የልብ ደስታ

«በቅዱስ ማደሪያው ያለ እግዚአብሔር የድሀ አደጎች አባት የመበለቶችም ዳኛ ነው።» — ከመዝሙር 68

በ1880 የራማባይ ወንድም ስሪኒቫስ በጠና ታመመ። ስለ እኅቱ ተጨነቀ። እርሱ ከሞተ በኋላ ማን ይንከባከባታል? ራማባይም «ከእግዚአብሔር በቀር አንተንና እኔን የሚንከባከብ ማንም የለም» አለችው። ወንድሟም «እግዚአብሔር የሚንከባከበን ከሆነማ ምንም አልፈራም» ብሎ መለሰላት። ብዙም ሳይቆይ ሞተ። ራማባይ ሃያ ሁለት ዓመቷ ነበር፤ አሁን ቤተሰቧ በሙሉ አልቆ ነበር።

ከጥቂት ወራት በኋላ የወንድሟ ወዳጅ የነበረውን ቢፒን የተባለ አንድ የሕግ ባለሙያ አገባች። እርሱ የመጣው ከሌላ ካስት፣ ማለትም ከሌላ የቤተሰቦች ወገን ነበር። ከተለያዩ ካስቶች የመጡ ሰዎች ፈጽሞ መጋባት የለባቸውም ብለው ያስቡ ስለ ነበር ብዙ ሰዎች ተቈጡ። ራማባይና ቢፒን ግን አብረው ደስተኞች ነበሩ። ሲልቻር በምትባል ትንሽ ከተማ ቤታቸውን አደረጉ፤ በ1881ም እግዚአብሔር አንዲት ሴት ሕፃን ሰጣቸው። ማኖራማ ብለው ስም አወጡላት፤ ትርጉሙም «የልብ ደስታ» ማለት ነው።

አንድ ቀን ራማባይ በገዛ መደርደሪያዋ ላይ አንዲት ትንሽ መጽሐፍ አገኘች። እዚያ እንዴት እንደ ደረሰች ማንም አያውቅም ነበር። የሉቃስ ወንጌል፣ የኢየሱስ ታሪክ ነበረች! በታላቅ ጕጕት ማንበብ ጀመረች። በከተማው የነበረ አንድ ሚስዮናዊም መጽሐፍ ቅዱስን ሊያስረዳት መጣ።

ከዚያም አንድ በጣም የሚያሳዝን ነገር ሆነ። በ1882 መጀመሪያ ላይ ቢፒን ኮሌራ በሚባል በሽታ ተይዞ ሞተ። ማኖራማ ገና አንድ ዓመት እንኳ አልሞላትም ነበር። ራማባይ አሁን መበለት፣ ማለትም ባሏ የሞተባት ሴት ሆነች፤ ከሕፃን ልጇም ጋር ብቻዋን ቀረች።

ራማባይ ግን ተስፋ አልቈረጠችም። ታላቁ ሐዘኗ ወደ እግዚአብሔር ይበልጥ እንዳቀረባት ተናገረች። ገና በሚገባ አላወቀችውም ነበር፤ ነገር ግን እያስተማራት እንደ ሆነ ተሰማት። ወደ እግዚአብሔር የምትመጣ ከሆነ «እርሱ ራሱ ሊስበኝ ይገባል» አለች።

ራማባይ ይበልጥ ብቻዋን በሆነች ጊዜ እግዚአብሔር ወደ ራሱ እያቀረባት ነበር። መጽሐፍ ቅዱስ እግዚአብሔር አባት ለሌላቸው አባት ነው ይላል። ብቸኝነት ሲሰማህ እግዚአብሔር ለአንተም ቅርብ ነው።

ውድ እግዚአብሔር ሆይ፣ ብቸኞችና ያዘኑ ለሆኑ ሰዎች ቅርብ ስለ ሆንህ አመሰግንሃለሁ። እባክህ ወደ አንተ አቅርበኝ። አሜን።