ማለዳ ማለዳ
የጁላይ ወር

ምዕራፍ 7 · 34 ደቂቃ ንባብ · 44 ደቂቃ ማዳመጥ

የጁላይ ወር

ጁላይ 1

«በበጋና በክረምት ይሆናል።» (ዘካርያስ 14:8)

ከኢየሩሳሌም የሚፈስሱት የሕያው ውኃ ወንዞች በብርቱው የክረምት ቀዝቃዛ ነፋስ እንዳልረጉ ሁሉ፥ በሚያቃጥለው የበጋ ሐሩርም አይደርቁም። ነፍሴ ሆይ፥ የጌታን ታማኝነት ለመመስከር በሕይወት ስለ ተረፍሽ ደስ ይበልሽ። ወራት ይለዋወጣሉ፥ አንቺም ትለዋወጫለሽ፤ ጌታሽ ግን ለዘላለም ያው ነው፤ የፍቅሩም ወንዞች እንደ ቀድሞው ጥልቅ፥ ሰፊና ሙሉ ናቸው። የሥራ ጭንቀት ሐሩርና የሚያቃጥሉ መከራዎች የጸጋውን ወንዝ የሚያበርድ ኃይል እንድሻ ያደርጉኛል፤ በበጋም በክረምትም ጎርፉን ያፈስሳልና ወዲያውኑ ሄጄ ከማያልቀው ምንጭ እስክረካ ድረስ ልጠጣ እችላለሁ። የላይኞቹ ምንጮች ከቶ አያንሱም፤ የጌታ ስም ይባረክ፥ የታችኞቹም ምንጮች ሊያልቁ አይችሉም። ኤልያስ የኮራት ፈፋ ሲደርቅ አየ፤ እግዚአብሔር ግን ያው የመግቦት አምላክ ነበረ። ኢዮብ ወንድሞቹ እንደሚያታልሉ ፈሳሾች መሆናቸውን ተናገረ፤ አምላኩን ግን የሚትረፈረፍ የመጽናናት ወንዝ ሆኖ አገኘው። ዓባይ የግብፅ ታላቅ መታመኛ ነው፥ ጎርፉ ግን ይለዋወጣል፤ ጌታችን ግን ለዘላለም ያው ነው። ቂሮስ የኤፍራጥስን ወንዝ አቅጣጫ በማዞር የባቢሎንን ከተማ ያዘ፤ ነገር ግን የሰውም ሆነ የሲኦል ኃይል የመለኮታዊውን ጸጋ ፍሰት ሊያዞር አይችልም። የጥንት ወንዞች መንገዶች ደርቀውና ባድማ ሆነው ተገኝተዋል፤ በመለኮታዊ ሉዓላዊነትና ወሰን በሌለው ፍቅር ተራሮች ላይ የሚመነጩት ወንዞች ግን ሁልጊዜ እስከ አፋቸው ሞልተው ይኖራሉ። ትውልዶች ይቀልጣሉ፥ የጸጋ ፍሰት ግን አይለወጥም። የእግዚአብሔር ወንዝ በግጥሙ ውስጥ ካለው ጅረት በበለጠ እውነት እንዲህ ብሎ ሊዘምር ይችላል፦

«ሰዎች ይመጣሉ፥ ሰዎችም ይሄዳሉ፥

እኔ ግን ለዘላለም እፈስሳለሁ።»

ነፍሴ ሆይ፥ በእንደዚህ ያለ የዕረፍት ውኃ አጠገብ በመመራትሽ እንዴት ብፅዕት ነሽ! የጌታን ተግሣጽ፥ «የደፈረሰውን ወንዝ ትጠጪ ዘንድ በግብፅ መንገድ ምን አለሽ?» የሚለውን እንዳትሰሚ ወደ ሌሎች ወንዞች ከቶ አትቅበዝበዢ።

ጁላይ 2

«ልባችን በእርሱ ደስ ይለዋል።» (መዝሙር 33:21)

ክርስቲያኖች በጥልቅ ጭንቀት ውስጥ እንኳ ደስ ሊላቸው መቻላቸው የተባረከ እውነት ነው፤ መከራ ቢከብባቸውም አሁንም ይዘምራሉ፤ እንደ ብዙ ወፎችም በጎጆአቸው ውስጥ ሆነው ይበልጥ ያምር ይዘምራሉ። ማዕበሉ በላያቸው ይንከባለል ይሆናል፥ ነፍሳቸው ግን ፈጥና ወደ ላይ ትወጣና የእግዚአብሔርን ፊት ብርሃን ታያለች፤ ራሳቸውን ሁልጊዜ ከውኃው በላይ የሚያቆይና በዐውሎ ነፋስ መካከል «እግዚአብሔር አሁንም ከእኔ ጋር ነው» ብለው እንዲዘምሩ የሚረዳቸው የመንሳፈፍ ኃይል አላቸው። ክብሩ ለማን ይሰጥ? ኦ! ለኢየሱስ ነው፤ ሁሉ በኢየሱስ ነውና። መከራ በራሱ ለአማኙ መጽናናትን አያመጣም፤ በእሳቱ እቶን ውስጥ ከእርሱ ጋር ያለው የእግዚአብሔር ልጅ መገኘት ግን ልቡን በደስታ ይሞላዋል። ታምሟል፥ ይሠቃያልም፤ ኢየሱስ ግን ይጎበኘዋል፥ መኝታውንም ያነጥፍለታል። እየሞተ ነው፤ ቀዝቃዛውና የሚያንቀጠቅጠው የዮርዳኖስ ውኃ እስከ አንገቱ ድረስ ከብቦታል፤ ኢየሱስ ግን በክንዱ አቅፎት እንዲህ ይላል፦ «የተወደድህ ሆይ፥ አትፍራ፤ መሞት መባረክ ነው፤ የሞት ውኃዎች ምንጫቸው በሰማይ ነው፤ መራራ አይደሉም፥ ከእግዚአብሔር ዙፋን ይፈስሳሉና እንደ ወለላ ጣፋጭ ናቸው።» የሚሄደው ቅዱስ ወንዙን እያቋረጠ ሲሄድ፥ ማዕበሉም በዙሪያው ሲሰበሰብ፥ ልቡና ሥጋውም ሲደክሙ፥ ያው ድምፅ በጆሮው «አትፍራ፤ እኔ ከአንተ ጋር ነኝ፤ አትደንግጥ፤ እኔ አምላክህ ነኝ» ብሎ ይሰማዋል። ወደማይታወቀው ወሰን የሌለው ዓለም ዳርቻ ሲቀርብ፥ ወደ ጥላዎችም ግዛት ለመግባት ሊፈራ ሲል፥ ኢየሱስ «መንግሥትን ሊሰጣችሁ የአባታችሁ በጎ ፈቃድ ነውና አትፍሩ» ይለዋል። አማኙ እንዲህ በርትቶና ተጽናንቶ መሞትን አይፈራም፤ እንዲያውም ለመሄድ ፈቃደኛ ነው፤ ኢየሱስን እንደ አጥቢያ ኮከብ አይቶታልና በኃይሉ እንዳለ ፀሐይ ሊመለከተው ይናፍቃል። በእውነት የኢየሱስ መገኘት የምንመኘው ሰማይ ሁሉ ነው። እርሱ በአንድ ጊዜ

«የብሩሃን ቀኖቻችን ክብር፥

የሌሊቶቻችንም መጽናናት ነው።»

ጁላይ 3

«መልካቸው የከፋና ሥጋቸው የከሳ ላሞች መልካቸው ያማረውንና የሰቡትን ሰባቱን ላሞች በሉአቸው።» (ዘፍጥረት 41:4)

የፈርዖን ሕልም ብዙ ጊዜ የንቃት ገጠመኜ ሆኖአል። የስንፍና ቀኖቼ በትጋት ዘመን ያገኘሁትን ሁሉ አውዳሚ በሆነ መንገድ አጥፍተውታል፤ የቅዝቃዜ ወራቴ የግለትና የቅንዓት ጊዜዬን ሞቅታ ሁሉ አቀዝቅዘውታል፤ የዓለማዊነት ጊዜያቴም በመለኮታዊው ሕይወት ካደረግሁት እድገት ወደ ኋላ መልሰውኛል። የከሱ ጸሎቶችን፥ የከሱ ምስጋናዎችን፥ የከሱ ተግባራትንና የከሱ ገጠመኞችን መጠንቀቅ ያስፈልገኛል፤ እነዚህ የመጽናናቴንና የሰላሜን ስብ ይበላሉና። ጸሎትን ለአጭር ጊዜ እንኳ ብተው የደረስሁበትን መንፈሳዊነት ሁሉ አጣለሁ፤ ከሰማይ አዲስ ስንቅ ባልቀዳ፥ በጎተራዬ ያለው አሮጌ እህል በነፍሴ ውስጥ በሚያይለው ራብ ፈጥኖ ያልቃል። የግድየለሽነት አባጨጓሬዎች፥ የዓለማዊነት ደጎብያዎችና የራስ ፍላጎት ኩብኩባዎች ልቤን ፈጽመው ባድማ ሲያደርጉት፥ ነፍሴንም ሲያዝሉአት፥ የቀድሞው ፍሬያማነቴና በጸጋ ማደጌ ምንም አይጠቅመኝም። ሥጋቸው የከሳ ቀኖች፥ መልካቸው የከፋ ሰዓታትም እንዳይኖሩኝ እንዴት ልተጋ ይገባኛል! በየቀኑ ወደ ምኞቴ ግብ ብጓዝ ፈጥኜ እደርስበት ነበር፤ ማፈግፈግ ግን ከላይኛው መጠራቴ ሽልማት ገና ሩቅ ያስቀረኛል፥ በብዙ ድካም ያደረግሁትንም እድገት ይዘርፈኛል። ቀኖቼ ሁሉ እንደ «ሰቡት ላሞች» ሊሆኑ የሚችሉበት ብቸኛው መንገድ በትክክለኛው መስክ ማሰማራት፥ ከጌታ ጋር፥ በአገልግሎቱ፥ በኅብረቱ፥ በፍርሃቱና በመንገዱ ማሳለፍ ነው። እያንዳንዱ ዓመት በፍቅር፥ በጠቃሚነትና በደስታ ካለፈው ለምን አይበልጥም? ወደ ሰማያዊ ኮረብቶች ይበልጥ ቀርቤአለሁ፥ ጌታዬንም ይበልጥ ተለማምጄዋለሁ፥ ይበልጥም እርሱን ልመስል ይገባኛል። አቤቱ፥ የነፍስን ክሳት እርግማን ከእኔ አርቅ፤ «ክሳቴ፥ ክሳቴ፥ ወዮልኝ!» ብዬ እንድጮኽ አታድርገኝ፤ ይልቁንም ስምህን አመሰግን ዘንድ በቤትህ ልመገብና ልጠገብ።

ጁላይ 4

«በእውነትህ ቀድሳቸው።» (ዮሐንስ 17:17)

መቀደስ በዳግም ልደት ይጀምራል። የእግዚአብሔር መንፈስ ሰው በክርስቶስ ኢየሱስ «አዲስ ፍጥረት» የሚሆንበትን ያንን አዲስ ሕያው መርሕ በውስጡ ያሰርጻል። በአዲስ ልደት የሚጀምረው ይህ ሥራ በሁለት መንገድ ይቀጥላል፤ አንደኛው የሥጋ ምኞቶች የሚሸነፉበትና የሚገዙበት መግደል ሲሆን፥ ሁለተኛው ደግሞ እግዚአብሔር በውስጣችን ያኖረው ሕይወት ለዘላለም ሕይወት የሚፈልቅ የውኃ ምንጭ የሚሆንበት ማሕየው ነው። ይህም «መጽናት» በሚባለው በየዕለቱ ይቀጥላል፤ በእርሱም ክርስቲያኑ በጸጋ ሁኔታ ተጠብቆ ይኖራል፥ ለእግዚአብሔርም ምስጋናና ክብር በመልካም ሥራ እንዲበዛ ይደረጋል፤ ነፍስም ፈጽማ ነጽታ በሰማያት በግርማው ቀኝ ከቅዱሳን ፍጥረታት ጋር ለመኖር ስትነጠቅ በ«ክብር» ይደመደማል ወይም ፍጻሜውን ያገኛል። የእግዚአብሔር መንፈስ የመቀደስ ባለቤት ቢሆንም፥ ሊረሳ የማይገባው የሚታይ መሣሪያ ግን አለ። ኢየሱስ «በእውነትህ ቀድሳቸው፤ ቃልህ እውነት ነው» አለ። የመቀደሳችን መሣሪያ የእግዚአብሔር ቃል መሆኑን የሚያረጋግጡ የመጽሐፍ ክፍሎች እጅግ ብዙ ናቸው። የእግዚአብሔር መንፈስ የእውነትን ትእዛዛትና ትምህርቶች ወደ አእምሮአችን ያመጣቸዋል፥ በኃይልም ይተገብራቸዋል። እነዚህ በጆሮ ይሰማሉ፥ በልብም ተቀብለው ስለ በጎ ፈቃዱ መፈለግንም ማድረግንም በእኛ ይሠራሉ። የሚቀድሰው እውነት ነው፤ እውነትን ካልሰማን ወይም ካላነበብን በመቀደስ አናድግም። በጤናማ ኑሮ የምንሻሻለው በጤናማ ማስተዋል በተሻሻልን መጠን ብቻ ነው። «ቃልህ ለእግሬ መብራት ለመንገዴም ብርሃን ነው።» ስለ ማናቸውም ስሕተት «ይህ የአስተያየት ጉዳይ ብቻ ነው» አትበል። ማንም ሰው የፍርድ ስሕተትን ቢያስተናግድ ፈጥኖም ሆነ ዘግይቶ የተግባር ስሕተትን መታገሡ አይቀርም። እውነትን አጥብቀህ ያዝ፤ እውነትን እንዲህ በመያዝ በእግዚአብሔር መንፈስ ትቀደሳለህና።

