማቅረብ ተተርጕሞ ታገኙታላችሁ።

[3.] በሚቀጥለውም፣ በሚሰብኩት ቃል ላይ ከመጨመር እንደሚጠነቀቁ ሁሉ ከእርሱ ከማጉደልም ይጠነቀቃሉ። በማን ፊት እንደ ቆሙ ሲያስቡ፣ እርሱ ከመደበላቸው በላይ [ወይም] በታች ለመናገር አይደፍሩም። ተገቢ አጋጣሚ በተገኘ መጠን በእግዚአብሔር ቃላት ውስጥ ያለውን ሁሉ ማወጅ አለባቸው፤ ለስላሳ ቢሆንም ባይሆንም ምንም ለውጥ አያመጣም፤ ያለ ጥርጥር እውነተኛ፣ ደግሞም ጠቃሚ ነውና፦ «የእግዚአብሔር መንፈስ ያለበት መጽሐፍ ሁሉ ለትምህርትና ለተግሣጽ ልብንም ለማቅናት በጽድቅም ላለው ምክር ይጠቅማል»፤ — ይኸውም ምን ማመን ወይም ምን ማድረግ እንዳለብን ሊያስተምረን፣ ወይም ስሕተትን ለማስረዳትና ክፋትን ለማረም ነው። በእርሱ ውስጥ፣ እምነትን ወይም ተግባርን በሚመለከት፣ ትርፍ የሆነ ነገር እንደሌለ ያውቃሉ፤ ስለዚህም ክፍሎቹን ሁሉ ይሰብካሉ፤ ባሉበት ስፍራ ይበልጥ በተለየ ሁኔታ የሚያስፈልጉትን ክፍሎች ግን ይበልጥ በተደጋጋሚና በተለየ ሁኔታ ይሰብካሉ። እግዚአብሔር በመግቦቱ በመደበላቸው ስፍራ አንድ ክፋት በዘመኑ ልማድ ስለ ሆነና የተከበረ ስለ ሆነ በእርሱ ላይ ከመናገር መቆጠብ ይቅርና፣ በዚያው ምክንያት በእርሱ ላይ በመመስከር ይበልጥ ይቀናሉ። በተመደቡበት ስፍራ አንዲት በጎነት በዘመኑ ልማድ ስላልሆነችና የተናቀች ስለ ሆነች ስለ እርሷ ከመናገር መቆጠብ ይቅርና፣ ስለዚያው ምክንያት ይበልጥ በብርቱ ይመክሯታል።

[4.] በመጨረሻም፦ በቅንነትና በላካቸው በእርሱ ፊት እንዳሉ ሆነው የሚናገሩ ሰዎች፣ ይህን እንደሚያደርጉ በአነጋገራቸው ያሳያሉ። በግልጥነትና በድፍረት ይናገራሉ፤ ትምህርታቸውንም ከሰዎች ጣዕም ጋር ለማስማማት ለማለዘብ አይጨነቁም። ደስ የሚያሰኝ ቢሆንም ባይሆንም ዘወትር በእውነተኛ ብርሃን ሊያቀርቡት ይጥራሉ። ዛቻን ኃይሉን እስኪጎዳ ድረስ አያለዝቡትም፤ አይደፍሩምም፤ ኃጢአትንም የተፈጥሮ ጥቁረቱን እስኪያደበዝዝ ድረስ በለዘቡ ቀለማት አይስሉትም። ይህ ማለት ግን ገርነት ውጤታማ ሊሆን በሚችልበት ጊዜ ገርነትን አይመርጡም ማለት አይደለም። «የጌታን ፍርሃት» ቢያውቁም፣ ይልቁንም «ሰዎችን ማስረዳት» ይሻሉ። ይህን ዘዴ ሊረዱ ከሚችሉት ሰዎች ጋር ይጠቀሙበታል፤ መጠቀሙንም ይወዳሉ። ሊረዱ ከማይችሉት ጋር ግን፣ ታማኞች መሆን ከፈለጉ፣ ይበልጥ ጠንካራውን መንገድ ለመያዝ ይገደዳሉ። ተሳዳቢዎቹ ይህን ራሳቸው ይዩት፤ እነርሱን አይጎዳቸውም፤ ይህን በማድረጋቸውም ቢወቀሱ ወይም ቢሰደቡ፣ ተሳዳቢዎቹ ይህን ራሳቸው ይዩት፦ ሰሚዎቹ ራሳቸውን ከቃሉ ጋር ያስማሙ፤ ቃሉ በዚህ መልኩ ከሰሚዎቹ ጋር የሚስማማ አይደለም። የቃሉ ሰባኪ በአንድ በኩል በባርነት መሰል ተለማማጭነት፣ በሌላው በኩል ደግሞ ርኅራኄ በሌለው ጭካኔ ሁለቱም እኩል በደለኛ ይሆናል።

