ስለ ሃይማኖታዊ መነቃቃት የተሰጡ ትምህርቶች
ትምህርት 21. በልቡ ወደ ኋላ የተመለሰ

ምዕራፍ 23 · 23 ደቂቃ ንባብ · 30 ደቂቃ ማዳመጥ

ትምህርት 21. በልቡ ወደ ኋላ የተመለሰ

ትምህርት 21.

በልቡ ወደ ኋላ የተመለሰ።

ጥቅስ፦ «በልቡ ወደ ኋላ የተመለሰ በገዛ መንገዱ ይሞላል።»—ምሳሌ 14:14።

አዳዲስ አማኞችን ወደ ኋላ ከመመለስ ሳላስጠነቅቅ ይህን የትምህርቶች ተከታታይ መደምደም አልችልም። ይህን ርዕሰ ጉዳይ ስመረምር የሚከተሉትን እናገራለሁ፦

I. በልብ ወደ ኋላ መመለስ ምን እንዳልሆነ።

II. በልብ ወደ ኋላ መመለስ ምን እንደ ሆነ።

III. በልብ ወደ ኋላ የመመለስ ምልክቶች ምን እንደ ሆኑ።

IV. በልብ ወደ ኋላ የመመለስ ውጤቶች ምን እንደ ሆኑ ማሳየት።

V. ከዚህ ሁኔታ እንዴት መመለስ እንደሚቻል።

I. በልብ ወደ ኋላ መመለስ ምን እንዳልሆነ።

1. እጅግ የተነሣሡ ሃይማኖታዊ ስሜቶች በመብረዳቸው አይደለም። የሃይማኖታዊ ስሜት መብረድ ወደ ኋላ የተመለሰ ልብ ምልክት ሊሆን ይችላል፤ ነገር ግን በልብ ወደ ኋላ መመለስ የሃይማኖታዊ ስሜት መቀዝቀዝ ማለት አይደለም።

II. በልብ ወደ ኋላ መመለስ ምን እንደ ሆነ።

1. እውነተኛውን መለወጥ የሚያስገኘውን ራስን ለእግዚአብሔርና ለአገልግሎቱ የመቀደስን ስጦታ መልሶ መውሰድ ነው።

2. ክርስቲያን የቀደመውን ፍቅሩን መተው ነው።

3. ክርስቲያን እውነተኛ ሃይማኖትን ከሚያስገኘው ፍጹምና ሁሉን ከሚያጠቃልል ለእግዚአብሔር ራስን የመስጠት ሁኔታ ራሱን አርቆ እንደ ገና ራስን በሚያስደስት መንፈስ ቍጥጥር ሥር መውደቁ ነው።

4. ጥቅሱ የሃይማኖት መልክና ለእግዚአብሔር መታዘዝ ተጠብቆ ሳለ ወደ ኋላ የተመለሰ ልብ ሊኖር እንደሚችል ያመለክታል። ሰዎች አንድ ዓይነት ወይም ተመሳሳይ ሥራን እጅግ ከተለያዩ፥ ብዙ ጊዜም ከተቃራኒ ምክንያቶች ተነሥተው እንደሚያደርጉ ከራሳችን ኅሊና ስለምናውቅ፥ ሰዎች በእውነት በልባቸው ወደ ኋላ ተመልሰው ሳሉ የሃይማኖትን ውጫዊ ሥርዓቶችና መልኮች ሁሉ ጠብቀው ሊኖሩ እንደሚችሉ እርግጠኞች ነን። እጅግ የከፋው ራስ ወዳድነት ብዙ ጊዜ ሃይማኖታዊ መልክ እንደሚይዝ ጥርጥር የለውም፤ በልቡ ወደ ኋላ የተመለሰ ሰው በነፍሱ ያለውን የአምልኮ ኃይል አጥቶ ሳለ ሥርዓቶቹን እንዲጠብቅ የሚገፋፉት ብዙ ምክንያቶችም አሉ።

III. ወደ ኋላ የተመለሰ ልብ ምልክቶች ምን እንደ ሆኑ።

1. በሃይማኖታዊ ተግባራት ውስጥ በግልጽ የሚታይ ልማዳዊ ሥርዓተኝነት። ከሃይማኖታዊ ሕይወት የሚፈልቅ ሳይሆን የልማድ ውጤት እንደ ሆነ በግልጽ የሚታይ፥ ነገሮችን የመናገርና የማድረግ ደረቅና ቋሚ ሥርዓታዊ መንገድ ነው። ይህ ሥርዓተኝነት ስሜት የሌለውና እንደ በረዶ ተራራ የቀዘቀዘ ይሆናል፤ ሃይማኖታዊ ተግባርን በመፈጸም ረገድም ትጋት ፈጽሞ እንደ ጐደለው ያሳያል። በጸሎትና በሃይማኖታዊ ተግባራት በልቡ ወደ ኋላ የተመለሰው ሰው ምናልባት ሁሉ እንዲሰሙት በከንፈሩ ይጸልያል፥ ያመሰግናል፥ ይናዘዛል ወይም ምስጋና ያቀርባል፤ ነገር ግን ማንንም እንዳይነካ አድርጎ ነው። ሕያውና አሁን ያለ እምነት፥ ፍቅርና ሃይማኖታዊ ቅንዓት ባለበት ስፍራ እንዲህ ያለ ሥርዓተኝነት ሊኖር አይችልም።

2. የሃይማኖታዊ ደስታ ማጣት ወደ ኋላ የተመለሰ ልብ ምልክት ነው። አብልጠን የምንወዳቸውን ደስ የሚያሰኙ ነገሮችን መናገርና ማድረግ ሁልጊዜ ደስ ያሰኘናል፤ ከዚህም በላይ ልብ ወደ ኋላ ካልተመለሰ ከእግዚአብሔር ጋር ያለው ኅብረት ይጠበቃል፤ ስለዚህ ሃይማኖታዊ ተግባራት ሁሉ በደስታ መፈጸማቸው ብቻ ሳይሆን በውስጣቸው ያለው ከእግዚአብሔር ጋር የሚደረግ ኅብረት የበለጸገና የማያቋርጥ የደስታ ምንጭ ይሆናል። የእግዚአብሔርን አገልግሎት ደስ ካላሰኘን በእውነት ስለማናገለግለው ነው። እርሱን ከሁሉ በላይ ከወደድነው በእያንዳንዱ እርምጃ በአገልግሎቱ ደስ ሳንሰኝ መቅረት አይቻለንም። እንግዲህ ሃይማኖታዊ ደስታችሁን ወይም እግዚአብሔርን በማገልገል የምታገኙትን ደስታ ባጣችሁ ጊዜ ሁሉ እርሱን በትክክል እንደማታገለግሉት ልታውቁ እንደምትችሉ ሁልጊዜ አስቡ።

3. ሃይማኖታዊ ባርነት ሌላው የወደ ኋላ የተመለሰ ልብ ምልክት ነው። እግዚአብሔር ባሪያዎች የሉትም። ግድ ስለሆነባቸው የሚያገለግሉትን የባሪያዎችን አገልግሎት አይቀበልም። ከፍቅር የሚመነጭ አገልግሎትን እንጂ ሌላ አይቀበልም። በልቡ ወደ ኋላ የተመለሰ ሰው ሃይማኖታዊ ተግባራቱ ሸክም ይሆኑበታል። ጌታን ለማገልገል ቃል ገብቷል። ከአገልግሎቱ መልክ ፈጽሞ ለመለየት አይደፍርም፤ ለእግዚአብሔር እውነተኛ ፍቅር ባለበት ስፍራ እጅግ በፈቃድ የሚፈልቁና ደስ የሚያሰኙ በሆኑት በጸሎት፥ በምስጋና፥ በአምልኮ፥ በጓዳ ተግባራት ወይም በማናቸውም በእነዚያ ተግባራት ልቡ ባይኖርም ታዛዥ ለመሆን ይሞክራል። በልቡ ወደ ኋላ የተመለሰ ሰው ብዙ ጊዜ ታዛዥ ነገር ግን የማትወድ ሚስትን ይመስላል። ለባሏ ግዴታዋን ለመፈጸም ትሞክራለች፤ ነገር ግን ስለማትወደው ፈጽሞ ትወድቃለች። ባሏን ደስ ለማሰኘት የምትደክመው በግድ ነው እንጂ ከአፍቃሪ ልብ በፈቃድ የሚፈልቅ አይደለም፤ ግንኙነቷና ተግባሮቿም የሕይወቷ ሸክም ይሆናሉ። በላይዋ ስላለው የኀላፊነት ክብደት እያማረረች ትዞራለች፤ ወጣት ሴቶችን እንዲያገቡ ትመክራለች ተብሎም አይጠበቅም። ዕድሜ ልኳን ታስራለች፤ ስለዚህም የትዳርን ሕይወት ተግባራት መፈጸም አለባት፤ ነገር ግን ወይ፥ እንዴት ያለ ባርነት ነው! ሃይማኖታዊ ባርነትም እንዲሁ ነው። ሃይማኖተኛ ነኝ የሚለው ሰው ግዴታውን መፈጸም አለበት። በሥቃይ እየጐተተ ያከናውነዋል፤ በተፈጥሮውም የወደ ኋላ የተመለሱትን መዝሙሮች ሲዘምር ትሰሙታላችሁ።