ጁላይ 5

«ቅዱሳን ልትሆኑ ለተጠራችሁ።» (ሮሜ 1:7)

የሐዋርያት ዘመን ቅዱሳንን ከሌሎቹ የእግዚአብሔር ልጆች ይልቅ በልዩ ሁኔታ «ቅዱሳን» እንደ ሆኑ አድርገን ለማየት እጅግ እንቸኩላለን። እግዚአብሔር በጸጋው የጠራቸውና በመንፈሱ የቀደሳቸው ሁሉ «ቅዱሳን» ናቸው፤ እኛ ግን ሐዋርያትን እንደ እኛ ላሉ ድካሞችና ፈተናዎች የማይጋለጡ ልዩ ፍጡራን አድርገን ልንመለከታቸው እንወዳለን። ይህን ስናደርግ ግን ሰው ወደ እግዚአብሔር ይበልጥ በቀረበ መጠን በክፉ ልቡ ላይ ይበልጥ አጥብቆ ማዘን እንዳለበት፥ ጌታውም በአገልግሎቱ ይበልጥ ባከበረው መጠን የሥጋ ክፋት በየዕለቱ ይበልጥ እንደሚያስጨንቀውና እንደሚያውከው ያለውን እውነት እንረሳለን። እውነቱ ይህ ነው፤ ሐዋርያው ጳውሎስን ብናየው ኖሮ ከሌሎቹ የተመረጡ ቤተሰብ አባላት ጋር እጅግ ተመሳሳይ ሆኖ ባገኘነው ነበር፤ ብናነጋግረውም ኖሮ «የእርሱና የእኛ ገጠመኝ አንድ ዓይነት ነው። እርሱ ከእኛ ይልቅ ይበልጥ ታማኝ፥ ይበልጥ ቅዱስ፥ ይበልጥም በጥልቅ የተማረ ነው፤ ነገር ግን ያንኑ መከራ ይታገሣል። እንዲያውም በአንዳንድ ረገድ ከእኛ ይልቅ እጅግ ተፈትኖአል» ባልን ነበር። እንግዲህ የጥንት ቅዱሳንን ከድካምም ሆነ ከኃጢአት ነፃ እንደ ሆኑ አድርጋችሁ አትመልከቱአቸው፤ ጣዖት አምላኪዎች ሊያደርገን በሚቃረብ ምሥጢራዊ አክብሮትም አትዩአቸው። ቅድስናቸው ለእኛም የሚደረስበት ነው። እኛ ወደ ከፍተኛ ጥሪያቸው ባስገደዳቸው በዚያው ድምፅ «ቅዱሳን ልንሆን ተጠርተናል»። ወደ ቅድስና ውስጠኛው ክበብ ገፍቶ መግባት የክርስቲያን ግዴታ ነው፤ እነዚህ ቅዱሳን በደረሱበት ደረጃ ከእኛ የሚበልጡ ከሆኑ፥ በእርግጥም ይበልጡ ነበር፥ እንከተላቸው፤ ቅንዓታቸውንና ቅድስናቸውንም እንምሰል። እነርሱ የነበራቸው ብርሃን ለእኛም አለን፥ ያው ጸጋ ለእኛም የሚደረስበት ነው፤ በሰማያዊ ባሕርይ እስክንተካከላቸው ድረስ ለምን እንረካለን? እነርሱ ከኢየሱስ ጋር ኖሩ፥ ለኢየሱስ ኖሩ፥ ስለዚህም ኢየሱስን እየመሰሉ አደጉ። እኛም እነርሱ በኖሩበት በዚያው መንፈስ «ወደ ኢየሱስ እየተመለከትን» እንኑር፤ ቅድስናችንም ፈጥኖ ይገለጣል።

ጁላይ 6

«የሚሰማኝ ግን ተዘልሎ ይኖራል፥ ክፉንም ሳይፈራ ይጸናል።» (ምሳሌ 1:33)

መለኮታዊ ፍቅር በፍርዶች መካከል ሲያበራ ጎልቶ ይታያል። በነጎድጓድ ደመናዎች ስንጥቅ መካከል ፈገግ የምትለው ያቺ ብቸኛ ኮከብ ውብ ናት፤ በአሸዋ ምድረ በዳ ውስጥ የሚያብበው ምንጭ ብሩህ ነው፤ በቍጣ መካከል ያለ ፍቅርም እንዲሁ ውብና ብሩህ ነው። እስራኤላውያን በማያቋርጥ ጣዖት አምልኮአቸው ልዑልን ባስቈጡት ጊዜ ጠልንም ዝናብንም በመከልከል ቀጣቸው፤ ስለዚህም ምድራቸው በጽኑ ራብ ተጎበኘች፤ ይህን ሲያደርግ ግን የራሱ የተመረጡት በሰላም እንዲኖሩ ተጠነቀቀ። ሌሎቹ ፈሳሾች ሁሉ ቢደርቁ ለኤልያስ አንድ ይጠበቅለታል፤ ያም ሲያልቅ እግዚአብሔር አሁንም የምግብ ስፍራ ያዘጋጅለታል፤ ይህ ብቻ አይደለም፥ ጌታ አንድ «ኤልያስ» ብቻ አልነበረውም፤ በጸጋ የተመረጡ ቅሬታዎች ነበሩት፤ እነርሱም በዋሻ ውስጥ አምሳ አምሳ ሆነው ተሸሽገው ነበር፤ ምድሪቱ ሁሉ ለራብ ብትጋለጥም በዋሻው ያሉት እነዚያ አምሳዎች ይመገቡ ነበር፤ ያውም እግዚአብሔርን በሚፈራው ታማኝ መጋቢው በአብድዩ አማካይነት ከአክዓብ ማዕድ ይመገቡ ነበር። ከዚህም የሚመጣው ቢመጣ የእግዚአብሔር ሕዝብ በሰላም እንዳሉ እንረዳ። ጽኑዋን ምድር መናወጥ ያንቀጥቅጣት፥ ሰማያትም ራሳቸው ለሁለት ይቀደዱ፤ በዓለማት ፍርስራሽ መካከል ግን አማኙ እጅግ ጸጥ ባለው የዕረፍት ሰዓት እንዳለ ያህል በሰላም ይኖራል። እግዚአብሔር ሕዝቡን ከሰማይ በታች ማዳን ባይችል በሰማይ ያድናቸዋል። ዓለም ልትሸከማቸው እስከማትችል ድረስ ብትግል፥ ሰማይ የመቀበያቸውና የሰላማቸው ስፍራ ይሆናል። እንግዲህ ጦርንና የጦርን ወሬ በሰማችሁ ጊዜ ተማመኑ። ምንም ሁከት አያስጨንቃችሁ፤ ክፉንም ሳትፈሩ ጸጥ በሉ። በምድር ላይ የሚመጣው ምንም ቢሆን፥ እናንተ በእግዚአብሔር ሰፊ ክንፎች ሥር በሰላም ትኖራላችሁ። በተስፋ ቃሉ ላይ ተደገፉ፤ በታማኝነቱ እረፉ፤ እጅግ የጨለመውን መጪ ጊዜ ተገዳደሩ፤ ለእናንተ የሚያስፈራ ምንም በእርሱ የለምና። ብቸኛ ጭንቀታችሁ የጥበብን ድምፅ መስማት ምን ያህል ብፅዕና እንደ ሆነ ለዓለም ማሳየት ሊሆን ይገባል።

ጁላይ 7

«ወንድሞች ሆይ፥ ስለ እኛ ጸልዩ።» (1ኛ ተሰሎንቄ 5:25)

ስለ አገልጋዮች የሚደረገውን ጸሎት በተመለከተ የአንባቢውን ትውስታ ለማደስ በዓመቱ ውስጥ ይህችን አንዲት ማለዳ ለይተናል፤ በመጀመሪያ በሐዋርያ የተነገረውንና አሁን በእኛ የሚደገመውን የዚህን ጥቅስ ልባዊ ልመና እንዲፈጽም የክርስቲያን ቤተሰብን ሁሉ እጅግ አጥብቀን እንለምናለን። ወንድሞች ሆይ፥ ሥራችን እጅግ ከባድና አስፈላጊ ነው፤ ለሺዎች ደኅንነትን ወይም ጥፋትን ያመጣል፤ ስለ ዘላለማዊ ጉዳይ በእግዚአብሔር ስም ከነፍሳት ጋር እንነጋገራለን፤ ቃላችንም ለሕይወት የሚሆን የሕይወት ሽታ ወይም ለሞት የሚሆን የሞት ሽታ ነው። እጅግ ከባድ ኃላፊነት በላያችን አለ፤ በመጨረሻም ከሰው ሁሉ ደም ንጹሓን ሆነን ብንገኝ ትንሽ ምሕረት አይደለም። በክርስቶስ ሠራዊት ውስጥ እንዳሉ አለቆች የሰዎችና የአጋንንት ጥላቻ ልዩ ዒላማ ነን፤ መሰናከላችንን ይጠብቃሉ፥ ተረከዛችንንም ሊይዙ ይደክማሉ። የተቀደሰው ጥሪያችን እናንተ ነፃ ለሆናችሁባቸው ፈተናዎች ያጋልጠናል፤ ከሁሉም በላይ ብዙ ጊዜ እውነትን በግል ከማጣጣም ወደ አገልግሎታዊና ሙያዊ አመለካከት ይስበናል። ብዙ የተወሳሰቡ ጉዳዮች ያጋጥሙናል፥ አእምሮአችንም ግራ ይጋባል፤ እጅግ አሳዛኝ ማፈግፈጎችን እናያለን፥ ልባችንም ይቈስላል፤ ሚሊዮኖች ሲጠፉ እናያለን፥ መንፈሳችንም ይዝላል። በስብከታችን ልንጠቅማችሁ እንወዳለን፤ ለልጆቻችሁ በረከት ልንሆን እንመኛለን፤ ለቅዱሳንም ለኃጢአተኞችም ጠቃሚ ለመሆን እንናፍቃለን፤ ስለዚህ የተወደዳችሁ ወዳጆች ሆይ፥ በአምላካችን ፊት ስለ እኛ ማልዱ። የጸሎታችሁን እርዳታ ብናጣ ምስኪኖች ነን፤ በምልጃችሁ ውስጥ ብንኖር ግን ብፁዓን ነን። መንፈሳዊ በረከትን የምትጠብቁት ከእኛ ሳይሆን ከጌታችን ነው፤ ሆኖም እነዚያን በረከቶች በአገልጋዮቹ በኩል ስንት ጊዜ ሰጥቶአል! እንግዲያስ ጌታ የወንጌልን መዝገብ የሚያኖርባቸው የሸክላ ዕቃዎች እንድንሆን ደጋግማችሁ ለምኑ። እኛ ሚስዮናውያን፥ አገልጋዮች፥ የከተማ ወንጌላውያንና ተማሪዎች ሁላችን በኢየሱስ ስም እንማልዳችኋለን፦

«ወንድሞች ሆይ፥ ስለ እኛ ጸልዩ።»

ጁላይ 8

«ታላቁ ኃይልህ በምን እንደ ሆነ እባክህ ንገረኝ።» (መሳፍንት 16:6)

የእምነት ስውር ኃይል በምን ላይ ነው? በሚመገበው ምግብ ላይ ነው፤ እምነት የተስፋው ቃል ምን እንደ ሆነ ያጠናልና፤ ይህም ከመለኮታዊ ጸጋ የሚፈልቅ፥ ከእግዚአብሔር ታላቅ ልብ የሚትረፈረፍ ነው፤ እምነትም «አምላኬ ይህን የተስፋ ቃል ከፍቅርና ከጸጋ በቀር ሊሰጥ አይችልም ነበር፤ ስለዚህ ቃሉ እንደሚፈጸም ፍጹም እርግጥ ነው» ትላለች። ከዚያም እምነት «ይህን የተስፋ ቃል የሰጠው ማን ነው?» ብላ ታስባለች። ታላቅነቱን ያህል ሳይሆን «ደራሲው ማን ነው?» የሚለውን ታስባለች። ሊዋሽ የማይችለው እግዚአብሔር፥ ሁሉን የሚችለው እግዚአብሔር፥ የማይለወጠው እግዚአብሔር መሆኑን ታስታውሳለች፤ ስለዚህም የተስፋው ቃል መፈጸም እንዳለበት ትደመድማለች፤ በዚህም ጽኑ እርግጠኝነት ወደ ፊት ትገሠግሣለች። የተስፋው ቃል ለምን እንደ ተሰጠ ታስታውሳለች፤ ይኸውም ለእግዚአብሔር ክብር ነው፤ የእግዚአብሔርም ክብር በሰላም እንዳለ፥ የራሱን የክብር ምልክት ከቶ እንደማያረክስ፥ የዘውዱንም ድምቀት እንደማያበላሽ ፍጹም ታውቃለች፤ ስለዚህ የተስፋው ቃል መጽናት አለበት፥ ይጸናልም። ደግሞም እምነት አስደናቂውን የክርስቶስን ሥራ አብ ቃሉን ሊፈጽም ማሰቡን የሚያሳይ ግልጽ ማስረጃ አድርጋ ትመለከተዋለች። «ለገዛ ልጁ ያልራራለት ነገር ግን ስለ ሁላችን አሳልፎ የሰጠው ያው ከእርሱ ጋር ደግሞ ሁሉን ነገር እንዲያው እንዴት አይሰጠንም?» ከዚህም በላይ እምነት ወደ ኋላ ትመለከታለች፤ ውጊያዎቿ አበርትተዋታልና፥ ድሎቿም ድፍረት ሰጥተዋታል። እግዚአብሔር ከቶ እንዳልጣላት ታስታውሳለች፤ እንዲያውም ከልጆቹ አንዱን እንኳ አንድ ጊዜ ስንኳ እንዳልጣለ ታስታውሳለች። ታላቅ አደጋ የነበረባቸውን፥ መዳንም የመጣባቸውን ጊዜያት፥ እጅግ አስጨናቂ ችግር የነበረባቸውን፥ እንደ ቀኗም ኃይሏ የተገኘባቸውን ሰዓታት ታስታውሳለች፤ እንዲህም ብላ ትጮኻለች፦ «አይደለም፥ እርሱ ተለውጦ አሁን ባሪያውን ይተዋል ብዬ ከቶ አላስብም። እስከ አሁን ድረስ እግዚአብሔር ረድቶኛል፥ ወደ ፊትም ይረዳኛል።» እንዲህ እምነት እያንዳንዱን የተስፋ ቃል ከተስፋው ሰጪ ጋር በማያያዝ ትመለከተዋለች፤ ይህንም ስለምታደርግ በእርግጠኝነት «በሕይወቴ ዘመን ሁሉ ቸርነትና ምሕረት በእውነት ይከተሉኛል!» ልትል ትችላለች።

