ንጽሕናን እንዴት መጠበቅ ይቻላል

ያዕቆብ 1:12 እንዲህ ይላል፦ «በፈተና የሚጸና ሰው የተባረከ ነው፤ ከተፈተነ በኋላ ለሚወዱት ተስፋ ስለ እርሱ የሰጣቸውን የሕይወትን አክሊል ይቀበላልና።»

ውድ ጓዶቼ ሆይ፣ የዚህን ተሞክሮ መልካምነት ላሳያችሁ ከሞከርኩና እንድትቀበሉትም አጥብቄ ከመከርኳችሁ በኋላ፣ የቅድስናን በረከት ካገኛችሁት በኋላ ጠብቆ ለማቆየት የተሻለውን መንገድ የሚመለከቱ ጥቂት ምክሮች ሊጠቅሙ ይችላሉ ብዬ ከማሰብ ልቆጠብ አልችልም። ብዙዎች ይህን የንጹሕ ልብ ቅዱስ ሀብት አግኝተው በሚያመጣው መተማመንና ደስታ ሐሤት እንደሚያደርጉ፣ ከጥቂት ጊዜ በኋላ ግን እንደገና እንደሚያጡት ጥርጥር የለውም። ወደ ቅዱሱ መቅደስ ይገባሉ፤ ከዚያም በአንድ ወይም በሌላ ምክንያት ትተውት ይሄዳሉ። በእንባና በጸሎት እየታገሉ ወደ ቅድስና ጎዳና ይወጣሉ፤ ከዚያም ወደ አንዱ ወይም ወደ ሌላው የጎን መንገድ ፈቀቅ ይላሉ፤ በዚያም እንደገና የቀድሞው ዘመን ጥርጣሬዎች፣ ፍርሃቶችና ኃጢአቶች ምርኮ ይሆናሉ። ይህ እጅግ የሚያሳዝን ነገር ነው።

እንዲህ የሚያደርጉ ሰዎች ዋነኞቹ ተጎጂዎች ራሳቸው ናቸው፤ ነገር ግን ወዮ! በታማኝነት ማጣታቸው በሌሎችም ላይ ታላቅ ጉዳት ይደርሳል። ይሁን እንጂ ይህን ጸጋ ያገኙ ሰዎች የተቀበሉትን መጠበቅ አለመቻላቸው፣ ወደዚህ ቅዱስ መንገድ ለገባችሁት ለእናንተ ተስፋ ማስቈረጫ ሊሆን አይገባም፤ በእርሱም ጸንታችሁ እንዳትቀጥሉ ምክንያት ሊሆን አይገባም።

ጓዶቼ ሆይ፣ ማድረግ ያለባችሁ ዋጋዋ እጅግ የበዛውን ዕንቁ ካገኛችሁ በኋላ ምንም ጠላት ይህን ሀብት እንዳይዘርፋችሁ በልባችሁ መቍረጥ ነው። ለዚህም የመጀመሪያው ምክሬ ይህ ነው፦ 1. ሥራው መፈጸሙን በልባችሁ የጸና እርግጠኝነት እስክታገኙ ድረስ ፈልጉ። እግዚአብሔር በእርግጥና በእውነት ነፍሳችሁን ከኃጢአት እንዳነጻት ከሚያረጋግጥላችሁ ማረጋገጫ ባነሰ በምንም ነገር አትርኩ።

በሚያስደስቱ ስሜቶች ብቻ ወይም ወደ ፊት ስለዚህ ጉዳይ መገለጥ ይመጣል በሚል ተስፋ ብቻ አትረፉ። ሥራው መፈጸሙን እስክትረኩ ድረስ መታገላችሁን፣ መጸለያችሁንና ማመናችሁን ቀጥሉ።

ምናልባት እንደገና፦ «እግዚአብሔር ነፍሴን ከኃጢአት እንዳነጻት እንዴት ማወቅ እችላለሁ?» ብላችሁ ትጠይቁ ይሆን? እኔም እንዲህ ብዬ እመልሳለሁ፦ «እግዚአብሔር ኃጢአታችሁን ይቅር እንዳለ እንዴት አወቃችሁ? ያንን ውድ እውነት እንዴት ልታውቁ ቻላችሁ? በዳናችሁ ጊዜ በእርግጥም ውድ እውነት ነበርና። ያ የጸጋ ስጦታ የእናንተ ከሆነ ወዲህ እነዚህን ቃላት ሺህ ጊዜና ከዚያም በላይ ዘምራችኋል ብዬ እገምታለሁ፦» «ኢየሱስ ኃጢአቴን ያጠበበትን ያን ቀን ከቶ አልረሳውም።»

