በደኅና

«ጸጋዬ ይበቃሃል፥ ኃይሌ በድካም ይፈጸማልና።» — ከ2ኛ ቆሮንቶስ 12

በ1903 ሜሪ ኤሲየንና ኤፊዮም የተባሉ ሁለት ወንዶች ልጆችንና ማና የምትባል አንዲት ልጃገረድን በወንዙ ዳር ወዳለው የቀድሞ የባሪያ ገበያ ወደ ኢቱ ወሰደቻቸው። ማና በአንድ ወቅት ራሷ ታፍና በባርነት ተሽጣ ነበር። ሜሪ ሦስቱንም እንዲያስተምሩ እዚያ ተወቻቸው። በጥቂት ወራት ውስጥ ከሦስት መቶ የሚበልጡ ሰዎች እነርሱ ራሳቸው ወደ ሠሩት ቤተ ክርስቲያን ይመጡ ጀመር፤ ማናም የኢቱን ሴቶች እንደ እናት አስተማረቻቸው።

ሜሪ የሲሚንቶ ወለሎችንም ራሷ ትሠራ ነበር። «ልክ እንደ ገንፎ አማስለዋለሁ» አለች፤ «አፈስሰዋለሁ፣ በዱላ አለሰልሰዋለሁ፤ ሁልጊዜም ‹ጌታ ሆይ፣ ሲሚንቶው ይኸው፤ ለክብርህ ከሆነ አጽናው› እያልሁ እጸልያለሁ፤ አንድም ጊዜ ተበላሽቶ አያውቅም።»

በዚህ ጊዜ ሜሪ ከስድሳ ዓመት በላይ ሆኗት ነበር፤ ልጆቿም ጎማ ባለው የቅርጫት ወንበር ላይ አስቀምጠው በጫካው ውስጥ ይገፏት ነበር። ቤተ ክርስቲያኗ ኢክፔ ወደምትባል ከተማ ማንንም ባልላከች ጊዜ «እኔ መሄድ አለብኝ» አለች፤ ሄደችም። በኋላም «እያንዳንዱን ቀን፣ ማለት ይቻላል እያንዳንዱን ጕዞ፣ የምጀምረው በሕመምና መቀጠል እንደማልችል እርግጠኛ እስክሆን ድረስ በድካም ውስጥ ሆኜ ነው፤ በጀመርሁ ቍጥር ግን ኃይሉ ይመጣል፤ እየጨመረም ይሄዳል» አለች።

በጃንዋሪ 1915 ሜሪ በጠና ታመመች። በጃንዋሪ 13 ቀን በማለዳ፣ ዩሴ በሚባል ስፍራ፣ ያሳደገቻቸው ልጃገረዶች በአጠገቧ እያሉ ሞተች። ሰዎች «ኤካ ክፑክፑሩ ኦዎ» ብለው የሚጠሯትን ሴት ለማልቀስ ከየአቅጣጫው መጡ፤ ትርጉሙም «የሁሉም እናት» ማለት ነው። ከሠላሳ ዘጠኝ ዓመት በፊት ለመጀመሪያ ጊዜ ከመርከብ በወረደችበት ስፍራ፣ ከዱክ ታውን በላይ ባለው ኮረብታ ላይ ተቀበረች።

በመቃብሯ አጠገብ ሜሪ ወደ ካላባር ከመጣችበት የመጀመሪያ ዘመን ጀምሮ ወዳጇ የነበረችው ጃማይካዊቷ ማሚ ፉለር ተቀምጣ ነበር። አንዳንድ ሴቶች ዋይ ዋይ ማለት በጀመሩ ጊዜ ማሚ ፉለር ተነሣች። «አታልቅሱ፣ አታልቅሱ» አለች። «በረከት ሁሉ የሚፈልቅበትን እግዚአብሔርን አመስግኑ። ማ ታላቅ በረከት ነበረች።» የሬሳ ሣጥኑ ወደ መቃብሩ ሲወርድ አንድ ቃል ተናገረች፦ «በደኅና።»

ሜሪ ፈጽሞ ብርቱ አልነበረችም። እግዚአብሔር ግን ለእያንዳንዱ ቀን ኃይል ሰጣት፤ ለአንተም እንደዚሁ ያደርጋል።

ውድ እግዚአብሔር ሆይ፣ ስለ ሜሪ ስሌሰርና ስለ ወደደቻቸው ልጆች ሁሉ አመሰግንሃለሁ። ደካማ እንደ ሆንሁ ሲሰማኝ እባክህ ለእያንዳንዱ ቀን ኃይል ስጠኝ፤ ለዘላለምም ከአንተ ጋር በደኅና ጠብቀኝ። አሜን።