ጁላይ 9

«ቸርነቱንም ሁሉ አትርሺ።» (መዝሙር 103:2)

በጥንት ቅዱሳን ሕይወት የእግዚአብሔርን እጅ ማስተዋል፥ እነርሱን በማዳኑ ቸርነቱን፥ ይቅር በማለቱ ምሕረቱን፥ ከእነርሱም ጋር ቃል ኪዳኑን በመጠበቁ ታማኝነቱን መመልከት ደስ የሚያሰኝና ጠቃሚ ሥራ ነው። ነገር ግን የእግዚአብሔርን እጅ በራሳችን ሕይወት ማስተዋል ለእኛ ይበልጥ የሚያስደስትና የሚጠቅም አይደለምን? የራሳችንን ታሪክ ከእኛ በፊት እንደ ሄዱት ቅዱሳን ሕይወት ቢያንስ በእግዚአብሔር የተሞላ፥ በቸርነቱና በእውነቱ የተሞላ፥ የታማኝነቱና የእውነተኛነቱም ማስረጃ እንደ ሆነ አድርገን ልንመለከተው አይገባንምን? ጌታ ኃያላን ሥራዎቹን ሁሉ ያደረገውና ብርታቱን ያሳየው በጥንት ዘመን ለነበሩት ብቻ ነው፥ አሁን በምድር ላሉት ቅዱሳን ግን ድንቅ አያደርግም ክንዱንም አይገልጥም ብለን ስናስብ በጌታችን ላይ እንበድላለን። የራሳችንን ሕይወት እንመርምር። በእርግጥ በዚህ ውስጥ ለራሳችን የሚያድሱ ለአምላካችንም ክብር የሚሰጡ አንዳንድ አስደሳች ገጠመኞችን እናገኛለን። መዳንን አላገኘህምን? በመለኮታዊ መገኘት ተደግፈህ በወንዞች አላለፍህምን? ሳትቃጠል በእሳት ውስጥ አልሄድህምን? መገለጦች አልነበሩህምን? የተመረጡ ውለታዎች አልተደረጉልህምን? ለሰሎሞን የልቡን ምኞት የሰጠው አምላክ አንተን ሰምቶ ልመናህን ከቶ አልመለሰልህምን? ዳዊት «ምኞትሽን በበጎ ነገር የሚያጠግብ» ብሎ የዘመረለት ያ ልግስናው የበዛ አምላክ አንተን በስብ ከቶ አላጠገበህምን? በለመለመ መስክ ከቶ አላሳረፈህምን? በዕረፍት ውኃ አጠገብ ከቶ አልመራህምን? በእርግጥ የእግዚአብሔር ቸርነት ለጥንት ቅዱሳን እንደ ነበረ ለእኛም ያው ሆኖአል። እንግዲያስ ምሕረቶቹን ወደ መዝሙር እንሸምን። የምስጋናን ንጹሕ ወርቅና የውዳሴን ዕንቍዎች ወስደን ለኢየሱስ ራስ ሌላ ዘውድ እንሥራ። ምሕረቱ ለዘላለም የሆነውን ጌታ ስናመሰግን፥ ነፍሳችን ከዳዊት በገና እንደ ወጣው ያለ ጣፋጭና አስደሳች ዜማ ታውጣ።

ጁላይ 10

«ከቅዱሳን ጋር ባላገሮች።» (ኤፌሶን 2:19)

በሰማይ ዜጎች መሆናችን ምን ማለት ነው? በሰማይ መንግሥት አገዛዝ ሥር ነን ማለት ነው። የሰማይ ንጉሥ ክርስቶስ በልባችን ይነግሣል፤ የዕለት ጸሎታችንም «ፈቃድህ በሰማይ እንደ ሆነች እንዲሁ በምድር ትሁን» የሚል ነው። ከክብር ዙፋን የሚወጡትን አዋጆች በነጻነት እንቀበላለን፤ የታላቁን ንጉሥ ትእዛዛት በደስታ እንታዘዛለን። ደግሞም የአዲሲቱ ኢየሩሳሌም ዜጎች እንደ መሆናችን የሰማይን ክብር እንካፈላለን። ለከበሩ ቅዱሳን የሚገባው ክብር ለእኛም ይገባናል፤ አሁኑኑ የእግዚአብሔር ልጆች ነንና፥ አሁኑኑ የንጉሣዊ ደም መሳፍንት ነን፤ አሁኑኑ የኢየሱስን ነውር የሌለበት የጽድቅ ልብስ ለብሰናል፤ አሁኑኑ መላእክት አገልጋዮቻችን፥ ቅዱሳን ጓደኞቻችን፥ ክርስቶስ ወንድማችን፥ እግዚአብሔር አባታችን፥ የማይጠፋውም አክሊል ዋጋችን ነው። የዜግነትን ክብር እንካፈላለን፤ በሰማያት ወደ ተጻፉ ወደ በኵራት ማኅበርና ቤተ ክርስቲያን ደርሰናልና። ዜጎች እንደ መሆናችን በሰማይ ንብረት ሁሉ ላይ የጋራ መብት አለን። የዕንቍ ደጆቿና የክርስቲሎቤ ቅጥሮቿ የእኛ ናቸው፤ መብራትም የፀሐይ ብርሃንም የማያስፈልጋት የከተማይቱ ሰማያዊ ብርሃን የእኛ ነው፤ የሕይወት ውኃ ወንዝ፥ በዳርቻውም በተተከሉት ዛፎች ላይ የሚበቅሉት አሥራ ሁለቱ ዓይነት ፍሬዎችም የእኛ ናቸው፤ በሰማይ የእኛ ያልሆነ ምንም የለም። «ያለውም ቢሆን የሚመጣውም ቢሆን» ሁሉ የእኛ ነው። ደግሞም የሰማይ ዜጎች እንደ መሆናችን በደስታዋ እንደሰታለን። በዚያ ንስሐ በሚገቡ ኃጢአተኞች፥ በተመለሱ አባካኞች ደስ ይላቸዋልን? እኛም እንዲሁ። የድል አድራጊውን ጸጋ ክብር ይዘምራሉን? እኛም ያንኑ እናደርጋለን። አክሊሎቻቸውን በኢየሱስ እግር ሥር ይጥላሉን? ያለንን ክብር እኛም በዚያ እንጥላለን። በፈገግታው ይማረካሉን? በታች ለምንኖረው ለእኛም ያነሰ ጣፋጭ አይደለም። ዳግመኛ መምጣቱን እየጠበቁ ወደ ፊት ይመለከታሉን? እኛም መገለጡን እንመለከታለን፥ እንናፍቃለንም። እንግዲህ እንዲህ የሰማይ ዜጎች ከሆንን፥ አካሄዳችንና ሥራችን ከከፍተኛው ክብራችን ጋር የሚስማማ ይሁን።

ጁላይ 11

«ለጥቂት ጊዜ መከራን ከተቀበላችሁ በኋላ ራሱ ፍጹማን ያደርጋችኋል ያጸናችሁምል ያበረታችሁማል።» (1ኛ ጴጥሮስ 5:10)

በሜዳ ላይ ተዘርግቶ የሰማይን ቀስት አይታችኋል፤ ቀለሞቹ ክቡራን፥ ኅብሮቹም ብርቅ ናቸው። ውብ ነው፥ ነገር ግን ወዮ፥ ያልፋል፥ እነሆም የለም። ውቦቹ ቀለሞች ለባዘቶ ደመናዎች ስፍራ ይለቃሉ፥ ሰማዩም ከእንግዲህ በሰማያዊ ኅብር አያበራም። የጸና አይደለም። እንዴትስ ሊሆን ይችላል? ከአላፊ የፀሐይ ጨረሮችና ከሚያልፉ የዝናብ ጠብታዎች የተሠራ የክብር ትዕይንት እንዴት ሊኖር ይችላል? የክርስቲያን ባሕርይ ጸጋዎች ግን በአላፊ ውበቱ ቀስተ ደመናን ሊመስሉ አይገባቸውም፤ በተቃራኒው የጸኑ፥ የረጉና የሚኖሩ ሊሆኑ ይገባቸዋል። አማኝ ሆይ፥ ያለህ መልካም ነገር ሁሉ የሚኖር እንዲሆን ፈልግ። ባሕርይህ በአሸዋ ላይ የተጻፈ ሳይሆን በዓለት ላይ የተቀረጸ ይሁን! እምነትህ «መሠረት የሌለው የራእይ ሕንጻ» አይሁን፤ ነገር ግን የግብዙን እንጨት፥ ሣርና አገዳ የሚያቃጥለውን ያንን አስፈሪ እሳት ሊቋቋም በሚችል ነገር ይታነጽ። በፍቅር ሥር የሰደድህና የተመሠረትህ ሁን። ጽኑ ሐሳብህ ጥልቅ፥ ፍቅርህ እውነተኛ፥ ምኞትህም ልባዊ ይሁን። የሲኦል ነፋሳት ሁሉና የምድር ማዕበሎች ሁሉ ከቶ ሊያናውጡህ እንዳይችሉ ሕይወትህ ሁሉ የረጋና የጸና ይሁን። ነገር ግን «በሃይማኖት የመጽናት» በረከት እንዴት እንደሚገኝ አስተውል። የሐዋርያው ቃል የሚጠቀምበትን መንገድ መከራን ያመለክተናል፤ «ለጥቂት ጊዜ መከራን ከተቀበላችሁ በኋላ።» ምንም ኃይለኛ ነፋስ በላያችን ሳያልፍ በደንብ ሥር እንሰዳለን ብሎ መተማመን ጥቅም የለውም። በባሉጥ ዛፍ ሥር ላይ ያሉት እነዚያ አሮጌ ቋጠሮዎችና የቅርንጫፎቹ እንግዳ ጥምዝምዝ ሁሉ በላዩ ስላለፉት ብዙ ማዕበሎች ይናገራሉ፤ ሥሮቹ ገፍተው የገቡበትን ጥልቀትም ያመለክታሉ። እንዲሁ ክርስቲያን በሕይወት መከራዎችና ማዕበሎች ሁሉ ይበረታል፥ ሥሩንም አጽንቶ ይሰዳል። እንግዲህ ከመከራ ዐውሎ ነፋስ አትሸሽ፤ ነገር ግን እግዚአብሔር በእነርሱ ጠንካራ ተግሣጽ ይህን በረከት በአንተ እየፈጸመ እንደ ሆነ አምነህ ተጽናና።

ጁላይ 12

(ይሁዳ 1)

«በክርስቶስ ኢየሱስ ለተቀደሱት።» (1ኛ ቆሮንቶስ 1:2)

«በመንፈስ መቀደስ።» (1ኛ ጴጥሮስ 1:2)

በጸጋ ሥራዎቻቸው ሁሉ የሦስቱን መለኮታዊ አካላት አንድነት አስተውል። በሥላሴ አካላት መካከል ምርጫ የሚያደርጉ አማኞች እንዴት ያለ ጥበብ የጎደለው ነገር ይናገራሉ! ኢየሱስን የሚወደድና የሚያስደስት ነገር ሁሉ መገለጫ አድርገው ያስቡታል፤ አብን ግን ፍጹም ጻድቅ ሆኖ ደግነት የሌለው አድርገው ይቈጥሩታል። የአብን ውሳኔና የወልድን ማስተስረያ አጕልተው የመንፈስን ሥራ የሚያሳንሱም እንዲሁ ተሳስተዋል። በጸጋ ሥራዎች ከሥላሴ አካላት አንዱም ከሌሎቹ ተለይቶ አይሠራም። በባሕርያቸው እንደ ሆኑ በሥራቸውም አንድ ናቸው። ለተመረጡት ባላቸው ፍቅር አንድ ናቸው፤ ከዚያ ታላቅ ማዕከላዊ ምንጭ በሚፈልቁት ሥራዎችም አሁንም አይከፋፈሉም። ይህን በተለይ በመቀደስ ጉዳይ አስተውል። መቀደስን ሳንሳሳት የመንፈስ ሥራ ብለን ልንናገር ብንችልም፥ አብና ወልድ በዚያ ድርሻ እንደሌላቸው አድርገን እንዳንመለከተው ልንጠነቀቅ ይገባናል። መቀደስን የአብ፥ የወልድና የመንፈስ ሥራ ብሎ መናገር ትክክል ነው። እግዚአብሔር አሁንም «ሰውን በመልካችን እንደ ምሳሌአችን እንፍጠር» ይላል፤ እንዲሁም እኛ «እኛ ፍጥረቱ ነንና፤ እንመላለስበት ዘንድ እግዚአብሔር አስቀድሞ ያዘጋጀውን መልካሙን ሥራ ለማድረግ በክርስቶስ ኢየሱስ ተፈጠርን።» ሦስቱ የሥላሴ አካላት «ነቍጥ ወይም የፊት መጨማደድ ወይም እንዲህ ያለ ነገር» የሌለባትን ቤተ ክርስቲያን ለማስገኘት አብረው እንደሚሠሩ ስለ ተገለጹ፥ እግዚአብሔር ለእውነተኛ ቅድስና የሚሰጠውን ዋጋ ተመልከት። አንተም አማኝ ሆይ፥ የክርስቶስ ተከታይ እንደ መሆንህ ለቅድስና፥ ለሕይወት ንጽሕናና ለአነጋገር ቅድስና ከፍ ያለ ዋጋ ልትሰጥ ይገባሃል። የክርስቶስን ደም የተስፋህ መሠረት አድርገህ አክብረው፤ ነገር ግን በብርሃን ያሉትን የቅዱሳንን ርስት ለመካፈል የሚያበቃህን የመንፈስን ሥራ ከቶ አታቃልል። ዛሬ የሥላሴን ሥራ በእኛ ውስጥ እንድንገልጥ ሆነን እንኑር።

