ምዕራፍ 108 · 16 ደቂቃ ንባብ · 21 ደቂቃ ማዳመጥ
ስለ እግዚአብሔር የወይን ቦታ
ስብከት 107
ስለ እግዚአብሔር የወይን ቦታ
«በወይኔ ያላደረግሁት፥ ደግሞ ላደርግለት የሚገባኝ ምን ነበር? ወይንን ያፈራል ብዬ ስጠብቅ ስለ ምን ሆምጣጣ አፈራ?»
ኢሳይያስ 5:4
የጌታ የወይን ቦታ፣ ቃሉን በሰፊው ትርጉሙ ብንወስደው፣ መላውን ዓለም ሊያጠቃልል ይችላል። የምድር ነዋሪዎች ሁሉ በአንድ መልኩ «የጌታ የወይን ቦታ» ሊባሉ ይችላሉ፤ «የሰውን ወገን ሁሉ በምድር ፊት ሁሉ ላይ እንዲኖሩ የፈጠረ፥ ምናልባት እየፈለጉ ያገኙት እንደ ሆነ ጌታን ይፈልጉ ዘንድ» ያደረገው እርሱ ነውና። ነገር ግን በጠበበ ትርጉሙ የጌታ የወይን ቦታ ክርስቲያናዊውን ዓለም ማለትም የክርስቶስን ስም የሚጠሩትንና ቃሉን እንታዘዛለን ብለው የሚናገሩትን ሁሉ ሊያመለክት ይችላል። ከዚህም ይበልጥ በጠበበ ትርጉም የክርስቲያን ቤተ ክርስቲያን የተሐድሶ ክፍል ተብሎ የሚጠራውን ሊያሳይ ይችላል። ከሁሉ ይበልጥ በጠበበው ትርጉም ደግሞ አንድ ሰው «የጌታ የወይን ቦታ» በሚለው አነጋገር በተለምዶ ሜቶዲስቶች የሚባሉትን ሕዝብ ሊያመለክት ይችላል። እኔም አሁን በዚህ ትርጉም እረዳዋለሁ፤ በዚህም በ1729 ዓመት በኦክስፎርድ የጀመረውንና እስከ ዛሬ ድረስ በአንድነት የጸናውን ያንን ማኅበር ብቻ ማለቴ ነው። ቃሉን በዚህ ትርጉም ተረድቼ እግዚአብሔር ለነቢዩ ያቀረበውን ጥያቄ እደግመዋለሁ፦ «በወይኔ ያላደረግሁት፥ ደግሞ ላደርግለት የሚገባኝ ምን ነበር? ወይንን ያፈራል ብዬ ስጠብቅ ስለ ምን ሆምጣጣ አፈራ?»
እግዚአብሔር በዚህ በወይን ቦታው ያላደረገውን፣ ደግሞ ሊያደርግለት የሚችለው ምን ነበር? (ታላላቅ ቅርንጫፎችን አውጥቶ በምድር ላይ እንዲሰፋ አስቦት ነበር እንበል፤)
I. ከትምህርት አንጻር፤
II. ከመንፈሳዊ እርዳታዎች አንጻር፤
III. ከሥነ ሥርዓት አንጻር፤ እና
IV. ከውጫዊ ጥበቃ አንጻር።
እነዚህ ነገሮች ከታዩ በኋላ ደግሞ «ወይንን ያፈራል ብሎ ሲጠብቅ ስለ ምን ሆምጣጣ አፈራ?» የሚለውን በአጭሩ እመረምራለሁ።
I. 1. በመጀመሪያ፦ እግዚአብሔር በዚህ በወይን ቦታው ያላደረገው፣ ሊደረግ ይችል የነበረው ምንድር ነው? ከትምህርት አንጻር ከዚህ በላይ ምን ሊደረግ ይችል ነበር? ከመጀመሪያው ጀምሮ፣ አራት ወጣቶች በአንድነት ከተባበሩበት ጊዜ አንሥቶ፣ እያንዳንዳቸው ሆሞ ኡኒዩስ ሊብሪ፣ — «የአንድ መጽሐፍ ሰው» ነበሩ። እግዚአብሔር ሁሉንም «ቃሉን ለእግራቸው መብራት፥ ለመንገዳቸውም ሁሉ ብርሃን» እንዲያደርጉ አስተማራቸው። ስለ ጠባያቸው፣ ስለ ቃላቸውና ስለ ሥራቸው ሁሉ አንድ፣ አዎን አንድ ብቻ የፍርድ መመሪያ ነበራቸው፤ እርሱም የእግዚአብሔር ቃላት ነው። ሁሉም በአንድነት የመጽሐፍ ቅዱስ ክርስቲያኖች ለመሆን ቈርጠው ነበር። በዚሁ ነገር ዘወትር ይነቀፉ ነበር፤ አንዳንዶች በፌዝ «የመጽሐፍ ቅዱስ አክራሪዎች» ይሉአቸው ነበር፤ ሌሎች ደግሞ «የመጽሐፍ ቅዱስ ብሎች» ይሉአቸው ነበር፤ ብሎች ልብስን እንደሚበሉ መጽሐፍ ቅዱስን ይበላሉ ይሉ ነበርና። በእውነትም እስከ ዛሬ ድረስ እንደ እግዚአብሔር ቃላት ማሰብና መናገር የዘወትር ጥረታቸው ነው።