«እንደ ዳናችሁ የግል ማረጋገጫ ያገኛችሁት እንዴት ነው?» ብዬ እጠይቃለሁ፤ እናንተም እግዚአብሔር በልባችሁ እንደ ነገራችሁ ትመልሳላችሁ። እንግዲያውስ የመቀደሳችሁ ማረጋገጫም በዚያው መንገድ ይመጣል።

ትዕቢቱ ሁሉና ክፋቱ፣ ቅናቱና ራስ ወዳድነቱ እንደ ተወገደ፣ እግዚአብሔርም በሰላምና በፍቅር እንደ ሞላችሁ መንፈስ ቅዱስ ደስ የሚያሰኝ እርግጠኝነትን በነፍሳችሁ ውስጥ ያስገኛል።

ይህ ውድ እርግጠኝነት ለተለያዩ ሰዎች በተለያየ መልክ እንደሚመጣ ጥርጥር የለውም። ለአንዳንዶች «የእምነት ዕረፍት» ሆኖ ይገለጣል፤ ለሌሎች «የእሳት ጥምቀት»፤ ለሌሎች «የፍቅር ሙላት»፤ ለሌሎች ደግሞ ጽድቅና ሰላም በመንፈስ ቅዱስም የሆነ ደስታ በሆነው በውስጣዊ መንግሥት ላይ ከሁሉ በላይ ሆኖ በነፍሳቸው ሊነግሥ የመጣው ክርስቶስ በዙፋኑ መቀመጡ ሆኖ ይገለጣል።

ነገር ግን ሥራው እውነተኛና የተሟላ በሆነ ጊዜ ለሁሉም በአንድነት ደሙ እንደሚያነጻና ልብ ንጹሕ እንደ ሆነ የሚያረጋግጥ እርግጠኝነት ይኖራል። ከዚህ ባነሰ በምንም አትርኩ፤ ከዚህ የበለጠውን መስጠቱን ወይም መከልከሉን ግን ለእግዚአብሔር በጎ ፈቃድ ተዉት።

2. እግዚአብሔር ልባችሁን እንዳነጻ ካረጋገጣችሁ በኋላ ይህንኑ እውነት መስክሩ። በረከቱን ጠብቃችሁ ለማቆየት ከፈለጋችሁ ይህን ማድረግ አለባችሁ። ዓለም ካወቃቸው እጅግ ቅዱሳን ወንዶችና ሴቶች ብዙዎቹ በሐሰተኛ ትሕትና ወይም በዓይን አፋርነት ወይም በሌሎች ምክንያቶች ተጽዕኖ እግዚአብሔር ያደረገላቸውን ድንቅ ነገሮች በግልጥ ከመናገር ተከልክለዋል፤ በዚህም መንፈስ ቅዱስን አሳዝነው በረከቱን አጥተዋል። ሰይጣን እናንተንም በዚያው ዓይነት ብርሃናችሁን ከዕንቅብ በታች እንድትሰውሩ ይፈትናችኋል፤ እናንተ ግን ልትቃወሙት፣ እግዚአብሔር የሰጣችሁንም መዳን በዙሪያችሁ ላሉት ሁሉ በድፍረት ልትመሰክሩ ይገባል።

ለራሳችሁ አምናችሁ ተቀበሉት። ለልባችሁ ደጋግማችሁ እንዲህ በሉ፦ «ክብር፣ ክብር፣ ኢየሱስ ያድነኛል፤ ክብር፣ ክብር ለበጉ ይሁን፤ አሁን የሚያነጻው ደም ደርሶልኛል፤ ክብር፣ ክብር ለበጉ ይሁን!»

ለአዳኛችሁ ግለጡት። በእርሱ እንደምትታመኑ ንገሩት፤ ስላደረገላችሁም ነገር አክብሩት። አመቺ በሆነ አጋጣሚ ሁሉ ለጓዶቻችሁ መስክሩ። በቤተሰባችሁም ዘንድ ይታወቅ። እግዚአብሔር ያደረገላችሁን ለእናንተ ቅርብና ውድ የሆኑት ሰዎች ማወቃቸው እናንተን እጅግ መርዳቱ ብቻ ሳይሆን ለእነርሱም ታላቅ በረከት ሊሆን ይችላል። እርግጥ ነው፣ ትምክህት የሚመስል መንፈስ እንዳታሳዩ፣ እንድትደሰቱበት ስለ ሰጣችሁም ነገር ሁሉ ክብሩን ሁሉ ለእግዚአብሔር እንድትሰጡ ትጠነቀቃላችሁ፤ ይህን ታላቅ መዳን ወደ ማየትና ወደ መቀበል ገና ያልደረሱትን ጓዶች እንደምትኰንኑ የሚያስመስል ምንም ዓይነት አነጋገር እንደማትናገሩም እርግጠኛ ነኝ። ፍቅር በልባችሁ ብቻ ሳይሆን በቃላችሁም ሁሉ ውስጥ ይኖራል።