ጁላይ 13

«እግዚአብሔርም ዮናስን፦ በእውኑ ልትቈጣ ይገባሃልን? አለው።» (ዮናስ 4:9)

ቍጣ ሁልጊዜ ወይም የግድ ኃጢአት አይደለም፤ ነገር ግን መረን የመልቀቅ ዝንባሌ ስላለው በተገለጠ ቍጥር «በእውኑ ልትቈጣ ይገባሃልን?» በሚለው ጥያቄ ባሕርዩን ፈጥነን ልንመረምር ይገባናል። ምናልባት «አዎን» ብለን ልንመልስ እንችል ይሆናል። ብዙ ጊዜ ቍጣ የእብድ ሰው ችቦ ነው፤ አንዳንድ ጊዜ ግን ከሰማይ የወረደ የኤልያስ እሳት ነው። በመልካሙና በቸሩ አምላካችን ላይ በሚፈጽመው በደል ምክንያት በኃጢአት ላይ ስንቈጣ፥ ወይም ከብዙ መለኮታዊ ትምህርት በኋላ ገና ሰነፎች ሆነን በመቅረታችን በራሳችን ላይ ስንቈጣ፥ ወይም የቍጣው ብቸኛ ምክንያት እነርሱ የሚያደርጉት ክፋት ሲሆን በሌሎች ላይ ስንቈጣ መልካም እናደርጋለን። በበደል የማይቈጣ ሰው የበደሉ ተካፋይ ይሆናል። ኃጢአት የሚያስጸይፍና የሚጠላ ነገር ነው፤ የታደሰም ልብ ሁሉ በትዕግሥት ሊሸከመው አይችልም። እግዚአብሔር ራሱ በየቀኑ በክፉዎች ላይ ይቈጣል፤ በቃሉም «እግዚአብሔርን የምትወድዱ ክፋትን ጥሉ» ተብሎ ተጽፎአል። ነገር ግን ቍጣችን የሚመሰገን ወይም ተገቢ እንኳ አለመሆኑ እጅግ ብዙ ጊዜ ያስፈራል፤ ያን ጊዜም «አይደለም» ብለን መመለስ አለብን። በልጆች ላይ ለምን እንነጫነጫለን? በአገልጋዮች ላይ ለምን እንቈጣለን? በጓደኞቻችንስ ላይ ለምን እንበሳጫለን? እንዲህ ያለው ቍጣ ለክርስቲያናዊ ምስክርነታችን ክብር ነውን? ወይስ እግዚአብሔርን ያከብራልን? የበላይነትን ለማግኘት የሚፈልግ ያ አሮጌው ክፉ ልብ አይደለምን? በአዲስ በተወለደው ባሕርያችን ኃይል ሁሉ ልንቋቋመው አይገባንምን? ብዙ ሃይማኖተኛ ነን ባዮች መቋቋም የማይጠቅም እንደ ሆነ አድርገው ለቍጣ ስሜታቸው እጅ ይሰጣሉ፤ አማኝ ግን በሁሉ ረገድ ድል አድራጊ መሆን እንዳለበት፥ አለዚያም አክሊል ሊቀዳጅ እንደማይችል ያስብ። ቍጣችንን መግዛት ካልቻልን ጸጋ ምን አደረገልን? አንድ ሰው ለሚስተር ጄይ ጸጋ ብዙ ጊዜ በኮምጣጣ ዛፍ ግንድ ላይ እንደሚጸገን ነገረው። እርሱም «አዎን፥ ፍሬው ግን ኮምጣጣ አይሆንም» አለ። የተፈጥሮ ድካምን ለኃጢአት ምክንያት ልናደርገው አይገባም፤ ነገር ግን ወደ መስቀሉ ልንሸሽና ጌታ ቍጣችንን እንዲሰቅልልን፥ በራሱም መልክ በገርነትና በየዋህነት እንዲያድሰን ልንጸልይ ይገባናል።

ጁላይ 14

«መሣሪያህን ብታነሣበት ታረክሰዋለህ።» (ዘጸአት 20:25)

የእግዚአብሔር መሠዊያ የሰው ጥበብ ወይም ድካም ምንም ምልክት እንዳይታይበት ካልተጠረቡ ድንጋዮች መሠራት ነበረበት። የሰው ጥበብ የመስቀሉን ትምህርቶች ይበልጥ ሰው ሠራሽ ወደ ሆነና ከወደቀው ተፈጥሮ የረከሰ ጣዕም ጋር ይበልጥ ወደሚስማማ ሥርዓት ማስተካከልና ማቀናበር ይወዳል፤ ሥጋዊ ጥበብ ግን ወንጌልን ከማሻሻል ይልቅ ያረክሰዋል፤ በመጨረሻም ሌላ ወንጌል ይሆናል፥ ፈጽሞም የእግዚአብሔር እውነት አይሆንም። በጌታ በራሱ ቃል ላይ የሚደረጉ ለውጦችና ማሻሻያዎች ሁሉ ርኵሰትና ብክለት ናቸው። ትዕቢተኛው የሰው ልብ በእግዚአብሔር ፊት በነፍስ መጽደቅ ውስጥ እጁን ለማስገባት እጅግ ይጓጓል፤ ለክርስቶስ የሚሆኑ ዝግጅቶች ይታለማሉ፥ ራስን ማዋረድና ንስሐ መግባት ይታመንባቸዋል፥ መልካም ሥራዎች ይወደሳሉ፥ በተፈጥሮ ችሎታ እጅግ ይመካል፤ በማንኛውም መንገድ በመለኮታዊው መሠዊያ ላይ የሰውን መሣሪያ ለማንሣት ሙከራ ይደረጋል። ኃጢአተኞች ሥጋዊ መታመኛዎቻቸው የአዳኙን ሥራ ፍጹም ከማድረግ ይልቅ እንደሚያረክሱትና እንደሚያዋርዱት ቢያስቡ መልካም ነበር። በማስተስረያው ሥራ ጌታ ብቻ ከፍ ሊል ይገባዋል፤ የሰው መቅረጫ ወይም መዶሻ አንዲትም ምልክት አትታገሥም። ክርስቶስ ኢየሱስ በሞቱ ሰዓት ተፈጸመ ብሎ ባወጀው ላይ ለመጨመር፥ ወይም እግዚአብሔር ፍጹም እርካታ ያገኘበትን ለማሻሻል መፈለግ በውስጡ ስድብ አለበት። የምትንቀጠቀጥ ኃጢአተኛ ሆይ፥ መሣሪያዎችህን አርቅ፥ በትሕትና ልመናም በጉልበትህ ተንበርከክ፤ ጌታ ኢየሱስን የማስተስረያህ መሠዊያ አድርገህ ተቀበለው፥ በእርሱም ብቻ እረፍ።

ብዙ ሃይማኖተኛ ነን ባዮች ከዚህ የማለዳ ጥቅስ ስለሚያምኑአቸው ትምህርቶች ማስጠንቀቂያ ሊወስዱ ይችላሉ። በክርስቲያኖች መካከል የመገለጥን እውነቶች ለማቅናትና ለማስታረቅ እጅግ የበዛ ዝንባሌ አለ፤ ይህ የአለማክበርና የአለማመን መልክ ነው፤ እንታገለው፥ እውነትንም እንዳገኘነው እንቀበል፤ የቃሉ ትምህርቶች ያልተጠረቡ ድንጋዮች በመሆናቸው ለጌታ መሠዊያ ለመሥራት ይበልጥ የሚገቡ መሆናቸውን ደስ እያለን።

ጁላይ 15

«እሳቱ በመሠዊያው ላይ ሁልጊዜ ይንደድ፤ አይጥፋ።» (ዘሌዋውያን 6:13)

የግል ጸሎትን መሠዊያ እያነደድህ ጠብቅ። ይህ የአምልኮ ሁሉ ሕይወት ነው። የመቅደሱና የቤተሰቡ መሠዊያዎች እሳታቸውን ከዚህ ይዋሳሉ፤ ስለዚህ ይህ በደንብ ይንደድ። ስውር አምልኮ የሕያውና የተለማመድነው ሃይማኖት ዋና ባሕርይ፥ ማስረጃና መለኪያ ነው።

የመሥዋዕቶችህን ስብ በዚህ አቃጥል። የእልፍኝህ ጊዜያት ቢቻል መደበኛ፥ ተደጋጋሚና የማይረበሹ ይሁኑ። የጻድቅ ሰው ጸሎት በሥራዋ እጅግ ኃይል ታደርጋለች። የምትጸልይበት ምንም ነገር የለህምን? ቤተ ክርስቲያንን፥ አገልግሎትን፥ የራስህን ነፍስ፥ ልጆችህን፥ ዘመዶችህን፥ ጎረቤቶችህን፥ አገርህንና በዓለም ሁሉ ያለውን የእግዚአብሔርንና የእውነትን ጉዳይ እንጠቁምህ። በዚህ አስፈላጊ ጉዳይ ራሳችንን እንመርምር። በግል አምልኮ በለብታ እንሳተፋለንን? የአምልኮ እሳት በልባችን ውስጥ ደብዝዞ ይነድዳልን? የሰረገላው መንኰራኵሮች በክብደት ይጐተታሉን? እንዲህ ከሆነ በዚህ የመበስበስ ምልክት እንደንግጥ። በልቅሶ እንሂድ፥ የጸጋንና የልመናን መንፈስ እንለምን። ለልዩ ጸሎት ልዩ ጊዜያትን እንለይ። ይህ እሳት በዓለማዊ መስማማት አመድ ሥር ቢታፈን በቤተሰብ መሠዊያ ላይ ያለውን እሳት ያደበዝዘዋል፥ በቤተ ክርስቲያንም በዓለምም ያለንን ተጽዕኖ ይቀንሰዋልና።

ጥቅሱ በልብ መሠዊያም ላይ ይሠራል። ይህ በእውነት የወርቅ መሠዊያ ነው። እግዚአብሔር የሕዝቡ ልብ ወደ እርሱ ሲግል ማየት ይወዳል። በፍቅር የሚንበለበለውን ልባችንን ለእግዚአብሔር እንስጥ፤ እሳቱ ከቶ እንዳይጠፋ ጸጋውን እንፈልግ፤ ጌታ እያነደደ ካልጠበቀው አይነድድምና። ብዙ ጠላቶች ሊያጠፉት ይሞክራሉ፤ ነገር ግን ከቅጥሩ በስተ ኋላ ያለው የማይታየው እጅ የተቀደሰውን ዘይት ቢያፈስስበት ከፍ ከፍ እያለ ይንበለበላል። የመጽሐፍ ቅዱስን ጥቅሶች ለልባችን እሳት እንደ ማገዶ እንጠቀምባቸው፤ እነርሱ ፍም ናቸውና፤ ስብከቶችን እንካፈል፥ ከሁሉም በላይ ግን ብዙ ጊዜ ከኢየሱስ ጋር ብቻችንን እንሁን።

ጁላይ 16

«ማለዳ ማለዳም መናውን ለቀሙ።» (ዘጸአት 16:21)

