የምልጃ አገልግሎት

«በኢየሱስ ክርስቶስ ለእግዚአብሔር ደስ የሚያሰኝ መንፈሳዊ መሥዋዕትን ታቀርቡ ዘንድ ቅዱሳን ካህናት።»—1ኛ ጴጥሮስ 2:5።

«እናንተ ግን የእግዚአብሔር ካህናት ትባላላችሁ።»—ኢሳይያስ 61:6።

«የጌታ የእግዚአብሔር መንፈስ በእኔ ላይ ነው፤ እግዚአብሔር ቀብቶኛልና።» እነዚህ በኢሳይያስ መጽሐፍ ውስጥ የሚገኙ የኢየሱስ ቃሎች ናቸው። የሥራው ፍሬ ሆነው የተዋጁት ሁሉ ካህናት ናቸው፤ እርሱ ሊቀ ካህናት ሆኖ በተቀባው የመንፈስ ቅብዓት ከእርሱ ጋር ተካፋዮች ናቸው። «በአሮን ጢም ላይ እንደሚወርድ፥ እስከ ልብሱ ዘርፍ እንደሚወርድ እንደ ክቡር ሽቱ ነው።» የአሮን ልጅ ሁሉ እንደ ነበረው፥ እንዲሁ የኢየሱስ አካል ብልት ሁሉ የክህነት መብት አለው። ነገር ግን ሁሉም ይህን መብት በሥራ ላይ አያውሉትም፤ ብዙዎች እስከ አሁን ድረስ ፈጽሞ አያውቁትም። ሆኖም ይህ ለእግዚአብሔር ልጅ ከሁሉ የሚበልጥ መብት ነው፤ «ዘወትር ሊጸልይ በሕይወት ለሚኖረው» ጌታ እጅግ የመቅረብና እርሱን እጅግ የመምሰል ምልክት ነው። ይህ በእርግጥ እንዲህ መሆኑን ትጠራጠራለህን? ክህነት በምን በምን እንደሚቆም አስብ። በመጀመሪያ የክህነት ሥራ አለ። ይህም ሁለት ገጽታ አለው፤ አንዱ ወደ እግዚአብሔር፥ ሌላው ወደ ሰው የሚመለከት ነው። «ሊቀ ካህናት ሁሉ … ለእግዚአብሔር በሆነው ነገር ሁሉ ስለ ሰው ይሾማልና» (ዕብራውያን 5:1)፤ ወይም ሙሴ እንደ ተናገረው (ዘዳግም 10:8፤ ደግሞም 21:5፤ 33:10፤ ሚልክያስ 2:6 ተመልከት)፦ «እግዚአብሔር የሌዊን ነገድ በእግዚአብሔር ፊት እንዲቆሙ፥ እንዲያገለግሉትም፥ በስሙም እንዲባርኩ ለየ።» በአንድ በኩል ካህኑ ወደ እግዚአብሔር የመቅረብ፥ በቤቱ ከእርሱ ጋር የመኖር፥ የመሥዋዕቱንም ደም ወይም የሚቃጠለውን ዕጣን በፊቱ የማቅረብ ሥልጣን ነበረው። ይህን ሥራ ግን ለራሱ ብሎ አልሠራውም፤ ወኪላቸው ሆኖ ስለ ቆመላቸው ሕዝብ ነበር እንጂ። ይህ የሥራው ሌላኛው ገጽታ ነው። ከሕዝቡ መሥዋዕታቸውን ተቀብሎ በእግዚአብሔር ፊት ያቀርብ ነበር፤ ከዚያም ወጥቶ በስሙ ይባርካቸው፥ የሞገሱን ማረጋገጫ ይሰጣቸውና ሕጉን ያስተምራቸው ነበር።