ነገር ግን እግዚአብሔር ልባችሁን እንዳነጻ፣ በመንፈሱም እርሱን ሳታሳዝኑ ዕለት ዕለት እንድትኖሩ እንደሚያስችላችሁ መመስከር አለባችሁ። አንዳንድ ጊዜ ይህ መስቀል ሊሆንባችሁ ይችላል። ነገር ግን ልትሸከሙት ይገባል፤ ይህን በማድረጋችሁም ለጓዶቻችሁና ለወዳጆቻችሁ ብርሃን፣ ኃይልና ደስታ ትሆናላችሁ።

3. በረከቱን ጠብቃችሁ ለማቆየት ወደ ደስታው በገባችሁበት በዚያው የመገዛት፣ የመታዘዝና ራስን ለእግዚአብሔር የመቀደስ መንፈስ ለመኖር መጣር አለባችሁ። የዕለት ተዕለት ተሞክሮአችሁ ብዙ ጊዜ የምንዘምረው ይህ መሆን አለበት፦ «እነሆ የአንተ የሆነውን ራሴን ለአንተ እተዋለሁ፤ የማይቃወመውን ጭቃህን እንደ ወደድህ ቅረጸው፤ ማኅተምህን እንድቀበል፣ ቃልህንም ሁሉ እንድታዘዝ አድርገኝ፤ በአንድ ልብና በአንድ ዓይን ላገልግልህ፤ ለክብርህም ልኑር ልሙትም።»

4. ይህን ተሞክሮ ለመጠበቅ በረከቱን በመጀመሪያ ወደ ልባችሁ ያመጣውን ያንኑ የመታመን መንፈስ ይዛችሁ መቀጠል አለባችሁ። የንጽሕናን ስጦታ የተቀበላችሁት በስሜት ወይም በእውቀት ወይም በሥራ አልነበረም፤ በምኞትም ሆነ በጸሎትም አልነበረም። አመናችሁ፤ ዳናችሁም። ሥራው በልቤ እንደ ተሠራ ካልተሰማኝ በቀር ኢየሱስ እንደሚያነጻ አላምንም ወይም ማመን አልችልም ብላችሁ ቢሆን ኖሮ፣ በማግኘቱ ደስ ሊላችሁ ባልቻለም ነበር። ታመናችሁ፤ ሥራውም ተፈጸመ። በዚያው መንፈስ ወደ ፊት መሄድ አለባችሁ። ሁሉ ነገር ከባድ፣ ጨለማና ባዶ የሚመስልባቸው ሰዓታት ይኖራሉ።

በዚያን ሰዓታት የእምነትን ገድል መጋደል አለባችሁ፤ ደስ ቢላችሁም ባይላችሁም፣ ልባችሁ ደንዳና ቢመስልም ለስላሳ፣ ደሙ እንደሚያነጻ የመጀመሪያ እምነታችሁን አጥብቃችሁ መያዝ ይገባችኋል። አጽንታችሁ ያዙት።

5. ልብን ንጹሕ አድርጎ ለመጠበቅ ፈተናን መቃወም አለባችሁ። ፈተና ይገጥማችኋል፤ ከተለያዩ ምንጮች ይመጣል፤ በተለይ ግን ከዲያብሎስ፣ በሦስት ልዩ አቅጣጫዎች፦ (ሀ) ወይ አጠራጣሪ ባሕርይ ወዳላቸው ወይም በግልጥ ክፉ ወደ ሆኑ የቀድሞ ልማዶች ፈቀቅ አድርጎ ሊስባችሁ ይሞክራል።

ደካማ ጎኖቻችሁን ያውቃል። በዚያ እጥፍ ጥበቃ አቁሙ።

(ለ) የራሱን ክፉ ምኞትና ፍላጎት በአእምሮአችሁ ያስገባል፤ ከዚያም ከራሳችሁ ልብ የመነጩ እንደ ሆኑ ሊያሳምናችሁ ይሞክራል። «እንደነዚህ ያሉ ኃጢአተኛ ሐሳቦች እያሉህ እንዴት የተቀደስህ ልትሆን ትችላለህ?» ይላችኋል። ርኩስ ፍሬዎቹን የእናንተ አይደሉም በሉ። የእናንተ እንዳልሆኑ ንገሩት። እንደምትጠሏቸው ንገሩት።