ለከበሩት ደስታዎችህ መቀጠል በጌታ በጎ ፈቃድና ደስታ ላይ ፈጽመህ ጥገኛ መሆንህን የሚያውቅ ልቡና እንዲኖርህ ትጋ። በአሮጌው መና ለመኖር ከቶ አትሞክር፤ በግብፅም እርዳታን ለማግኘት አትፈልግ። ሁሉ ከኢየሱስ መምጣት አለበት፤ አለዚያ ለዘላለም ጠፍተሃል። የድሮ ቅባቶች ለመንፈስህ ቅባትን ለመስጠት አይበቁም፤ ራስህ ከመቅደሱ የወርቅ ቀንድ አዲስ ዘይት ሊፈስስበት ይገባዋል፤ አለዚያ ክብሩ ይቋረጣል። ዛሬ በእግዚአብሔር ተራራ ጫፍ ላይ ትሆን ይሆናል፤ በዚያ ያኖረህ ግን በዚያ ሊጠብቅህ ይገባዋል፤ አለዚያ ከምታስበው እጅግ ፈጥነህ ትወርዳለህ። ተራራህ የሚጸናው እርሱ በስፍራው ሲያጸናው ብቻ ነው፤ ፊቱን ቢሰውር ፈጥነህ ትታወካለህ። አዳኙ ቢፈቅድ የሰማይን ብርሃን የምታይበትን መስኮት ሁሉ በቅጽበት ሊያጨልመው ይችላል። ኢያሱ ፀሐይን እንድትቆም አዘዘ፤ ኢየሱስ ግን ፈጽሞ በጨለማ ሊሸፍናት ይችላል። የልብህን ደስታ፥ የዓይንህን ብርሃንና የሕይወትህን ኃይል ሊወስድ ይችላል፤ መጽናናቶችህ በእጁ ናቸው፥ በፈቃዱም ከአንተ ሊሄዱ ይችላሉ። ይህን የሰዓት በሰዓት ጥገኝነት እንድንሰማውና እንድናውቀው ጌታችን ቁርጥ ሐሳብ አድርጎአል፤ ስለ «የዕለት እንጀራ» ብቻ እንድንጸልይ ይፈቅድልናልና፥ «እንደ ዘመናችንም ኃይላችን ይሆናል» ብሎ ብቻ ቃል ገብቶአልና። ብዙ ጊዜ ወደ ዙፋኑ እንድንሄድ፥ ዘወትርም ፍቅሩን እንድናስታውስ እንዲህ መሆኑ አይሻለንምን? ኦ! ያለማቋረጥ የሚመግበን፥ ስለ ምስጋና ቢስነታችንም ራሱን የማይከለክል ጸጋ እንዴት ባለጠጋ ነው! የወርቁ ዝናብ ከቶ አያቋርጥም፤ የበረከት ደመና ለዘላለም በማደሪያችን ላይ ይቆያል። ጌታ ኢየሱስ ሆይ፥ ያለ አንተ ምንም ልናደርግ እንደማንችል አውቀን በእግርህ ሥር እንሰግዳለን፤ ልንቀበል በታደልነው ውለታ ሁሉ የተባረከውን ስምህን እናመልካለን፥ የማያልቀውንም ፍቅርህን እንመሰክራለን።

ጁላይ 17

«በእግዚአብሔር የተወደዳችሁ ወንድሞች ሆይ፥ መመረጣችሁን እናውቃለን።» (1ኛ ተሰሎንቄ 1:4)

ብዙ ሰዎች ወደ ክርስቶስ ከመመልከታቸው በፊት መመረጣቸውን ማወቅ ይፈልጋሉ፤ ነገር ግን እንዲህ ሊያውቁት አይችሉም፤ የሚገለጠው «ወደ ኢየሱስ በመመልከት» ብቻ ነው። መመረጥህን ለማረጋገጥ ብትወድድ፥ ልብህን በእግዚአብሔር ፊት በዚህ መንገድ ታረጋጋለህ። የጠፋህና በደለኛ ኃጢአተኛ እንደ ሆንህ ይሰማሃልን? በቀጥታ ወደ ክርስቶስ መስቀል ሂድ፥ ይህንንም ለኢየሱስ ንገረው፤ በመጽሐፍ ቅዱስም «ወደ እኔም የሚመጣውን ከቶ ወደ ውጭ አላወጣውም» የሚለውን እንዳነበብህ ንገረው። ደግሞም «ኃጢአተኞችን ሊያድን ክርስቶስ ኢየሱስ ወደ ዓለም መጣ የሚለው ቃል የታመነና ሁሉ እንዲቀበሉት የተገባ ነው» ብሎ እንደ ተናገረ ንገረው። ወደ ኢየሱስ ተመልከት በእርሱም እመን፥ መመረጥህንም ወዲያውኑ ታረጋግጣለህ፤ በእርግጥ ብታምን የተመረጥህ ነህና። ራስህን ፈጽመህ ለክርስቶስ ብትሰጥና በእርሱ ብትታመን፥ ከእግዚአብሔር ምርጦች አንዱ ነህ፤ ነገር ግን ቆመህ «አስቀድሜ የተመረጥሁ እንደ ሆንሁ ማወቅ እፈልጋለሁ» ብትል፥ የማታውቀውን ትለምናለህ። ምንም ያህል በደለኛ ብትሆን፥ እንዳለህ ወደ ኢየሱስ ሂድ። ስለ መመረጥ የሚነሣውን የጕጕት ጥያቄ ሁሉ ተው። በቀጥታ ወደ ክርስቶስ ሂድ በቍስሎቹም ተሸሸግ፥ መመረጥህንም ታውቃለህ። የመንፈስ ቅዱስ ማረጋገጫ ይሰጥሃል፥ ስለዚህም «ያመንሁትን አውቃለሁ፥ የሰጠሁትንም ሊጠብቅ እንዲችል ተረድቼአለሁ» ለማለት ትችላለህ። ክርስቶስ በዘላለሙ ምክር ነበረ፤ የተመረጥህ መሆንህንና አለመሆንህን ሊነግርህ ይችላል፤ አንተ ግን በሌላ መንገድ ልታገኘው አትችልም። ሂድና በእርሱ ታመን፥ መልሱም እንዲህ ይሆናል፦ «በዘላለም ፍቅር ወድጄሻለሁ፤ ስለዚህ በቸርነት ሳብሁሽ።» እርሱን በመረጥህ ጊዜ፥ እርሱ አንተን እንደ መረጠህ ምንም ጥርጥር አይኖርም።

«በእግዚአብሔር ምርጫ ልጆች ነን፥

በኢየሱስ ክርስቶስ የምናምን።»

ጁላይ 18

«ከዓላማዎቻቸው ጋር በኋላ ይጓዛሉ።» (ዘኍልቍ 2:31)

የእስራኤል ሠራዊት በሚጓዝበት ጊዜ የዳን ሰፈር በመጨረሻ ይከተል ነበር። የዳን ልጆች የመጨረሻውን ስፍራ ያዙ፤ ነገር ግን እንደ ፊተኞቹ ነገዶች በእውነት የሠራዊቱ ክፍል ነበሩና ስፍራው ምን ይጐዳ ነበር? ያንኑ የእሳትና የደመና ዓምድ ተከተሉ፥ ያንኑ መና በሉ፥ ከዚያው መንፈሳዊ ዓለት ጠጡ፥ ወደዚያውም ርስት ተጓዙ። ልቤ ሆይ፥ ኋለኛና ታናሽ ብትሆንም ተጽናና፤ በሠራዊቱ ውስጥ መሆንና በፊት እንደሚመሩት መኖር መብትሽ ነው። አንድ ሰው በክብርና በአክብሮት ኋለኛ መሆን አለበት፤ አንድ ሰው ለኢየሱስ ዝቅተኛ ሥራ መሥራት አለበት፤ ለምንስ እኔ አልሆንም? በድሃ መንደር ባልተማሩ ገበሬዎች መካከል፥ ወይም በኋላ መንገድ በተዋረዱ ኃጢአተኞች መካከል መሥራቴን እቀጥላለሁ፥ «ከዓላማዬም ጋር በኋላ እጓዛለሁ።»

የዳን ልጆች እጅግ ጠቃሚ ስፍራ ያዙ። በጉዞ ላይ ወደ ኋላ የቀሩት መሰብሰብ አለባቸው፥ የጠፋውም ዕቃ ከሜዳው መለቀም አለበት። እሳታማ መንፈስ ያላቸው አዲስ እውነትን ለመማርና ብዙ ነፍሳትን ለኢየሱስ ለማትረፍ ባልተረገጡ መንገዶች ወደ ፊት ሊሮጡ ይችላሉ፤ ነገር ግን ጥንታዊውን የሚጠብቁ አንዳንዶች ቤተ ክርስቲያንን የቀድሞ እምነቷን በማሳሰብና የደከሙ ልጆችዋን በማበርታት መልካም ሊሠሩ ይችላሉ። ስፍራ ሁሉ የራሱ ተግባር አለው፤ በዝግታ የሚጓዙ የእግዚአብሔር ልጆችም ለሠራዊቱ ሁሉ እጅግ በረከት የሚሆኑበትን የራሳቸውን ልዩ ሁኔታ ያገኛሉ።

የኋላ ጠባቂነት የአደጋ ስፍራ ነው። በፊታችን እንዳሉ ሁሉ በኋላችንም ጠላቶች አሉ። ጥቃት ከየትኛውም አቅጣጫ ሊመጣ ይችላል። አማሌቅ በእስራኤል ላይ ወድቆ ከኋለኞቻቸው አንዳንዶችን እንደ ገደለ እናነባለን። ልምድ ያለው ክርስቲያን በእምነት፥ በእውቀትና በደስታ ኋለኞች የሆኑትን እነዚያን ምስኪን ተጠራጣሪዎች፥ ተስፋ የቈረጡና የሚወላውሉ ነፍሳትን በመርዳት ለጦር ዕቃው ብዙ ሥራ ያገኛል። እነዚህ ያለ ረዳት መተው የለባቸውም፤ ስለዚህ በሚገባ የተማሩ ቅዱሳን ዓላማቸውን በኋለኞቹ መካከል መሸከም ሥራቸው ይሁን። ነፍሴ ሆይ፥ ዛሬ ኋለኞቹን ለመርዳት በርኅራኄ ተጠንቀቂ።

ጁላይ 19

«አምላካችን እግዚአብሔር ክብሩን አሳየን።» (ዘዳግም 5:24)

እግዚአብሔር በሥራዎቹ ሁሉ ያለው ታላቅ ዓላማ የራሱን ክብር መግለጥ ነው። ከዚህ ያነሰ ዓላማ ሁሉ ለእርሱ የማይገባ በሆነ ነበር። ነገር ግን የእግዚአብሔር ክብር እንደ እኛ ላሉ ለወደቁ ፍጡራን እንዴት ይገለጣል? የሰው ዓይን ቀና አይደለም፤ ሁልጊዜ ወደ ራሱ ክብር በጎን ይመለከታል፥ ለራሱም ችሎታ ከፍ ያለ ግምት አለው፤ ስለዚህ የጌታን ክብር ለማየት ብቁ አይደለም። እንግዲህ እግዚአብሔር ከፍ እንዲል ስፍራ ይገኝ ዘንድ ራስ ከመንገድ ገለል ማለት እንዳለበት ግልጥ ነው፤ ስለዚህም ነው ሕዝቡን ብዙ ጊዜ ወደ ጭንቅና ችግር የሚያመጣቸው፤ የራሳቸውን ስንፍናና ድካም አውቀው፥ እርሱ ሊያድናቸው በሚወጣበት ጊዜ የእግዚአብሔርን ግርማ ለማየት ብቁ ይሆኑ ዘንድ። ሕይወቱ አንድ የተስተካከለና ለስላሳ መንገድ የሆነ ሰው ከጌታ ክብር የሚያየው ጥቂት ነው፤ ራሱን ባዶ የሚያደርግበት አጋጣሚ ጥቂት ነውና፥ ስለዚህም በእግዚአብሔር መገለጥ ለመሞላት ያለው ብቃት ጥቂት ነው። በትናንሽ ወንዞችና ጥልቀት በሌላቸው ገባሮች የሚቀዝፉ ስለ ዐውሎ ነፋስ አምላክ የሚያውቁት ጥቂት ነው፤ ነገር ግን «በብዙ ውኃዎች ሥራቸውን የሚሠሩ» እነርሱ «በጥልቁ ውስጥ ተአምራቱን» ያያሉ። በኀዘን፥ በድህነት፥ በፈተናና በነቀፋ ግዙፍ የአትላንቲክ ማዕበሎች መካከል የሰውን ታናሽነት ስለሚሰማን የእግዚአብሔርን ኃይል እንማራለን። እንግዲህ በሸካራ መንገድ ተመርተህ ከሆነ እግዚአብሔርን አመስግን፤ የእግዚአብሔርን ታላቅነትና ቸርነት እንድታውቅ ያደረገህ ይኸው ነው። መከራዎችህ በሌላ በምንም መንገድ በማይገኝ የእውቀት ሀብት አበልጽገውሃል፤ ፈተናዎችህ እግዚአብሔር ባሪያውን ሙሴን እንዳደረገው ክብሩን ሲያልፍ ታይ ዘንድ ያኖረህ የዓለቱ ስንጣቂ ሆነዋል። የማያቋርጥ ብልጽግና ሊያመጣው በሚችል ጨለማና ድንቁርና ስላልተተውህ፥ ነገር ግን በታላቁ የመከራ ተጋድሎ ውስጥ በአንተ ላይ በሚያደርገው ድንቅ አያያዝ የክብሩን ብርሃን ለመቀበል ስለ ተዘጋጀህ እግዚአብሔርን አመስግን።

ጁላይ 20

«እርሱም የርስታችን መያዣ ነው።» (ኤፌሶን 1:14)