«ማስተዋል ምክሩን ሲመዝን እሰማለሁ፥

ቃሉንም ሁሉ እቀበላለሁ፤

ነገር ግን መታዘዝ ይከብደኛል፥

መውደድ ደግሞ ከዚያ ይበልጥ ይከብደኛል።»

4. ያልተገራ ቍጣ።

ልብ በፍቅር ሲሞላ ጠባይ በተፈጥሮው የተገራና ጣፋጭ ይሆናል፤ ወይም ቢያንስ ፈቃድ ይገዛዋል፤ በአስከፊ ስድብም እንዲፈነዳ አይፈቅድለትም፤ ወይም በማናቸውም ጊዜ ከፈቃድ ቍጥጥር እጅግ አምልጦ በጥላቻ ቃላት ቢፈነዳ ቶሎ ይገዛል፤ ቍጥጥሩን እንዲይዝና ሌሎችን በሚያስቸግር መንገድ እንዲገለጥ በምንም ዓይነት አይፈቀድለትም። በተለይም አፍቃሪ ልብ ክፉ ጠባይ በማናቸውም ጊዜ ቢያሸንፈው ይናዘዛል፥ ይሰበራልም። ስለዚህ በዙሪያው ላሉት ሰዎች እንዲገለጥ የተፈቀደ ቍጡና ያልተገራ ጠባይ ባለበት ስፍራ ሁሉ ወደ ኋላ የተመለሰ ልብ እንዳለ ልታውቁ ትችላላችሁ።

5. የፍቅር ማጣት መንፈስ ወደ ኋላ የተመለሰ ልብ ምልክት ነው። ይህን ስል የሰውን ሁሉ ጠባይ በምክንያታዊነት ሊተረጐም በሚቻለው በተሻለ መንገድ የመተርጐም ዝንባሌ ማጣትን ማለቴ ነው፤ በሌሎች መልካም ዓላማና ምስክርነት ላይ እምነት ማጣት ማለት ነው። የምንወዳቸውን ሰዎች መልካም ምስክርነት በተፈጥሮ እናምናለን። ትክክለኛ ዓላማ እንዳላቸው በተፈጥሮ እንቈጥራለን፤ ቃላቸውንና ሥራቸውንም በሚፈቀደው በተሻለ ትርጓሜ እንረዳለን። ይህ በጐደለበት ስፍራ ወደ ኋላ የተመለሰ ወይም ፍቅር የሌለው ልብ ስለ መኖሩ የማያወላውል ማስረጃ አለ።

6. ፈራጅነት ያለበት መንፈስ ወደ ኋላ የተመለሰ ልብ የማያወላውል ማስረጃ ነው። ይህ የሌሎች ጠባይ በፍቅር ሊተረጐም ሲቻል ስሕተት የመፈለግና የሌሎችን ዓላማ የመጠራጠር መንፈስ ነው። በሌሎች ላይ ነቀፋ የማሳረፍና በክፉ የመፍረድ ዝንባሌ ነው። በክርስቲያናዊ ጠባይና ምስክርነት ላይ ያለመታመን መንፈስ ነው። በከባድ ፍርዶች፥ በከባድ ንግግሮችና በግለሰቦች ላይ ደስ የማያሰኝ ስሜትን በማሳየት የሚገለጥ የአእምሮ ሁኔታ ነው። ይህ የአእምሮ ሁኔታ ከአፍቃሪ ልብ ጋር ፈጽሞ አይስማማም፤ ሃይማኖተኛ ነኝ በሚል ሰው ዘንድ ፈራጅ መንፈስ በሚገለጥበት ስፍራ ሁሉ ወደ ኋላ የተመለሰ ልብ እንዳለ ልታውቁ ትችላላችሁ።

7. ለእግዚአብሔር ቃል ፍላጎት ማጣትም የወደ ኋላ የተመለሰ ልብ ምልክት ነው። ሃይማኖተኛ ነኝ የሚል ሰው ለመጽሐፍ ቅዱስ ያለውን ፍላጎት ከማጣቱ የበለጠ ወደ ኋላ የተመለሰ ልብ እንዳለው በእርግጥ የሚያረጋግጥ ነገር ምናልባት የለም። ልብ በፍቅር ሲሞላ በዓለም ላይ እንደ መጽሐፍ ቅዱስ የከበረ መጽሐፍ የለም። ፍቅር ሲጠፋ ግን መጽሐፍ ቅዱስ የማይስብ ብቻ ሳይሆን ብዙ ጊዜ የሚያስጠላ ይሆናል። የተስፋ ቃሎቹን የሚቀበል እምነት የለም፤ ማስፈራሪያዎቹን ለመፍራት የሚበቃ ወቀሳ ግን ቀርቷል። በአጠቃላይ ግን በልቡ ወደ ኋላ የተመለሰ ሰው ለመጽሐፍ ቅዱስ ግድየለሽ ነው። ብዙም አያነበውም፤ ሲያነበውም ለመረዳት የሚበቃ ፍላጎት የለውም። ገጾቹ ጨለማና የማይስቡ ይሆኑበታል፤ ስለዚህም ቸል ይባላል።

8. ለስውር ጸሎት ፍላጎት ማጣትም የወደ ኋላ የተመለሰ ልብ ምልክት ነው።

አንተ ወጣት ክርስቲያን! ለመጽሐፍ ቅዱስና ለስውር ጸሎት ያለህን ፍላጎት እያጣህ እንደ ሆነ ብታገኝ ወዲያውኑ ቁም፤ ወደ እግዚአብሔር ተመለስ፤ የፊቱን ብርሃን እስክትደሰትበትም ድረስ ለራስህ ዕረፍት አትስጥ። ለመጸለይ ወይም መጽሐፍ ቅዱስህን ለማንበብ ፍላጎት ባይኖርህ፥ ስትጸልይና መጽሐፍ ቅዱስህን ስታነብ ልብህ በዚያ ባይኖር፥ ደስታም ባይኖርህ፥ ስውር አምልኮህን ለማሳጠር ብትዝ ወይም ቸል ለማለት በቀላሉ ብትገፋፋ፥ አሳብህ፥ ፍቅርህና ስሜትህ ቢባዝኑ፥ የጓዳ ተግባራትህም ሸክም ቢሆኑብህ፥ በልብህ ወደ ኋላ የተመለስህ እንደ ሆንህ ልታውቅ ትችላለህ፤ የመጀመሪያው ሥራህም መሰበርና ፍቅርህና ቅንዓትህ እንዲታደሱ ማረጋገጥ ነው።

9. ለነፍሳት መለወጥና ሃይማኖታዊ መነቃቃትን ለማስፋፋት ለሚደረግ ጥረት ፍላጎት ማጣት። ይህ በእርግጥ ወደ ኋላ የተመለሰ ልብን ይገልጣል። አፍቃሪ ልብ በመነቃቃቶች ውስጥ ከሚሆነው የነፍሳት መለወጥና እነርሱንም ለማስፋፋት ከሚደረገው ጥረት የበለጠ ፍላጎት የሚያሳድርበት ነገር የለም።

10. ስለ ሃይማኖታዊ መነቃቃቶች ለታተሙ ዘገባዎችና ታሪኮች ፍላጎት ማጣትም የወደ ኋላ የተመለሰ ልብ ምልክት ነው። አንድ ሰው ለነፍሳት መለወጥና ለሃይማኖታዊ መነቃቃቶች ያለውን ፍላጎት እስከ ያዘ ድረስ በየትኛውም ስፍራ ስለሚሆኑ መነቃቃቶች ለሚነገሩ ዘገባዎች ሁሉ በእርግጥ ፍላጎት ይኖረዋል። ስለዚህ እንዲህ ያሉትን ዘገባዎች ለማንበብ ፍላጎት እንደሌላችሁ ወይም እንደማይስቡአችሁ ብታገኙ በልባችሁ ወደ ኋላ እንደ ተመለሳችሁ እርግጠኞች ሁኑ።

11. ስለ ሚስዮኖችና ስለ ሚስዮናዊ ሥራና እንቅስቃሴ የሚሆነውም እንዲሁ ነው። ለሥራው ፍላጎት ብታጡ፥ ለአሕዛብም መለወጥ ግድ ባይላችሁ፥ ስለ ሚስዮኖች መከናወን ማንበብና መስማት ደስ ባያሰኛችሁ በልባችሁ ወደ ኋላ እንደ ተመለሳችሁ ልታውቁ ትችላላችሁ።

12. በአጠቃላይ ለበጎ አድራጎት ሥራዎች ፍላጎት ማጣት የወደ ኋላ የተመለሰ ልብ ምልክት ነው። ፍላጎት ማጣት እላለሁ፤ በእርግጥ ወደ ክርስቶስ ተለውጣችሁ ከነበረ በእውቀታችሁ ውስጥ ለገቡ የበጎ አድራጎት ሥራዎች ሁሉ ፍላጎት ነበራችሁና። ሃይማኖት ከራስ ጥቅም የጸዳ በጎነት ነው። በእርግጥ የተለወጠች ነፍስ የሰውን ልጅ ለማሻሻልና ለማዳን በሚደረጉ የበጎ አድራጎት ጥረቶች ሁሉ እጅግ ጥልቅ ፍላጎት ይኖራታል። በመልካም አስተዳደር፥ በክርስቲያናዊ ትምህርት፥ በመጠን የመኖር ዓላማ፥ በባርነት መሻር፥ ለድሆች በሚደረግ እርዳታ፥ በአጭሩም በመልካም ቃልና ሥራ ሁሉ ላይ የነበራችሁን ፍላጎት ባጣችሁ መጠን ልክ በልባችሁ ወደ ኋላ እንደ ተመለሳችሁ ማስረጃ አላችሁ።

