ስለ ንስሐ የቀጠለ ምክር

የእግዚአብሔር ጸጋ አገልጋዮች በመንፈስ ቅዱስ ስለ ንስሐ ተናገሩ፤ የሁሉም ጌታ ራሱም ስለ እርሱ በመሐላ እንዲህ ብሎ አወጀ፦ «እኔ ሕያው ነኝ፥ ይላል ጌታ፥ የኃጢአተኛውን ሞት አልወድም፥ ይልቁንም ንስሐውን እንጂ»፤ ደግሞም ይህን የጸጋ ቃል ጨመረበት፦ «የእስራኤል ቤት ሆይ፥ ከዓመፃችሁ ንስሐ ግቡ። ለሕዝቤ ልጆች እንዲህ በላቸው፦ ኃጢአታችሁ ከምድር እስከ ሰማይ ቢደርስ፥ ከቀይ ግምጃም ይልቅ ቢቀላ፥ ከማቅም ይልቅ ቢጠቍር፥ በፍጹም ልባችