የጸሎት አስፈላጊነት

አንድ ነገር ምን ያህል ድንቅ እንደ ሆነ አንዴ ካወቅህ፥ እንድትመኘው ማንም ሊያስገድድህ አያስፈልግም!

የጸሎት ጥቅሞች እንደ ናዳ የበዙ ናቸው። እንደ ተማሪ ይህን ማወቅህ አስፈላጊ ነው፤ ምክንያቱም ከዚያ በኋላ ምን እንደምትጠብቅ መመሪያ ታገኛለህ። እንዴት መጸለይ እንዳለብህ በመማር መንፈስህ ከመቼውም ይበልጥ ለመጸለይ እጅግ ይቀጣጠላል። ይህ ምዕራፍ የያዘውን ስታነብ፥ መንፈስህ እንዲመገብ ልብህና መንፈስህ የዋህና ክፍት ይሁኑ። እነዚህን የጸሎት ጥቅሞች ተመልከት፤ መንፈስህም እጅግ ደስ ይበለው!

1. ጸሎት ከእግዚአብሔር ጋር ኅብረት እንድናደርግ ይረዳናል። ከእግዚአብሔር ጋር አንድ መሆን፣ ሁሉን ከፈጠረው ጋር መተባበር፣ በልቡ ያለውን ማወቅና በምድር ላይ የሚፈልገውን እንዴት በትክክል መፈጸም እንደምትችል ማወቅ ምንኛ ያማረ ነው! ይህ እጅግ አስደናቂ ነው!

2. አንዳንድ ጊዜ ሰዎች የድርጊታቸውን መዘዝ የማይቀበሉት አንድ ሰው ወይም አንዳንድ ሰዎች ለዚህ በደለኛ ሰው ምሕረት እንዲያደርግለት ወደ እግዚአብሔር ስለ ጸለዩ እንደ ሆነ ታውቃለህ? ጸሎት ያን ያህል ኃይል አለው! አባትህ፣ እናትህ፣ ማንኛውም ዘመድህ ወይም ወዳጅህ እግዚአብሔር ይቅር ሊለው ይችላል ብለህ እንኳ የማታስበውን ነገር አድርጎ ሊሆን ይችላል፤ ዓለም ሁሉ የሚቃወመው ትልቅ ነገር ሊሆን ይችላል፤ ነገር ግን በጸሎት እግዚአብሔር እንዲምራቸው ልትለምነው ትችላለህ፤ እግዚአብሔርም ስንጸልይ ይሰማል። እግዚአብሔር ቤተሰብህንና ወዳጆችህን በድርጊታቸው ምክንያት ሊቀበሉት ከሚገባቸው ቅጣት ሊያድናቸው ይችላል። ክብር ለእግዚአብሔር ይሁን! ኢየሱስ ወደ እግዚአብሔር የጸለየበትና ሰዎች ይቅር የተባሉበት በመጽሐፍ ቅዱስ ውስጥ ያለ በጣም ጥሩ ምሳሌ ይኸውልህ።

«ቀራንዮም ወደሚባል ስፍራ በደረሱ ጊዜ፥ በዚያ እርሱን ክፉ አድራጊዎቹንም አንዱን በቀኝ ሁለተኛውንም በግራ ሰቀሉ። ኢየሱስም። አባት ሆይ፥ የሚያደርጉትን አያውቁምና ይቅር በላቸው አለ።» ሉቃስ 23:33-34።

ስለዚህ እግዚአብሔር ይቅር እንዲለው የምትፈልገው ሰው ካለ፥ ቀጥል፣ ስለ እርሱ ጸልይ። እግዚአብሔር ሊምረውና ባትጸልይ ኖሮ ይቀበለው የነበረውን ቅጣት እንኳ ሊያስወግድለት ይችላል።

3. ሌላው የጸሎት ጥቅም በእግዚአብሔር ላይ እንድናተኩር የሚረዳን መሆኑ ነው።

«በላይ ያለውን አስቡ እንጂ በምድር ያለውን አይደለም።» ቆላስይስ 3:2። በጸሎት አማካይነት በላይ ያለውን ልናስብ እንችላለን፤ ምክንያቱም ጸሎት እንድናተኩርና እግዚአብሔር የሚያየውን እንድናይ ይረዳናል። ሰውም እግዚአብሔርም መንፈስ ናቸው፤ ስለዚህ በጸሎት ውስጥ መንፈስ ከሆነው ከእግዚአብሔር ጋር ኅብረት ስለምታደርግ በመንፈሳዊ ነገሮች ላይ ታተኩራለህ።

4. ስንጸልይ መንፈስ ቅዱስ ደግሞ መመሪያና አቅጣጫ ይሰጠናል። ሮሜ 8:26 እንዲህ ይላል፦ «እንዲሁም ደግሞ መንፈስ ድካማችንን ያግዛል፤ እንዴት እንድንጸልይ እንደሚገባን አናውቅምና፥ ነገር ግን መንፈስ ራሱ በማይነገር መቃተት ይማልድልናል።»

መንፈስ ቅዱስ በሰማይ ያለውን የአብን ፈቃድ ስለሚያውቅ፥ የአብን ፈቃድ እንድናስተላልፍ ይረዳናል፤ በዚህም የእግዚአብሔርን ፈቃድ እንዴት በተሳካ ሁኔታ መፈጸም ወይም ማድረግ እንደምንችል መመሪያ እንቀበላለን። ይህ ያማረ አይደለምን? ያለ መንፈስ ቅዱስ የእግዚአብሔርን ፈቃድ ሙሉ በሙሉ መረዳት አይቻልም።

