ክርስቶስ ሊቀ ካህናት

«አባት ሆይ፥ እኔ ባለሁበት የሰጠኸኝ እነርሱ ደግሞ ከእኔ ጋር ይሆኑ ዘንድ እወዳለሁ።»—ዮሐንስ 17:24

ጌታ ኢየሱስ በመሰናበቻ ንግግሩ፣ የእግዚአብሔር መንግሥት በኃይል በመጣች ጊዜ አዲሱ ሕይወት ምን እንደሚሆን ለደቀ መዛሙርቱ ሙሉ በሙሉ ገለጠላቸው። ጥሪያቸውንና ብፅዕናቸውን የሚያገኙት መንፈስ ቅዱስ በውስጣቸው በማደሩ፣ ሰማያዊው የወይን ግንድ ከሆነው ከእርሱ ጋር በመተባበራቸው፣ ስለ እርሱም ሊመሰክሩና መከራ ሊቀበሉ በመውጣታቸው ነበር። ጌታ ስለ መጪው አዲስ ሕይወታቸው በሚያስረዳበት መካከል፣ ጸሎታቸው ሊኖረው ስለሚችለው ኃይል ወሰን የሌላቸውን የተስፋ ቃሎች ደጋግሞ ሰጥቶ ነበር። አሁንም በመደምደሚያው እርሱ ራሱ መጸለይ ጀመረ። ደቀ መዛሙርቱ፣ ሊቀ ካህናታቸው ሆኖ በሰማይ ስለ እነርሱ የሚያቀርበው ምልጃ ምን እንደሚመስል የማወቅን ደስታ እንዲያገኙ፣ ይህን ወደ አብ ያቀረበውን ጸሎቱን እንደ ክቡር ውርስ ሰጣቸው። ይህንንም ያደረገው፣ እነርሱ ደግሞ ካህናት እንደ መሆናቸው በምልጃ ሥራው ተካፋዮች ስለ ሆኑ፣ እነርሱም እኛም ይህን ቅዱስ ሥራ እንዴት መሥራት እንዳለብን እንድናውቅ ጭምር ነው። በዚህች የመጨረሻ ሌሊት ከጌታችን ትምህርት፣ እነዚህ አስደናቂ የጸሎት የተስፋ ቃሎች የተሰጡት ለራሳችን ጥቅም ሳይሆን ለጌታና ለመንግሥቱ ጉዳይ እንደ ሆነ ተረድተናል፤ በስሙ የሚቀርብ ጸሎት ምን መሆንና ምን ማግኘት እንዳለበት መማር የምንችለው ከጌታ ራሱ ብቻ ነው። በስሙ መጸለይ ከእርሱ ጋር ፍጹም በሆነ አንድነት መጸለይ እንደ ሆነም አስተውለናል፤ የሊቀ ካህናቱ ጸሎት በኢየሱስ ስም የሚቀርብ ጸሎት ሊለምነውና ሊጠብቀው የሚችለውን ሁሉ ያስተምረናል።

ይህ ጸሎት በተለምዶ በሦስት ክፍል ይከፈላል። ጌታችን በመጀመሪያ ስለ ራሱ (ቁ. 1-5)፣ ቀጥሎ ስለ ደቀ መዛሙርቱ (6-19)፣ በመጨረሻም በዘመናት ሁሉ ስለሚያምኑ ሰዎች ሁሉ (20-26) ይጸልያል። ራሱን ለምልጃ ሥራ የሰጠና በኢየሱስ ስም በዙሪያው ባሉት ላይ ምን ያህል በረከት በጸሎት ሊያወርድ እንደሚችል ለመሞከር የሚናፍቅ የኢየሱስ ተከታይ፣ ይህን ድንቅ ጸሎት ከጸሎት ትምህርት ቤት እጅግ አስፈላጊ ትምህርቶች እንደ አንዱ አድርጎ ያጠናው ዘንድ በፍጹም ትሕትና በመንፈስ እንዲመራ ራሱን ይሰጣል።

