አዲስ ስም

«ስለዚህ ማንም በክርስቶስ ቢሆን አዲስ ፍጥረት ነው፤ አሮጌው ነገር አልፎአል፤ እነሆ፥ ሁሉም አዲስ ሆኖአል።» — ከ2ኛ ቆሮንቶስ 5

በሴራ ሊዮን አጃዪ ባተርስት ወደምትባል መንደር ተላከ። አቶ ዴቪ በተባሉ ሚስዮናዊና በሚስታቸው ቤት ኖረ። ወይዘሮ ዴቪ በየምሽቱ ለግማሽ ሰዓት ያስተምሩት ነበር።

አጃዪ በጣም በፍጥነት ተማረ። ከስድስት ወር ብቻ በኋላ አዲስ ኪዳንን ማንበብ ቻለ! ብዙም ሳይቆይ ሞኒተር ተደረገ፤ ይህም ታናናሾቹን ልጆች ለማስተማር ይረዳ ነበር ማለት ነው። በወር ሰባት ፔኒ ተኩል ይከፈለው ነበር። አንድ ነገር እንደ ተማረ ወዲያውኑ ለሌሎች ሊያስተምረው ይፈልግ ነበር።

በትምህርት ቤቱና በቤተ ክርስቲያኑ አጃዪ ስለ ኢየሱስ ሰማ። በኋላም «ጌታ … ልቤን ሊከፍት ወደደ» ብሎ ተናገረ። ክፉ ነገሮችን እንዳደረገና የእግዚአብሔር ይቅርታ እንደሚያስፈልገው ተረዳ፤ ኢየሱስ የሚሰጠውንም ይቅርታ ፈለገ። በዲሴምበር 11 ቀን 1825 ተጠመቀ።

በጥምቀቱ አዲስ ስም ወሰደ፦ ሳሙኤል ክራውዘር። ይህ በለንደን የነበሩ የአንድ ቄስ ስም ነበር። ወይዘሮ ዴቪ በእርሳቸው ቤተ ክርስቲያን የሰንበት ትምህርት ቤት አስተማሪ ነበሩ፤ ስለዚህ ስማቸውን ለልጁ መረጡለት። ሳሙኤል ግን የዮሩባ ስሙን ፈጽሞ አልረሳም። በሕይወቱ ዘመን ሁሉ ሳሙኤል አጃዪ ክራውዘር ብሎ ይፈርም ነበር።

በባተርስት አሳኖ የተባለች አንዲት ልጅም ነበረች። እርሷም ከሌላ የባሪያ መርከብ ነጻ የወጣች ነበረች፤ በዚያው ትምህርት ቤትም ትማር ነበር። ከብዙ ዓመታት በኋላ፣ በ1829፣ ሳሙኤልና አሳኖ ተጋቡ። ለሃምሳ አንድ ዓመት በትዳር አብረው ኖሩ፤ ስድስት ልጆችም ወለዱ።

የኢየሱስ ስትሆን በውስጥህ አዲስ ትሆናለህ። ግን አሁንም አንተው ነህ! እግዚአብሔር የፈጠረውን ሰው አይጥልም። አዲስ ያደርግሃል።

ውድ ኢየሱስ ሆይ፣ የሳሙኤልን ልብ እንደ ከፈትህ፣ አንተን እንድሰማ እባክህ ልቤን ክፈትልኝ። ይቅር ስለምትለኝና አዲስ ስለምታደርገኝ አመሰግንሃለሁ። አሜን።