በጸሎት ማሸነፍ

በሰዎች ፊት ከማሸነፋችን በፊት አስቀድመን በእግዚአብሔር ፊት እናሸንፋለን።

ከጸሎት አንጻር፥ የሚያሸንፍ ጸሎት ማለት የተፈለገውን ውጤት እስኪያገኝ ድረስ በጽናት የሚቀጥል ጸሎት ማለት ነው። ወደ ፊት ከመቀጠላችን በፊት፥ ድሉ በሥጋዊው ዓለም ከመታየቱ በፊት አስቀድመን በመንፈስ እንደምናሸንፍ እንድናስታውስ እወዳለሁ። ያዕቆብ ወደ አገሩ ለመመለስ እንዴት እንደ ፈለገ ተመልከት። እግዚአብሔር የባረከው ሀብት ሁሉ ተይዞ ነበር፤ እርሱም ወደ ቤቱ ለመሄድ ተዘጋጅቶ ነበር።

ሆኖም ወንድሙን ዔሳውን እንዳታለለው አስታወሰ። ዔሳው አሁን ጸንቶ የተቋቋመ ሰው ነበር፤ ይህም ያዕቆብ የሚፈራበት በቂ ምክንያት ሰጠው። ለጉዞው ሲዘጋጅ ልቡ ታወከ፤ ራሱንም ብቻውን አገኘው። ያዕቆብ በእግዚአብሔር ፊት ካላሸነፈ በዔሳው ፊት እንደማያሸንፍ ተረዳ።

በዚያች ሌሊት መልአክ ለያዕቆብ ተገለጠለት፤ እርሱም እስኪነጋ ድረስ ከመልአኩ ጋር ታገለ። ያዕቆብ ተስፋ አልቆረጠም፤ መልአኩ እስኪባርከው ድረስ አጥብቆ ያዘው። ይህም ያዕቆብ በእግዚአብሔር ፊት እንዳሸነፈ ያሳየ ሲሆን በዔሳውም ፊት እንዲሳካለት አዘጋጀው።

«እርሱም፦ ‹ከእንግዲህ ወዲህ ስምህ እስራኤል ይሁን እንጂ ያዕቆብ አይባል፤ ከእግዚአብሔርና ከሰው ጋር ታግለህ አሸንፈሃልና› አለው።» ዘፍጥረት 32:28።

እንደ ተለመዱት ጸሎቶቻችን ሳይሆን፥ የሚያሸንፍ ጸሎት በአንድ ሰው ልብ ውስጥ ካለ ጥልቅ ሸክም ይወጣል። ውጤት እስክታይ ድረስ እንድትቀጥል መንፈስ ቅዱስ የሚገፋፋህ የጸሎት ዓይነት ነው። ቀደም ብለን እንደ ተነጋገርነው፥ የሚያሸንፍ ጸሎት እጅግ አስፈላጊ ነው፤ ዓላማውን እስኪፈጽም ድረስ አያቆምም። ስለ ቸርነቱ ጌታን ከማመስገን ያልፋል፤ ብርቱ ጸሎትን ይጠይቃል።

«እንዲሁም ደግሞ መንፈስ ድካማችንን ያግዛል፤ እንዴት እንድንጸልይ እንደሚገባን አናውቅምና፥ ነገር ግን መንፈስ ራሱ በማይነገር መቃተት ይማልድልናል።» ሮሜ 8:26።

ያለ መንፈስ ቅዱስ አንድ ሰው በጸሎት ሊያሸንፍ አይችልም፤ ምክንያቱም በሥጋዊ መንገድ ስንጸልይ ምንም ወይም እጅግ ጥቂት ነገር ብቻ ሊለወጥ ይችላል። ለምን? ለውጥ ለማምጣት በትክክል ምን መናገር እንዳለብንና እንዴት መናገር እንዳለብን ልናውቅ አንችልም፤ መንፈስ ግን መሪያችን ነው።

ሁሉን ነገር አድርገህ አሁንም ውጤት እንዳላየህ ይሰማሃል? ቀጥል! እስክትሳካ ድረስ አታቋርጥ። እየሠራ ባይመስልም እንኳ በእርግጥ እየሠራ ነው። ጠላት ወደ ፊት መግፋትህን ከቀጠልህ ልታሸንፍ እንደምትችል ያውቃል። እርሱ የሚጨነቀው ተስፋ በሚቆርጡ ሰዎች ብቻ ነው፤ ምክንያቱም አስቀድመው እንደ ተሸነፉ ያውቃል። ስለዚህ ተስፋ አትቁረጥ! ለመጸለይ ሸክም ከተሰማህ መጸለይህን አረጋግጥ። እግዚአብሔር ልትሸከመው ከምትችለው በላይ አይሰጥህም። የሚሰጥህን ሁሉ ለማሸነፍ ብርታትንም ደግሞ ይሰጥሃል! ሃሌ ሉያ!

ነገር ግን ከመጸለይህ በፊት በሕይወትህ ካለ ከማንኛውም ስሕተት ንስሐ መግባት አስፈላጊ ነው። ከዚያ በኋላ ይቅርታን ተቀበልና ወደ ፊት ቀጥል። ለዚያ ጉዳይ የሚያስፈልጉትን ነገሮች እንድትፈጽም ስለሚረዳህ በሌሎች ልሳኖች ተናገር። ከዚያም የእግዚአብሔርን ቃል በድፍረት ተናገር። መንፈስ ቅዱስ ልብህን ሲሞላ የእግዚአብሔርን ቃል በድፍረት ትናገራለህ፦ «ከጸለዩም በኋላ ተሰብስበው የነበሩበት ስፍራ ተናወጠ፥ በሁሉም መንፈስ ቅዱስ ሞላባቸው፥ የእግዚአብሔርንም ቃል በግልጥ ተናገሩ።» የሐዋርያት ሥራ 4:31።

የሚያሸንፍ ጸሎት ምን ያደርጋል?

መነሣሣትን ያጸናል። የማትጸልይ ከሆነ ጸሎትን የሚከተለውን ሞገስ/ብርሃን ታጣለህ። «ለሥራ ከመትጋት አትለግሙ፤ በመንፈስ የምትቃጠሉ ሁኑ፤ ለጌታ ተገዙ።» ሮሜ 12:11። በትጋት ፈጽሞ አትለግም!

እንዴት ታደርገዋለህ? በእግዚአብሔር ቃል ላይ በማሰላሰል። ይህንን ደጋግመህ አድርግ፤ የማንነትህም ክፍል ይሁን።

የሚያሸንፍ ጸሎት ደግሞ ያነጻናል፤ ወደ ጸሎት ከገባንበት ጊዜ ይልቅ ይበልጥ የከበርን ያደርገናል። አብልጠህ በጸለይህ መጠን አብልጠህ ታበራለህ።