[III. 1.] እንግዲህ የእግዚአብሔርን ቃል፣ ያልተበረዘውንና ያልተቀላቀለውን እውነተኛውን የእግዚአብሔርን ቃል፣ ያንንም ብቻ ተናግረን ከሆነ፤ ከተፈጥሮ ውጭ የሆነ ትርጓሜ ሳንሰጠው፣ የታወቁትን አባባሎች በተለመደውና ግልጥ በሆነው ትርጉማቸው [ወስደን]፣ — ብዙም ባልታወቁ ጊዜ መጽሐፍን በመጽሐፍ አብራርተን ከሆነ፤ አጋጣሚ በተገኘ መጠን ቃሉን በሙሉ ተናግረን ከሆነ፣ ይልቁንም በዘመኑ ልማድ የሆነን ክፋት ለመግታት ወይም በዘመኑ ልማድ ያልሆነን በጎነት ለመበረታታት እጅግ ተገቢ የመሰሉትን ክፍሎች፤ ይህንንም ጉዳዩ በሚፈቅደው ገርነትና ለስላሳነት ሁሉ ቢሆንም በግልጥና በድፍረት አድርገን ከሆነ፤ — እንግዲያስ ቃላችንን ባታምኑ ሥራችንን እመኑ፤ ወይም ይልቁንም ሁለቱንም አብራችሁ እመኑ። ሰባኪ ሊያደርግ የሚችለው ይህ ብቻ ነው፤ ስለ መልካም ሐሳቡ ሊሰጥ የሚችለው ወይም ሊሰጥ የሚያስፈልገው ማስረጃ ሁሉ ይህ ነው። በቅንነት፣ በጌታ እንደ ተላከ፣ በፊቱም እንዳለ ሆኖ እንደሚናገር የሚያሳይበት ከዚህ በቀር ሌላ መንገድ የለም። ከዚህ ሁሉ በኋላ የምንደክመው ለራሳችን ጉዳይ ሳይሆን ለእርሱ ጉዳይ እንደ ሆነ፣ በመናገራችን የመጀመሪያው ዓላማችን ወደ ደስታ የሚወስደውን መንገድ ልናሳየውና ወደ መከራ ከሚመራው ሰፊ ጐዳና ልናላቅቀው እንደ ሆነ የማያምን ሰው ቢኖር፣ እኛ ከዚያ ሰው ደም ንጹሓን ነን፤ — ደሙ በራሱ ላይ ነው። የአገራችንን ሰዎችና የወንድሞቻችንን ነፍሳት የምንጠብቅ ጕበኞች አድርጎ ያቆመን ጌታ እንዲህ ይላልና፦ «ኃጢአተኛውን ከመንገዱ ይመለስ ዘንድ ብታስጠነቅቀው፤» — ማስጠንቀቂያው ከእግዚአብሔር እንደ ሆነ ልናሳምነው የሚቻለንን መንገድ ሁሉ ብንጠቀምማ እንዴት ይልቅ፤ — «እርሱም ከመንገዱ ባይመለስ፥» — እኛ ከልብ መሆናችንን ካላመነ በእርግጥ አይመለስም፤ — «እርሱ በኃጢአቱ ይሞታል፤ አንተ ግን ነፍስህን አድነሃል።» [የክፍሎቹ ቍጥሮች (እንዲሁም ይበልጥ ጉልህ የሆኑ የጽሑፍ ልዩነቶችን የሚያሳዩ ሌሎች በቅንፍ የገቡ ጭማሪዎች) የሁለት መቶኛ ዓመት እትምን ይከተላሉ።]

ጨርሰዋል፦ የእግዚአብሔርን ቃል ስለ መበረዝ

ቀዳሚ ቀጣይ