በመጀመሪያ ኢየሱስ ስለ ራሱ ይጸልያል፤ አብን ያከብር ዘንድ ራሱ እንዲከበር ይለምናል። «አባት ሆይ፥ ልጅህን አክብር። አሁንም፥ አባት ሆይ፥ … አክብረኝ።» እንዲህ የሚጸልይበትንም ምክንያት ያቀርባል። በሰማይ በአብና በወልድ መካከል ቅዱስ ቃል ኪዳን ተደርጎ ነበር። አብ ለሥራው ዋጋ በሥጋ ለባሽ ሁሉ ላይ ሥልጣን እንደሚሰጠው ተስፋ ሰጥቶት ነበር፤ እርሱም ሥራውን ፈጽሞ ነበር፣ አብንም አክብሮ ነበር፤ አሁንም ብቸኛ ዓላማው አብን ከዚህ ይበልጥ ማክበር ነው። ለሕዝቡ ሊሆንና ሊያደርግ የተቀበለውን ሁሉ አሁን ይፈጽም ዘንድ አብ እንዲያከብረው በፍጹም ድፍረት ይለምናል።

የኢየሱስ ደቀ መዝሙር ሆይ! የካህንነት ምልጃ ሥራህን የመጀመሪያ ትምህርት ከታላቁ ሊቀ ካህናትህ ምሳሌ የምትማረው እዚህ ነው። በኢየሱስ ስም መጸለይ ከእርሱ ጋር በአንድነትና በአንድ ልብ መጸለይ ነው። ወልድ ከአብ ጋር ያለውን ግንኙነት በማብራራት፣ ሥራውንና መታዘዙን፣ አብም ሲከበር ለማየት ያለውን ናፍቆት በማቅረብ ጸሎቱን እንደ ጀመረ፣ አንተም እንዲሁ አድርግ። ቅረብ፤ በክርስቶስ ሆነህ በአብ ፊት ቁም። የፈጸመውን ሥራ አቅርበህ ተማጸን። ከዚያ ሥራ ጋር አንድ እንደ ሆንህ፣ በእርሱ እንደምትታመን፣ በእርሱም እንደምትኖር ተናገር። አንተም ደግሞ አብ እንድትሠራው የሰጠህን ሥራ ልትፈጽምና ለክብሩ ብቻ ልትኖር ራስህን እንደ ሰጠህ ተናገር። ከዚያም ወልድ በአንተ እንዲከበር በልበ ሙሉነት ለምን። በስሙ፣ በቃሉ፣ በኢየሱስ መንፈስ፣ ከኢየሱስ ራሱ ጋር በመተባበር መጸለይ ይህ ነው። እንዲህ ያለው ጸሎት ኃይል አለው። ከኢየሱስ ጋር አብን ብታከብር፣ አብ በስሙ የምትለምነውን በማድረግ ኢየሱስን ያከብረዋል። በዙሪያህ ስላሉት ለመማለድ እንደ ክርስቶስ ኃይል የሚኖርህ፣ እንደ ክርስቶስ በዚህ ረገድ ከእግዚአብሔር ጋር ያለህ የግል ግንኙነት የጠራ ሲሆን፣ እርሱን ስታከብርና ሁሉን ለክብሩ ስትፈልግ ብቻ ነው።

ጌታችን ቀጥሎ ስለ ደቀ መዛሙርቱ ክበብ ይጸልያል። አብ የሰጣቸው እንደ ሆኑ አድርጎ ይናገርላቸዋል። ዋነኛ መለያቸው የክርስቶስን ቃል መቀበላቸው ነው። አብ እርሱን እንደ ላከው እንዲሁ እርሱም አሁን በእርሱ ፈንታ ወደ ዓለም እንደሚልካቸው ይናገራል። ለእነርሱም ሁለት ነገር ይለምናል፤ አብ ከክፉው እንዲጠብቃቸው፣ እርሱም ራሱን ስለ እነርሱ ስለሚቀድስ በቃሉ እንዲቀድሳቸው።