ኦ! በኢየሱስ፥ በኢየሱስም ብቻ መመገብን የተማረ ሰው እንዴት ያለ ብርሃን፥ እንዴት ያለ ደስታ፥ እንዴት ያለ መጽናናት፥ እንዴት ያለ የልብ ሐሤት ያገኛል! ነገር ግን የክርስቶስን ክቡርነት የምናውቅበት ልምድ በዚህ ሕይወት ቢበዛ ያልተሟላ ነው። አንድ ጥንታዊ ጸሐፊ እንዳለው፥ «ቅምሻ ብቻ ነው!» «ጌታ ቸር እንደ ሆነ» ቀምሰናል፤ ነገር ግን ምን ያህል መልካምና ቸር እንደ ሆነ ገና አናውቅም፤ ከጣፋጭነቱ የምናውቀው ግን ለበለጠ እንድንናፍቅ ያደርገናል። የመንፈስን በኵራት ተደስተንበታል፥ እርሱም ለሰማያዊው የወይን መከር ሙላት እንድንራብና እንድንጠማ አድርጎናል። ልጅነትን እየተጠባበቅን በውስጣችን እንቃትታለን። እዚህ ከኤሽኮል አንድ ዘለላ ብቻ እንደ ነበረው በምድረ በዳ እንዳለው እስራኤል ነን፤ በዚያ ግን በወይኑ ቦታ ውስጥ እንሆናለን። እዚህ መናው እንደ ድንብላል ዘር ደቅቆ ሲወርድ እናያለን፤ በዚያ ግን የሰማይን እንጀራና የመንግሥቱን አሮጌ እህል እንበላለን። አሁን በመንፈሳዊ ትምህርት ጀማሪዎች ብቻ ነን፤ የፊደልን የመጀመሪያ ሆሄያት ብንማርም፥ ገና ቃላትን ማንበብ አንችልም፥ ዓረፍተ ነገርን ማቀናጀትማ እንዴት እንችላለን? ነገር ግን አንዱ እንዳለው፥ «በሰማይ አምስት ደቂቃ ብቻ የቆየ በምድር ካሉት የሊቃውንት ጠቅላላ ጉባኤ የበለጠ ያውቃል።» አሁን ብዙ ያልረኩ ምኞቶች አሉን፤ ነገር ግን በቅርቡ ምኞት ሁሉ ይረካል፤ ችሎታዎቻችንም ሁሉ በዚያ በዘላለማዊው የደስታ ዓለም እጅግ ጣፋጭ ሥራ ያገኛሉ። ክርስቲያን ሆይ፥ ሰማይን ጥቂት ዓመታት አስቀድመህ ቅመስ። በጣም ጥቂት ጊዜ ውስጥ ከመከራዎችህና ከችግሮችህ ሁሉ ትገላገላለህ። አሁን በእንባ የተሞሉ ዓይኖችህ ከእንግዲህ አያለቅሱም። በዙፋኑ ላይ የተቀመጠውን የእርሱን ግርማ በማይነገር ሐሤት ትመለከታለህ። ከዚህም በላይ፥ በዙፋኑ ላይ ትቀመጣለህ። የክብሩ ድል ለአንተም ይካፈልሃል፤ አክሊሉ፥ ደስታው፥ ገነቱ እነዚህ የአንተ ይሆናሉ፥ ሁሉን ከወረሰውም ጋር አብረህ ወራሽ ትሆናለህ።

ጁላይ 21

«የኢየሩሳሌም ልጅ በአንተ ላይ ራስዋን ነቀነቀች።» (ኢሳይያስ 37:22)

በእግዚአብሔር ቃል የተጽናኑት የጽዮን ምስኪንና የሚንቀጠቀጡ ነዋሪዎች ደፈሩ፥ በሰናክሬምም የትዕቢት ዛቻ ላይ ራሳቸውን ነቀነቁ። ጽኑ እምነት የእግዚአብሔርን ባሪያዎች እጅግ ትዕቢተኞች የሆኑትን ጠላቶቻቸውን በረጋ ንቀት እንዲመለከቱ ያስችላቸዋል። ጠላቶቻችን የማይቻለውን እንደሚሞክሩ እናውቃለን። ኢየሱስ ሕያው ሆኖ ሳለ ሊሞት የማይችለውን የዘላለም ሕይወት ለማጥፋት፥ የገሃነም ደጆች የማይችሉትንም ምሽግ ለመገልበጥ ይሻሉ። የመውጊያውን ብረት ይቃወማሉ ራሳቸውንም ያቈስላሉ፥ በእግዚአብሔርም ጋሻ እብጠቶች ላይ ለራሳቸው ጉዳት ይሮጣሉ።

ድካማቸውን እናውቃለን። ሰዎች እንጂ ምንድር ናቸው? ሰውስ ትል እንጂ ምንድር ነው? እንደ ባሕር ማዕበል ይጮኻሉ ያብጣሉም፥ የራሳቸውንም እፍረት አረፋ አድርገው ይደፍቃሉ። ጌታ በተነሣ ጊዜ በነፋስ ፊት እንዳለ ገለባ ይበርራሉ፥ እንደሚንጣጣ እሾህም ይበላሉ። በእግዚአብሔርና በእውነቱ ጉዳይ ላይ ጉዳት ለማድረስ ፈጽሞ ኃይል ማጣታቸው በጽዮን ሰልፍ ውስጥ ያሉትን እጅግ ደካሞቹን ወታደሮች እንኳ እንዲሥቁባቸው ያደርጋል።

ከሁሉ በላይ፥ ልዑል ከእኛ ጋር እንዳለ እናውቃለን፤ እርሱም የጦር ዕቃውን በለበሰ ጊዜ ጠላቶቹ ወዴት ናቸው? ከስፍራው ቢወጣ፥ የምድር ገሎች ከፈጣሪያቸው ጋር ብዙ ጊዜ አይከራከሩም። የብረት በትሩ እንደ ሸክላ ሠሪ ዕቃ ያደቃቸዋል፥ መታሰቢያቸውም እንኳ ከምድር ይጠፋል። እንግዲህ ፍርሃት ሁሉ ይራቅ፤ መንግሥቱ በንጉሡ እጅ ውስጥ የተጠበቀች ናት። ጌታ ነግሦአልና በደስታ እንጩኽ፤ ጠላቶቹም ለፋንድያ ክምር እንደ ገለባ ይሆናሉ።

«የእግዚአብሔር ቃል እውነት እንደ ሆነ እንዲሁ እውነት ነው፤

ምድርም ገሃነምም ከሠራዊታቸው ሁሉ ጋር

በእኛ ላይ አያሸንፉም።

መሣቂያና መተረቻ ሆነዋል፤

እግዚአብሔር ከእኛ ጋር ነው፥ እኛም የእርሱ ነን፥

ድላችን ሊወድቅ አይችልም።»

ጁላይ 22

«እኔ ባላችሁ ነኝ።» (ኤርምያስ 3:14)

ክርስቶስ ኢየሱስ ከሕዝቡ ጋር በጋብቻ አንድነት ተጣምሯል። ቤተ ክርስቲያኑ ከባርነት ቀንበር በታች ከመውደቋ ብዙ ዘመን አስቀድሞ እንደ ንጽሕት ድንግል በፍቅር አጨት። በሚቃጠል ፍቅር ተሞልቶ፥ ያዕቆብ ለራሔል እንደ ደከመ፥ የዋጋዋ ሁሉ እስኪከፈል ድረስ ደከመ፤ አሁንም በመንፈሱ ፈልጎ እንድታውቀውና እንድትወድደው ካደረጋት በኋላ፥ የጋራ ደስታቸው በበጉ የሰርግ እራት የሚፈጸምበትን የክብር ሰዓት ይጠባበቃል። የክብሩ ሙሽራ የታጨችውን ፍጽምትና ሙሉ አድርጎ በሰማይ ግርማ ፊት ገና አላቀረባትም፤ እርስዋም እንደ ሚስቱና እንደ ንግሥቱ የክብሯን ደስታ በእውነት ገና አልጀመረችም፤ ገና በዋይታ ዓለም ውስጥ ተቅበዝባዥ፥ በቄዳር ድንኳኖች የምትኖር ናት፤ ነገር ግን አሁንም እንኳ ሙሽራ፥ የኢየሱስ ሙሽሪት ናት፤ ለልቡ ውድ፥ በፊቱ ክብርት፥ በእጆቹ ላይ የተቀረጸች፥ ከአካሉም ጋር የተዋሐደች። በምድር ላይ የባልን የፍቅር ተግባራት ሁሉ ያደርግላታል። ለፍላጎቷ ብዙ ይሰጣታል፥ ዕዳዋን ሁሉ ይከፍላል፥ ስሙን እንድትይዝና ከሀብቱ ሁሉ እንድትካፈል ይፈቅድላታል። ከዚህም በቀር ከቶ አያደርግባትም። «መፋታትን ይጠላልና» ፍቺ የሚለውን ቃል ከቶ አይጠራም። ሞት እጅግ በሚዋደዱ ሟቾች መካከል ያለውን የጋብቻ ማሰሪያ መበጠስ አለበት፤ ነገር ግን የዚህን የማይሞት ጋብቻ ሰንሰለት ሊለያይ አይችልም። በሰማይ አያገቡም፥ እንደ እግዚአብሔር መላእክት ናቸው እንጂ፤ ነገር ግን ለዚህ ሥርዓት አንድ አስደናቂ ልዩነት አለ፤ በሰማይ ክርስቶስና ቤተ ክርስቲያኑ የደስታ ሰርጋቸውን ያከብራሉና። ይህ ዝምድና ይበልጥ ዘላቂ እንደ ሆነ፥ ከምድራዊ ጋብቻም ይበልጥ የቀረበ ነው። የባል ፍቅር ምንም ያህል ንጹሕና የጋለ ቢሆን፥ በኢየሱስ ልብ ውስጥ ለሚነድደው ነበልባል ደካማ ምስል ብቻ ነው። ክርስቶስ አባቱን ትቶ ከእርስዋ ጋር አንድ ሥጋ የሆነላት፥ ከቤተ ክርስቲያን ጋር ያለው ያ ምሥጢራዊ መጣበቅ ከሰው አንድነት ሁሉ ያልፋል።

ጁላይ 23

«አንተ ደግሞ ከእነርሱ እንደ አንዱ ነበርህ።» (አብድዩ 1:11)

በችግር ጊዜ ከኤዶም ወደ እስራኤል የወንድማማች ቸርነት ይገባ ነበር፤ ነገር ግን በዚህ ፈንታ የዔሳው ሰዎች ከእስራኤል ጠላቶች ጋር ተባበሩ። በፊታችን ባለው ዓረፍተ ነገር ውስጥ አንተ በሚለው ቃል ላይ ልዩ ትኩረት ተሰጥቷል፤ ቄሣር ብሩቱስን «አንተም ብሩቱስ» ብሎ እንደ ጮኸ፤ ክፉ ሥራ ከሠራው ሰው የተነሣ ይበልጥ የከፋ ሊሆን ይችላል። የሰማይ ምርጥ ወዳጆች የሆንን እኛ ኃጢአት ስንሠራ፥ በከፋ መንገድ ኃጢአትን እንሠራለን፤ እጅግ ልዩ ቸርነት ስለ ተደረገልን በደላችን የሚጮኽ በደል ነው። ክፉ ስናደርግ መልአክ እጁን በላያችን ቢጭን፥ «አንተ? አንተ በዚህ ምን ታደርጋለህ?» ከሚለው ጥያቄ ሌላ ተግሣጽ አያስፈልገውም። ብዙ ተሰርዮልን፥ ብዙ ድነን፥ ብዙ ተምረን፥ ብዙ በልጽገን፥ ብዙ ተባርከን ሳለን እጃችንን ወደ ክፉ ለመዘርጋት እንደፍራለንን? አይሁን!

የዋህ አንባቢ ሆይ፥ ዛሬ ጠዋት ጥቂት ደቂቃ መናዘዝ ይጠቅምሃል። ከቶ እንደ ኃጢአተኞች አልሆንህምን? በአንድ የምሽት ግብዣ አንዳንድ ሰዎች በርኩሰት ሳቁ፥ ቀልዱም ለጆሮህ ፈጽሞ የሚያስጸይፍ አልነበረም፤ አንተ ደግሞ ከእነርሱ እንደ አንዱ ነበርህ። ስለ እግዚአብሔር መንገዶች ከባድ ነገር በተነገረ ጊዜ፥ በእፍረት ዝም አልህ፤ ስለዚህም ለተመልካቾች ከእነርሱ እንደ አንዱ ነበርህ። ዓለማውያን በገበያ ሲገበያዩና ጥብቅ ውል ሲዋዋሉ፥ አንተ ከእነርሱ እንደ አንዱ አልነበርህምን? ከንቱነትን በአዳኝ እግር ሲያሳድዱ፥ አንተስ እንደ እነርሱ ለትርፍ የሣሳህ አልነበርህምን? በአንተና በእነርሱ መካከል ልዩነት ሊታይ ይቻል ነበርን? ልዩነት አለን? እዚህ ወደ ቅርብ ፍልሚያ እንመጣለን። ከነፍስህ ጋር ቅን ሁን፥ በክርስቶስ ኢየሱስም አዲስ ፍጥረት መሆንህን አረጋግጥ፤ ይህ ከተረጋገጠ በኋላ ግን ማንም ደግሞ «አንተ ደግሞ ከእነርሱ እንደ አንዱ ነበርህ» ማለት እንዳይችል በቅናት ተመላለስ። የዘላለም ፍርዳቸውን ልትካፈል አትወድድም፤ እንግዲያስ እዚህ ለምን እነርሱን ትመስላለህ? ወደ ጥፋታቸው እንዳትገባ ወደ ምሥጢራቸው አትግባ። ከዓለም ጋር ሳይሆን ከተጨነቁት ከእግዚአብሔር ሕዝብ ጋር ወግን።

ጁላይ 24

«ዝም ብላችሁ ቁሙ፥ የእግዚአብሔርንም ማዳን እዩ።» (ዘጸአት 14:13)