13. ለእውነተኛ መንፈሳዊ ንግግር ፍላጎት ማጣት ሌላው የወደ ኋላ የተመለሰ ልብ ምልክት ነው። «በልብ ሞልቶ ከተረፈው አፍ ይናገራልና።» ጌታችን ኢየሱስ ክርስቶስ ይህን የተፈጥሮአችን ሕግ አድርጎ ተናገረ። ስለ ክርስቶስና ስለ ሕያው ክርስቲያናዊ ተሞክሮአችን ከሚነገረው ንግግር የበለጠ ለእውነተኛ አፍቃሪ ልብ የሚጣፍጥ ንግግር የለም። ስለ ልብ ሃይማኖትና ስለ ክርስቲያኖች ልዩ ልዩና ድንቅ ተሞክሮዎች ለመነጋገር ያላችሁን ፍላጎት እያጣችሁ እንደ ሆነ ብታገኙ፥ እውነተኛውን የእግዚአብሔር ፍቅር አውቃችሁ ከነበረ ከእርሱ ወድቃችኋል፤ በልባችሁም ወደ ኋላ የተመለሳችሁ ናችሁ።

14. እጅግ መንፈሳውያን ከሆኑ ሰዎች ንግግርና ኅብረት ፍላጎት ማጣት የወደ ኋላ የተመለሰ ልብ ምልክት ነው። ለእኛ እጅግ ውድ ለሆኑ ነገሮች ከሁሉ የበለጠ ፍላጎት ባላቸው ሰዎች ኅብረት እጅግ ደስ ይለናል። ስለዚህ አፍቃሪ ክርስቲያናዊ ልብ ከሁሉ ይልቅ መንፈሳዊ አስተሳሰብ ያላቸውንና ንግግራቸው እጅግ ወንጌላዊና መንፈሳዊ የሆነውን ሰዎች ኅብረት ሁልጊዜ ይፈልጋል። በዚህ ረገድ ጐድላችሁ ብትገኙ በልባችሁ ወደ ኋላ እንደ ተመለሳችሁ በእርግጥ እወቁ።

15. ስለ ቅድስና ጥያቄ ፍላጎት ማጣት የወደ ኋላ የተመለሰ ልብ ምልክት ነው። እንደ ገና እላለሁ፥ ፍላጎት ማጣት፤ የእግዚአብሔርን ፍቅር በእውነት አውቃችሁ ከነበረ ራስን ለእግዚአብሔር ፈጽሞ ስለ መቀደስ ወይም ስለ ፍጹም ቅድስና ጥያቄ ታላቅ ፍላጎት ሳይኖራችሁ አይቀርምና። ክርስቲያን ከሆናችሁ ኃጢአት ለነፍሳችሁ አስጸያፊ እንደ ሆነ ተሰምቷችኋል። ለዘላለም ከእርሱ ለመላቀቅ የማይነገር ናፍቆት ነበራችሁ፤ በዚያ እጅግ አስጨናቂ አስፈላጊነት ባለው ጥያቄ ላይ ብርሃን ሊፈነጥቅ የሚችል ነገር ሁሉ እጅግ ይስባችሁ ነበር። ይህ ጥያቄ ከተተወና ከእንግዲህ ፍላጎት ካልሰጣችሁት በልባችሁ ወደ ኋላ ስለ ተመለሳችሁ ነው።

16. አዲስ ለተለወጡት ሰዎች ፍላጎት ማጣትም የወደ ኋላ የተመለሰ ልብ ምልክት ነው። መዝሙረኛው «የሚፈሩህ ሁሉ ባዩኝ ጊዜ ደስ ይላቸዋል፥ በቃልህ ተስፋ አድርጌአለሁና» ይላል። ይህን በአዲስ አማኝ አፍ ያኖረዋል፤ ይህ እውነት እንደ ሆነ የማያውቅስ ማን ነው? ንስሐ በሚገባ በአንድ ኃጢአተኛ በእግዚአብሔር መላእክት ፊት ደስታ ይሆናል፤ ታዲያ ወደ ክርስቶስ በሚመጡትና በመንግሥተ ሰማያት እንደ አዲስ እንደ ተወለዱ ሕፃናት በሆኑት ሰዎች በምድር ባሉ ቅዱሳን መካከል ደስታ አይሆንምን? ወደ ክርስቶስ ለተለወጡት ሰዎች ሙሉ ልብ የሚወስድ ፍላጎት የማያሳይ ሃይማኖተኛ ነኝ የሚልን ሰው አሳዩኝ፤ እኔም በልቡ ወደ ኋላ የተመለሰንና ግብዝን አሳያችኋለሁ፤ ሃይማኖትን ይናገራል እንጂ ምንም የለውም።

17. ተለወጥን ስለሚሉ ሰዎች ፍቅር የሌለበት የአእምሮ ሁኔታም የወደ ኋላ የተመለሰ ልብ ምልክት ነው። ፍቅር ሁሉን ተስፋ ያደርጋል፥ ሁሉን ያምናል፤ ወደ ክርስቶስ ተለውጠናል በሚሉት ሰዎች ላይ በቸርነትና በበጎነት ለመፍረድ እጅግ ዝግጁ ነው፤ በተፈጥሮውም በፍላጎት ይጠብቃቸዋል፥ ይጸልይላቸዋል፥ ያስተምራቸዋል፤ በምክንያታዊነት ሊኖር የሚገባውንም ያህል ይታመናቸዋል። ስለዚህ እነርሱን የመነትፍ፥ የመተቸትና የመንቀፍ ዝንባሌ የወደ ኋላ የተመለሰ ልብ ምልክት ነው።

18. የጸሎት መንፈስ ማጣት የወደ ኋላ የተመለሰ ልብ ምልክት ነው። የክርስቶስ ፍቅር በነፍስ ውስጥ አዲስ ሆኖ ሲኖር በውስጥ የሚያድረው የክርስቶስ መንፈስ ራሱን የጸጋና የልመና መንፈስ አድርጎ ይገልጣል። ለኃጢአተኞች መዳንና ለቅዱሳን መቀደስ በነፍስ ውስጥ ብርቱ ምኞትን ያስገኛል። እንደ እግዚአብሔር ፈቃድ ስለሆኑት ነገሮች ብዙ ጊዜ በታላቅ ናፍቆት፥ በብርቱ ጩኸትና በእንባ፥ በቃላትም ሊነገር በማይችል መቃተት በውስጣቸው ይማልዳል፤ ወይም በመጽሐፍ ቅዱስ ቋንቋ ለመግለጽ፥ ጳውሎስ በሮሜ 8:26 እና 27 እንዳለው፦ «እንዲሁም ደግሞ መንፈስ ድካማችንን ያግዛል፤ እንዴት እንድንጸልይ እንደሚገባን አናውቅምና፥ ነገር ግን መንፈስ ራሱ በማይነገር መቃተት ይማልድልናል፤ ልብንም የሚመረምረው የመንፈስ አሳብ ምን እንደ ሆነ ያውቃል፥ እንደ እግዚአብሔር ፈቃድ ስለ ቅዱሳን ይማልዳልና።» የጸሎት መንፈስ ቢለይ ወደ ኋላ የተመለሰ ልብ እርግጠኛ ምልክት ነው፤ የክርስቲያን የቀደመ ፍቅር እስከ ቀጠለ ድረስ በጸሎት ብዙ እንዲጋደል በመንፈስ ቅዱስ መሳቡ አይቀርምና።

19. ወደ ኋላ የተመለሰ ልብ ብዙ ጊዜ ሰዎች በሚጸልዩበት መንገድ ራሱን ይገልጣል። ለምሳሌ አንድ ሰው ራሱን በመኰነን ሁኔታ ውስጥ እንዳለ ወይም በኃጢአቱ እንደ ተወቀሰ ኃጢአተኛ መጸለዩ የወደ ኋላ የተመለሰ ልብ ምልክት ነው። እንዲህ ያለው ሰው ከእግዚአብሔር ጋር ሰላም እንደሌለው ይገልጣል። መናዘዙና ራሱን መክሰሱ ምናልባት እርሱ ራሱ በደንብ የማይረዳውን ነገር ለሌሎች ያሳያል። የአጸላለዩ መንገድ ከእግዚአብሔር ጋር ኅብረት እንደሌለው ይገልጣል፤ በእምነትና በፍቅር ከመሞላት ይልቅ ብዙም ይሁን ጥቂት በኃጢአት እንደ ተወቀሰና በእግዚአብሔር ዘንድ ተቀባይነት ባለው ሁኔታ ውስጥ እንዳልሆነ እንደሚያውቅ ያሳያል። በተፈጥሮው ከክርስቲያን ይልቅ በኃጢአቱ እንደ ተወቀሰ ኃጢአተኛ ይጸልያል። በክርስቲያናዊ ነጻነት ሁኔታ ውስጥ እንዳልሆነ፥ በሮሜ 8ኛው ምዕራፍ ከተገለጸው ተሞክሮ ይልቅ የሮሜ 7ኛውን ምዕራፍ ተሞክሮ እያሳለፈ እንደ ሆነ ከጸሎቱ ይታያል።

