እንድትቆም የተደረገችው መርከብ

«ነፍሳችን እንደ ወፍ ከአዳኞች ወጥመድ አመለጠች፤ ወጥመዱ ተሰበረ፥ እኛም አመለጥን።» — ከመዝሙር 124

በሌጎስ አጃዪን የፖርቱጋል የባሪያ ነጋዴዎች ገዙት። ከሌሎች ወንዶች ልጆችና ጎልማሶች ጋር መስኮት በሌለው ጨለማ ክፍል ውስጥ፣ አንገት ለአንገት በሰንሰለት ተያይዘው ተቀመጡ። አራት ወር የሚጠጋ በዚያ ጠበቁ።

በመጨረሻ፣ አንድ ሌሊት ወደ አንድ መርከብ ተወሰዱ። በውስጧ 187 ሰዎች ታጭቀው ነበር። መርከቧ ውቅያኖሱን አቋርጣ ወደ አሜሪካ አህጉራት ልትጓዝ ነበር፤ በዚያም ባሪያዎች በትልልቅ እርሻዎች ላይ በግድ ይሠሩ ነበር።

ነገር ግን በዚያው ምሽት ሁለት የእንግሊዝ የጦር መርከቦች መጥተው የባሪያ መርከቧን አስቆሙ! በዚያ ዘመን የእንግሊዝ የባሕር ኃይል የባሪያ መርከቦችን ለማስቆምና ሰዎቹን ነጻ ለማውጣት በአፍሪካ የባሕር ዳርቻ ወዲያና ወዲህ ይጓዝ ነበር። መርከቦቻቸው ሚርሚዶን እና ኢፊጌኒያ ይባሉ ነበር። ቀኑ ኤፕሪል 7 ቀን 1822 ነበር።

አጃዪና አምስት ጓደኞቹ ወደ ሚርሚዶን ተወሰዱ። በዚያም የሚያስፈራ ነገር አዩ፦ ነጭ ቆዳ ያለው ሥጋ ተሰቅሎ፣ በመርከቡ ወለል ላይም የተደረደሩ ክብ የብረት ኳሶች። ልጆቹ መርከበኞቹ ሌሎቹን ምርኮኞች በልተዋቸዋል፣ ኳሶቹም ራሶቻቸው ናቸው ብለው አሰቡ! በቅርበት ሲመለከቱ ግን ሥጋው የአሳማ ሥጋ ነበር፤ ኳሶቹም የመድፍ ጥይቶች ብቻ ነበሩ። አጃዪ በሕይወቱ ዘመን ሁሉ በዚህ ነገር ይስቅ ነበር።

መርከበኞቹ ደጎች ነበሩ። ለልጆቹ ምግብና ልብስ ሰጧቸው። በባሕር ላይ ሁለት ወር ተኩል ያህል ከተጓዙ በኋላ መርከቡ ወደ ሴራ ሊዮን አደረሳቸው፤ ሴራ ሊዮን የዳኑ ሰዎች በነጻነት የሚኖሩባት ስፍራ ነበረች። በዚያ ያሉ ሰዎችም «ነጻ ናችሁ!» አሏቸው። ብዙም ሳይቆዩ አመኑ።

ኢየሱስም ሰዎችን ነጻ ሊያወጣ መጣ። የመጣው «ለታሰሩትም መፈታትን … እሰብክ ዘንድ» እንደ ሆነ ተናገረ። አጃዪ ከባሪያ መርከብ ነጻ ወጣ። አንድ ቀን ደግሞ ከዚህም ስለሚበልጥ ነጻነት ይማራል።

ውድ ኢየሱስ ሆይ፣ ሰዎችን ነጻ ልታወጣ ስለ መጣህ አመሰግንሃለሁ። በችግር ውስጥ ያሉትን ሌሎች ሰዎች ስለሚረዱ ሰዎች አመሰግንሃለሁ። እኔም ከእነርሱ አንዱ እንድሆን እርዳኝ። አሜን።