ክርስቶስን በግልጽ መመስከር

በአንተና በእርሱ መካከል በተደረገ የግል ስምምነት በክርስቶስ ፊት ተገቢውን አቋም በመያዝ የክርስትናን ሕይወት በትክክል ከጀመርህ በኋላ፣ ቀጣዩ እርምጃ አሁን በአንተና በኢየሱስ ክርስቶስ መካከል ያለውን ግንኙነት በግልጽ መመስከር ነው። ኢየሱስ በማቴዎስ 10:32 እንዲህ ይላል፦ «ስለዚህ በሰው ፊት ለሚመሰክርልኝ ሁሉ እኔ ደግሞ በሰማያት ባለው በአባቴ ፊት እመሰክርለታለሁ።» እርሱ በሕዝብ ፊት መመስከርን ይጠይቃል። ይህንም የሚጠይቀው ለአንተው ጥቅም ነው። የበረከት መንገድ ይህ ነው። ብዙዎች ዓለም ሳያውቅባቸው የኢየሱስ ደቀ መዛሙርት ለመሆን ይሞክራሉ። በዚህ ሙከራ የተሳካለት ማንም የለም። በስውር ደቀ መዝሙር መሆን ጭራሹን ደቀ መዝሙር አለመሆን ማለት ነው። አንድ ሰው በእውነት ክርስቶስን ተቀብሎ ከሆነ ይህን በልቡ ብቻ ይዞ ሊኖር አይችልም። «በልብ ሞልቶ ከተረፈው አፍ ይናገራልና» (ማቴዎስ 12:34)። ክርስቶስን በሕዝብ ፊት መመስከር እጅግ አስፈላጊ ከመሆኑ የተነሣ ጳውሎስ የመዳንን ቅድመ ሁኔታዎች ሲገልጽ ይህን አስቀድሞ ያስቀምጠዋል። እንዲህ ይላል፦ «ኢየሱስ ጌታ እንደ ሆነ በአፍህ ብትመሰክር እግዚአብሔርም ከሙታን እንዳስነሣው በልብህ ብታምን ትድናለህና፤ ሰው በልቡ አምኖ ይጸድቃልና በአፉም መስክሮ ይድናልና» (ሮሜ 10:9-10)። የመመስከር ሕይወት የሙሉ መዳን ሕይወት ነው። እንዲያውም የመመስከር ሕይወት የብቸኛው እውነተኛ መዳን ሕይወት ነው። እዚህ በምድር በሰዎች ፊት ስለ ክርስቶስ ስንመሰክር፣ እርሱ በሰማይ ባለው በአብ ፊት ይመሰክርልናል፤ አብም የመዳናችን ማኅተም አድርጎ መንፈስ ቅዱስን ይሰጠናል።

ክርስቶስን አንድ ጊዜ ብቻ መመስከር በቂ አይደለም፤ ለምሳሌ ማረጋገጫ (ኮንፈርሜሽን) በምንቀበልበት ጊዜ፣ ወይም የቤተ ክርስቲያን አባል በምንሆንበት ጊዜ፣ ወይም በመነቃቃት ስብሰባ ላይ ወደ ፊት በምንወጣበት ጊዜ ብቻ መመስከር በቂ አይደለም። ክርስቶስን ዘወትር ልንመሰክር ይገባናል። በጌታችንና በንጉሣችን ልናፍር አይገባንም። በእርሱ ወገን መሆናችንን ሰዎች እንዲያውቁ ልናደርግ ይገባናል። በቤት፣ በቤተ ክርስቲያን፣ በሥራችንና በመዝናኛችን ስፍራ የቆምነው የት እንደ ሆነ ሌሎች እንዲያውቁ ልናደርግ ይገባናል። እርግጥ ነው፣ ክርስትናችንን ወይም መንፈሳዊነታችንን ለታይታ ልናሳይ አይገባንም፤ ነገር ግን የክርስቶስ መሆናችንን የሚጠራጠር አንድም ሰው እንዳይኖር ልናደርግ ይገባናል። ጌታችንና ንጉሣችን አድርገን በእርሱ እንደምንመካ ይታይ።

ክርስቶስን አለመመስከር ሰዎችን ወደ ኋላ እንዲያፈገፍጉ ከሚያደርጉ እጅግ የተለመዱ ምክንያቶች አንዱ ነው። ክርስቲያኖች እንደ ክርስቲያን ወደማይታወቁበትና ይህንኑ እንዲደብቁ ወደሚፈተኑበት አዲስ ግንኙነት ይገባሉ፤ ለፈተናው እጅ ይሰጣሉ፤ ብዙም ሳይቆዩ እየተንሸራተቱ መሄዳቸውን ያገኙታል። ኢየሱስ ክርስቶስን ባከበርኸው መጠን እርሱም አንተን ያከብርሃል። በሁሉ ነገር ክርስቶስን ጌታ አድርጎ የሚቀበል ሰው መሆንህ በግልጽ ከታወቀ ከብዙ ፈተና ያድንሃል።