20. ወደ ኋላ የተመለሰ ልብ ደግሞ ከሞላ ጎደል ለራስ ብቻና የራስ ክፍል እንደ ሆኑ ለሚቈጠሩ ወዳጆች ብቻ በመጸለይ ራሱን ይገልጣል። ወደ ኋላ የተመለሱ ሰዎች የጸሎት ስብሰባ ላይ መገኘት ብዙ ጊዜ እጅግ የሚያስደንቅ፥ እንዲያውም የሚያስደነግጥ ነው፤ የቤተ ክርስቲያን ብዙ የጸሎት ስብሰባዎች ከዚህ ብዙም የተለዩ አለመሆናቸውን ስናገር እጅግ አዝናለሁ። ጸሎታቸው ፈሪና የሚያመነታ ነው፤ እምነታቸውም ጥቂት ወይም ምንም እንዳልሆነ ይገልጣል። የጸጋውን ዙፋን ከብበው በዙሪያቸው ላሉት በረከት እንዲሆን ልባቸውን ከማፍሰስ ይልቅ መስቀላቸውን እንዲሸከሙ ወደ ግዴታ እየተገፉ መወትወት አለባቸው። ልባቸው በፈቃዱ በጸሎት ወደ እግዚአብሔር አይፈስስም፥ አይፈስስምም። ለሌሎች የሚያስቡት እጅግ ጥቂት ነው፤ እንደሚሉትም መስቀላቸውን ተሸክመው ግዴታቸውን ሲፈጽሙና ጸሎት ለመምራት ሲያስመስሉ፥ ከሞላ ጎደል ለራሳቸው ብቻ በኃጢአታቸው እንደ ተወቀሱ የኃጢአተኞች ጉባኤ እንደሚጸልዩ ይታያል። በኃጢአቱ የተወቀሰ ኃጢአተኛ ለአዲስ ልብ እንደሚጸልይ፥ ቢያገኙት ሃይማኖት ለሚሆነው ነገር ይጸልያሉ፤ እንደሚያደርጉትም ለሃይማኖት መጸለያቸው አሁን ባሉበት የአእምሮ ሁኔታ ሃይማኖት እንደሌላቸው ያሳያል። ለኃጢአተኞች መለወጥ እንዲጸልዩ ጠይቋቸው፤ ፈጽመው ይረሱታል፥ ወይም ስለ እነርሱ ለመጸለይ ልብ እንደሌላቸው በሚያሳይ መንገድ በጥቂቱ ይጠቅሷቸዋል። ልጆቻቸው እንኳ በኃጢአት ወቀሳ ሥር ሳሉ ለገዛ ልጆቻቸው መለወጥ ለመጸለይ ልብ እስከማይኖራቸው ድረስ እንዲህ ያለ ሁኔታ ውስጥ የገቡ ክርስቲያን ነን የሚሉ ወላጆችን አውቃለሁ። የቤተሰብ ጸሎትን ይጠብቃሉ፥ ሳምንታዊ የጸሎት ስብሰባም ይገኛሉ፤ ነገር ግን ለራሳቸው እየዞሩ ከመጸለይ አሮጌ ጐዳና ፈጽሞ አይወጡም። ከጥቂት ዓመታት በፊት በአንዲት የፕሬስቢቴሪያን ቤተ ክርስቲያን በመነቃቃት ውስጥ እሠራ ነበር። በምሽቱ ስብከት መጨረሻ ከቤተ ክርስቲያኑ ሽማግሌዎች የአንዱ ልጅ በታላቅ የአእምሮ ጭንቀት ውስጥ እንዳለች አገኘሁ። በኃጢአት መወቀሷ እጅግ ጥልቅ እንደ ሆነ አስተዋልሁ። በቤተ ክርስቲያኑ የልብስ ክፍል ከጠያቂዎች ጋር ስብሰባ ስናደርግ ነበር፤ ጠያቂዎቹንም ገና አሰናብቼ ሳለሁ ይህች ወጣት ሴት በታላቅ መናወጥ ወደ እኔ መጥታ እንድጸልይላት ለመነችኝ። በጥያቄ ስብሰባው የተገኙት ወዳጆቻቸው እስኪሰናበቱ በቤተ ክርስቲያኑ አዳራሽ ውስጥ ይጠብቁ ከነበሩት ጥቂቶች በቀር ሕዝቡ አብዛኛው ሄዶ ነበር። የልጁን እጅግ የተጨነቀ የአእምሮ ሁኔታ እንዲያይ የዚህችን ወጣት ሴት አባት ወደ ልብስ ክፍሉ ጠራሁት። በአባቷ ፊት ከእርሷ ጋር አጭር ግላዊ ንግግር ካደረግሁ በኋላ እንዲጸልይላት ጠየቅሁት፤ እኔም ከእርሱ በኋላ እንደምከተል ነገርሁት፤ እርሷንም ልቧን ለክርስቶስ እንድትሰጥ አጥብቄ መከርኋት። ሁላችንም ተንበረከክን፤ እርሱም እያለቀሰች ካለችው ልጁ አጠገብ ተንበርክኮ ጉዳይዋን ፈጽሞ ሳይጠቅስ ጸሎቱን ፈጸመ። ጸሎቱ ከእርሷ የበለጠ ሃይማኖት እንዳልነበረው፥ እርሱም በአስፈሪ የኵነኔ ስሜት ሥር ሆኖ ከእርሷ የአእምሮ ሁኔታ ብዙም የተለየ እንዳልነበረ ገለጠ። የሃይማኖትን መልክ ጠብቆ ነበር። የቤተ ክርስቲያን ሽማግሌ እንደ መሆኑ መልኩን መጠበቅ ግድ ነበረበት። ልቡ ፈጽሞ ወደ ኋላ ተመልሶ ሳለ በተግባሮቹ የወፍጮ መንኰራኵር ላይ እየዞረ ይመላለስ ነበር። በልባቸው ወደ ኋላ የተመለሱ ሰዎች የጸሎት ስብሰባ ላይ መገኘት ብዙ ጊዜ ከሞላ ጎደል የሚያቅለሸልሽ ነው። አንዱ ከሌላው በኋላ እየዞሩ በእውነቱ ለገዛ መለወጣቸው ይጸልያሉ። እንዲህ ብለው አይገልጡትም፤ ነገር ግን የጸሎቱ እውነተኛ ትርጉም ይኸው ነው። እያንዳንዳቸው በዚህ ቢምሉበት እንኳ በልባቸው ወደ ኋላ የተመለሱ መሆናቸውን ከዚህ የበለጠ ግልጽ ሊያደርጉት አይችሉም።

21. በቋሚ የጸሎት ስብሰባዎች ላይ በጥቃቅን ምክንያቶች አለመገኘት የወደ ኋላ የተመለሰ ልብ እርግጠኛ ምልክት ነው። ለነቃ ክርስቲያን ከጸሎት ስብሰባ የበለጠ የሚስብ ስብሰባ የለም፤ ለመጸለይ ልብ እስካላቸው ድረስ በእግዚአብሔር መግቦት ካልተከለከሉ በቀር ከጸሎት ስብሰባ አይቀሩም። በስብሰባው ሰዓት የወዳጅ ጕብኝት እጅግ ልዩ በሆነ ሁኔታ ካልሆነ በቀር እንዳይገኙ ሊከለክላቸው ከቻለ ለመገኘት እንደማይፈልጉ፥ ስለዚህም በልባቸው ወደ ኋላ የተመለሱ እንደ ሆኑ ብርቱ ማስረጃ ነው። በዚያ ሰዓት የሚደረግ ጕብኝት በሰርግ፥ በግብዣ፥ በሽርሽር ወይም በሚያዝናና ንግግር ላይ እንዳይገኙ አይከለክላቸውም። እውነቱ በጥቃቅን ምክንያቶች ሊቀሩ እየቻሉ በእውነት ለመሄድ እንደሚፈልጉ ማስመሰላቸው ግብዝነት ነው። ሊሄዱበት እጅግ የሚፈልጉት ስፍራ ቢሆን ኖሮ ይቅርታ ጠይቀው «በፈረስ ልወጣ ነበር»፥ ወይም «ወደ እንዲህ ያለ ስፍራ ልሄድ ነበር» ብለው ይሄዱ ነበር።

22. በጥቃቅን ምክንያቶች የቤተሰብ ጸሎትን ቸል ማለትም እንዲሁ ነው።

ልብ በሃይማኖት ሲጠመድ ክርስቲያኖች የቤተሰብ አምልኮን በቀላሉ አይተዉም፤ ለመተው ምክንያት ለማግኘት በተዘጋጁ ጊዜ ሁሉ በልባቸው ወደ ኋላ እንደ ተመለሱ እርግጠኛ ማስረጃ ነው።