የሐዋርያት ሥራ 13:2 ደቀ መዛሙርቱ ከመንፈስ ቅዱስ ጋር ኅብረት ሲያደርጉ ከእርሱ እንዴት መመሪያ እንደ ተቀበሉ ያሳየናል።

«እነዚህም ጌታን ሲያመልኩና ሲጦሙ መንፈስ ቅዱስ። በርናባስንና ሳውልን ለጠራኋቸው ሥራ ለዩልኝ አለ።»

እያንዳንዱ ክርስቲያን ለመንፈስ ቅዱስ ትኩረት መስጠትና እርሱን ማዳመጥ ያለበት በዚህ ምክንያት ነው።

ስትጸልይ መንፈስ ቅዱስ ይምራህ፤ ምክንያቱም እርሱ እግዚአብሔር የሚፈልገውንና አንተ የሚያስፈልግህን ያውቃል።

5. በጸሎት እናሸንፋለን! ሃሌ ሉያ! እግዚአብሔር ይባረክ! እንደ ክርስቲያን፥ በሥጋዊው ዓለም የሚሆነው ነገር ሁሉ አስቀድሞ በመንፈሳዊው ዓለም እንደሚሆን ማወቅ አስፈላጊ ነው። ስንጸልይ እግዚአብሔር ያበረታናል። እንድንሳካና ጤናማ ሆነን እንድንኖር የሚረዳን ከእርሱ የሆነ ልዩ ኃይል አለን። ይህ ኃይል አደገኛ ነገሮችን እንድንረግጥ፣ በኢየሱስ ስም አጋንንትን እንድናወጣና ለሌሎች የማይቻል የሚመስሉ ነገሮችን እንድናደርግ ያስችለናል።

ችግር ገጥሞሃል? ጸልይ፤ ነገሮችም ከቀን ወደ ቀን እንደሚሻሻሉ እመን። ስንጸልይ እግዚአብሔር ይሰማል፤ ይመልሳልም። ለእኛ መልካም ዕቅድ አለው፤ እጅግ ከባድ የሆኑትን ፈተናዎች እንኳ እንድናሸንፍ ይረዳናል።

6. ጸሎት ያጸናናል። እንደ ክርስቲያኖች የምንጸልየው እግዚአብሔርን ለማስለወጥ አይደለም፤ እርሱ ፈጽሞ አይለወጥም።

ትኩረቱን ለመሳብም አንጸልይም፤ ምክንያቱም አስቀድመን ለእርሱ ውድ ነን። ሁልጊዜ በዓይኖቹ ፊት ነን። እግዚአብሔር ይመስገን! ይልቁንም ጸሎት በእርሱ ላይ እንድናተኩር ይረዳናል። ምንም ቢሆን ከእርሱ ጋር በደኅንነት እንዳለን ያስታውሰናል። ተስፋ እንዳንቆርጥና እንዳንታክት፥ ነገር ግን ከእግዚአብሔር ጋር ተገናኝተን እንድንኖር ሁልጊዜ መጸለይ እጅግ አስፈላጊ የሆነው ለዚህ ነው። በሉቃስ 18:1 ያለውን ይህን ቃል ተመልከት፦ «ሳይታክቱም ዘወትር ሊጸልዩ እንዲገባቸው የሚል ምሳሌን ነገራቸው።»

7. ስንጸልይ ነገሮችን በቃላችን ወደ መኖር ልናመጣ እንችላለን። ሕይወትህ የአንተ ኃላፊነት ነው፤ እግዚአብሔርም ዓለምህን እንድትቀርጽ መንፈስ ቅዱስንና ቃሉን ሰጥቶሃል። ማንነትህና የምታልፍበት ነገር የቃላትህ ውጤት ነው። በእግዚአብሔር ቃል ሁኔታዎችን መለወጥና አዲስ ነገሮችን መፍጠር ትችላለህ።

እግዚአብሔር ሲፈጥርህ በራሱ መልክ ፈጠረህ፤ ይህ ማለት እንደ እርሱ ፈጣሪ እንድትሆን ይፈልጋል ማለት ነው። የራስህን እውነታ የመፍጠር ኃይል አለህ። ለምሳሌ መልኩን የተሸከምከው እርሱ (እግዚአብሔር) ፈጽሞ ሊታመም ስለማይችል፥ ለመታመም እምቢ ልትል ትችላለህ። ምንም ቢሰማህ በየዕለቱ ታላቅ ሕይወት ለመኖር መምረጥ ትችላለህ።

አንዳንድ ሰዎች ሕይወት ውጣ ውረድ አለው ይላሉ፤ እኔ ግን «መጽሐፍ ቅዱስ ይህን የሚለው የት ነው?» ብዬ እጠይቃቸዋለሁ። ለአማኝ ነገሩ እንዲህ ሊሆን አይገባም። እውነቱን ካወቅሁ ወዲህ ሕይወቴ ወደ ላይና ወደ ፊት ብቻ እየሄደ ነው! ጌታ ይመስገን! በሕይወትህና በውስጡ ባለው ነገር ሁሉ ላይ ሥልጣን አለህ። ከወቅት ወደ ወቅት፣ ከዓመት ወደ ዓመት የማያቋርጥ ስኬት ያለበትን ሕይወት መኖር ይቻላል።

በሕይወትህ ላይ ተናገር፤ እግዚአብሔር የሰጠህንም ተጠቀምበት። አስታውስ፥ እግዚአብሔር አዲስ መጽሐፍ ቅዱስ እንድትጽፍ አይፈልግም፤ ቃሉን እንድትረዳና በእርሱ እንድትኖር ይፈልጋል። የራስህ ሕይወት ነቢይ አንተ ስለ ሆንክ፥ ብልጽግናንና ሙላትን በራስህ አፍ አውጅ! ሃሌ ሉያ!