2. እርግጥ ነው፣ አንድ ምሁር ዶ/ር ትራፕ ገና መንገዳቸውን እንደ ጀመሩ ስለ እነርሱ እጅግ የተለየ ዘገባ ሰጡ። ዶክተሩ እንዲህ አሉ፦ «እነዚህን ሁለት መጻሕፍት፣ ‹ስለ ክርስቲያናዊ ፍጽምና የተጻፈ ድርሰት›ን እና ‹ወደ ቅዱስ ሕይወት የቀረበ ጥብቅ ጥሪ›ን ባየሁ ጊዜ፣ እነዚህ መጻሕፍት በእርግጥ ጉዳት ያደርሳሉ ብዬ አሰብሁ። እንደዚያም ሆነ፤ ወዲያው ከዚያ በኋላ ሜቶዲስቶች ብቅ አሉና። ስለዚህ እርሱ (አቶ ሎው) ወላጃቸው ነበር።» ይህ ፈጽሞ እውነት ባይሆንም ጥቂት እውነት ነበረበት። ሜቶዲስቶች ሁሉ እነዚህን መጻሕፍት በጥንቃቄ አነበቡ፤ በእነርሱም እጅግ ተጠቀሙ። ቢሆንም ከእነርሱ በምንም መንገድ አልወጡም፤ ከቅዱሳት መጻሕፍት እንጂ፤ ቅዱስ ጴጥሮስ እንደሚለው «በሕያውና ለዘላለም በሚኖር በእግዚአብሔር ቃል» ዳግመኛ የተወለዱ ናቸውና።
3. ሌላ ምሁር፣ ሟቹ ኤጲስ ቆጶስ ዋርበርተን፣ «የአቶ ሎውና የካውንት ዚንዘንዶርፍ የጋራ ልጆች ናቸው» ብለው በድፍረት ያረጋግጣሉ። ይህ ግን ከዚያ የሚበልጥ ስሕተት ነበር። ከካውንት ዚንዘንዶርፍ ጋር ትንሽ እንኳ ትውውቅ ከማድረጋቸው፣ ወይም እንዲህ ያለ ሰው በዓለም መኖሩን እንኳ ከማወቃቸው ብዙ ዓመታት በፊት አብረው ይሰበሰቡ ነበርና። ባወቁትም ጊዜ በፍቅር እጅግ ቢያከብሩትም፣ መጽሐፍ ከሚፈቅድላቸው አልፈው አንድ እርምጃ እንኳ ሊከተሉት አልደፈሩም።
4. ከቅዱሳት መጻሕፍት ቀጥሎ ስለ ታላቁ የእምነት መጽደቅ ጉዳይ ፍርዳቸውን በማጽናት እጅግ የጠቀማቸው መጽሐፍ የሆሚሊዎች መጽሐፍ ነበር። እነዚህን በጥንቃቄ እስኪመረምሩና ከቅዱሳት መጻሕፍት በተለይም ከቅዱስ ጳውሎስ ወደ ሮሜ ሰዎች መልእክት ጋር እስኪያነጻጽሩ ድረስ በእምነት ብቻ እንደምንጸድቅ በግልጽ አልተረዱም ነበር። ማንኛውም የቤተ ክርስቲያን አገልጋይ በምንም ጨዋነት እነዚህን ሊቃወም አይችልም፤ በተሾመበት ጊዜ የቤተ ክርስቲያንን ሠላሳ ስድስተኛውን አንቀጽ በመፈረሙ በእነርሱ ላይ ፈርሞአልና።
5. በመጽደቅም ሆነ በመቀደስ ረገድ ፍርዳቸው የጠራ የነበረ እጅግ ጥቂቶች መሆናቸው ብዙ ጊዜ ተስተውሎአል። ስለ መጽደቅ እጅግ ግሩም አድርገው የተናገሩና የጻፉ ብዙዎች ስለ መቀደስ ትምህርት ግልጽ ግንዛቤ አልነበራቸውም፤ እንዲያውም ፈጽሞ አያውቁትም ነበር። በእምነት ብቻ ስለ መጽደቅ ከማርቲን ሉተር ይበልጥ በብቃት የጻፈ ማን ነው? ደግሞስ ስለ መቀደስ ትምህርት ከእርሱ ይበልጥ ያላወቀ ወይም ስለ እርሱ ያለው ግንዛቤ ይበልጥ የተዘበራረቀ ማን ነበር? ስለዚህ ነገር፣ ማለትም ስለ መቀደስ ፈጽሞ ያለማወቁ፣ ሙሉ በሙሉ ለመረዳት ዝነኛውን የገላትያ መልእክት ማብራሪያውን ያለ አድልዎ ከማንበብ የበለጠ አያስፈልግም። በሌላ በኩል ደግሞ ከሮማ ቤተ ክርስቲያን ጸሐፊዎች ስንቶቹ (በተለይ እንደ ፍራንሲስ ሳልስና ሁዋን ደ ካስታኒዛ ያሉት) ስለ መቀደስ በብርቱና መጽሐፍ ቅዱሳዊ በሆነ መንገድ ጽፈዋል፤ ሆኖም የመጽደቅን ምንነት ፈጽሞ አያውቁም ነበር! ይኸውም በትሬንት ጉባኤ የተሰበሰቡት የነገረ መለኮት ሊቃውንታቸው በሙሉ «ካቴኪስሙስ አድ ፓሮኮስ» በተባለው መጽሐፋቸው (እያንዳንዱ የደብር ካህን ለሕዝቡ ሊያስተምረው የሚገባው ትምህርተ ጥያቄ) መቀደስንና መጽደቅን ፈጽሞ እስኪያደባልቁ ድረስ ነው። እግዚአብሔር ግን ለሜቶዲስቶች የሁለቱንም፣ በመካከላቸውም ያለውን ሰፊ ልዩነት ሙሉና ግልጽ እውቀት ሊሰጣቸው ወደደ።
6. በእርግጥ አንድ ሰው በሚጸድቅበት በዚያው ጊዜ መቀደስ በትክክል እንደሚጀምር ያውቃሉ። በሚጸድቅበት ጊዜ «ዳግመኛ ይወለዳልና»፣ «ከላይ ይወለዳል»፣ «ከመንፈስ ይወለዳል»፤ ይህም (አንዳንዶች እንደሚገምቱት) የመቀደስ ሂደት በሙሉ ባይሆንም ያለ ጥርጥር መግቢያ በሩ ነው። ስለዚህም ደግሞ እግዚአብሔር ሙሉ እይታን ሰጥቶአቸዋል። አዲስ ልደት ከሴት በተወለደ ጊዜ በሥጋው ላይ እንደ ተደረገው ያህል ታላቅ ለውጥን «ከመንፈስ በተወለደው» ሰው ነፍስ ውስጥ እንደሚያመለክት