ስለዚህ ካህን ፈጽሞ ለራሱ የማይኖር ሰው ነው። ከእግዚአብሔር ጋርና ለእግዚአብሔር ይኖራል። ሥራውም የእግዚአብሔር አገልጋይ ሆኖ ቤቱን፥ ክብሩንና አምልኮውን መጠበቅ፥ ፍቅሩንና ፈቃዱንም ለሰዎች ማስታወቅ ነው። ከሰዎች ጋርና ለሰዎች ይኖራል (ዕብራውያን 5:2)። ሥራውም ኃጢአታቸውንና ችግራቸውን ተረድቶ በእግዚአብሔር ፊት ማቅረብ፥ በስማቸው መሥዋዕትንና ዕጣንን ማቅረብ፥ ይቅርታንና በረከትን ማስገኘት፥ ከዚያም ወጥቶ በስሙ መባረክ ነው። ይህ የአማኝ ሁሉ ከፍ ያለ ጥሪ ነው። «ይህ ክብር ለቅዱሳኑ ሁሉ ነው።» የተዋጁት በአንድ ዓላማ ነው፤ ይኸውም በዙሪያቸው በሚጠፉት በሚሊዮኖች መካከል የእግዚአብሔር ካህናት እንዲሆኑ፥ ታላቁን ሊቀ ካህናት ኢየሱስን መስለው በዙሪያቸው ላሉት ሁሉ የእግዚአብሔር ጸጋ አገልጋዮችና መጋቢዎች ይሆኑ ዘንድ ነው።

ደግሞም ከሥራው ጋር የሚስማማ የክህነት አካሄድ አለ። እግዚአብሔር ቅዱስ እንደ ሆነ፥ ካህኑም በተለየ ሁኔታ ቅዱስ ሊሆን ይገባው ነበር። ይህ ማለት ከርኩስ ነገር ሁሉ መለየት ብቻ ሳይሆን ለእግዚአብሔር ቅዱስ መሆን፥ ማለትም እግዚአብሔር እንደ ፈቀደ ያደርገው ዘንድ ለእርሱ ተለይቶ ራሱን መስጠት ነው። ከዓለም መለየቱና ለእግዚአብሔር መለየቱ በብዙ መንገድ ይገለጥ ነበር።

በልብሳቸው ይታይ ነበር፤ እግዚአብሔር ራሱ ባዘዘው ሥርዓት የተሠራው የተቀደሰው ልብስ የእርሱ መሆናቸውን ያመለክት ነበር (ዘጸአት 28)። በልዩ ንጽሕና እንዲኖሩና ከሞትና ከርኩሰት ጋር ከሚደረግ ንክኪ ሁሉ እንዲጠበቁ በተሰጣቸው ትእዛዝ ይታይ ነበር (ዘሌዋውያን 11:22)። ለተራው እስራኤላዊ የተፈቀደው ብዙ ነገር ለእነርሱ የተከለከለ ነበር። ካህኑ የአካል ጉድለት ወይም ነውር እንዳይኖርበት በታዘዘው ሕግ ይታይ ነበር፤ የአካል ፍጹምነት በእግዚአብሔር አገልግሎት ውስጥ ለሚፈለገው ምሉእነትና ቅድስና ምሳሌ ነበር። የካህናቱም ነገድ ከሌሎቹ ነገዶች ጋር ርስት እንዳይኖረው በተደረገው ሥርዓት ይታይ ነበር፤ እግዚአብሔር ራሱ ርስታቸው ነበር። ሕይወታቸው የእምነት ሕይወት ሊሆን ይገባው ነበር፤ ለእግዚአብሔር ተለይተው ለእርሱ እንደሚኖሩ ሁሉ በእርሱም ሊኖሩ ይገባቸው ነበር።

ይህ ሁሉ የአዲስ ኪዳን ካህን ባሕርይ ምን ሊሆን እንደሚገባው የሚያሳይ ምሳሌ ነው። በእግዚአብሔር ዘንድ ያለን የክህነት ኃይል በግል ሕይወታችንና በአካሄዳችን ላይ የተመሠረተ ነው። ኢየሱስ በምድር ስላላቸው አካሄድ «ልብሳቸውን ያላረከሱ» ብሎ ከሚመሰክርላቸው ወገን ልንሆን ይገባናል።

