በባቡር መስኮት ላይ የፈሰሰ እንባ

«እርሱም ገና ሩቅ ሳለ አባቱ አየውና አዘነለት፥ ሮጦም አንገቱን አቀፈውና ሳመው።» — ከሉቃስ 15

ከጊዜ በኋላ ወዳጆቹ «ጄ. ኤን.» ብለው የሚጠሩት አንድ ወጣት ነበር። የመጣው ከከፍተኛ ማዕረግ ካለው የሂንዱ ቤተሰብ ነበር፤ የሚስዮን ትምህርት ቤት ገብቶ በኢየሱስ አመነ። መጀመሪያ ቤተሰቡ ተቈጡ። ከዚያም እጅግ ደግ ሆኑለት፤ እርሱም ወደ ቤቱ ተመለሰ። በዚያም ከልክ በላይ ወደ መጠጣት የመሩትን ወዳጆች አፈራ፤ ከኢየሱስም ራቀ።

ነገር ግን ደስተኛ አልነበረም፤ ስለዚህ ወደ ጆን መጣ። ጆንም ኢየሱስ ስለ ጠፋው ልጅ በተናገረው ታሪክ ውስጥ እንዳለው አባት ተቀበለው፤ ጄ. ኤን.ም ከእርሱ ጋር ሊኖር መጣ። ነገር ግን ደጋግሞ ወደ መጠጥ ተመለሰ። ከአንድ ጊዜ በላይ የጆንን ልብሶች እንኳ ሰርቆ ሸጣቸው! ጆን ግን ፈገግ ብቻ አለ፤ የሚሞቅ ልብስ ስላልቀረለት በዚያ በጋ በሞቃቱ ሜዳማ ምድር መቆየት እንዳለበት ለአንድ ወዳጁ ነገረው።

አንድ ቀን ጄ. ኤን. ላሆር ወደምትባል ከተማ በሚሄድ ባቡር ውስጥ ተቀመጠ። ወደ አሮጌ ወዳጆቹ እንደሚመለስ በብልግና ተናገረ። ጆን በሠረገላው መስኮት ጐንበስ ብሎ እንዳይሄድ ለመነው። በጣቢያው የምትሠራ አንዲት ሴት በጆን ፊት ላይ እንባ ሲፈስስ አየች። ወጣቱ ግን አልሰማም፤ ባቡሩም ተነሥቶ ሄደ።

ልክ በማግስቱ ሴቲቱ ጄ. ኤን. ሲመለስ አየችው። ፊቱ ገርጥቶ ነበር። «ወደ እርሱ እየተመለስሁ ነው፤» አለ፤ «እንባውን ልረሳ አልቻልሁም።» ጆንን ሲያገኘው ጆን እየጸለየ ነበር። ጆንም አቅፎት «እግዚአብሔር ወደ እኔ እንዲመልስህ አሁን እየጸለይሁ ነበር፤ እነሆም መለሰልኝ!» አለው።

የጄ. ኤን. ታሪክ ያማረ መጨረሻ የለውም። ከብዙ ዓመታት በኋላም ገና እየታገለ ነበር። ነገር ግን ጆን ምን ያህል እንደ ወደደው ፈጽሞ አልረሳም።

ኢየሱስ ሰዎች ደጋግመው ቢሳሳቱም እንኳ መውደዳቸውን ይቀጥላል። አንተንም እንዲሁ ይወድሃል። ሌሎች ሰዎችን በዚያው መንገድ እንድትወድም ሊረዳህ ይችላል።

ውድ ኢየሱስ ሆይ፣ ስሳሳት እንኳ እኔን መውደድህን ፈጽሞ ስለማታቋርጥ አመሰግንሃለሁ። ለመውደድ የሚከብዱኝን ሰዎች እንድወድ እርዳኝ። አሜን።