ሰዎችን ወደ ክርስቶስ በማምጣት ለሚገኝ ስኬት የሚያስፈልጉ አጠቃላይ ቅድመ ሁኔታዎች

ሰዎችን ወደ ክርስቶስ በማምጣት እውነተኛ ስኬት ለማግኘት ፈጽሞ የግድ መሟላት ያለባቸው አንዳንድ አጠቃላይ ቅድመ ሁኔታዎች አሉ። ደግነቱ እነዚህ ቅድመ ሁኔታዎች ጥቂቶችና ቀላሎች ናቸው፤ ማንም ሰው ሊያሟላቸው የሚችላቸውም ናቸው።

1. ሌሎችን ወደ ክርስቶስ በማምጣት እውነተኛ ስኬት ሊኖረው የሚወድ ሰው ራሱ ፈጽሞ የተለወጠ ሰው መሆን አለበት። ኢየሱስ ጴጥሮስን፦ «አንተም በተመለስህ ጊዜ ወንድሞችህን አጽና» አለው። ጴጥሮስ ጌታውን በፍርሃት ከካደ በኋላ በፍጹም ልቡ ወደ እርሱ እስኪመለስ ድረስ ወንድሞቹን ለመርዳት የሚያስችል ሁኔታ ላይ አልነበረም። እኛም ሌሎችን ወደ ክርስቶስ ለማምጣት ከፈለግን ከኃጢአት ሁሉ፣ ከዓለማዊነትና ከራስ ወዳድነት በፍጹም ልባችን ዘወር ማለትና በሐሳባችን፣ በዓላማችንና በተግባራችን ላይ ፍጹም ጌትነትን ለኢየሱስ መስጠት አለብን። የራሳችንን መንገድ የምንፈልግበትና እርሱ በሕይወታችን የራሱን መንገድ እንዲይዝ የማንፈቅድበት አንዳች አቅጣጫ ቢኖር ኃይላችን ይሽመደመዳል፤ ልናድናቸው እንችል የነበሩ ሰዎችም ይጠፋሉ። በእያንዳንዱ ወጣት ክርስቲያን ሕይወት ውስጥ ይህን ወይም ያን ላድርግ ወይስ አላድርግ በሚል ለሚነሡት ብዙ ጥያቄዎች ይህን መርሕ እንዴት ተግባራዊ ማድረግ እንዳለበት፣ በአእምሮው ውስጥ ከሁሉ በላይ የሆነው የራሱ ደስታ ሳይሆን የክርስቶስ ክብር ከሆነና እግዚአብሔር እንዲመራው በቅንነት ወደ እርሱ ከተመለከተ፣ እያንዳንዱ ሰው ለራሱ ሊወስን ይችላል።

2. ሌሎችን ወደ ክርስቶስ በማምጣት እውነተኛ ስኬት ሊኖረው የሚወድ ሰው ለነፍሳት ፍቅር፣ ማለትም የጠፉት እንዲድኑ የሚናፍቅ ልብ ሊኖረው ይገባል። ለነፍሳት ፍቅር ከሌለን ጥረታችን እንደ ማሽን ሥራ ደረቅና ኃይል አልባ ይሆናል። ሰዎችን እንዴት እንደምንቀርብና ምን እንደምንላቸው እናውቅ ይሆናል፤ ነገር ግን በምንናገረው ውስጥ ኃይል አይኖርም፤ ልብንም አይነካም። እንደ ጳውሎስ ግን ስላልዳኑት ሰዎች «በልባችን ታላቅ ኀዘንና የማያቋርጥ ጭንቀት» ቢኖረን፣ በድምፃችንና በአቀራረባችን እጅግ ግድ የለሽ የሆነውን ሰው እንኳ የሚነካ ልባዊ ትጋት ይኖራል። ከዚህም በላይ ለነፍሳት ፍቅር ካለን፣ ካልዳኑት ጋር ለመነጋገር የሚያስችሉ አጋጣሚዎችን ዘወትር እንጠባበቃለን፤ ያለዚያ ፈጽሞ ሳናስተውላቸው የሚያልፉ አጋጣሚዎችንም በመንገድ ላይ፣ በሱቅ ውስጥ፣ በቤት ውስጥ፣ በባቡር ውስጥና በየትኛውም ቦታ እናገኛለን።