ለሌሎች የተፈቀደ የሚመስለውን ነገር በመተውና ከዓለም በመለየት፥ ለጌታ ቅዱሳን ለመሆን ራሳችንን መለየታችን በሙሉ ልብና ያለ አንዳች ጉድለት መሆኑን ልናረጋግጥ ይገባናል። የካህኑ የአካል ፍጹምነት በእኛም ዘንድ አቻ ሊኖረው ይገባል፤ እኛም «ያለ እድፈትና ያለ ነውር»፥ «የእግዚአብሔር ሰው ለበጎ ሥራ ሁሉ ተዘጋጅቶ ፍጹም»፥ «ምንም የሚጎድላችሁ ሳይኖር ፍጹማንና ምሉዓን» ልንሆን ይገባናል (ዘሌዋውያን 21:17-21፤ ኤፌሶን 5:27፤ 2ኛ ጢሞቴዎስ 2:7፤ ያዕቆብ 1:4)። ከሁሉም በላይ በምድር ያለውን ርስት ሁሉ ለመተው እንስማማለን፤ ሁሉን ትተን እንደ ክርስቶስ እግዚአብሔርን ብቻ ዕድል ፈንታችን እናደርጋለን፤ ያለን እንደሌለን ሆነን እንኖራለን፤ ሁሉንም ለእግዚአብሔር ብቻ ብለን እንይዛለን። እውነተኛውን ካህን፥ ማለትም ለእግዚአብሔርና ለባልንጀሮቹ ብቻ የሚኖረውን ሰው የሚለየው ይህ ነው።

አሁን ደግሞ ወደ ክህነት የሚያደርሰውን መንገድ እንመልከት። እግዚአብሔር በአሮን ልጆቹን ሁሉ ካህናት እንዲሆኑ መርጦ ነበር፤ እያንዳንዳቸው በትውልድ ካህን ነበሩ። ሆኖም አንዳቸውም ልዩ በሆነ የሹመት ሥርዓት፥ ማለትም በመቀደስ ካልሆነ በቀር ወደ ሥራው ሊገቡ አይችሉም ነበር። የእግዚአብሔር ልጅ ሁሉ በልደቱ፥ ማለትም ከታላቁ ሊቀ ካህናት ጋር ባለው የደም ዝምድና ካህን ነው፤ ይህ ግን በቂ አይደለም፤ ሥልጣኑን በሥራ ላይ የሚያውለው መቀደሱን ሲቀበልና በሕይወቱ እውን ሲያደርገው ብቻ ነው።

በአሮንና በልጆቹ ላይ ይህ እንዲህ ሆነ (ዘጸአት 29)፦ ከታጠቡና ከለበሱ በኋላ በቅዱሱ ዘይት ተቀቡ። ከዚያም መሥዋዕቶች ቀረቡ፥ በደሙም የቀኝ ጆሮ፥ የቀኝ እጅና የቀኝ እግር ተነካ። ከዚያም እነርሱና ልብሳቸው እንደ ገና በደሙና በዘይቱ በአንድነት ተረጩ። እንዲሁም የእግዚአብሔር ልጅ አስቀድሞ ተካፋይ የሆነባቸው ደሙና መንፈሱ ለእርሱ ምን እንደ ሆኑ ይበልጥ በሙላት እየገባው ሲሄድ፥ የቅዱሱ ክህነት ኃይል በእርሱ ውስጥ ይሠራል። ደሙ የአለመገባትን ስሜት ሁሉ ያስወግዳል፤ መንፈስም የአለመብቃትን ስሜት ሁሉ ያስወግዳል።

በካህኑ ላይ ደሙ ሲረጭ አዲስ የነበረው ነገር ምን እንደ ሆነ እናስተውል። ከዚህ በፊት ንስሐ የገባ ሰው ሆኖ ይቅርታን እየፈለገ ስለ ኃጢአቱ መሥዋዕት አቅርቦ ቢሆን፥ ደሙ የተረጨው በመሠዊያው ላይ እንጂ በሰውነቱ ላይ አልነበረም። አሁን ግን ለክህነት መቀደስ ከደሙ ጋር የቀረበ ግንኙነት ሊኖረው ይገባ ነበር፤ ጆሮ፥ እጅና እግር በልዩ ሥርዓት ከደሙ ኃይል በታች ገቡ፤ ሁለንተናውም ተይዞ ለእግዚአብሔር ተቀደሰ። እንዲሁም ለይቅርታ የሚያስፈልገው በስርየት መክደኛው ላይ የተረጨው ደም እንደ ሆነ በማሰብ ብቻ ረክቶ የነበረ አማኝ፥ እንደ ካህን ወደ እግዚአብሔር ሙሉ በሙሉ መቅረብን እንዲፈልግ ሲመራ፥ የደሙን ኃይል ይበልጥ በሙላትና በጽናት መለማመድ እንደሚያስፈልገው ይሰማዋል፤ ይኸውም ደሙ በእውነት ልብን ከክፉ ሕሊና ረጭቶ እንደሚያነጻ፥ «ከዚያ በኋላ በሕሊናው ኃጢአትን» እንዳያውቅ (ዕብራውያን 10:2) ከኃጢአት ሁሉ እንደሚያነጻ መለማመድ ነው። ይህንንም ደስ እያለው ሲለማመድ፥ ወደ እግዚአብሔር እጅግ በቅርበት ለመቅረብ ያለው አስደናቂ መብትና ምልጃው ተቀባይነት እንዳለው የሚሰጠው ሙሉ ማረጋገጫ በውስጡ ይነቃል።