23. ስውር ጸሎት ከመብት ይልቅ እንደ ግዴታ ሲቈጠር ልብ ወደ ኋላ ስለ ተመለሰ ነው። ክርስቲያኖች ስለ ጸሎት እንደ ግዴታ ሲናገሩ መስማት ሁልጊዜ ከሞላ ጎደል የሚያስቅ ሆኖ ታይቶኛል። ጸሎት በምድር ካሉት መብቶች ሁሉ ከታላላቆቹ አንዱ ነው። አንድ ልጅ ስለ ራበው ሳይሆን እንደ ግዴታ ምሳውን ለመጠየቅ ወደ ወላጁ ቢመጣ ምን እናስባለን? አንድ ለማኝ ከእኛ ምጽዋት መለመን ግዴታው እንደ ሆነ ሲናገር ብንሰማ ምን ይመስለናል? ወደ እግዚአብሔር እንድንመጣና የሚያስፈልገንን ሁሉ እንድንለምን መፈቀዱ ወሰን የሌለው መብት ነው። ነገር ግን ስለ ተፈቀደልን ሳይሆን ግድ ስለ ሆነብን መጸለይ ከተፈጥሮ ውጭ ይመስላል። የምንፈልገውን መለመን፥ ስለምንፈልገውም፥ እግዚአብሔርም እንድንለምን ስላበረታታንና ልመናችንን ለመመለስ ተስፋ ስለ ሰጠ መለመን ተፈጥሮአዊና ምክንያታዊ ነው። ነገር ግን እንደ ግዴታ፥ በጸሎታችንም እግዚአብሔርን ውለታ የምንውልለት ይመስል መጸለይ እጅግ የሚያስቅ ነው፤ የወደ ኋላ የተመለሰ ልብ እርግጠኛ ምልክትም ነው።

24. ዓለማዊ መዝናኛዎችን መደገፍም የወደ ኋላ የተመለሰ ልብ ምልክት ነው። በእውነት መንፈሳዊ ለሆነ አእምሮ ከሁሉ ይበልጥ ደስ የሚያሰኙት መዝናኛዎች ነፍስን ከእግዚአብሔር ጋር በቀጥታ ወደ ኅብረት የሚያመጡ ተግባራት ናቸው። ልብ በፍቅርና በእምነት ተሞልቶ ሳለ፥ ከእግዚአብሔር ጋር በኅብረት ብቻውን የሚያሳልፈው አንድ ሰዓት ወይም አንድ ምሽት ዓለም ከምታቀርበው መዝናኛ ሁሉ ይልቅ ያስደስታል። አፍቃሪ ልብ ከእግዚአብሔር ጋር ያለውን ኅብረት በሚያፈርስ ወይም በሚያውክ ነገር ሁሉ ይቀናል። ለተራ ዓለማዊ መዝናኛዎች ምንም ጣዕም የለውም። ነፍስ ከዓለማዊ ነገሮች ሁሉ ይልቅ በእግዚአብሔር የበለጠ ደስታ ካላገኘች፥ ልብ በሚያሳዝን ሁኔታ ወደ ኋላ ተመልሷል።

25. መንፈሳዊ ዕውርነት ሌላው የወደ ኋላ የተመለሰ ልብ ምልክት ነው። ዓይን ጤናማ ሳለች ሰውነት ሁሉ በመንፈሳዊ ብርሃን ይሞላል፤ ዓይን ግን ታማሚ ብትሆን (ይህም ወደ ኋላ የተመለሰ ልብ ነው) ሰውነት ሁሉ በጨለማ ይሞላል።

መንፈሳዊ ዕውርነት በእግዚአብሔር ቃልና በአጠቃላይ በሃይማኖታዊ እውነት ላይ ፍላጎት በማጣት ይገለጣል። መንፈሳዊ የመለየት ችሎታ ማጣትንም ያሳያል፤ በሰይጣን ሹክሹክታም በቀላሉ ይታለላል። ወደ ኋላ የተመለሰ ልብ የላሉ የሥነ ምግባር መርሆችን ወደ መቀበል ይመራል። የእግዚአብሔርን ሕግ መንፈሳዊነት፥ በአጠቃላይም የሚጠይቃቸውን ነገሮች አያስተውልም። ይህ መንፈሳዊ ዕውርነት ሲገለጥ ልብ ወደ ኋላ መመለሱን የሚያሳይ እርግጠኛ ምልክት ነው።

26. በዓለማዊ ነገር ንቁና ስሜታዊ ሆኖ በሃይማኖት ነገር ግድየለሽ መሆን የወደ ኋላ የተመለሰ ልብ እርግጠኛ ምልክት ነው። በዓለማዊ ጉዳዮች ጥልቅና ፈጣን ስሜት የሚሰማቸው፥ በሃይማኖታዊ ጉዳዮች ግን ጥልቅ ስሜት እንዲሰማቸው ማድረግ የማይቻል ሰዎችን አንዳንድ ጊዜ እናያለን። ይህ ወደ ኋላ የተመለሰ የአእምሮ ሁኔታን በግልጽ ያሳያል።

27. ራስን የማስደሰት መንፈስ የወደ ኋላ የተመለሰ ልብ እርግጠኛ ምልክት ነው። ራስን ማስደሰት ስል ምኞቶችን፥ ስሜቶችንና ዝንባሌዎችን የማርካት ዝንባሌን፥ ማለትም «የሥጋንና የልቡናን ፈቃድ» ማድረግን ማለቴ ነው።

ይህም በመጽሐፍ ቅዱስ እንደ መንፈሳዊ ሞት ሁኔታ ተገልጿል። በልብ ወደ ኋላ ለመመለስ ከሁሉ የሚዘወተረው ምክንያት የተለያዩ ምኞቶችና ዝንባሌዎች እንዲረኩ የሚያሰሙት ጩኸት እንደሆነ ተረድቻለሁ። የምግብ ፍላጎት ብዙ ጊዜ፥ ምናልባትም ከማንኛውም ሌላ ነገር ይበልጥ፥ ወደ ኋላ ለመመለስ ምክንያት ይሆናል። በዚህ በኩል አደጋ እንዳለ የሚገነዘቡ ክርስቲያኖች ጥቂቶች እንደሆኑ እፈራለሁ። የእግዚአብሔር ትእዛዝ «እንግዲህ የምትበሉ ወይም የምትጠጡ ብትሆኑ ወይም ማናቸውን ነገር ብታደርጉ ሁሉን ለእግዚአብሔር ክብር አድርጉት» የሚል ነው። ክርስቲያኖች ይህን ይረሳሉ፤ ራሳቸውንም ለማስደሰት ይበላሉ ይጠጣሉም—የሕይወትንና የጤናን ሕግ ሳይሆን የምግብ ፍላጎታቸውን ይጠይቃሉ። ቤተ ክርስቲያን ከምታውቀው በላይ ብዙ ሰዎች በማዕዳቸው ይጠመዳሉ። ማዕድ ማንም ሊቈጥራቸው ለማይችል ብዙ ሰዎች የሞት ወጥመድ ነው። የአልኮል መጠጦችን ፈጽሞ የሚርቁ ብዙ ሰዎች በሻይና በቡና፥ በትንባሆም ጭምር፥ በምግብም በብዛቱም በዓይነቱም የጤናን ሕግ ሁሉ በሚጥስ መንገድ ራሳቸውን ያስደስታሉ። ከምግብ ፍላጎት ሕግ በቀር ሌላ ሕግ የሌላቸው ይመስላሉ፤ ይህንንም በአላግባብ አጠቃቀም እጅግ ስለሚያበላሹት እርሱን ማርካት ሥጋንና ነፍስን በአንድነት ማጥፋት ይሆናል። ሆዳም የሆነ ሃይማኖተኛ ነኝ የሚል አሳዩኝ፥ እኔም ወደ ኋላ የተመለሰ ሰው አሳያችኋለሁ።

28. የደነዘዘ ሕሊናም የወደ ኋላ የተመለሰ ልብ ምልክት ነው። ነፍስ ንቁና አፍቃሪ ሳለች ሕሊና እንደ ዓይን ብሌን ስሱ ነው። ልብ ወደ ኋላ ሲመለስ ግን ሕሊና በብዙ ጉዳዮች ዝም ይላል፥ ይደነዝዛልም። እንዲህ ያለው ሰው በመብላትም ሆነ በመጠጣት ወይም በማናቸውም ዓይነት ራስን ማስደሰት ሕሊናውን እንደማይጥስ ይነግርሃል። ወደ ኋላ የተመለሰ ሰው ያለው ሕሊና እጅግ ጥቂት እንደሆነ ታገኛለህ። በአጠቃላይ የቸልተኝነት ኃጢአቶችን በተመለከተም እንዲሁ ነው። እጅግ ብዙ ግዴታዎች ቸል ሊባሉ ይችላሉ፤ የደነዘዘ ሕሊና ግን ዝም ብሎ ይቀራል። ሕሊና ንቁ ባልሆነበት ስፍራ ልብ በእርግጥ ወደ ኋላ ተመልሷል።

29. የላሉ የሥነ ምግባር መርሆች የወደ ኋላ የተመለሰ ልብ እርግጠኛ ምልክት ናቸው። በልቡ ወደ ኋላ የተመለሰ ሰው በሰንበት ደብዳቤ ይጽፋል፥ ዓለማዊ ንባብ ያነባል፥ ብዙ ዓለማዊ ወሬም ያወራል። በንግድ ረገድ እንዲህ ያለው ሰው ትንንሽ ብልጠቶችን ይጠቀማል፥ የንግድ ማታለያዎችን ይሠራል፥ በንግድ አሠራር የዓለማውያን ነጋዴዎችን ልማድ ይከተላል፥ በሽያጭና በግዢ ስምምነት በማታለልና በማሳሳት በደለኛ ይሆናል፥ ከልክ ያለፈ ወለድ ይጠይቃል፥ የባልንጀሮቹንም ችግር ተጠቅሞ ይበዘብዛል።