ያውቃሉ፤ ይህም ከስካር ወደ መጠን ማወቅ፣ ከዝርፊያ ወይም ከስርቆት ወደ ታማኝነት እንደሚደረገው ያለ ውጫዊ ለውጥ ብቻ አይደለም፤ (ይህ እውነተኛውን ሃይማኖት ፈጽሞ የማያውቁ ሰዎች ምስኪን፣ ደረቅና አሳዛኝ አስተሳሰብ ነው፤) ነገር ግን ከርኩሳን ጠባያት ሁሉ ወደ ቅዱሳን ጠባያት ሁሉ የሚደረግ ውስጣዊ ለውጥ ነው፤ — ከትዕቢት ወደ ትሕትና፣ ከቍጡነት ወደ የዋህነት፣ ከነጭናጫነትና ካለመርካት ወደ ትዕግሥትና ወደ መገዛት፤ በአንድ ቃል፣ ከምድራዊ፣ ከሥጋዊና ከአጋንንታዊ አእምሮ በክርስቶስ ኢየሱስ ወደ ነበረው አሳብ የሚደረግ ለውጥ ነው።
7. እርግጥ ነው፣ በቅርብ ጊዜ የነበሩ አንድ እጅግ ታዋቂ ጸሐፊ «ስለ ዳግመኛ መወለድ የተጻፈ ድርሰት» በተባለው እንግዳ መጽሐፋቸው ዳግመኛ መወለድ የመቀደስ ቀስ በቀስ የሚሄድ እድገት በሙሉ ነው በሚል ግምት ላይ ፈጽሞ ተመሥርተው ይሄዳሉ። አይደለም፤ የመቀደስ መድረክ ብቻ ነው፤ ወደ እርሱ የሚገባበት የመጀመሪያው መግቢያ ነው። በሥጋዊ ልደት ሰው በአንድ ጊዜ ተወልዶ ከዚያም ቀስ በቀስ እየተለቀና እየበረታ እንደሚሄድ፣ እንዲሁ በመንፈሳዊ ልደትም ሰው በአንድ ጊዜ ይወለዳል፤ ከዚያም በመንፈሳዊ ቁመትና ብርታት ቀስ በቀስ ያድጋል። ስለዚህ አዲስ ልደት የመቀደስ የመጀመሪያ ነጥብ ነው፤ መቀደስም ቀኑ ፍጹም እስኪሆን ድረስ እየጨመረ ሊሄድ ይችላል።
8. እንግዲያስ መጽደቅን መቀደስን እስኪሽር ድረስ አድርገው እንደማያስቡትና እንደማይናገሩት፣ እንዲሁ ደግሞ መቀደስን መጽደቅን እስኪሽር ድረስ አድርገው አለማሰባቸውና አለመናገራቸው ለዚህ ሕዝብ የተሰጠ ታላቅ በረከት ነው። እያንዳንዱን በገዛ ስፍራው ለማኖር ይጠነቀቃሉ፤ በአንዱም በሌላውም ላይ እኩል ክብደት ይሰጣሉ። እግዚአብሔር እነዚህን እንዳጣመራቸው፣ ሰውም ሊለያያቸው እንደማይገባ ያውቃሉ፤ ስለዚህ በአንድ በኩል ነጻ፣ ሙሉና የአሁን መጽደቅን፣ በሌላ በኩል ደግሞ የልብና የኑሮ ፍጹም መቀደስን ትምህርት በእኩል ቅንዓትና ትጋት ይጠብቃሉ፤ ስለ ውስጣዊ ቅድስና እንደ ማንኛውም ምሥጢራዊ፣ ስለ ውጫዊውም እንደ ማንኛውም ፈሪሳዊ አጥብቀው ይይዛሉ።
9. እንግዲህ እግዚአብሔር ለዚህ ሕዝብ በሰጠው ብርሃን መሠረት ክርስቲያን ማን ነው? «በእምነት ጸድቆ በእግዚአብሔር ዘንድ በጌታችን በኢየሱስ ክርስቶስ ሰላም ያለው»፣ በዚያውም ጊዜ «ዳግመኛ የተወለደ»፣ «ከላይ የተወለደ»፣ «ከመንፈስ የተወለደ»፤ ከዲያብሎስ መልክ ወደዚያ «በተፈጠረበት የእግዚአብሔር መልክ» በውስጡ የተለወጠ ሰው ነው፤ በተሰጠውም በመንፈስ ቅዱስ የእግዚአብሔር ፍቅር በልቡ እንደ ፈሰሰ የሚያውቅ፣ ይህም ፍቅር ባልንጀራውን፣ ሰውን ሁሉ፣ እንደ ራሱ እንዲወድ በጣፋጭነት የሚያስገድደው ሰው ነው፤ የዋህና በልቡ ትሑት መሆንን፣ ባለበትም ሁኔታ ሁሉ መርካትን ከጌታው የተማረ ሰው ነው፤ በክርስቶስ ኢየሱስ ደግሞ የነበረው ያ አሳብ ሁሉ፣ እነዚያም ጠባያት ሁሉ በእርሱ ያሉበት ሰው ነው፤ በሥራው ከክፉ መልክ ሁሉ የሚርቅ፣ በአንደበቱም የማይሰናከል ሰው ነው፤ በእግዚአብሔር ትእዛዛት ሁሉና በሥርዓቱ ሁሉ ያለ ነቀፋ የሚመላለስ ሰው ነው፤ ከሰዎች ጋር ባለው ግንኙነት ሁሉ ሌሎች እንዲያደርጉለት የሚወደውን ለእነርሱ የሚያደርግ፣ በሕይወቱና በአኗኗሩም ሁሉ ቢበላም ቢጠጣም ወይም ማንኛውንም ነገር ቢያደርግ ሁሉን ለእግዚአብሔር ክብር የሚያደርግ ሰው ነው።
እንግዲህ እግዚአብሔር ለዚህ ለወይን ቦታው ከትምህርት አንጻር ያላደረገለት፣ ከዚህ በላይ ሊያደርግለት የሚችለው ምን ነበር? ቀጥሎ የምንመረምረው፦