እነዚህ ቃላት አማኙ ወደ ታላቅ ጭንቅ በተጣለና ወደ ያልተለመደ ችግር በገባ ጊዜ የተሰጡ የእግዚአብሔር ትእዛዝ ናቸው። ወደ ኋላ ሊመለስ አይችልም፤ ወደ ፊት ሊሄድ አይችልም፤ በቀኝም በግራም ተዘግቶበታል፤ እንግዲህ ምን ያድርግ? የጌታው ቃል ለእርሱ «ዝም ብለህ ቁም» የሚል ነው። በእንዲህ ያለ ጊዜ የጌታውን ቃል ብቻ ቢሰማ መልካም ይሆንለታል፤ ሌሎች ክፉ መካሪዎች ምክራቸውን ይዘው ይመጣሉና። ተስፋ መቍረጥ «ተኝተህ ሙት፤ ሁሉንም ተው» ብሎ ያንሾካሹካል። እግዚአብሔር ግን በደስታ ድፍረትን እንድንለብስ፥ በከፋው ጊዜያችንም እንኳ በፍቅሩና በታማኝነቱ ደስ እንዲለን ይፈልጋል። ፍርሃት «ወደ ኋላ ተመለስ፤ ወደ ዓለማውያን የአሠራር መንገድ ተመለስ፤ የክርስቲያንን ድርሻ ልትፈጽም አትችልም፥ እጅግ ከባድ ነው። መርሆችህን ተው» ይላል። ነገር ግን ሰይጣን ይህን መንገድ ምንም ያህል ቢገፋፋህ፥ የእግዚአብሔር ልጅ ከሆንህ ልትከተለው አትችልም። መለኮታዊ ትእዛዙ ከኃይል ወደ ኃይል እንድትሄድ አዝዞሃል፥ እንዲሁም ትሄዳለህ፤ ሞትም ገሃነምም ከመንገድህ አይመልሱህም። ለጥቂት ጊዜ ዝም ብለህ እንድትቆም ብትጠራ ምን አለ? ይህ በጊዜው ለሚበልጥ ግስጋሤ ኃይልህን ለማደስ ብቻ ነው። ችኮላ «አንድ ነገር አድርግ። ተንቀሳቀስ፤ ዝም ብሎ ቆሞ መጠበቅ ፍጹም ስንፍና ነው» ብሎ ይጮኻል። አንድ ነገርን ብቻ ሳይሆን ሁሉን የሚያደርገውን ጌታን ከመመልከት ይልቅ፥ ወዲያውኑ አንድ ነገር ማድረግ አለብን፤ እኛ ራሳችን ማድረግ አለብን ብለን እናስባለን። ትዕቢት «ባሕሩ በፊትህ ቢሆን ወደ ውስጡ ግባ ተአምርም ጠብቅ» ብሎ ይመካል። እምነት ግን ትዕቢትንም ተስፋ መቍረጥንም ፍርሃትንም ችኮላንም አይሰማም፤ እግዚአብሔር «ዝም ብለህ ቁም» ሲል ይሰማል፥ እንደ ዓለትም ሳይነቃነቅ ይቆማል። «ዝም ብለህ ቁም፤» ለሥራ እንደ ተዘጋጀ፥ ተጨማሪ ትእዛዝ እንደሚጠብቅ፥ የሚመራውን ድምፅ በደስታና በትዕግሥት እንደሚጠባበቅ ቀጥ ያለ ሰው አቋምህን ጠብቅ፤ ሙሴ ለእስራኤል ሕዝብ እንደ ተናገረው በግልጥ እግዚአብሔር «ወደ ፊት ሂዱ» የሚልህ ጊዜ ሩቅ አይሆንም።

ጁላይ 25

«ልብሱንም በእጅዋ ትቶ ሸሸ፥ ወደ ውጭም ወጣ።» (ዘፍጥረት 39:12)

ከአንዳንድ ኃጢአቶች ጋር በመታገል ከመሸሽ በቀር የድል መንገድ የለም። የጥንት የተፈጥሮ ተመራማሪዎች ዓይናቸው ተጠቂዎቻቸውን አፍዝዞ በቀላሉ እንዲጠቁ ስለሚያደርጋቸው ስለ ባሲሊስኮች ብዙ ጽፈዋል፤ እንዲሁም ክፋትን መመልከት ብቻ በከባድ አደጋ ላይ ይጥለናል። ከክፉ ሥራ ሊድን የሚወድድ ከክፉ አጋጣሚዎች ፈጥኖ መራቅ አለበት። የፈተናን ምክንያት እንኳ እንዳንመለከት ከዓይኖቻችን ጋር ቃል ኪዳን መግባት አለብን፤ እንደነዚህ ያሉ ኃጢአቶች ለመጀመር ብልጭታ ብቻ ያስፈልጋቸዋል፥ ነበልባሉም በቅጽበት ይከተላልና። ወደ ለምጻሙ እስር ቤት በግድየለሽነት ገብቶ በአስከፊ ብስባሹ መካከል የሚተኛ ማን ነው? ራሱ ለምጻም ለመሆን የሚወድድ ብቻ እንዲህ ያለውን መጋባት ይፈልጋል። መርከበኛ ዐውሎ ነፋስን እንዴት እንደሚያመልጥ ቢያውቅ፥ በውስጡ ለማለፍ ከመድፈር ይልቅ ምንም ነገር ያደርጋል። ጠንቃቃ መሪዎች ወደ አሸዋው ምን ያህል ተጠግተው መቅዘፍ እንደሚችሉ፥ ወይም መርከባቸው ሳይሸነቈር ዓለትን ስንት ጊዜ ሊነኩ እንደሚችሉ ለመሞከር አይሹም፤ ዓላማቸው በተቻለ መጠን በአስተማማኙ መተላለፊያ መካከል መቆየት ነው።

ዛሬ ለታላቅ አደጋ ልጋለጥ እችላለሁ፤ ከእርሱ ርቄ ለመቆየትና ለማምለጥ የእባብን ብልሃት ይኑረኝ። ዛሬ የርግብ ክንፎች ከአንበሳ መንጋጋ ይልቅ ይጠቅሙኝ ይሆናል። ክፉ ባልንጀርነትን በመተው የከሰርሁ መስዬ እታይ ይሆናል፤ ነገር ግን መልካም ስሜን ከማጣት መጐናጸፊያዬን ብተው ይሻለኛል፤ ባለ ጠጋ መሆን አያስፈልገኝም፥ ንጹሕ መሆን ግን ግዴታዬ ነው። የወዳጅነት ማሰሪያ፥ የውበት ሰንሰለት፥ የችሎታ ብልጭታ፥ የፌዝ ፍላጻ ከኃጢአት ለመሸሽ ካደረግሁት ጥበበኛ ውሳኔ ሊመልሰኝ አይገባም። ዲያብሎስን መቃወም አለብኝ ከእኔም ይሸሻል፤ ነገር ግን ከሥጋ ምኞቶች እኔ መሸሽ አለብኝ፥ ያለዚያ በእርግጥ ያሸንፉኛል። የቅድስና አምላክ ሆይ፥ እመቤት አረፋ በርኩስ ማባበያዋ እንዳታስታቸው ዮሴፎችህን ጠብቅ። ዓለም፥ ሥጋና ዲያብሎስ የሆኑት ያ አስከፊ ሦስትነት ከቶ አያሸንፉን!

ጁላይ 26

«ትጋትን ሁሉ እያሳያችሁ በእምነታችሁ በጎነትን ጨምሩ፥ በበጎነትም እውቀትን፥ ወዘተ።» (2ኛ ጴጥሮስ 1:5, 6)

በተባረከው መንፈስ አሠራርና እርዳታ የእምነትን ሙሉ መረዳት ታላቅ ጸጋ ልትደሰትበት ብትወድድ፥ መጽሐፍ የሚነግርህን አድርግ፤ «ትጋትን አሳይ።» እምነትህ ትክክለኛው ዓይነት እንዲሆን ተጠንቀቅ፤ የትምህርት እውቀት ብቻ ሳይሆን፥ በክርስቶስ፥ በክርስቶስም ብቻ የሚደገፍ ቀላል እምነት እንዲሆን። ለድፍረትህ በትጋት ተጠንቀቅ። ትክክል መሆንህን አውቀህ በድፍረት ወደ ፊት እንድትሄድ የአንበሳ ፊት እንዲሰጥህ እግዚአብሔርን ለምን። መጻሕፍትን በሚገባ አጥና፥ እውቀትንም አግኝ፤ የትምህርት እውቀት እምነትን እጅግ ያጸናልና። የእግዚአብሔርን ቃል ለማስተዋል ሞክር፤ በልብህ በሙላት ይኑር።

ይህን ባደረግህ ጊዜ፥ «በእውቀትህ ራስን መግዛት ጨምር።» ለሰውነትህ ተጠንቀቅ፤ በውጭ ራስህን ግዛ። ለነፍስህ ተጠንቀቅ፤ በውስጥ ራስህን ግዛ። በከንፈር፥ በኑሮ፥ በልብና በአሳብ ራስን መግዛትን አግኝ። በዚህ ላይ በእግዚአብሔር መንፈስ ቅዱስ መጽናትን ጨምር፤ መከራን የሚታገሥ፥ በተፈተነም ጊዜ እንደ ወርቅ የሚወጣውን ትዕግሥት እንዲሰጥህ ለምነው። በመከራህ እንዳታጕረመርምና እንዳትተክዝ ትዕግሥትን ልበስ። ያ ጸጋ በተገኘ ጊዜ ወደ እግዚአብሔርን መምሰል ተመልከት። እግዚአብሔርን መምሰል ከሃይማኖተኛነት የሚበልጥ ነገር ነው። የእግዚአብሔርን ክብር የሕይወትህ ዓላማ አድርግ፤ በፊቱ ኑር፤ በአጠገቡ ተቀመጥ፤ ከእርሱ ጋር ኅብረትን ፈልግ፤ «እግዚአብሔርን መምሰልም» ይኖርሃል፤ በዚያም ላይ የወንድማማችን መዋደድ ጨምር። ቅዱሳንን ሁሉ ውደድ፤ በዚያም ላይ ክንዱን ለሰዎች ሁሉ የሚከፍትና ነፍሳቸውን የሚወድድ ፍቅርን ጨምር። በእነዚህ ጌጦች ባጌጥህ ጊዜ፥ እነዚህንም ሰማያዊ በጎነቶች በምትለማመድበት መጠን፥ «መጠራታችሁንና መመረጣችሁን» በግልጥ ማስረጃ ታውቃለህ። መረዳትን ልታገኝ ብትወድድ «ትጋትን አሳይ»፤ ለብ ማለትና መጠራጠር በተፈጥሮ አብረው ይሄዳሉና።

ጁላይ 27

«የተከበረና እጅግ ታላቅ የሆነ ተስፋ።» (2ኛ ጴጥሮስ 1:4)

የተስፋዎችን ክቡርነት በልምድ ልታውቅና በልብህ ልትደሰትባቸው ብትወድድ፥ በእነርሱ ላይ ብዙ አሰላስል። በወይን መጭመቂያ ውስጥ እንዳለ ወይን የሆኑ ተስፋዎች አሉ፤ ብትረግጣቸው ጭማቂው ይፈስሳል። የተቀደሱትን ቃላት ማሰብ ብዙ ጊዜ ለፍጻሜያቸው መግቢያ ይሆናል። በእነርሱ ላይ ስታሰላስል የምትፈልገው በረከት ሳይታወቅህ ወደ አንተ ይመጣል። ለተስፋው የተጠሙ ብዙ ክርስቲያኖች መለኮታዊውን መዝገብ ሲመረምሩ ሳሉ ተስፋው ያረጋገጠው ሞገስ በቀስታ ወደ ነፍሳቸው ሲንጠባጠብ አግኝተዋል፤ ተስፋውንም ወደ ልባቸው እንዲያቀርቡ በመመራታቸው ደስ ብሏቸዋል።

ነገር ግን በተስፋዎቹ ላይ ከማሰላሰል በተጨማሪ፥ በነፍስህ የእግዚአብሔር ቃላት እንደ ሆኑ አድርገህ ልትቀበላቸው ፈልግ። ለነፍስህ እንዲህ ብለህ ተናገር፦ «የሰውን ተስፋ ብቀበል፥ ከእኔ ጋር ቃል የገባውን ሰው ችሎታና ጠባይ በጥንቃቄ እመረምር ነበር። የእግዚአብሔርም ተስፋ እንዲሁ ነው፤ ዓይኔ በምሕረቱ ታላቅነት ላይ ሳይሆን፥ ያ ሊያንገዳግደኝ ይችላልና፥ በተስፋ ሰጪው ታላቅነት ላይ ማተኰር አለበት፤ ያ ያበረታኛልና። ነፍሴ ሆይ፥ የሚናገርሽ እግዚአብሔር ነው፥ አምላክሽ ራሱ፥ ሊዋሽ የማይችል እግዚአብሔር። አሁን የምታስቢው ይህ ቃሉ እንደ ራሱ ህልውና እውነት ነው። እርሱ የማይለወጥ አምላክ ነው። ከአፉ የወጣውን ነገር አልለወጠም፥ አንዲትም የመጽናናት ቃል አላስመለሰም። ኃይልም አይጐድለውም፤ እንዲህ የተናገረው ሰማያትንና ምድርን የፈጠረ አምላክ ነው። ሞገሱን የሚሰጥበትን ጊዜ በተመለከተ በጥበብ ሊሳሳት አይችልም፤ መስጠት የሚሻልበትንና መከልከል የሚሻልበትን ጊዜ ያውቃልና። ስለዚህ እንዲህ እውነተኛ፥ እንዲህ የማይለወጥ፥ እንዲህ ኃያል፥ እንዲህ ጠቢብ የሆነ የአምላክ ቃል መሆኑን አይቼ፥ ተስፋውን አምናለሁ፥ ማመንም አለብኝ።» እንዲህ በተስፋዎቹ ላይ ብናሰላስልና ተስፋ ሰጪውን ብናስብ፥ ጣፋጭነታቸውን እንለማመዳለን፥ ፍጻሜያቸውንም እናገኛለን።

ጁላይ 28

«እኔ ሰነፍ ነበርሁ፥ አላወቅሁም፤ በፊትህ እንደ እንስሳ ነበርሁ።» (መዝሙር 73:22)