30. የሰው ፍርሃት መንገሥ የወደ ኋላ የተመለሰ ልብ ምልክት ነው። ልብ በእግዚአብሔር ፍቅር ተሞልቶ ሳለ የሚፈራው እግዚአብሔር ነው እንጂ ሰው አይደለም። የሰዎችን ውዳሴ መሻት ይገታል፤ ሰዎች ቢደሰቱም ባይደሰቱም እንዲህ ላለው ሰው እግዚአብሔርን ደስ ማሰኘት ይበቃዋል። የእግዚአብሔር ፍቅር ሲቀንስ ግን «ወጥመድን የሚያመጣ ሰውን መፍራት» ሰውን ይይዘዋል። ከዚያም ዓላማው ከእግዚአብሔር ይልቅ ሰውን ደስ ማሰኘት ይሆናል። በዚህ ሁኔታ ውስጥ ሰውን ከማሳዘን ይልቅ እግዚአብሔርን ማሳዘን ይቀልለታል።

31. ስለ ሥርዓቶች፥ ስለ ሥነ ሥርዓቶችና አስፈላጊ ስላልሆኑ ነገሮች መከራከር የወደ ኋላ የተመለሰ ልብ ምልክት ነው። አፍቃሪ ልብ የሚጠነቀቀው ስለ ሃይማኖት ፍሬ ነገርና ኃይል ብቻ ነው እንጂ ስለ ሥርዓቶቹ አይከራከርም።

32. መነቃቃትን ለማስፋፋት በሚሠራባቸው ዘዴዎች ላይ ስሕተት መፈላለግ የወደ ኋላ የተመለሰ ልብ እርግጠኛ ምልክት ነው። ልብ የኃጢአተኞችን መለወጥና የአማኞችን ቅድስና ሙሉ በሙሉ በሚሻበት ስፍራ፥ ጉዳዩን በተፈጥሮው በቀጥታው መንገድ ይቀርበዋል፤ ዓላማውንም ለማሳካት እጅግ በሚስማሙ መንገዶች ይጠቀማል። እግዚአብሔር በግልጽ የባረካቸውን ዘዴዎች አይቃወምም፥ አይሰናከልባቸውምም፤ ይልቁንም ልብ የተጣበቀበትን ታላቅ ዓላማ ለማሳካት እጅግ ተስማሚ የሆኑ መንገዶችን ለመቀየስ ጥበቡን ሁሉ ያውላል።

IV. በልብ ወደ ኋላ መመለስ የሚያስከትላቸውን ውጤቶች ማሳየት። ጥቅሱ በልቡ ወደ ኋላ የተመለሰ በገዛ መንገዱ ይሞላል ይላል።

1. በገዛ ሥራዎቹ ይሞላል። እነዚህ ግን የሞቱ ሥራዎች ናቸው፤ በእግዚአብሔር ዘንድ ተቀባይነት ያላቸው የእምነትና የፍቅር ሥራዎች አይደሉም፥ ይልቁንም የገዛ ጽድቁ የመርገም ጨርቅ ናቸው። እንደ ሃይማኖታዊ አገልግሎት ቢፈጸሙ አስጸያፊ ግብዝነትና በእግዚአብሔር ዘንድ ርኵሰት ብቻ ናቸው፤ ልብ የለባቸውም፤ እንዲህ ላለውም ሰው እግዚአብሔር «ይህን ከእጃችሁ የፈለገ ማን ነው?» ይላል። «ራሳችሁን በሰው ፊት የምታጸድቁ እናንተ ናችሁ፥ ነገር ግን እግዚአብሔር ልባችሁን ያውቃል፤ በሰው ዘንድ የከበረ በእግዚአብሔር ፊት ርኵሰት ነውና።» «የእግዚአብሔር ፍቅር በእናንተ እንደሌለ አውቃችኋለሁ።»

2. በገዛ ስሜቶቹ ይሞላል። ቀድሞ ያጣጣመውን ያን ጣፋጭ ሰላምና ዕረፍት፥ በመንፈስ ቅዱስም ያለውን ደስታ ፈንታ ራሱን ዕረፍት በሌለበት ሁኔታ ውስጥ ያገኘዋል፤ በራሱም በሌላውም ሰው ሁሉ አይረካም፤ ስሜቶቹም ብዙ ጊዜ የሚያሠቃዩ፥ የሚያዋርዱ፥ ሊታሰብ በሚቻለው መጠን ደስ የማያሰኙና የማይወደዱ ናቸው። ወደ ኋላ ከተመለሰ ሰው ጋር መኖር ብዙ ጊዜ እጅግ ፈታኝ ነው። እንደነዚህ ያሉት ብዙ ጊዜ በመንገዳቸው ሁሉ ቍጡዎች፥ ፈራጆችና የሚያበሳጩ ናቸው። እግዚአብሔርን ትተዋል፤ በስሜታቸውም ውስጥ ከሰማይ ይልቅ ገሃነም ይበዛል።

3. በገዛ ጭፍን ጥላቻቸው ይሞላሉ። እውነትን ለማወቅና ለማድረግ የነበራቸው ፈቃደኝነት ጠፍቷል። ራስን የማስደሰት መንፈሳቸውን የሚነካ እውነትን ሁሉ ለመቃወም በቀላሉ ይቆማሉ። ራሳቸውን ለማጽደቅ ይጥራሉ፤ ወደ ኋላ የተመለሰውን ሁኔታቸውን የሚገሥጽ ነገር አያነቡም አይሰሙምም፤ በመንገዳቸው ላይ በሚገጥማቸው ሰው ሁሉ ላይ ጥልቅ ጭፍን ጥላቻ ያድርባቸዋል። ማንም ቢገሥጻቸው እንደ ጠላት ይቈጥሩታል። ራሳቸውን አጥረው ዓይናቸውን ከብርሃን ይጨፍናሉ፤ ራሳቸውን በመከላከል ላይ ይቆማሉ፤ የሚመረምራቸውንም ነገር ሁሉ ይነቅፋሉ።

4. በልቡ ወደ ኋላ የተመለሰ በገዛ ጠላትነቱ ይሞላል። እንዲህ ያለው ሰው የንግድ ወይም ሌላ ግንኙነት ባለው ሰው ላይ ቂም መያዙ አይቀርም ማለት ይቻላል። በሕይወት ግንኙነቶች ሁሉ ማለት ይቻላል ይበሳጫል፤ ራሱን ለንዴትና ለቍጣ አሳልፎ ይሰጣል፤ ከአንዳንዶች፥ ምናልባትም ከብዙ ሰዎች ጋር ስለ እነርሱ በቅንነት መጸለይ በማይችልበትና በተራ ጨዋነት እንኳ ሊይዛቸው በሚያዳግተው ግንኙነት ውስጥ ይገባል። ይህ የወደ ኋላ የተመለሰ ልብ የማይቀር ውጤት ነው ማለት ይቻላል።

5. በልቡ ወደ ኋላ የተመለሰ በገዛ ስሕተቶቹ ይሞላል። ከእግዚአብሔር ጋር አይሄድም። ከመለኮታዊው ሥርዓት ወጥቶ ወድቋል። በመንፈስ አይመራም፥ ይልቁንም በመንፈሳዊ ጨለማ ይመላለሳል። በዚህ ሁኔታ ውስጥ በብዙና በከባድ ስሕተቶች መውደቁ አይቀርም፤ ደስታውን በሚያበላሽ፥ ምናልባትም ዕድሜ ልኩን ጠቃሚነቱን በሚያጠፋ መንገድ ሊጠላለፍ ይችላል። በንግድ ስሕተት፥ በሕይወት አዳዲስ ግንኙነቶችን በመመሥረት ስሕተት፥ ጊዜውን፥ አንደበቱን፥ ገንዘቡንና ተጽዕኖውን በመጠቀም ስሕተት—ወደ ኋላ በተመለሰ ሁኔታ ውስጥ እስካለ ድረስ ሁሉ ነገር ይበላሽበታል።

6. በልቡ ወደ ኋላ የተመለሰ በገዛ ምኞቶቹ ይሞላል። ተገዝተው የነበሩት ፍላጎቶቹና ስሜቶቹ አሁን እንደ ገና ሥልጣናቸውን ይዘዋል፤ ለረጅም ጊዜ ታፍነው ስለ ነበሩም ከቀድሞው ይልቅ ይበልጥ ጮኸውና ገዢ ሆነው የሚበቀሉ ይመስላሉ። እንስሳዊ ፍላጎቶችና ስሜቶች ወደ ኋላ የተመለሰውን ሰው እስኪያስደንቁ ድረስ ፈንድተው ይወጣሉ፤ ከቀድሞው ሁሉ ይበልጥ በእነርሱ ተጽዕኖ ሥር ሆኖ፥ ይበልጥም ተገዝቶላቸው ራሱን ማግኘቱ ፈጽሞ አይቀርም ማለት ይቻላል።