ታዲያ አንድ ሰው ለነፍሳት ፍቅርን እንዴት ሊያገኝ ይችላል? የዚህ ጥያቄ መልስ ቀላል ነው። በመጀመሪያ ደረጃ፣ ለነፍሳት ያለ ፍቅር እንደ ማንኛውም ሌላ የክርስቲያናዊ ባሕርይ ጸጋ የመንፈስ ቅዱስ ሥራ ነው። ስለዚህ ሊኖረን የሚገባው ለነፍሳት ያለ ፍቅር እንደሌለን ከተገነዘብን፣ በመጀመሪያ ማድረግ ያለብን ወደ እግዚአብሔር ሄደን ይህን በሕይወታችን ያለውን ጉድለት በትሕትና መናዘዝ፣ ያን እጅግ የሚያስፈልገንን ነገር በመንፈስ ቅዱሱ እንዲሰጠን መለመንና እንደሚያደርገውም መጠበቅ ነው (1ኛ ዮሐንስ 5:14-15፤ ፊልጵስዩስ 4:19)። በሁለተኛ ደረጃ፣ ኢየሱስ ክርስቶስ ለነፍሳት ጥልቅ ፍቅር ነበረው (ማቴዎስ 23:37፤ ሉቃስ 19:10)፤ ከእርሱ ጋር ያለ የቅርብና የማያቋርጥ ኅብረትም በእርሱ ሕይወት ውስጥ እጅግ ጎልቶ የታየውን ይህን ጸጋ ለሕይወታችን ያካፍለናል። በሦስተኛ ደረጃ፣ ስሜቶች የሐሳቦች ውጤቶች ናቸው። በሕይወታችን አንድን ስሜት ከፈለግን ያንን ስሜት ለማስገኘት በሚስማሙ ሐሳቦች ላይ ማሰላሰል ይገባናል። ማንኛውም የዳነ ሰው ከክርስቶስ ውጭ ያለ ሰው ያለበትን አደጋና ጉስቁልና፣ እንዲሁም የእግዚአብሔር ልጅ እርሱን ለማዳን በመሞቱ እንደሚታየው ነፍሱ በእግዚአብሔር ፊት ያላትን ዋጋ በበቂ ሁኔታ ቢያሰላስል፣ ለዚያ ሰው መዳን የሚሆን ጽኑ ምኞት መከተሉ ከሞላ ጎደል የማይቀር ነው። በአራተኛ ደረጃ፣ ያለ ክርስቶስ የነበርንበትን የጠፋና የተጐሳቈለ ሁኔታችንን፣ እንዲሁም ክርስቶስ እኛን ለማዳን የከፈለውን ታላቅ መሥዋዕት ማሰላሰል ሌሎችን ወዳገኘነው አዳኝ የማምጣትን ምኞት በልባችን እንደሚሞላ የተረጋገጠ ነው።

3. ሰዎችን ወደ ክርስቶስ በማምጣት እውነተኛ ስኬት ሊኖረው የሚወድ ሰው መጽሐፍ ቅዱስን በተግባር የመጠቀም እውቀት ሊኖረው ይገባል። የእግዚአብሔር ቃል የመንፈስ ሰይፍ ነው (ኤፌሶን 6:17)። እግዚአብሔር ስለ ኃጢአት ለመውቀስ፣ ክርስቶስን ለመግለጥና ሰዎችን ዳግመኛ ለመውለድ የሚጠቀምበት መሣሪያ እርሱ ነው። ከእግዚአብሔር ጋር አብረን ልንሠራ ከወደድን፣ ሰዎችን ወደ ክርስቶስ በማምጣት ልንታመንበትና ልንጠቀምበት የሚገባን መሣሪያ መጽሐፍ ቅዱስ ነው። (1) ሰዎች አዳኝ እንደሚያስፈልጋቸው ለማሳየት፣ (2) የሚያስፈልጋቸው አዳኝ ኢየሱስ መሆኑን ለማሳየት፣ (3) ይህን አዳኝ የግል አዳኛቸው እንዴት ሊያደርጉት እንደሚችሉ ለማሳየት፣ (4) ክርስቶስን እንዳይቀበሉ መንገዳቸውን የዘጉባቸውን ችግሮች ለመፍታት መጽሐፍ ቅዱስን እንዴት መጠቀም እንዳለብን ማወቅ አለብን። የሚከተሉት ገጾች ሰፊ ክፍል ይህን እውቀት ለማስተላለፍ ይውላል።