ደሙ መብትን እንደሚሰጥ፥ መንፈስም ኃይልን ይሰጣል፤ በእምነት ለሚደረግ ምልጃም ያበቃል። የክህነትን መንፈስ፥ ማለትም ለእግዚአብሔር ክብርና ለነፍሳት መዳን የሚነድ ፍቅርን እፍ ይልብናል። በስሙ የሚደረግ ጸሎት እውነት እንዲሆንልን ከኢየሱስ ጋር አንድ ያደርገናል። በእምነትና በጽናት እንድንጸልይ ያበረታናል። ክርስቲያን በእውነት በክርስቶስ መንፈስ በተሞላ መጠን ራሱን ለክህነታዊ የምልጃ ሕይወት መስጠቱ ይበልጥ ከልቡ በራሱ የሚፈልቅ ይሆናል። የተወደዳችሁ ክርስቲያን ወንድሞቼ ሆይ! እግዚአብሔር ወደ እርሱ የሚቀርቡ፥ በፊቱ የሚኖሩ፥ በምልጃቸውም የጸጋውን በረከት በሌሎች ላይ የሚያወርዱ ካህናት ያስፈልጉታል፤ እጅግ ያስፈልጉታል። ዓለምም የሚጠፉትን ሰዎች ሸክም የሚሸከሙና ስለ እነርሱ የሚማልዱ ካህናት ያስፈልጉታል፤ እጅግ ያስፈልጉታል።

ራስህን ለዚህ ቅዱስ ሥራ ለማቅረብ ፈቃደኛ ነህን? የሚጠይቀውን ራስን መስጠት ታውቀዋለህ፤ ይህም የእግዚአብሔር ፍቅር የማዳን ዓላማ በሰዎች መካከል ይፈጸም ዘንድ እንደ ክርስቶስ ሁሉን መተው ነው፤ ከዚህ ያነሰ ምንም አይደለም። ወይ፥ መዳንን ስላገኙ ብቻ ረክተው ራሳቸውን ሞቅ ያሉና ሕያዋን አድርገው ለማቆየት ያህል ብቻ ከሚሠሩት ወገን ከእንግዲህ አትሁን። ወይ፥ ፈጽሞና ብቻ ካህን ለመሆን ራስህን ከመስጠት ምንም ነገር አይከልክልህ፤ ሌላ ምንም ሳይሆን፥ ከዚህም ያነሰ ሳይሆን የልዑል እግዚአብሔር ካህን ሁን። የአለመገባት ወይም የአለመብቃት አሳብ ወደ ኋላ ሊያስቀርህ አይገባም። በደሙ የፍጹሙ ቤዛነት ተጨባጭ ኃይል በአንተ ውስጥ ይሠራል፤ በመንፈስ ደግሞ ይኸው ቤዛነት እንደ መለኮታዊ ሕይወት በግልና በውስጥ ሙሉ በሙሉ መለማመዱ የተረጋገጠ ይሆናል። ደሙ ጸሎትህን እጅግ ተቀባይነት ያለው የሚያደርግ ወሰን የሌለው መገባትን ይሰጣል፤ መንፈስ ደግሞ ልክ እንደ እግዚአብሔር ፈቃድ እንድትጸልይ እያስተማረህ መለኮታዊ ብቃትን ይሰጣል። ካህን ሁሉ እንደ መቅደሱ ሕግ መሥዋዕትን ሲያቀርብ ተቀባይነት እንደሚያገኝ ያውቅ ነበር፤ አንተም በደሙና በመንፈሱ መሸፈኛ ሥር ሆነህ በኢየሱስ ስም ስለሚደረግ ጸሎት የተሰጡት አስደናቂ ተስፋዎች ሁሉ በአንተ እንደሚፈጸሙ ማረጋገጫ አለህ። ከታላቁ ሊቀ ካህናት ጋር በአንድነት ስትኖር፥ «የምትወዱትን ሁሉ ለምኑ ይሆንላችሁማል።» በሥራዋ እጅግ ኃይል የምታደርገውን የጻድቅ ሰው ጸሎት ለመጸለይ ኃይል ይኖርሃል። ቤተ ክርስቲያን ስለ ዓለም በምታቀርበው የጋራ ጸሎት መተባበር ብቻ ሳይሆን፥ በራስህ ክልል ውስጥ በጸሎት የተሰጠህን ልዩ ሥራ ልትይዝ ትችላለህ፤ እንደ ካህን ጉዳዩን ከእግዚአብሔር ጋር ልትፈጽም፥ መልሱን ልትቀበልና ልታውቅ፥ እንዲሁም በስሙ ልትባርክ ትችላለህ። ወንድሜ ሆይ፥ ና፤ ና፥ ካህንም ሁን፤ ካህን ብቻ፥ ሙሉ በሙሉ ካህን ሁን። ለቅዱሱ የምልጃ አገልግሎት እንደ ተለየህ ሙሉ በሙሉ እያወቅህ አሁኑኑ በጌታ ፊት ለመመላለስ ፈልግ። የእግዚአብሔርን ልጅ መልክ የመምሰል እውነተኛ ብፅዕና ይህ ነው።