II. ሁለተኛ፦ ከመንፈሳዊ እርዳታዎች አንጻር በእርሱ ያላደረገው፣ ሊደረግ ይችል የነበረው ምንድር ነው?
1. ይህን ጉዳይ ከመጀመሪያው ጀምረን እንመልከት። በምንም መንገድ ያን ያህል የማይታወቁ፣ በመካከለኛ ዕድሜ የነበሩ፣ ከብርቱነት ይልቅ ደካማ ቢሆኑም በቂ ጤንነት የነበራቸው ሁለት ወጣት ቀሳውስት ከሃምሳ ዓመት ገደማ በፊት ኃጢአተኞችን ወደ ንስሐ መጥራት ጀመሩ። ይህንም ለተወሰነ ጊዜ በለንደንና በዙሪያዋ ባሉ በብዙ አብያተ ክርስቲያናት አደረጉ። ነገር ግን ሁለት ችግሮች ተነሡ፦ የመጀመሪያው፦ አብያተ ክርስቲያናቱ እጅግ ከመጨናነቃቸው የተነሣ ብዙዎቹ የደብሩ ምእመናን መግባት አልቻሉም። ሁለተኛው፦ አዳዲስ ትምህርቶችን ይሰብኩ ነበር፤ ይኸውም በእምነት እንደምንድንና «ያለ ቅድስና ጌታን ሊያይ የሚችል የለም» የሚል ነው። ከእነዚህ ምክንያቶች በአንዱ ወይም በሌላው በአብያተ ክርስቲያናት እንዲሰብኩ ብዙ ጊዜ አልተፈቀደላቸውም። ከዚያም በሙርፊልድስ፣ በኬኒንግተን ኮመንና በሌሎች በብዙ የሕዝብ ስፍራዎች ሰበኩ። የስብከታቸውም ፍሬ ወዲያው ታየ። ብዙ ኃጢአተኞች በልባቸውም በኑሮአቸውም ተለወጡ። ይህ ግን ብዙ ሊቀጥል የማይችል መሰለ፤ እነዚህ ሰባኪዎች ራሳቸውን ቶሎ እንደሚያደክሙ ሁሉም በግልጽ አይቶ ነበርና፤ ሊረዳቸውም የደፈረ አንድም ቄስ አልነበረም። ነገር ግን ብዙ ሳይቆይ ያልተሾሙ ቢሆኑም አንዱና ሌላው ሊረዱአቸው ራሳቸውን አቀረቡ። እግዚአብሔርም ለቃላቸው የተለየ በረከት ሰጠ። ብዙ ኃጢአተኞች ስለ ኃጢአት ፈጽመው ተወቀሱ፤ ብዙዎችም በእውነት ወደ እግዚአብሔር ተመለሱ። ረዳቶቻቸውም በቍጥርም በድካማቸውም ስኬት በዙ። ከእነርሱ አንዳንዶቹ የተማሩ፣ አንዳንዶቹ ያልተማሩ ነበሩ። አብዛኞቹ ወጣቶች፣ ጥቂቶቹ በመካከለኛ ዕድሜ የነበሩ ናቸው፤ አንዳንዶቹ ደካሞች፣ አንዳንዶቹ ግን በተቃራኒው እጅግ ብርቱ ማስተዋል የነበራቸው ነበሩ። እግዚአብሔር ግን ሁሉንም ሊቀበላቸው ወደደ፤ ስለዚህም ከቃጠሎ የተነጠቁ ትንታጎች እየበዙ ሄዱ።
2. እነዚህ ቀሳውስት በዚህ ጊዜ ሁሉ ምንም ዕቅድ እንዳልነበራቸው ልብ ሊባል ይችላል። ነፍሳትን ከሞት የማዳን ተስፋ ባዩበት ስፍራ ሁሉ ወዲህና ወዲያ ይሄዱ ነበር እንጂ። ነገር ግን ብዙና ብዙ ሰዎች «እድን ዘንድ ምን ማድረግ ይገባኛል?» ብለው በጠየቁ ጊዜ፣ ሁሉም በአንድነት እንዲሰበሰቡ ተጠየቁ። በመጀመሪያው የሐሙስ ምሽት አሥራ ሁለት ሰዎች መጡ፤ በሚቀጥለው አርባ፤ ብዙም ሳይቆይ መቶ። እስከ ሃያ ሦስት ወይም ሃያ አራት ዓመት በፊት ድረስም እየበዙ ሄዱ፤ በዚያን ጊዜ የለንደን ማኅበር ወደ 2,800 ገደማ ደረሰ።
3. «ነገር ግን ይህ ብዙ ሕዝብ በአንድነት እንዴት ይጠበቃል? ለሙያቸውስ እንደሚገባ መመላለሳቸው እንዴት ይታወቃል?» ስለ ሌላ ነገር ማለትም የሕዝብን ዕዳ ስለ መክፈል ሲያስቡ፣ ሕዝቡን ሁሉ እንደ መኖሪያ ስፍራቸው በትንንሽ ቡድኖች ወይም ክፍሎች እንዲከፋፍሉና በእያንዳንዱ ክፍል ሌሎቹን ሁሉ በየሳምንቱ የሚያይ አንድ ሰው እንዲሾሙ በእግዚአብሔር መግቦት ተመሩ። በዚህም መንገድ ከእነርሱ ማንም በሚታወቅ ኃጢአት ቢኖር ወዲያው ይገለጥ ነበር። እንዲህ ቢያደርጉ በመጀመሪያ ይመከሩ ነበር፤ የማይታረሙ ሆነው ሲገኙ ደግሞ ከማኅበሩ ይለዩ ነበር።
4. ይህ የሕዝቡ መከፋፈልና ያለ አድልዎ ሥርዓት በሌለው መንገድ የሚመላለሱትን መለየት ሌሎች ጥቂት ማኅበረሰቦች ብቻ የነበሯቸው እርዳታዎች ነበሩ። ማኅበራቱ እየበዙ ሲሄዱ በእነዚህ ላይ ብዙ ሳይቆይ ሌላ ተጨመረ። በእያንዳንዱ አውራጃ ያሉ የማኅበራቱ መጋቢዎች የየማኅበራቸውን መንፈሳዊና ምድራዊ ሁኔታ እንዲያስረዱ በሩብ ዓመት አንድ ጊዜ በአንድ ማዕከላዊ ስፍራ ከሰባኪዎቹ ጋር እንዲገናኙ ተጠየቁ። የእነዚህ የሩብ ዓመት ስብሰባዎች ጥቅም እጅግ ታላቅ መሆኑ ብዙ ሳይቆይ ታወቀ፤ ከዚህም የተነሣ ቀስ በቀስ በመንግሥቱ ውስጥ ወዳሉት ማኅበራት ሁሉ ተስፋፉ።
5. በሰባኪዎቹ መካከል ያለውን አንድነት፣ እንዲሁም የሕዝቡን አንድነት ለማብዛት፣ ሁሉም በአንድነት በለንደን እንዲሰበሰቡ ተጠየቁ፤ ከተወሰነ ጊዜ በኋላ ደግሞ ከእነርሱ የተመረጡ ጥቂቶች። ከዚያ በኋላ ለበለጠ ምቾት በለንደን፣ በብሪስቶልና በሊድስ በየተራ ተሰበሰቡ። በዚህ አጠቃላይ ጉባኤ ለጋራው ጥቅም እጅግ የሚጠቅመው ምን እንደ ሆነ እያሰቡ ጥቂት ቀናትን አብረው አሳለፉ። ውጤቱም ወዲያው ለወንድሞቻቸው ሁሉ ይገለጥ ነበር። ቅዱስ ጳውሎስ ስለ መላዋ ቤተ ክርስቲያን የተናገረው በተወሰነ መጠን በእያንዳንዱ ክፍልዋ ላይ ሊሠራ እንደሚችል ብዙ ሳይቆዩ ተገነዘቡ፦ «አካል ሁሉ» … «በተሰጠለት በጅማት ሁሉ እየተጋጠመና እየተያያዘ፥ ራሱን በፍቅር ለማነጽ አካሉን ያሳድጋል።» (ኤፌሶን 4:16)