ይህ እንደ እግዚአብሔር ልብ የሆነው ሰው መናዘዝ መሆኑን አስታውስ፤ ውስጣዊ ሕይወቱን ሲነግረን «እኔ ሰነፍ ነበርሁ፥ አላወቅሁም» ብሎ ይጽፋል። እዚህ «ሰነፍ» የሚለው ቃል በተለመደው ቋንቋ ከሚያመለክተው በላይ ትርጉም አለው። ዳዊት በዚሁ መዝሙር ቀደም ባለው ቍጥር «የኃጢአተኞችን ደኅንነት ባየሁ ጊዜ በሰነፎች ቀንቼ ነበርና» ብሎ ይጽፋል፤ ይህም ያሰበው ስንፍና ኃጢአት እንደ ነበረበት ያሳያል። ራሱን እንዲህ «ሰነፍ» ብሎ ይቈጥራል፥ ደግሞም ለማጠንከር አንድ ቃል ይጨምራል፤ «እንዲህ ሰነፍ ነበርሁ።» ምን ያህል ሰነፍ እንደ ነበረ ሊናገር አልቻለም። ኃጢአተኛ ስንፍና ነበረች፤ በድካም ምክንያት የምትታለፍ ሳትሆን፥ በጠማማነቷና በፈቃደኛ ድንቁርናዋ ምክንያት የምትኰነን ስንፍና፤ የእንደነዚህ ያሉትን ሁሉ የሚጠብቃቸውን አስፈሪ ፍጻሜ ረስቶ በኃጢአተኞች የአሁኑ ደኅንነት ቀንቶ ነበርና። እኛስ ራሳችንን ጠቢባን ለማለት ከዳዊት እንበልጣለንን! ፍጽምናን እንዳገኘን፥ ወይም በትሩ ግትርነታችንን ሁሉ እስኪያወጣልን ድረስ እንደ ተቀጣን እንናገራለንን? ኦ፥ ይህ በእውነት ትዕቢት በሆነ ነበር! ዳዊት ሰነፍ ከነበረ፥ ራሳችንን ማየት ብንችል እኛ በራሳችን ግምት ምን ያህል ሰነፎች በሆንን ነበር! አማኝ ሆይ፥ ወደ ኋላ ተመልከት፤ እግዚአብሔር ለአንተ እጅግ ታማኝ ሆኖ ሳለ እንዴት እንደ ተጠራጠርኸው አስብ፤ ታላቁን በረከት ሊሰጥህ በመከራ እጆቹን ባመሳቀለ ጊዜ፥ «አባቴ ሆይ፥ እንዲህ አይደለም» ብለህ የጮኽኸውን የስንፍና ጩኸት አስብ፤ መግቦቱን በጨለማ ያነበብህበትን፥ አሠራሩን የተረጐምህበትንና ሁሉም ለበጎህ አብረው እየሠሩ ሳሉ «ይህ ሁሉ በእኔ ላይ ነው» ብለህ ያቃተትህበትን ብዙ ጊዜ አስብ! ደስታው በእውነት መራራ ሥር ሆኖብህ ሳለ፥ ስለ ደስታው ኃጢአትን ስንት ጊዜ እንደ መረጥህ አስብ! በእርግጥ ልባችንን ብናውቅ በኃጢአተኛ ስንፍና ክስ በደለኞች መሆናችንን ማመን አለብን፤ ይህንንም «ስንፍና» አውቀን የዳዊትን ተከታይ ውሳኔ የራሳችን ማድረግ አለብን፤ «በምክርህ ትመራኛለህ።»

ጁላይ 29

«እኔ ግን ሁልጊዜ ከአንተ ጋር ነኝ።» (መዝሙር 73:23)

«እኔ ግን»፤ ዳዊት ለእግዚአብሔር አሁን የተናዘዘው ስንፍናና ድንቁርና ሁሉ ቢኖርም፥ ዳዊት መዳኑና መቀበሉ፥ ዘወትር በእግዚአብሔር ፊት የመሆን በረከትም ያለ ጥርጥር የእርሱ መሆኑ አንዲት ቅንጣት እንኳ እውነትነቱና እርግጠኛነቱ ያልቀነሰ ይመስል። የራሱን የጠፋ ሁኔታ፥ የባሕርዩንም ተንኰልና ርኩሰት ፈጽሞ አውቆ፥ በክብር በፈነዳ እምነት «እኔ ግን ሁልጊዜ ከአንተ ጋር ነኝ» ብሎ ይዘምራል። አማኝ ሆይ፥ ወደ አሳፍ መናዘዝና ማመን ለመግባት ተገደሃል፤ በዚያው መንፈስ «እኔ ግን የክርስቶስ ስለ ሆንሁ ሁልጊዜ ከእግዚአብሔር ጋር ነኝ!» ለማለት ሞክር። ይህም ማለት ሁልጊዜ በእርሱ አሳብ ውስጥ ነኝ፥ ለበጎዬ ሁልጊዜ ያስብልኛል ማለት ነው። ሁልጊዜ በዓይኑ ፊት ነኝ፤ የጌታ ዓይን ከቶ አይተኛም፥ ነገር ግን ደኅንነቴን ዘወትር ይጠብቃል። ሁልጊዜ በእጁ ውስጥ ነኝ፥ ስለዚህ ማንም ከዚያ ሊነጥቀኝ አይችልም። ሁልጊዜ በልቡ ላይ ነኝ፤ ሊቀ ካህናቱ የአሥራ ሁለቱን ነገዶች ስሞች በልቡ ላይ ለዘላለም እንደ ተሸከመ፥ በዚያ ለመታሰቢያ ተደርጌአለሁ። አምላክ ሆይ፥ አንተ ሁልጊዜ ታስበኛለህ። የፍቅርህ አንጀት ሁልጊዜ ወደ እኔ ይናፍቃል። መግቦትን ሁልጊዜ ለበጎዬ ታሠራለህ። በክንድህ ላይ እንደ ማኅተም አኖርኸኝ፤ ፍቅርህ እንደ ሞት የበረታ ነው፥ ብዙ ውኃ ሊያጠፋው አይችልም፤ ፈሳሾችም ሊያሰጥሙት አይችሉም። አስደናቂ ጸጋ! በክርስቶስ ታየኛለህ፥ በራሴ የተጠላሁ ብሆንም የክርስቶስን ልብስ እንደ ለበስሁ በደሙም እንደ ታጠብሁ ትመለከተኛለህ፥ እንዲሁም በፊትህ ተቀባይነት አግኝቼ እቆማለሁ። እንዲህ ሁልጊዜ በሞገስህ ውስጥ ነኝ፤ «ሁልጊዜ ከአንተ ጋር።» ለተፈተነችና ለተጨነቀች ነፍስ መጽናናት እዚህ አለ፤ በውስጥ ባለው ዐውሎ ነፋስ የተናወጥሽ ሆይ፥ በውጭ ያለውን ጸጥታ ተመልከቺ። «እኔ ግን»፤ ኦ፥ በልብህ ተናገረው፥ የሚሰጠውንም ሰላም ውሰድ። «እኔ ግን ሁልጊዜ ከአንተ ጋር ነኝ።»

ጁላይ 30

«ነገሩንም አስቦ አለቀሰ።» (ማርቆስ 14:72)

አንዳንዶች ጴጥሮስ በሕይወት እስካለ ድረስ ጌታውን መካዱን ባስታወሰ ቍጥር የእንባው ምንጭ መፍሰስ ይጀምር ነበር ብለው አስበዋል። ይህ እንዲህ መሆኑ የማይመስል አይደለም፤ ኃጢአቱ እጅግ ታላቅ ነበረና፥ በእርሱም ውስጥ ጸጋ ከዚያ በኋላ ፍጹም ሥራ ሠርቶ ነበርና። ይህ ተመሳሳይ ልምድ የእግዚአብሔር መንፈስ የተፈጥሮን የድንጋይ ልብ ባስወገደበት መጠን ለተቤዡት ቤተሰብ ሁሉ የተለመደ ነው። እኛም እንደ ጴጥሮስ የመመካት ተስፋችንን እናስታውሳለን፤ «ሁሉም ቢሰናከሉ እኔ ግን ከቶ አልሰናከልም።» የገዛ ቃላችንን ከንስሐ መራራ ቅጠል ጋር እንበላለን። እንሆናለን ብለን የተሳልነውንና የሆንነውን ስናስብ፥ የኀዘን ዝናብ ልናፈስስ እንችላለን። ጌታውን መካዱን አሰበ። ያደረገበትን ስፍራ፥ ወደዚህ ያለ ከባድ ኃጢአት የመራውን ትንሽ ምክንያት፥ ሐሰቱን ለማጽናት የተጠቀመባቸውን መሐላዎችና ስድቦች፥ ይህንንም ደግሞ ደጋግሞ እንዲያደርግ የገፋፋውን አስፈሪ የልብ ድንዳኔ። ኃጢአቶቻችንና እጅግ ኃጢአተኛነታቸው በተነሣልን ጊዜ ደንዝዘንና እልከኞች ሆነን እንቀራለንን? ቤታችንን ቦኪም አናደርግምን? ለይቅርታ ፍቅር አዲስ ማረጋገጫ ወደ ጌታ አንጮኽምን? በቅርቡ በገሃነም ነበልባል የደረቀ ምላስ እንዳይኖረን፥ ኃጢአትን በደረቀ ዓይን ከቶ አንመልከት። ጴጥሮስ የጌታውን የፍቅር እይታ ደግሞ አሰበ። ጌታ የዶሮውን የማስጠንቀቂያ ድምፅ በኀዘን፥ በርኅራኄና በፍቅር በሚገሥጽ እይታ ተከተለው። ያ እይታ ጴጥሮስ በሕይወት እስካለ ድረስ ከአእምሮው አልወጣም። ያለ መንፈስ ከሚሰበኩ እልፍ ስብከቶች እጅግ የበለጠ ኃይል ነበረው። ንስሐ የገባው ሐዋርያ ወደ ቀድሞ ስፍራው የመለሰውን የአዳኙን ሙሉ ይቅርታ ባስታወሰ ጊዜ በእርግጥ ያለቅስ ነበር። እንዲህ ያለውን ቸርና መልካም ጌታ እንዳስቀየምን ማሰብ ዘወትር የምናለቅስ እንድንሆን ከበቂ በላይ ምክንያት ነው። ጌታ ሆይ፥ ዓለታማ ልባችንን ምታ፥ ውኃውንም አፍስስ።

ጁላይ 31

«እኔ በእነርሱ።» (ዮሐንስ 17:23)

በነፍሳችንና በጌታችን አካል መካከል ያለው አንድነት እንዲህ ከሆነ፥ የኅብረታችን መተላለፊያ ምንኛ ጥልቅና ሰፊ ነው! ይህ እንደ ክር ያለ ጅረት የሚጠመዘዝበት ጠባብ ቧንቧ አይደለም፤ በክብሩ ርዝመቱ ሁሉ ከባድ የሕይወት ውኃ ጎርፍ የሚንከባለልበት አስደናቂ ጥልቀትና ስፋት ያለው መተላለፊያ ነው። እነሆ፥ በፊታችን የተከፈተ በር ሰጥቶአል፤ ለመግባት አንዘግይ። ይህች የኅብረት ከተማ ብዙ የዕንቍ ደጆች አሏት፤ እያንዳንዱ ደጅ ከአንድ ዕንቍ የተሠራ ነው፥ እያንዳንዱም ደጅ እንድንገባ፥ እንደምንቀበልም እርግጠኞች ሆነን፥ ፈጽሞ ተከፍቷል። ከኢየሱስ ጋር ለመነጋገር አንዲት ትንሽ ቀዳዳ ብቻ ብትኖር፥ በዚያች ጠባብ በር የኅብረት ቃልን ማስገባት ታላቅ መብት በሆነ ነበር፤ እንዲህ ያለ ሰፊ መግቢያ ስላለን ምንኛ የተባረክን ነን! ጌታ ኢየሱስ ብዙ የሚናወጥ ባሕር በመካከል ሆኖ ከእኛ እጅግ ርቆ ቢሆን፥ ፍቅራችንን እንዲያደርስለትና ከአባቱ ቤት ወሬ እንዲያመጣልን መልእክተኛ ወደ እርሱ ለመላክ በናፈቅን ነበር፤ ነገር ግን ቸርነቱን ተመልከት፤ ቤቱን ከቤታችን አጠገብ ሠርቶአል፤ ከዚህም በላይ፥ ከእኛ ጋር ዘወትር ይነጋገር ዘንድ ከእኛ ጋር ያድራል፥ በድሆችና በትሑታን ልቦችም ውስጥ ይኖራል። ኦ፥ ከእርሱ ጋር በዘወትር ኅብረት ባንኖር ምንኛ ሰነፎች መሆን አለብን! መንገዱ ረጅም፥ አደገኛና አስቸጋሪ ሲሆን ወዳጆች እርስ በርሳቸው እምብዛም ቢገናኙ አያስደንቅም፤ ነገር ግን አብረው ሲኖሩ ዮናታን ዳዊቱን ይረሳልን? ሚስት ባልዋ በመንገድ ላይ ሳለ ከእርሱ ጋር ሳትነጋገር ብዙ ቀን ልትቆይ ትችላለች፤ ነገር ግን በገዛ ቤትዋ ካሉት ክፍሎች በአንዱ ውስጥ እንዳለ ብታውቅ ከእርሱ መለየትን ከቶ መታገሥ አትችልም። አማኝ ሆይ፥ በወይን ግብዣው ለምን አትቀመጥም? ቅርብ ነውና ጌታህን ፈልግ፤ ወንድምህ ነውና እቀፈው። ባልህ ነውና አጥብቀህ ያዘው፤ ከገዛ ሥጋህ ነውና ወደ ልብህ አስጠጋው።

ጨርሰዋል፦ የጁላይ ወር

ቀዳሚ ቀጣይ