7. በልቡ ወደ ኋላ የተመለሰ በገዛ ቃላቱ ይሞላል። በዚያ ሁኔታ ውስጥ ሳለ አንደበቱን አይገታም፥ ሊገታውም አይችልም። አንደበቱ የሚገድል መርዝ የሞላበት ዓመፀኛ ብልት መሆኑን ያሳያል፤ የፍጥረትን ሩጫ ያቃጥላል፥ ራሱም በገሃነም ይቃጠላል። በቃላቱ ወደ እግዚአብሔር እስኪመለስ ድረስ ፈጽሞ ሊወጣባቸው በማይችል ብዙ ችግሮችና ግራ መጋባቶች ውስጥ ራሱን ይጥላል።

8. በገዛ መከራዎቹ ይሞላል። ከፈተና ራሱን ከመጠበቅ ይልቅ በቀጥታ ወደ ፈተና ይሮጣል። ከእግዚአብሔር ባይርቅ ኖሮ ፈጽሞ የማይደርሱበትን እጅግ ብዙ መከራዎች በራሱ ላይ ያመጣል። ስለ መከራዎቹ ያማርራል፤ ነገር ግን ዘወትር ያበዛቸዋል። ወደ ኋላ የተመለሰ ሰው መከራዎቹ ክፉኛ ይሰሙታል፤ በዙሪያው ባለው ነገር ሁሉ እንዲህ እንደሚፈተን እያማረረ ዘወትር ያባብሳቸዋል፤ የእነርሱም ምንጭ ራሱ በመሆኑ እንደ በረዶ ናዳ በራሱ ላይ ሊያመጣቸው የሚተጋ ይመስላል።

9. በልቡ ወደ ኋላ የተመለሰ በገዛ ሞኝነቶቹ ይሞላል። መለኮታዊውን መመሪያ ስለ ናቀ በግልጽ ወደ ገዛ ስንፍናው ጥልቀት ይወድቃል። እጅግ ብዙ የሞኝነትና የሚያስቅ ነገር መናገሩና ማድረጉ አይቀርም። ሃይማኖተኛ ነኝ የሚል ስለ ሆነ እነዚህ ነገሮች ይበልጥ ይታያሉ፤ ስለዚህም ይበልጥ ለፌዝና ለንቀት ይዳርጉታል። ወደ ኋላ የተመለሰ ሰው በእውነት በዓለም ካሉት ሁሉ የሚበልጥ ሞኝ ነው። እውነተኛውን የሕይወት መንገድ በተሞክሮ አውቆ ሳለ እርሱን የሚተው ወሰን የሌለው ሞኝነት አለው። የሕይወትን ውኃ ምንጭ እያወቀ ትቶታል፤ ለራሱም ጕድጓዶችን—ውኃን መያዝ የማይችሉ የተቀደዱ ጕድጓዶችን ቈፍሯል። በዚህ ወሰን በሌለው ሞኝነት በደለኛ ስለ ሆነ፥ ወደ ኋላ የተመለሰ ሕይወቱ አካሄድ ሁሉ በመጽሐፍ ቅዱሳዊ ትርጉሙ የሰነፍ አካሄድ መሆኑ የግድ ነው።

10. በልቡ ወደ ኋላ የተመለሰ በገዛ ችግሮቹ ይሞላል። እግዚአብሔር ይቃወመዋል፤ እርሱም ራሱን ይቃወማል። ከእግዚአብሔር፥ ከራሱ፥ ከቤተ ክርስቲያንም ሆነ ከዓለም ጋር ሰላም የለውም። ውስጣዊ ዕረፍት የለውም። ሕሊናው ይኰንነዋል። እግዚአብሔር ይኰንነዋል። ሁኔታውን የሚያውቁ ሁሉ ይኰንኑታል። «ለክፉዎች ሰላም የላቸውም ይላል አምላኬ።» በጊዜም ሆነ በቦታ ዕረፍት የሚያገኝበት ስፍራ የለም።

11. በልቡ ወደ ኋላ የተመለሰ በገዛ ጭንቀቶቹ ይሞላል። ወደ ራስ ወዳድነት ተመልሷል። ራሱንና ንብረቱን እንደ ገዛ ራሱ ይቈጥራል። የሚጨነቅለት ነገር ሁሉ አለበት። ራሱንና ንብረቱን የእግዚአብሔር እንደሆኑ አድርጎ አይይዝም፥ ራሱንና ያለውን ሁሉ የመጠበቅን ኀላፊነትም አያስወግድም። የሚያስጨንቀውን በጌታ ላይ አይጥልም፥ ሊጥልም አይፈቅድም፤ ይልቁንም ሁሉን ነገር ለራሱ፥ በገዛ ጥበቡ፥ ለገዛ ዓላማውም ሊያስተዳድር ይሞክራል። ስለዚህ ጭንቀቶቹ ይበዛሉ፥ እንደ ጎርፍም ይመጡበታል።

12. በልቡ ወደ ኋላ የተመለሰ በገዛ ግራ መጋባቶቹ ይሞላል። እግዚአብሔርን ትቶ፥ ከሥርዓቱ ወጥቶ ወደ ገዛ ሞኝነቱ ጨለማ ስለ ወደቀ፥ የራስ ወዳድነት ዓላማውን ለማሳካት የትኛውን መንገድ እንደሚከተል በግራ መጋባትና በጥርጣሬ ይሞላል። ከእግዚአብሔር ጋር ሳይሆን እግዚአብሔርን በመቃወም ይመላለሳል። ስለዚህ የእግዚአብሔር መግቦት ዘወትር መንገዱን ያቋርጣል፥ ዕቅዶቹንም ሁሉ ያከሽፋል። እግዚአብሔር በመንገዱ ላይ ጨለማን ይጥላል፤ ዕቅዶቹን ግራ ለማጋባትና ሐሳቦቹን በነፋስ ለመበተን ይተጋል።

13. በልቡ ወደ ኋላ የተመለሰ በገዛ ሥጋቶቹ ይሞላል። ስለ ራሱ፥ ስለ ንግዱ፥ ስለ ስሙ፥ ስለ ሁሉም ነገር ይሠጋል። እነዚህን ሁሉ ከእግዚአብሔር እጅ ወስዶ የገዛ ራሱ እንደሆኑ ይናገራል፥ እንዲሁም ይይዛቸዋል፤ ከእንግዲህ በእግዚአብሔር እምነት ስለሌለውና ሁኔታዎችን መቈጣጠር ስለማይችል ስለ ወደፊቱ በሥጋት መሞላቱ የግድ ነው። እነዚህ ሥጋቶች እግዚአብሔርን በመተዉ ያሳየው የእብደቱና የሞኝነቱ የማይቀር ውጤት ናቸው።

14. በልቡ ወደ ኋላ የተመለሰ በገዛ ተስፋ መቍረጦቹ ይሞላል። እግዚአብሔርን ትቶ በፊቱ የራስ ፈቃድ አቋም ስለ ያዘ፥ የራስ ወዳድነት ዓላማውን ሲከተል እግዚአብሔር ተስፋውን ማስቈረጡ አይቀርም። እግዚአብሔርን ሳይጠይቅ ራሱን ደስ ለማሰኘት መንገዱን ያቅዳል። እግዚአብሔርም እንዲሁ ተስፋውን እንዲያስቈርጥ መንገዱን ያቅዳል። የራሱን መንገድ ለመከተል ቈርጦ ስለ ተነሣ ዕቅዶቹ ቢከሽፉ ተስፋው እጅግ ይቈረጣል፤ በእግዚአብሔር መንግሥት ሥር ያለው የማይለወጥ የሁኔታዎች አካሄድም በእርሱ ላይ ባመፁ ተገዢዎች ላይ ተከታታይ ተስፋ መቍረጥን ማምጣቱ አይቀርም።

15. በልቡ ወደ ኋላ የተመለሰ በገዛ ኪሳራዎቹ መሞላቱ አይቀርም። ንብረቱን፥ ጊዜውን፥ ተጽዕኖውን፥ ስሙንም የገዛ ራሱ አድርጎ ይቈጥራል። ከእነዚህ የአንዱን መጥፋት የገዛ ኪሳራው አድርጎ ይቈጥረዋል። እግዚአብሔርን ስለ ተወና የእነዚህ ነገሮች መቀጠል በተመሠረተባቸው ሁኔታዎች ላይ ቍጥጥር ስለሌለው በየአቅጣጫው ኪሳራ ሲደርስበት ራሱን ያገኘዋል። ሰላሙን ያጣል። ንብረቱን ያጣል። ብዙ ጊዜውን ያጣል። ክርስቲያናዊ ስሙን ያጣል። ክርስቲያናዊ ተጽዕኖውን ያጣል፤ ቢጸናበትም ነፍሱን ያጣል።