እንደ ጌታ ሁሉ፣ እያንዳንዱ አማኝ አማላጅ በመጀመሪያ የሚጸልይለት የራሱ የቅርብ ክበብ አለው። ወላጆች ልጆቻቸው፣ መምህራን ተማሪዎቻቸው፣ እረኞች መንጎቻቸው፣ ሠራተኞች ሁሉ በአደራ የተሰጧቸው፣ አማኞችም ሁሉ ሸክማቸው በልባቸው ላይ ያረፈባቸው ሰዎች አሏቸው። ምልጃ የግል፣ ያነጣጠረና የተወሰነ መሆኑ እጅግ አስፈላጊ ነው። እንግዲህ የመጀመሪያ ጸሎታችን ሁልጊዜ ቃሉን እንዲቀበሉ መሆን አለበት። ነገር ግን ከጌታችን ጋር «እኔ ቃልህን ሰጥቻቸዋለሁ» ካላልን ይህ ጸሎት አይጠቅምም፤ ስለ ነፍሳት በምናቀርበው ምልጃ ነጻነትንና ኃይልን የሚሰጠን ይህ ነው። ስለ እነርሱ መጸለይ ብቻ ሳይሆን እነርሱንም አነጋግራቸው። ቃሉንም በተቀበሉ ጊዜ ከክፉው እንዲጠበቁና በዚያ ቃል እንዲቀደሱ አብዝተን እንጸልይ። የሚወድቁትን ተስፋ ከመቁረጥ ወይም ከመፍረድ ወይም ከመተው ይልቅ ስለ ክበባችን «አባት ሆይ፥ … በስምህ ጠብቃቸው»፤ «በእውነትህ ቀድሳቸው» እያልን እንጸልይ። በኢየሱስ ስም የሚቀርብ ጸሎት «እጅግ ኃይል ታደርጋለች»፤ «የምትወዱትን ሁሉ … ይሆንላችሁማል»።

ከዚያም ጌታችን ስለ ሰፊው ክበብ ያቀረበው ጸሎት ይከተላል። «ስለ እነዚህም ብቻ አልለምንም፥ በቃላቸው በእኔ ስለሚያምኑ ደግሞ እንጂ።» የካህንነት ልቡ ስፍራዎችን ሁሉና ዘመናትን ሁሉ ለማቀፍ ይሰፋል፤ የእርሱ የሆኑት ሁሉ በየትም ስፍራ፣ የተልእኮው መለኮታዊነት ለዓለም የእግዚአብሔር ማስረጃ ሆነው አንድ እንዲሆኑ፣ ከዚያም በክብሩ ሁልጊዜ ከእርሱ ጋር እንዲሆኑ ይጸልያል። እስከዚያው ድረስም ልመናው «እኔንም የወደድህባት ፍቅር በእነርሱ እንድትሆን እኔም በእነርሱ» የሚል ነው።

በመጀመሪያ በራሱ ክበብ የጸሎትን ኃይል የፈተነ የኢየሱስ ደቀ መዝሙር በዚያ ወሰን ብቻ ተወስኖ ሊቀር አይችልም፤ ስለ ዓለም አቀፋዊቱ ቤተ ክርስቲያንና ስለ ልዩ ልዩ ቅርንጫፎችዋ ይጸልያል። በተለይም ስለ መንፈስና ስለ ፍቅር አንድነት ይጸልያል። ፍቅር በራስ ወዳድነትና በመለያየት ላይ ድል እንዲያደርግ ያለ ድንቅ ያደረገው ክርስቶስ በእውነት ከሰማይ የተላከ የእግዚአብሔር ልጅ እንደ ሆነ ለዓለም ምስክር ትሆን ዘንድ፣ ቤተ ክርስቲያን በክርስቶስ አንድ እንድትሆን ይጸልያል። እያንዳንዱ አማኝ የቤተ ክርስቲያን አንድነት በውጫዊ ድርጅቶች ሳይሆን በመንፈስና በእውነት ይገለጥ ዘንድ አብዝቶ ሊጸልይ ይገባዋል።