የእርሱ እንደ ሆኑ ንገሩት።

(ሐ) በረከቱ እንዳላችሁ ሁልጊዜ ስለማይሰማችሁ በረከቱን ያጣችሁ እንዲመስላችሁ ለማድረግ ይጥራል። እናንተ ግን መኖር ያለባችሁ በስሜት ሳይሆን በእምነት ነው።

6. ንጹሕ ልብን ለመጠበቅ እግዚአብሔር ለእርዳታችሁ የሠራቸውን መንገዶች በጥንቃቄ መጠቀማችሁን መቀጠል አለባችሁ። ንጽሕና እርሱን ለመጠበቅና ለማሳደግ የሚረዱትን መንገዶች መጠቀም አላስፈላጊ ወደሚያደርግ ሁኔታ አያስገባችሁም።

7. በረከቱን ለመጠበቅ፦ (ሀ) መጸለይ አለባችሁ፤ በተወሰኑ ሰዓታትና ለተወሰነ ጊዜ እንድትጸልዩ አጥብቄ እመክራችኋለሁ።

(ለ) መጽሐፍ ቅዱሳችሁን ማንበብና ማጥናት አለባችሁ።

(ሐ) በቅድስና ርእስ ላይ የሚያስተምሩና የሚያበረታቱ መጻሕፍትንና ጽሑፎችን አንብቡ።

(መ) ከመጸለይም ጋር ትጉ። ዘወትር ተጠንቀቁ።

8. ለነፍሳት መዋጋታችሁን ቀጥሉ፤ በራሳችሁ ተሞክሮ ብቻ ወይም ያንኑ ተሞክሮ በሌሎች ጓዶች ዘንድ በማስፋፋት ብቻ ወደ ተያዘ ራስ ወዳድ ሥራ አትሳቡ። ከጊዜአችሁና ከጉልበታችሁ የተወሰነውን ክፍል ራሳችሁን ለመቀደስና ፍጹም መዳንን በጓዶቻችሁ መካከል ለማስፋፋት ተግባር ብታውሉ ተገቢ ነው ብዬ አስባለሁ። ነገር ግን በዙሪያችሁ ላሉት ለሚጠፉ ነፍሳት መዳን ከመዋጋት ግዴታ ምንም ነገር ነጻ ሊያደርጋችሁ አይችልም።

ለአንድ ሌላ ቃል ብቻ ቦታ አለኝ። እጅግ ጠቃሚ ነው። በምችለው አጽንዖት ሁሉ ለእነዚህ ደብዳቤዎች አንባቢ ሁሉ እንዲህ እላለሁ፦ በማናቸውም ምክንያት የኢየሱስ ደም እንደሚያነጻችሁ ያላችሁን እርግጠኝነት ብታጡ፣ ወይም ይልቁንም የባሰ የሚያሳዝነው፣ የንጽሕናን በረከት ብታጡ፣ ወዲያውኑ ወደ አዳኛችሁ እግር ሩጡ፤ ጥፋታችሁን ተናዘዙ፤ ራሳችሁን እንደገና ለጌታችሁ ሙሉ አገልግሎት አሳልፋችሁ ስጡ፤ አሁንም እንደገና ለኃጢአትና ለርኵሰት በተከፈተው ምንጭ ውስጥ ተጥለቁ፤ ከዚያም ከውድቀታችሁ ኀዘንና ተስፋ መቍረጥ ትምህርት ወስዳችሁ በሚያነጻ አዳኝ የእምነትን ሕይወት ለመኖር እንደ አዲስ ጀምሩ።

«ሺህ ሠራዊት ቢሰለፉ፣ ሺህ ዓለማት ነፍሴን ሊያናውጡ ቢነሡ፣ ቍጣቸውን የሚያበርድ፣ የባዕድ ሠራዊትንም ወደ ኋላ የሚመልስ ጋሻ አለኝ፤ የሚደማ በግ ተሥሎበታል፤ በኢየሱስ ስም ለማመን እደፍራለሁ።

«ከሰይጣን እጅ ሊመልሰኝ፣ ከዚህ ክፉ ዓለም ነጻ ሊያወጣኝ፣ ኃጢአቴን ሊያነጻ፣ እስራቴንም ሊፈታ፣ ከዓመፃም ሁሉ ሊያድነኝ፣ ጌታዬና አምላኬ ከሰማይ መጣ፤ በኢየሱስ ስም ለማመን እደፍራለሁ።»

— ፍጻሜ —