«ጌታ ሆይ፥ እንጸልይ ዘንድ አስተምረን።»

የተባረክህ ሊቀ ካህናቴ ሆይ፥ ነፍሴ አሁን ለመልእክትህ መልስ አድርጋ የምታቀርበውን ይህን ራስን የመቀደስ ቃል ተቀበል።

በቅዱሳንህ ቅዱስ ክህነት አምናለሁ፤ እኔም ካህን እንደ ሆንሁ፥ በአብ ፊት ለመቅረብ ሥልጣን እንዳለኝ፥ እጅግ ኃይል በምታደርግ ጸሎትም በዙሪያዬ በሚጠፉት ላይ በረከትን ማውረድ እንደምችል አምናለሁ።

ከኃጢአት ሁሉ በሚያነጻው፥ በእግዚአብሔር ፊት ፍጹም መታመንን በሚሰጠኝ፥ ምልጃዬም እንደሚሰማ በተረዳ እምነት ወደ እርሱ በሚያቀርበኝ በክቡር ደምህ ኃይል አምናለሁ።

ታላቁ ሊቀ ካህናቴ ሆይ፥ ከአንተ በየዕለቱ በሚወርደው በመንፈስ ቅብዓት አምናለሁ፤ ይህም ሊቀድሰኝ፥ የክህነት ጥሪዬን በማወቅና ለነፍሳት በሚሆን ፍቅር ሊሞላኝ፥ እንደ እግዚአብሔር ፈቃድ የሆነውን ነገርና የእምነትንም ጸሎት እንዴት እንደምጸልይ ሊያስተምረኝ ነው።

ጌታዬ ኢየሱስ ሆይ፥ አንተ ራስህ በሁሉ ነገር ሕይወቴ እንደ ሆንህ፥ እንዲሁ አንተ ደግሞ የጸሎት ሕይወቴ ዋስ እንደ ሆንህ፥ አንተ ራስህም ወደ አስደናቂው የምልጃ ሥራህ ኅብረት ከፍ አድርገህ እንደምታስገባኝ አምናለሁ።

በዚህ እምነት ዛሬ ራሴን ከተቀቡት ካህናቱ እንደ አንዱ አድርጌ ለአምላኬ እሰጣለሁ፤ ይኸውም በፊቱ ቆሜ ስለ ኃጢአተኞች እማልድ ዘንድ፥ ወጥቼም በስሙ እባርክ ዘንድ ነው።

ቅዱስ ጌታ ኢየሱስ ሆይ! ራሴን መቀደሴን ተቀብለህ አትመው። አዎን ጌታ ሆይ፥ እጆችህን በላዬ ጫን፤ ለዚህም ቅዱስ ሥራህ አንተ ራስህ ቀድሰኝ። በሰዎች መካከልም የልዑል እግዚአብሔር ካህን መሆኔን እያወቅሁ በካህን ባሕርይ እንድመላለስ አድርገኝ።

ለወደደን ከኃጢአታችንም በደሙ ላጠበን፥ መንግሥትም ለአምላኩና ለአባቱም ካህናት እንድንሆን ላደረገ፥ ለእርሱ ከዘላለም እስከ ዘላለም ድረስ ክብርና ኃይል ይሁን፤ አሜን።