መቅድም

ክርስቲያን አንባቢ ሆይ፣

ቀጥሎ ያለው ጽሑፍ ለሕዝብ እንዲታተም እንድፈቅድ ያደረጉኝን ምክንያቶች በጥቂት ቃላት አስታውቅሃለሁ። ከእነዚህ ምክንያቶች መካከል ዋናውን ስፍራ የያዘው፣ ክርስትናን የሚናገሩ ሰዎች በአብዛኛው ያሉበትን የአሁኑን ሁኔታና ይዞታ ማሰቤ ነው፤ የልባቸውና የመንፈሳቸው ሥሪት በግልጽ የሚታዩ ምልክቶች፣ በዓለም ካገኙት ሰላምና በመካከላቸው ካለው መለያየት የተነሣ የከበቡአቸውን ፈተናዎች ለመቋቋም ታላቅ አቅመ ቢስነት እንዳለባቸው ያሳያሉ። ይህ ጕዳይ እጅግ ታላቅ ክብደት እንዳለው እርግጠኛ ነኝ፤ ስለዚህ በዚህ ጥረቴ ሌሎች መንገዳቸውን የማጤንን ሥራ በሰዎች ሕሊና ላይ ይበልጥ በኃይል እንዲያስጨንቁ፣ የታለመውንም ፍጻሜ ለማግኘት ይበልጥ ግልጽ መመሪያ እንዲሰጡ ምክንያት ብሆን ብቻ እንኳ፣ በዚህ ሥራ የደረሰኝን ዕድል ፈንታ መልካም አድርጌ እቈጥረዋለሁ። ይህንንም የሚደግፍ ሁለተኛ ምክንያት ነበረ፤ ይኸውም በቅርብ ዘመን ኃጢአትን ስለ መግደል መመሪያ ለመስጠት የተነሡ የአንዳንድ ሰዎችን አደገኛ ስሕተት መመልከቴ ነው፤ እነዚህ ሰዎች የወንጌልን ምሥጢርና የክርስቶስን ሞት ኃይል ሳያውቁ፣ እነርሱም ሆኑ አባቶቻቸው ሊሸከሙት ያልቻሉትን በራስ ጥረት የሚገኝ ኃጢአትን የመግደል ሥራ ቀንበር በደቀ መዛሙርታቸው ጫንቃ ላይ እንደ ገና ጭነዋል። የሚያወድሱትና አጥብቀው የሚያስገድዱት ይህ የመግደል ሥራ በባሕርዩም ቢሆን፣ በፈጻሚውም ቢሆን፣ በምክንያቶቹም ቢሆን፣ በመንገዶቹም ቢሆን፣ በውጤቶቹም ቢሆን ከወንጌሉ የመግደል ሥራ ጋር የሚስማማ አይደለም፤ እንዲህ ታስሮ የተዘጋጀላቸውን ሸክም በሚሸከሙት ላይ ዘወትር የሚያሳዝኑ ፍሬዎችን ያስከትላል፤ እነርሱም አጉል እምነት፣ ራስን ማጽደቅና የሕሊና ጭንቀት ናቸው።