ስለ ጸሎቱ ይዘት ይህን ያህል ካልን፣ አሁን ደግሞ ስለ አቀራረቡ። ኢየሱስ «አባት ሆይ፥ እወዳለሁ» ይላል። በወልድነቱ መብት፣ አብም በሰጠው የተስፋ ቃል፣ በፈጸመውም ሥራ ላይ ተመሥርቶ እንዲህ ማለት ይችል ነበር። አብ «ለምነኝ፥ … እሰጥሃለሁ» ብሎት ነበር። እርሱም የአብን የተስፋ ቃል በቀላሉ ተጠቀመበት። ኢየሱስም እንደዚሁ ያለ የተስፋ ቃል ሰጥቶናል፤ «የምትወዱትን ሁሉ … ይሆንላችሁማል»። በስሙ የምወደውን እንድናገር ይጠይቀኛል። ሰው ምንም ያልሆነበትና ክርስቶስ ሁሉ በሆነበት ሕያው ኅብረት በእርሱ የሚኖር አማኝ የሊቀ ካህናቱን ያንን ቃል አንሥቶ፣ «ምን … ትወዳለህ?» ለሚለው ጥያቄ «አባት ሆይ፥ የተስፋ ቃል የሰጠኸውን ሁሉ እወዳለሁ» ብሎ ለመመለስ ነጻነት አለው። ይህ እውነተኛ እምነት እንጂ ሌላ አይደለም፤ ይህ እግዚአብሔርን ማክበር ነው፤ የምወደውን በመናገር ያለኝ እንዲህ ያለ መታመን በእርግጥ በእርሱ ዘንድ ተቀባይነት እንዳለው መረዳት ነው። በመጀመሪያ ሲታይ ልባችን ከዚህ አነጋገር ወደ ኋላ ይላል፤ እንዲህ ለመናገር ነጻነቱም ኃይሉም እንደሌለን ይሰማናል። ይህ ቃል ጸጋ የሚሰጥበት ፈቃዳችንን ፈጽሞ በመካድ ብቻ ነው፤ ነገር ግን ፈቃዱን በጌታው ፈቃድ ውስጥ ለሚያጠፋ ሁሉ ለዚሁ ጸጋ በእርግጥ ይሰጠዋል። ፈቃዱን የሚያጠፋ ያገኘዋል፤ ፈቃዱን ፈጽሞ የሚሰጥ በመለኮታዊ ብርታት ታድሶና ጸንቶ እንደ ገና ያገኘዋል። «አባት ሆይ፥ እወዳለሁ»፤ ይህ በሰማይ ያለው የጌታችን ዘላለማዊ፣ ሁልጊዜ የሚሠራና ሁሉን የሚያሸንፍ ምልጃ ዋና ቃና ነው። ጸሎታችን የሚጠቅመው ከእርሱ ጋር በመተባበር ብቻ ነው፤ ከእርሱ ጋር በመተባበር ግን እጅግ ይጠቅማል። በእርሱ ብቻ ብንኖር፣ በስሙ እየኖርንና እየተመላለስን ሁሉንም እያደረግን፤ እያንዳንዱን ልመና በቃሉና በመንፈሱ ተፈትኖና ተዳስሶ ይዘን ብንመጣ፣ ወደ ላይ ተሸክሞ በአብ ፊት እንዲቀርብ ከእርሱ ወደሚወጣው ኃያል የምልጃ ወንዝ ብንጥለው፤— የምንለምነውን ልመና እንደምንቀበል ሙሉ መታመን ይኖረናል፤ «አባት ሆይ፥ እወዳለሁ» የሚለውም በመንፈስ ራሱ በውስጣችን ይተነፈሳል። ራሳችንን በእርሱ ውስጥ እናጣለን፣ ምንምም እንሆናለን፤ በድካማችንም ውስጥ ኃይል እንዳለንና እንደምናሸንፍ እናገኛለን።

