የአፍሪካ የገዛ ልጆች

«… በኢየሩሳሌምም በይሁዳም ሁሉ በሰማርያም እስከ ምድር ዳርም ድረስ ምስክሮቼ ትሆናላችሁ» — ከየሐዋርያት ሥራ 1

ሳሙኤል አደገና መምህር ሆነ። በሴራ ሊዮን ፉራ ቤይ በተባለ አዲስ ኮሌጅ የመጀመሪያው ተማሪ እርሱ ነበር። የልጅነቱ ቋንቋ በሆነው በዮሩባ ቃላትን መጻፍ ጀመረ።

በ1841 የእንግሊዝ መንግሥት ሦስት የእንፋሎት መርከቦችን በታላቁ የኒጀር ወንዝ ላይ ወደ አፍሪካ ውስጥ ርቆ ላከ። የባሪያ ንግድን ማስቆምና የኢየሱስን የምሥራች ማካፈል ፈልገው ነበር። ሳሙኤልም ሚስዮናዊ ሆኖ ከእነርሱ ጋር ሄደ።

በወንዙ ላይ አስፈሪ ትኩሳት ተነሣ። አውሮፓውያኑ ሁሉ ማለት ይቻላል ታመሙ፤ ብዙዎቻቸውም ሞቱ። በመርከቦቹ ላይ የነበሩት አብዛኞቹ አፍሪካውያን ግን ጤነኞች ሆነው ቆዩ።

ሳሙኤል በለንደን ላሉት ሚስዮናውያን ደብዳቤ ጻፈ። አፍሪካ ከሁሉ በላይ የምትረዳው «በገዛ ልጆቿ» እንደ ሆነ ተናገረ። ይህን ሲል አፍሪካውያን አውሮፓውያን በሚታመሙበት ቦታ መኖር እንደሚችሉና የሰዎቹን ቋንቋዎች መናገር እንደሚችሉ ማለቱ ነበር። ስለዚህ ሠልጥነው ለገዛ ወገኖቻቸው ስለ ኢየሱስ እንዲናገሩ መላክ ይገባቸዋል።

ከሁለት ዓመት በኋላ፣ በ1843፣ ሳሙኤል በለንደን የእንግሊዝ ቤተ ክርስቲያን ቄስ ሆኖ ተሾመ። ወደ ቤቱ ወደ ሴራ ሊዮን ሲመለስ በሰው በተጨናነቀ ቤተ ክርስቲያን ሰበከ። ብዙ ሰዎች ከዚያ በፊት አፍሪካዊ ቄስ አይተው አያውቁም ነበር! ከዚያም አዲስ ነገር አደረገ፦ በዮሩባ ቋንቋ የቤተ ክርስቲያን አገልግሎት አካሄደ። እዚያ ቆሞ ሳለ የገዛ ቋንቋውን መናገር እንደሚማር ሕፃን ሆኖ እንደ ተሰማው ተናገረ።

ኢየሱስ ወዳጆቹን ከቤት ጀምረው ስለ እርሱ ለሰዎች እንዲናገሩ ነገራቸው። ይህን ለማድረግ ሩቅ መጓዝ አያስፈልግህም። በዙሪያህ ባሉ ሰዎች መጀመር ትችላለህ።

ውድ ኢየሱስ ሆይ፣ ካለሁበት ቦታ ጀምሬ በዙሪያዬ ላሉ ሰዎች ስለ አንተ እንድናገር እርዳኝ። አሜን።