እዚህ በድካም የቀረበው ነገር ከወንጌል መንፈስና ፊደል ጋር፣ እንዲሁም በጸጋ ኪዳን ቃል መሠረት ከእግዚአብሔር ጋር መመላለስ ምን እንደ ሆነ የሚያውቁ ሰዎች ካላቸው ልምድ ጋር እንደሚስማማ በትሕትና ተስፋ አደርጋለሁ። ስለዚህ ይህ ራሱ ባይሆን እንኳ፣ ቢያንስ ከዚህ ዓይነት የሆነ አንድ ነገር፣ በአማኞች ልብ ውስጥ ያለውን ይህን የወንጌል የኃጢአት መግደል ሥራ ለማበረታታትና ለማሳደግ፣ አማኞችንም በደኅና መንገዶች ለመምራት፣ በእነርሱም ለነፍሳቸው ዕረፍት እንዲያገኙ ለማድረግ በዚህ ወቅት እጅግ አስፈላጊ ነው። በተለይ እኔን የሚመለከተውን አንድ ነገር ልጨምር። ለዘሪ ዘርን በሚሰጥ በእርሱ ጸጋ በዚህ ርዕስ ላይ ሰብኬ የሚያጽናና ፍሬ ካየሁ በኋላ፣ የእግዚአብሔር መንገዶች በልባቸው ያሉ ብዙ ሰዎች ያስተላለፍሁትን፣ አስፈላጊ ናቸው ብዬ ከምገምታቸው ጭማሪዎችና ለውጦች ጋር፣ እንዲህ እንዳሳትመው አጥብቀው ለመኑኝ። በፍላጎታቸው ተገፋፍቼ ሳለሁ፣ ከእግዚአብሔር ጋር ስላለ ኅብረት የሚናገር ጽሑፍ ከተወሰነ ጊዜ በፊት ቃል ገብቼላቸው ስለ ነበረ፣ ለብዙ የተከበሩና የተመሰገኑ ክርስቲያን ወዳጆች ለጥቂት ዓመታት ባለ ዕዳ ሆኜ የቈየሁበትን ዕዳ አስታወስሁ፤ ከዚያም፣ በዚህ ታላቁን ዕዳ ልከፍል ባልችል እንኳ፣ ይህን ከራሳቸው ጋር ስላለ ጠብ የሚናገር ጽሑፍ፣ ያን ከእግዚአብሔር ጋር ስላለ ሰላምና ኅብረት የሚናገረውን ጽሑፍ በመጠበቅ ለታገሡበት ትዕግሥት እንደ ወለድ አድርጌ ላቀርብላቸው እንደምችል አሰብሁ። ከዚህም በላይ፣ በእግዚአብሔር መግቦት በሃይማኖት ጕዳይ ላይ በተነሡ ልዩ ልዩ ክርክሮች በይፋ ለመሳተፍ ተገድጄ እንደ ነበረ አሰብሁ፤ ይህም በግዴታ ሳይሆን በምርጫ የሚገኝ ፍሬ ሆኖ ለብዙዎች የሚጠቅም ሌላ ዓይነት ነገር እንዲኖር የሚጠይቅ ይመስል ነበር። በእነዚህና በመሳሰሉት ምክንያቶች ይህ አጭር ጽሑፍ ለሕዝብ ዓይን ወጥቶ አሁን ለአንተ ቀርቦአል። የእግዚአብሔር መልካም መግቦት ባኖረኝ ስፍራ የልቤ በጎ ፈቃድና ወደ እግዚአብሔር የማቀርበው ልመና፣ የሕይወቴም ዋና ዓላማ ይህ እንደ ሆነ በቅንነት ልመሰክር እንደምችል ተስፋ አደርጋለሁ፤ ይኸውም ኃጢአትን የመግደል ሥራና ሁለንተናዊ ቅድስና በገዛ ልቤ፣ በሌሎችም ልብና መንገድ ለእግዚአብሔር ክብር እንዲስፋፋ፣ በዚህም የጌታችንና የመድኃኒታችን የኢየሱስ ክርስቶስ ወንጌል በሁሉ ነገር እንዲያጌጥ ነው። ይህን ፍጻሜ ለማግኘት ይህ ትንሽ ጽሑፍ (ስለ መታተሙ የምሰጠው ማብራሪያ ድምር ይህ ነው) ከቅዱሳን ለታናሹ እንኳ በአንዳች ነገር ቢጠቅም፣ ብቁ ያልሆነው ጸሐፊው ከእርሱ ጋር ለሚያቀርባቸው ደካማ ጸሎቶች እንደ ተሰጠ መልስ ይቈጠራል፤

ጆን ኦወን።