የኢየሱስ ደቀ መዛሙርት ሆይ! በካህንነት ምልጃው ጌታችሁን ትመስሉ ዘንድ የተጠራችሁ፣ ለሚጠፉ ሰዎች በእግዚአብሔር ፊት ለመማለድና ለማሸነፍ የተሰጠንን ከአእምሮ በላይ የሆነውን የዚህን ዕጣ ፈንታችንን ክብር መቼ፣ ኦ መቼ እንነቃለን! ራሱን በትሕትና ሽፋን የሚያለብሰውን ስንፍና አራግፈን፣ እግዚአብሔራችን እርሱን አጥብቆ ለሚይዝ ፈቃድ ሊሰጠው የሚጠብቀውን ሁሉ እንድናውቅ፣ እንድንወስድና እንድንወርስ ፈቃዳችንን በብርሃንና በኃይል ይሞላ ዘንድ ራሳችንን ሙሉ በሙሉ ለእግዚአብሔር መንፈስ የምንሰጠው ኦ መቼ ይሆን?

«ጌታ ሆይ፥ እንጸልይ ዘንድ አስተምረን።»

ብሩክ ሊቀ ካህናቴ ሆይ! በሚያሸንፈው የምልጃ ኃይልህ ከአንተ ጋር እንድካፈል እንዲህ የምትጋብዘኝ እኔ ማን ነኝ! ጌታዬ ሆይ! ሕዝብህን የዋጀህበትን ይህን ድንቅ መብት ለማስተዋል፣ ለማመንና ለመጠቀም ልቤ ለምን እንዲህ ዘገምተኛ ሆነ? ጌታ ሆይ! ይህ፣ ሳላቋርጥ በመጸለይ በምድር በዙሪያዬ ባሉት ሁሉ ላይ የሰማይን በረከት ማውረድ፣ እየጨመረ የሚሄድ የማያቋርጥ የሕይወት ሥራዬ ይሆን ዘንድ ጸጋህን ስጠኝ።

ብሩክ ጌታ ሆይ! ይህን ጥሪዬን ለመቀበል አሁን መጥቻለሁ። ለዚህም ሁሉን ትቼ ልከተልህ እወዳለሁ። ሁለንተናዬን በእምነት በእጆችህ ልሰጥ እወዳለሁ፤ ከጸሎት ሠራዊትህ አንዱ እሆን ዘንድ ቅረጸኝ፣ አሠልጥነኝ፣ አነሣሣኝ፤ በጸሎት ከሚተጉና ከሚጋደሉ ታጋዮች፣ ኃይል ካላቸውና ከሚያሸንፉ እስራኤሎች፣ ከእግዚአብሔር መሳፍንት አንዱ አድርገኝ። ልቤን ያዘው፤ አብ የሰጠህ ሰዎች ተሰብስበው፣ ተቀድሰውና አንድ ሆነው እግዚአብሔር እንዲከበር በሚል በአንድ ምኞት ሙላው። አእምሮዬን ውሰድ፤ ጸሎት መቼ በረከትን ሊያመጣ እንደሚችል ማወቅ ጥናቴና ጥበቤ ይሁን። ሁልጊዜ በእግዚአብሔር ፊት ቆሜ በስሙ እባርክ ዘንድ ሙሉ በሙሉ ውሰደኝ፤ ለካህንነትም አዘጋጀኝ።

ብሩክ ጌታ ሆይ! በመንፈሳዊ ሕይወት ሁሉ እንደ ሆነ እዚህም እንዲሁ ይሁን፤ አንተ ሁሉ፣ እኔ ምንም። ለራሱ ምንም የሌለውና ምንም የማይፈልግ ሁሉን እንደሚቀበል፣ በዘላለማዊው የምልጃ አገልግሎትህ ከአንተ ጋር እስከ መካፈል ድንቅ ጸጋ ድረስ እንደሚቀበል፣ ይህ በዚህ ረገድ የእኔም ተሞክሮ ይሁን። አሜን።