6. ይህ ይበልጥ በውጤታማነት እንዲፈጸም ሌላ ግሩም እርዳታ አላቸው፤ ይኸውም የሰባኪዎች የዘወትር መለዋወጥ ነው፤ ምንም ሰባኪ በአንድ ወረዳ ከሁለት ዓመት በላይ በተከታታይ እንዳይቆይ፣ ከእነርሱም ጥቂቶቹ ብቻ ከአንድ ዓመት በላይ እንዲቆዩ ደንባቸው ነውና። አንዳንዶች በእርግጥ ይህ ለእግዚአብሔር ሥራ እንቅፋት እንደ ሆነ አስበዋል፤ ነገር ግን በመንግሥቱ ክፍል ሁሉ የተገኘ የረጅም ጊዜ ልምድ ተቃራኒውን ያረጋግጣል። ሕዝቡ ከልዩ ልዩ ሰባኪዎች ይልቅ ከአንድ ሰው ብቻ ጥቂት እንደሚጠቀም ይህ ሁልጊዜ አሳይቶአል፤ ይህም ሲሆን
በእያንዳንዱ ላይ የተሰጡትን ስጦታዎች፣
በእግዚአብሔር ጥበብ የተቀመሙትን ይጠቀማሉ።
7. ከእነዚህ ለማኅበራቸው ብቻ ከተለዩት እርዳታዎች ጋር፣ ሌሎቹ የእንግሊዝ ቤተ ክርስቲያን አባላት በጋራ የሚደሰቱባቸው እርዳታዎች ሁሉ አሏቸው። በእርግጥ ከእርስዋ እንዲለዩ ለረጅም ጊዜ ተገፋፍተዋል፤ ለዚህም ከየዓይነቱ ፈተናዎች ገጥመዋቸዋል። ነገር ግን በንጹሕ ሕሊና በእርስዋ ውስጥ መኖር እስከ ቻሉ ድረስ ከእርስዋ ሊለዩ አይችሉም፣ አይደፍሩም፣ አይፈልጉምም። እርግጥ ነው፣ ማንኛውም በኃጢአት የተሞላ የኅብረት ቅድመ ሁኔታ ቢጫንባቸው ኖሮ ለመለየት በተገደዱ ነበር፤ ነገር ግን አሁን ይህ ስላልሆነ በእርስዋ ውስጥ በመቀጠላችን ደስ ይለናል።
8. እንግዲህ እግዚአብሔር ለዚህ ለወይን ቦታው ከመንፈሳዊ እርዳታዎች አንጻር ያላደረገለት፣ ከዚህ በላይ ሊያደርግለት የሚችለው ምን ነበር? በክርስቲያናዊው ዓለም ውስጥ ካሉ ሌሎች ሕዝቦች ለማንም እንዲህ አላደረገም ማለት ይቻላል። «እንደ ሞራቪያ ወንድሞች የተለየ ሕዝብ ሊያደርጋቸው ይችል ነበር» ቢባል፣ እኔ እመልሳለሁ፦ ይህ እነርሱን ባስነሣበት ዓላማው ሁሉ ላይ ቀጥተኛ ተቃርኖ በሆነ ነበር፤ ዓላማውም መጽሐፍ ቅዱሳዊ ሃይማኖትን በምድሪቱ ሁሉ ከየትኛውም ቤተ እምነት በሆኑ ሰዎች መካከል ማስፋፋት፣ እያንዳንዱንም የራሱን አስተያየት እንዲይዝና የራሱን የአምልኮ ሥርዓት እንዲከተል መተው ነው። ይህም በውጤታማነት ሊፈጸም የሚችለው እነዚህን ነገሮች እንደ ነበሩ በመተውና መላውን ሕዝብ በዚያ «በፍቅር የሚሠራ እምነት» ለማቦካት በመጣር ብቻ ነበር።
III. 1. እግዚአብሔር ሳይሰስት ለዚህ ለወይን ቦታው የሰጣቸው መንፈሳዊ እርዳታዎች እነዚህ ናቸው። ሥነ ሥርዓትም በእነዚህ መካከል ሊገባ ይችል ነበር፤ ነገር ግን በተለየ ርእስ ሥር ብንናገርበት ይሻላል። በዚህ ረገድ ሜቶዲስቶች እጅግ ሞገስ ያገኙ ሕዝብ መሆናቸው እርግጥ ነው። ከሜቶዲስቶች ሥነ ሥርዓት ይበልጥ ቀላል፣ ይበልጥም ምክንያታዊ የሆነ ምንም ነገር ሊኖር አይችልም፤ ፈጽሞ በጤናማ አእምሮ ላይ የተመሠረተ ነው፤ በተለይም የመጽሐፍ ቅዱስን አጠቃላይ ሕግጋት በሥራ ላይ ያውላል። ነፍሱን ለማዳን የቈረጠ ማንም ሰው ከእነርሱ ጋር ሊተባበር ይችላል (የሚጠየቀው ብቸኛ ቅድመ ሁኔታ ይህ ነው)። ይህ ፍላጎት ግን በሦስት ምልክቶች መረጋገጥ አለበት፦ የሚታወቀውን ኃጢአት ሁሉ በማስወገድ፤ እንደ አቅሙ መልካም በማድረግ፤ በእግዚአብሔርም ሥርዓቶች ሁሉ በመገኘት። ከዚያም ለእርሱ በሚስማማው ክፍል ውስጥ ይመደባል፤ በዚያም በሳምንት አንድ ሰዓት ያህል ያሳልፋል። በሚቀጥለውም ሩብ ዓመት በእርሱ ላይ የሚቀርብ ምንም ነገር ከሌለ ወደ ማኅበሩ ይገባል፤ በዚያም ከወንድሞቹ ጋር መሰብሰቡን እስከ ቀጠለና እንደ ሙያው እስከ ተመላለሰ ድረስ ሊቀጥል ይችላል።
2. የሕዝብ አምልኮአቸው ምድራዊ ሥራቸው እንዳይስተጓጎል ከሌሊቱ አሥራ አንድ ሰዓት፣ እንዲሁም ከምሽቱ አሥራ ሁለት ወይም አንድ ሰዓት ላይ ነው። በእሑድ ብቻ ከጠዋቱ በሦስትና በአራት ሰዓት መካከል ይጀምርና በጌታ እራት ይፈጸማል። በእሑድ ምሽት ማኅበሩ ይሰበሰባል፤ ነገር ግን የቤተ ሰብ ራሶች ሁሉ የየቤተ ሰባቸውን አባላት ለማስተማር ጊዜ እንዲያገኙ ቶሎ እንዲሰናበቱ ጥንቃቄ ይደረጋል። በሩብ ዓመት አንድ ጊዜ በእያንዳንዱ ወረዳ ያለው ዋናው ሰባኪ በዚያ ያሉትን የማኅበራቱን አባላት ሁሉ ይመረምራል። በዚህም መንገድ የማንም ጠባይ ነቀፋ ያለበት ቢሆን፣ ይህም እንዲህ ባለ ብዙ ሕዝብ ዘንድ ብዙ ጊዜ የሚጠበቅ ነው፣ በቀላሉ ይገለጣል፤ በደሉ ወይም በዳዩ በጊዜው ይወገዳል።
3. ሥርዓት የሌለውን አባል ከማኅበሩ ማስወጣት በሚያስፈልግበት ጊዜ ሁሉ ይህ እጅግ ጸጥ ባለና ማንንም በማያስቀይም መንገድ ይደረጋል፤ ይኸውም በሩብ ዓመቱ ጉብኝት የአባልነት ካርዱን ባለማደስ ብቻ ነው። ነገር ግን በደሉ ታላቅ በሆነና የሕዝብ ማሰናከያ የመሆን አደጋ ባለበት በአንዳንድ ሁኔታዎች፣ አባላቱ ሁሉ በተገኙበት «እገሌ ከእንግዲህ የማኅበራችን አባል አይደለም» ብሎ ማሳወቅ አስፈላጊ ሆኖ ይታያል። እንግዲህ ከመጀመሪያው እስከ መጨረሻው ምንም ችግር፣ ወጪ ወይም መዘግየት ከሌለበት ከዚህ ቀላል ሥነ ሥርዓት ይበልጥ ምክንያታዊ ወይም ይበልጥ መጽሐፍ ቅዱሳዊ የሆነ ምን ሊኖር ይችላል?