16. በልቡ ወደ ኋላ የተመለሰ በገዛ መስቀሎቹ ይሞላል። ሃይማኖታዊ ግዴታ ሁሉ ያሰለቸዋል፤ ስለዚህም መስቀል ይሆንበታል። በክርስቲያናዊ የአእምሮ ሁኔታ ቢሆን እጅግ ደስ የሚያሰኙ ይሆኑ የነበሩትን እጅግ ብዙ ነገሮች የአእምሮው ሁኔታ መስቀሎች ያደርጋቸዋል። ለሃይማኖት ያለውን ልብ ሁሉ ስላጣ ሃይማኖታዊ ግዴታዎችን ሁሉ መፈጸም ስሜቱን ይቃረናል። ወደ እግዚአብሔር ካልተመለሰ በቀር ምንም መፍትሔ የለውም። የመለኮታዊ መግቦት አካሄድ ሁሉ መንገዱን ይቃረናል፤ ሕይወቱም ሁሉ ተከታታይ መስቀሎችና መከራዎች ይሆናል። የራሱን መንገድ መከተል አይችልም። የገዛ ምኞቱንና ፍላጎቱን በመፈጸም ራሱን ማስደሰት አይችልም። በእግዚአብሔር ፈቃድና በእግዚአብሔር መንገድ ዘላለማዊ ዓለቶች ላይ ራሱን ሊመታና ሊያላትም ይችላል፤ ሰብሮ አልፎ ሁሉን ከፊቱ ጠራርጎ መሄድ ግን አይችልም። ወደ መለኮታዊው ሥርዓት እስኪገባና በእግዚአብሔር ፈቃድ ውስጥ እስኪሰምጥ ድረስ ደጋግሞ፥ ደጋግሞም መቃወም ይገባዋል።

17. በልቡ ወደ ኋላ የተመለሰ በገዛ ቍጣዎቹ ይሞላል። እግዚአብሔርን ስለ ተወ የሚያበሳጩት ብዙ ነገሮች መኖራቸው አይቀርም። ወደ ኋላ በተመለሰ ሁኔታ ውስጥ ነፍሱን በትዕግሥት ሊገዛ አይችልም። ወደ ኋላ የተመለሰ ሕይወቱ ብስጭቶች ቍጡና ተበሳጭ ያደርጉታል፤ ቍጣውም የሚፈነዳና የማይገታ ይሆናል።

18. በልቡ ወደ ኋላ የተመለሰ በገዛ ውርደቶቹ ይሞላል። ሃይማኖተኛ ነኝ የሚል ነው። የዓለም ዓይኖች በእርሱ ላይ ናቸው፤ አለመጣጣሞቹ ሁሉ፥ ዓለማዊ አስተሳሰቡ፥ ሞኝነቶቹ፥ ክፉ ቍጣዎቹ፥ የሚያስጠሉ ቃላቱና ሥራዎቹም በሚያውቁት ሰዎች ሁሉ ፊት ያዋርዱታል።

19. በልቡ ወደ ኋላ የተመለሰ በገዛ ማታለያዎቹ ይሞላል። ክፉ ዓይን ስላለው ሰውነቱ ሁሉ በጨለማ ይሞላል። ስለ ትምህርቶችም ስለ ልማዶችም በማታለያዎች መውደቁ አይቀርም ማለት ይቻላል። እንደሚያደርገው በጨለማ ሲቅበዘበዝ እጅግ የከፉትን ማታለያዎች ሊውጥ ይችላል። ስፒሪቲዝም፥ ሞርሞኒዝም፥ ሁሉን አዳኝነት፥ ከእውነትም የራቀ ሌላው ማናቸውም «ኢዝም» ሊይዘው እጅግ የሚቻል ነው። በልባቸው ወደ ኋላ በተመለሱ ሰዎች ይህን ያላስተዋለ ማን ነው?

20. በልቡ ወደ ኋላ የተመለሰ በገዛ ባርነቱ ይሞላል። ሃይማኖተኛ ነኝ ማለቱ ለቤተ ክርስቲያን ባሪያ ያደርገዋል። የቤተ ክርስቲያንን ጥቅም ለማሰብ ወይም ለእድገቷ ለመድከም ልብ የለውም፤ ነገር ግን ይህን ለማድረግ በኪዳን ግዴታ ሥር ነው፤ ስሙም አደጋ ላይ ነው። ሃይማኖታዊ ተቋማትን ለመደገፍ አንድ ነገር ማድረግ አለበት፤ ይህን ማድረግ ግን ባርነት ነው። ቢያደርገው ስለሚገደድ ነው እንጂ ስለ ፈቀደ አይደለም። ደግሞም ለእግዚአብሔር በባርነት ነው። ሃይማኖታዊ ግዴታ የሚለውን ማንኛውንም ነገር ቢፈጽም እንደ ነጻ ሰው ሳይሆን እንደ ባሪያ ነው። ልክ እንደ ባሪያ ከፍቅር ሳይሆን ከፍርሃት ወይም ከተስፋ ተነሥቶ ያገለግላል። ደግሞም ለገዛ ሕሊናው በባርነት ነው። የኃጢአት ወቀሳንና ጸጸትን ለማስወገድ ብዙ ነገሮችን ያደርጋል ወይም ይተዋል፤ ይህ ሁሉ ግን በግድ ነው እንጂ ከልባዊ በጎ ፈቃዱ ፈጽሞ አይደለም።

21. በልቡ ወደ ኋላ የተመለሰ በገዛ ራስን መኰነን ይሞላል። የእግዚአብሔርን ፍቅር አጣጥሞ ከዚያ በኋላ ስለ ተወው በሁሉ ነገር ኵነኔ ይሰማዋል። ሃይማኖታዊ ግዴታን ለመፈጸም ቢሞክር ልቡ እንደሌለበት ያውቃል፤ ስለዚህም ራሱን ይኰንናል። ሃይማኖታዊ ግዴታን ቸል ቢል ራሱን መኰነኑ የታወቀ ነው። መጽሐፍ ቅዱሱን ቢያነብ ይኰንነዋል። ባያነበው ኵነኔ ይሰማዋል። ወደ ስብሰባ ቢሄድ አገልግሎቱ ይኰንነዋል፤ ቢቀር ይኰነናል። በስውር፥ በቤተሰቡ ወይም በሕዝብ ፊት ቢጸልይ ቅን እንዳልሆነ ያውቃል፤ ኵነኔም ይሰማዋል። መጸለይን ቸል ቢል ወይም እምቢ ቢል ኵነኔ ይሰማዋል። ሁሉ ነገር ይኰንነዋል። ሕሊናው በእርሱ ላይ ተነሥቷል፤ የኵነኔ ነጐድጓድና መብረቅም ወደሚሄድበት ሁሉ ይከተሉታል።

V. ከወደ ኋላ መመለስ ሁኔታ እንዴት መመለስ እንደሚቻል።

1. ከወዴት እንደ ወደቅህ አስብ። ጉዳዩን ወዲያውኑ አንሥተህ አሁን ያለህበትን ሁኔታ ከእግዚአብሔር ጋር ትመላለስበት ከነበረው ሁኔታ ጋር በጥንቃቄ አወዳድር።

2. ያለህበትን እውነተኛ ቦታ በልብህ ተቀብለህ ተገንዘብ። በእግዚአብሔርና በነፍስህ መካከል ያለውን ትክክለኛ ሁኔታ ለመረዳት ከእንግዲህ አትዘግይ።

3. ወዲያውኑ ንስሐ ግባ፥ የቀደመውንም ሥራህን እንደ ገና አድርግ።

4. የውጭ ጠባይህን ብቻ በማሻሻል ለመመለስ አትሞክር። በልብህ ጀምር፤ ወዲያውኑም ራስህን ከእግዚአብሔር ጋር አስተካክል።

5. እንደ ተወቀሰ ተራ ኃጢአተኛ አትሁን፤ ንስሐ ባልገባ ሥራ ወይም ጸሎት ራስህን በእግዚአብሔር ዘንድ ተቀባይነት ለማሰጠት አትሞክር። ወደ ክርስቶስ ከመምጣትህ በፊት ራስህን ማሻሻልና የተሻልህ ማድረግ አለብህ ብለህ አታስብ፤ ይልቁንም የተሻልህ ሊያደርግህ የሚችለው ወደ ክርስቶስ መምጣት ብቻ እንደሆነ በግልጽ ተረዳ። ምንም ያህል ብትጨነቅ፥ ንስሐ እስክትገባና ፈቃዱን ያለ ቅድመ ሁኔታ እስክትቀበል ድረስ ምንም እንዳልተሻልህ፥ ይልቁንም ዘወትር እየባሰብህ እንደምትሄድ በእርግጥ እወቅ። ራስህን በሉዓላዊ ምሕረቱ ላይ እስክትጥልና በዚህም ወደ እግዚአብሔር እስክትመለስ ድረስ ከእጅህ ምንም አይቀበልም።

6. በጽድቅ ሁኔታ ውስጥ እንዳለህ አታስብ፤ እንዳልሆንህ ታውቃለህና። ሕሊናህ ይኰንንሃል፤ እግዚአብሔርም ሊኰንንህ እንደሚገባ ታውቃለህ፤ አሁን ባለህበት ሁኔታ ቢያጸድቅህ ሕሊናህ እርሱን ሊያጸድቅ አይችልም። እንግዲያስ እንዳለህ እንደ በደለኛና እንደ ተኰነነ ኃጢአተኛ ወዲያውኑ ወደ ክርስቶስ ና፤ በደልህን ተናዘዝ፥ ኀፍረቱንና ነቀፋውንም ሁሉ በራስህ ላይ ውሰድ፤ ከእግዚአብሔር የራቅህባቸው መቅበዝበዞችህ ሁሉ ቢኖሩም አሁንም እንደሚወድድህ እመን—በዘላለም ፍቅር እንደ ወደደህ፥ ስለዚህም በቸርነቱ እንደሚስብህ እመን።

ቀዳሚ ቀጣይ