4. ሰዎችን ወደ ክርስቶስ በማምጣት እውነተኛ ስኬት ሊኖረው የሚወድ ሰው አብዝቶ መጸለይ አለበት። ነፍሳትን የመማረክ ጽኑ ሥራ በእያንዳንዱ እርምጃ ከጸሎት ጋር መሄድ አለበት። (1)። እግዚአብሔር ልንቀርባቸው ወደሚገቡ ትክክለኛ ሰዎች እንዲመራን መጸለይ አለብን። እግዚአብሔር ያገኘነውን ሰው ሁሉ እንድናነጋግር አይፈልግም። ይህን ለማድረግ ብንሞክር፣ ብዙ መልካም ነገር ልናደርግላቸው የምንችላቸውን ሰዎች ለማነጋገር ልንጠቀምበት እንችል የነበረውን ብዙ ውድ ጊዜ ልንረዳቸው የማንችላቸውን ሰዎች በማነጋገር እናባክናለን። እንድናነጋግረው የሚፈልገውን ሰው የሚያውቅ እግዚአብሔር ብቻ ነው፤ ስለዚህ ያንን ሰው እንዲያመለክተን መለመንና እንደሚያደርገውም መጠበቅ አለብን (የሐዋርያት ሥራ 8:29)። (2)። እግዚአብሔር ወደ እነርሱ ለሚመራን ሰዎች በትክክል ምን እንደምንናገር እንዲያሳየን መጸለይ አለብን። ከተለያዩ የሰዎች ዓይነቶች ጋር ስንነጋገር የምንጠቀምባቸውን ክፍሎች ሁሉ ካጠናን በኋላም እንኳ፣ በእያንዳንዱ የተለየ ሁኔታ የእግዚአብሔር ምሪት ያስፈልገናል። ልምድ ያለው ሠራተኛ ሁሉ፣ እግዚአብሔር ያለዚያ የማይጠቀሙበትን አንድ የመጽሐፍ ቅዱስ ጥቅስ እንዲጠቀሙ መርቷቸው ጥቅሱ በትክክል የሚያስፈልገው ሆኖ የተገኘባቸውን ብዙ አጋጣሚዎች ይመሰክራል። (3)። እግዚአብሔር እንድንናገር ለሰጠን ቃል ኃይልን እንዲሰጥ መጸለይ አለብን። ከእግዚአብሔር የሆነ መልእክት ብቻ ሳይሆን መልእክቱን ወደ ልብ የሚያደርስ ከእግዚአብሔር የሆነ ኃይልም ያስፈልገናል። አብዛኞቹ ሠራተኞች ይህን ትምህርት የሚማሩት በሚያዋርዱ ገጠመኞች ነው። ካልዳነ ሰው አጠገብ ተቀምጠው ይከራከራሉ፣ ይማጸናሉ፣ ከእግዚአብሔር ቃልም ጥቅሶችን ያቀርባሉ፤ ሰውየው ግን ክርስቶስን አይቀበልም። በመጨረሻ ሰውየውን በራሳቸው ብርታት ለመለወጥ እየሞከሩ እንደ ነበረ ይገለጥላቸዋል፤ ከዚያም ብርታቱን እንዲሰጣቸው ትሑትና ልባዊ ጸሎት ወደ እግዚአብሔር ያቀርባሉ፤ እግዚአብሔርም ይሰማል፤ በአጭር ጊዜም ይህ «እጅግ አስቸጋሪ ጉዳይ» ውሳኔውን ያደርግና በክርስቶስ ደስ ይለዋል። (4)። ሥራችን ካበቃ በኋላ እግዚአብሔር ሥራውን እንዲቀጥል መጸለይ አለብን። በማንኛውም አጋጣሚ ግዴታችንን በሙሉ የፈጸምን በሚመስለን ጊዜ፣ የሥራችን ውጤት የተሳካም ይሁን ያልተሳካ የሚመስለው ምንም ቢሆን፣ ጉዳዩን በግልጽ በጸሎት ለእግዚአብሔር አደራ መስጠት ይገባናል። በዚህ በችኮላ ዘመን ያለ አማካይ ሠራተኛ ልቡ ውስጥ ሊቀረጽለት የሚገባ አንድ ነገር ቢኖር የበለጠ የመጸለይ አስፈላጊነት ነው። አብልጠን በመጸለያችን ሥራችን አያንስም፤ እጅግ የበለጠ ግን እንፈጽማለን።

5. ሰዎችን ወደ ክርስቶስ በማምጣት እውነተኛ ስኬት ሊኖረው የሚወድ ሰው «በመንፈስ ቅዱስ የተጠመቀ» መሆን አለበት። ኢየሱስ ደቀ መዛሙርቱን ወጥተው ሰዎችን ወደ እርሱ እንዲያመጡ ታላቁን ተልእኮ ከሰጣቸው በኋላ፦ «ነገር ግን መንፈስ ቅዱስ በእናንተ ላይ በወረደ ጊዜ ኃይልን ትቀበላላችሁ» አላቸው። ነፍሳትን የመማረክ ኃይል ዋናው ቅድመ ሁኔታ ዛሬም ያው ነው፦ «መንፈስ ቅዱስ በእናንተ ላይ በወረደ ጊዜ»። «በመንፈስ ቅዱስ መጠመቅ» ምን እንደ ሆነና ማንኛውም ክርስቲያን እንዴት ሊያገኘው እንደሚችል የሚያጠና ምዕራፍ ከዚህ በኋላ ይቀርባል።