IV. 1. ነገር ግን እነዚህ ሁሉ ነገሮች ያለ ተቃውሞ ጎርፍ ይደረጉ ዘንድ ይቻል ነበርን? የዚህ ዓለም ገዥ አልሞተም፣ አላንቀላፋምም፤ መንግሥቱ ተላልፎ እንዳይሰጥ አይዋጋምን? የሐዋርያው ቃል በዘመናትና በአሕዛብ ሁሉ እውነት ሆኖ ከተገኘ፣ «በክርስቶስ ኢየሱስ እግዚአብሔርን እየመሰሉ ሊኖሩ የሚወዱ ሁሉ ይሰደዳሉ»፤ ይህ ስለ እያንዳንዱ ክርስቲያን እውነት ከሆነ፣ መንግሥቱን ለመገልበጥ በግልጽ ዓላማ በሚታይ ሁኔታ በአንድነት ስለ ተባበሩ የሰዎች ስብስቦችማ እንዴት አብልጦ እውነት ይሆናል! ያለ ምንም የሚታይ እርዳታ፣ ያለ ገንዘብ፣ ያለ ሥልጣን፣ ያለ ወዳጆች በሆኑ ምስኪን፣ መከላከያ በሌላቸውና በተናቁ ሕዝብ ላይ ሊያስነሣው ቸል የማይለውን ስደትስ ምን ሊቋቋመው ይችል ነበር?
2. በእውነትም የዚህ ዓለም አምላክ አላንቀላፋም ነበር። ሥራ ፈትም አልነበረም። መንግሥቱ ተላልፎ እንዳይሰጥ በእርግጥ ተዋጋ፤ ያውም በኃይሉ ሁሉ ነው። «ሠራዊቱን ሁሉ ለጦርነት አወጣ።» በመጀመሪያ፦ የሕዝቡን አራዊት አስነሣ። እንደ አንበሶች አገሡ፤ ትንንሾቹንና መከላከያ የሌላቸውን በየአቅጣጫው ከበቡ። ማንም ባልጠበቀው መንገድ መዳን እስኪመጣ ድረስ ማዕበሉ ይበልጥ እየበረታ ሄደ። እግዚአብሔር የሟቹን የቸሩን ንጉሣችንን ልብ አነሣሣ፤ እርሱም ለዳኞቹ ትእዛዝ ሰጠ፤ ትእዛዙም በሥራ ላይ በዋለ ጊዜ የሕዝቡን እብደት በውጤታማነት አበረደው። በዚያው ጊዜ ገደማ አንድ ታላቅ ሰው ወደ ግርማዊነታቸው በአካል ቀርቦ «እነዚህን ወዲያ ወዲህ የሚዞሩ ሰባኪዎች የሚያስቆም እርምጃ እንዲወስዱ» ለመነ። ግርማዊነታቸውም በቍጣ ተመልክተውት ያለ ምንም ሥርዓት እንደ ንጉሥ መለሱ፦ «እልሃለሁ፣ እኔ በዙፋኑ ላይ እስከ ተቀመጥሁ ድረስ ማንም ስለ ሕሊናው አይሰደድም።»
3. ይህን ተዳፍረው ግን የግርማዊነታቸውን ሹመት የተቀበሉ አንዳንዶች ከጊዜ ወደ ጊዜ አሳደዱአቸው፤ ያውም በሕግ ሽፋን፣ የኮንቬንቲክል ሕግ የሚባለውን በመጠቀም ነው። በተለይ በኬንት የነበረ አንዱ ከጥቂት ዓመታት በፊት ከሰባኪዎቹ አንዱንና ከአድማጮቹ ብዙዎችን በገንዘብ ለመቅጣት ራሱን ሥልጣን ሰጠ። እነርሱ ግን ወደ ግርማዊነታቸው የንጉሡ ከፍተኛ ችሎት ይግባኝ ማለት ግዴታቸው እንደ ሆነ አሰቡ። ጉዳዩም ለከሳሾቹ ተፈረደ፤ እነርሱም ከዚያ ጊዜ ጀምሮ እንደ ገዛ ሕሊናቸው እግዚአብሔርን እንዲያመልኩ ተፈቅዶላቸዋል።
4. ይህ ፈጽሞ ቀደምት የሌለው ነገር ነው ብዬ አምናለሁ። ከበዓለ ሃምሳ ቀን ጀምሮ እስከ ዛሬ ድረስ በየትኛውም የቤተ ክርስቲያን ዘመን ሌላ እንዲህ ያለ ምሳሌ አላገኘሁም። ትክክልም ሆነ ስሕተት የሆነ አስተያየት ሁሉ በዘመናትና በአሕዛብ ሁሉ ማለት ይቻላል ታግሦ ኖሮአል። ምንም ያህል አጉል እምነት ያለበት ወይም የማይረባ ቢሆን የአምልኮ ዓይነት ሁሉ ታግሦ ኖሮአል። ነገር ግን እውነተኛ፣ ሕያውና መጽሐፍ ቅዱሳዊ ሃይማኖት ከዚህ በፊት ታግሦ እንደ ሆነ አላውቅም። ስለዚህም ሜቶዲስቶች የተባሉት ሕዝብ እግዚአብሔርን የሚያመሰግኑበት ብዙ ምክንያት አላቸው። ለእነርሱ ሲል በምድር ላይ አዲስ ነገርን አድርጎአል፤ ጠላትንና ተበቃዩን ጸጥ አሰኝቶአል። እንግዲህ ይህን ለውጫዊና ለውስጣዊ ሰላማቸው ባለቤት ለእርሱ ሊሰጡ ይገባቸዋል።
V. 1. እግዚአብሔር ለዚህ ለወይን ቦታው በእርግጥ ያላደረገለት፣ ከዚህ በላይ ሊያደርግለት የሚችለው ምን ነበር? ይህ በሰፊው ከተገለጠ በኋላ፣ አሁን ወደዚያ ብርቱና ርኅሩኅ ወቀሳ ልንሄድ እንችላለን፦ «ይህን ሁሉ ካደረግሁ በኋላ እጅግ ግሩም የሆነውን ወይን ልጠብቅ አይገባኝም ነበርን? እንግዲህ ስለ ምን ሆምጣጣ አፈራ? የእምነትና የፍቅር፣ የጽድቅና የእውነተኛ ቅድስና፣ አዎን፣ የመንፈስ ፍሬ፣ — የፍቅር፣ የደስታ፣ የሰላም፣ የትዕግሥት፣ የየዋህነት፣ የቸርነት፣ የእምነት፣ የበጎነትና ራስን የመግዛት — አጠቃላይ ብዛትን ልጠብቅ አይገባኝም ነበርን?» እነዚህ ፍሬዎች መላዋን ቤተ ክርስቲያኑን ይሸፍናሉ ብሎ መጠበቅ ምክንያታዊ አልነበረምን? በእውነት፣ እግዚአብሔር ከአርባና ከሃምሳ ዓመት በፊት በሕዝቡ መካከል ያደረገውን ባየሁ ጊዜ፣ በመጀመሪያ ፍቅራቸው ሞቀው፣ ጌታን ሲያከብሩና በአዳኛቸው በእግዚአብሔር ደስ ሲላቸው ባየኋቸው ጊዜ፣ እነዚህ ሁሉ በዚህ በምድር እንደ መላእክት ይኖራሉ ከማለት ያነሰ ነገር ልጠብቅ አልቻልሁም ነበር፤ የማይታየውን ዘወትር እንደሚያዩ ሆነው ይመላለሳሉ፣ ከአብና ከወልድ ጋር የዘወትር ኅብረት ይኖራቸዋል፣ በዘላለማዊነት ውስጥ ይኖራሉ በዘላለማዊነትም ውስጥ ይመላለሳሉ ብዬ ጠብቄ ነበር። በአኗኗራቸው ሁሉ «የተመረጠ ትውልድ፥ የንጉሥ ካህናት፥ ቅዱስ ሕዝብ፥ ለርስቱ የተለየ ወገን»፤ «ከጨለማ ወደሚደነቅ ብርሃኑ የጠራቸውን የእርሱን በጎነት» የሚናገሩ ሆነው ለማየት ጠብቄ ነበር።
2. ነገር ግን በዚህ ፋንታ ሆምጣጣ አፈራ፤ — ፈጽሞ ተቃራኒ ባሕርይ ያለውን ፍሬ። በአሥር ሺህ መልክ ስሕተትን አፈራ፤ ከየዋሆቹም ብዙዎችን ከመንገድ አስወጣ። ስሜታዊ አክራሪነትን፣ የሐሳብ ተመስጦን አፈራ፤ የጋለ ምናብ የሚፈጥራቸውን ልቅ፣ የማይረቡና እርስ በርሳቸው የሚጋጩ ሕልሞችን ሁሉ ሁሉን ለሚያውቅ ጥበበኛ አምላክ ሰጠ። ትዕቢትን አፈራ፤ የመልካም ስጦታ ሁሉ ሰጪ የሆነውን ለስሙ የሚገባውን ክብር ዘረፈ። ጭፍን ጥላቻን፣ ክፉ ጥርጣሬን፣ ነቃፊነትን፣ እርስ በርስ መፈራረድንና መኰናነንን አፈራ፤ — እነዚህ ሁሉ የክርስቲያናዊ ሙያ መለያ ምልክት የሆነውን ያንን የወንድማማች ፍቅር ፈጽመው የሚገለብጡ ናቸው፤ ያለ እርሱ የሚኖር ማንም ቢሆን በእግዚአብሔር ፊት እንደ ሞተ ይቈጠራል። ቍጣን፣ ጥላቻን፣ ክፋትን፣ በቀልንና ክፉ ቃልንና ሥራን ሁሉ አፈራ፤ — እነዚህ ሁሉ የመንፈስ ቅዱስ ሳይሆኑ የጥልቁ ጕድጓድ አስከፊ ፍሬዎች ናቸው!
3. ደግሞ በብዙዎች፣ በተለይም ሀብታቸው በበዛላቸው ሰዎች ዘንድ፣ ያንን ታላቅ የነፍሳት መርዝ የዓለምን ፍቅር አፈራ፤ ያውም በቅርንጫፎቹ ሁሉ ነው፦ «የሥጋ ምኞት»፣ ማለትም ደስታን በስሜት ሕዋሳት ተድላ መፈለግ፤ — «የዓይን ምኞት»፣ ማለትም ደስታን በአለባበስ ወይም በማንኛውም የምናብ ተድላ መፈለግ፤ — እና «የሕይወት ትዕቢት»፣ ማለትም ደስታን በሰዎች ምስጋና፣ ወይም ለእነዚህ ሁሉ በሚያገለግለው፣ በምድር ላይ ገንዘብን በማከማቸት መፈለግ። ከየዓይነቱ ራስን ማስደሰትን፣ ቅምጥልነትን፣ ሴታሴትነትን፣ ልስላሴን አፈራ፤ ይህም በሰው ልጅ መከራ የሚቀልጠው ትክክለኛው ዓይነት ልስላሴ አይደለም። ገጣሚያቸው ራሱ ስለ እነርሱ ያለቀሰበትን እንደ ምስኪኖቹ አሕዛብ ያሉ እንዲህ ያሉ ወራዳና በምድር ላይ የሚጐተቱ ፍቅሮችን፣ እንዲህ ያለ ጥልቅ ምድራዊ አስተሳሰብን አፈራ፦ — «ኦ ኩርቬ ኢን ቴራስ አኒሜ ኤት ኮኤሌስቲዩም ኢናኔስ!» — «ወደ ምድር ያጎነበሳችሁ፣ እግዚአብሔርም የሌላችሁ ነፍሳት ሆይ!»
4. ባለጠግነት ያላችሁ እናንተ ሆይ፣ የጌታን ቃል ደግማችሁ ስሙ! በዚህ ዓለም ባለጠጎች የሆናችሁ፣ የምትበሉት ምግብ፣ የምትለብሱትም ልብስ፣ ከዚያም የሚተርፍ ያላችሁ እናንተ፣ ዓለምን ከመውደድ እርግማን ነጻ ናችሁን? አደጋችሁ ይሰማችኋልን? «ገንዘብ ላላቸው ወደ እግዚአብሔር መንግሥት መግባት እንዴት ጭንቅ ይሆናል» የሚለው ይሰማችኋልን? በእሳት መካከል ሳትቃጠሉ ትኖራላችሁን? በዓለም ፍቅር አልተነካችሁምን? ከሥጋ ምኞት፣ ከዓይን ምኞትና ከሕይወት ትዕቢት ነጻ ናችሁን? ለመብላት በምትቀመጡበት ጊዜ ገበታችሁ ወጥመድ እንዳይሆንባችሁ «በጕሮሮአችሁ ላይ ካራ ታደርጋላችሁን»? ሆዳችሁ አምላካችሁ አይደለምን? መብላትና መጠጣት ወይም ሌላ ማንኛውም የስሜት ሕዋሳት ተድላ የምትደሰቱበት ታላቁ ደስታ አይደለምን? በአለባበስ፣ በቤት ዕቃ፣ በሥዕሎች፣ በአትክልት ስፍራዎች ወይም ዓይንን በሚያስደስት በማንኛውም ሌላ ነገር ደስታን አትፈልጉምን? ድሆች በነበራችሁ ጊዜ እንደ ቻላችሁት ብርድን፣ ሙቀትን፣ ነፋስን ወይም ዝናብን መቋቋም ተስኖአችሁ ልስላሳና ቅምጥሎች አትሆኑምን? በድሆች በኩል ለእግዚአብሔር እንዲህ ያለውን ወይም እንዲያ ያለውን መጠን ሳይሆን ልትሰጡ የምትችሉትን ሁሉ በመመለስ ፋንታ፣ ሀብታችሁ እየበዛ በምድር ላይ ገንዘብን አታከማቹምን? በእርግጥ «ባለጠጋ ወደ እግዚአብሔር መንግሥት ከሚገባ ግመል በመርፌ ቀዳዳ ቢገባ ይቀላል!»
5. ነገር ግን ስለ ምን አሁንም ሆምጣጣ ታፈራላችሁ? ምን ምክንያት ልታቀርቡ ትችላላችሁ? እግዚአብሔር በእርሱ በኩል ጐድሎአልን? ደግማችሁ ደጋግማችሁ አልተመከራችሁምን? «ተንኰል በሌለበት በቃሉ ወተት» አልተመገባችሁምን? የእግዚአብሔር ቃል በሙሉ ያለ አንዳች የስሕተት ቅልቅል አልተሰጣችሁምን? የነጻ፣ የሙሉና የአሁን መጽደቅ፣ እንዲሁም ቀስ በቀስ የሚሆንና በቅጽበት የሚሆን መቀደስ መሠረታዊ ትምህርቶች አልተሰጣችሁምን? የውስጣዊና የውጫዊ ቅድስና ቅርንጫፍ ሁሉ በግልጽ አልተብራራምን? በትጋትስ አልተተገበረምን? ያውም ከየዓይነቱ ሰባኪዎች፣ ከወጣቶችና ከሽማግሌዎች፣ ከተማሩትና ካልተማሩት ነው። ነገር ግን ከእናንተ አንዳንዶቹ እግዚአብሔር ያዘጋጀላችሁን እርዳታዎች ባትንቁ መልካም ነው። ምናልባት ከቀሳውስት በቀር ማንንም አትሰሙ ይሆናል፤ ወይም ቢያንስ ከምሁራን በቀር ማንንም። እንግዲህ እግዚአብሔር የራሱን መልእክተኞች እንዲመርጥ፣ በወደደው እንዲልክ አትፈቅዱለትምን? ይህ ክፉ ጥበብ ሆምጣጣ ለማፍራታችሁ አንዱ ምክንያት ባይሆን መልካም ነው!
6. ሌላው ምክንያቱስ ያንን ግሩም እርዳታ፣ ከክርስቲያናዊ ማኅበር ጋር መተባበርን መናቃችሁ አልነበረምን? «ብቻውን ግን እንዴት ይሞቀዋል?» እንዲሁም «ለብቻው ሆኖ ለሚወድቅ ወዮለት» የሚለውን አላነበባችሁምን? ነገር ግን በቂ ጓደኞች አሏችሁ። ምናልባት ከበቂ በላይ፣ ለነፍሳችሁ ከሚጠቅሙት በላይ። ነገር ግን እግዚአብሔርን የሚጠሙና እናንተንም እንደዚያ ለማድረግ የሚደክሙ በቂ ጓደኞች አሏችሁን? መልስ እንደሚሰጡ ሆነው ነፍሳችሁን የሚጠብቁ፣ የተሳሳተ እርምጃ ብትወስዱ ወይም ልትወስዱ በአደጋ ላይ ብትሆኑ በነጻነትና በታማኝነት የሚያስጠነቅቁአችሁ በቂ ጓደኞች አሏችሁን? እንዲህ ያሉ ጓደኞች ጥቂት እንዳሏችሁ እፈራለሁ፤ አለዚያማ የተሻለ ፍሬ ታፈሩ ነበር!
7. የማኅበሩ አባል ከሆናችሁ መብታችሁን በሙላት ትጠቀሙበታላችሁን? ክፍላችሁን ለመገናኘት ፈጽሞ አትቀሩምን? ያውም ለወግ ያህል ሳይሆን በስሙ በተሰበሰባችሁ ጊዜ ጌታችሁ በመካከላችሁ እንደሚሆን በመጠበቅ ነውን? ለእናንተና ለወንድሞቻችሁ ለተሰጠው፣ በእናንተ ሁኔታ ያሉ ሰዎች ከዚህ በፊት ፈጽሞ ላልተደሰቱበት ለዚያ አስደናቂ የሕሊና ነጻነት በእውነት አመስጋኞች ናችሁን? ለእውነተኛ ሃይማኖት አጠቃላይ መስፋፋትስ ለመልካም ስጦታ ሁሉ ሰጪ አመስጋኞች ናችሁን? በእርግጥ ከመላእክትና ከሊቃነ መላእክት፣ ከሰማይም ማኅበር ሁሉ ጋር እስክታመሰግኑት ድረስ፣ በእናንተ ላይ በብዛት ስለ ዘነቡት ስለ እነዚህ በረከቶች ሁሉ እግዚአብሔርን በበቂ ሁኔታ ልታመሰግኑት አትችሉም!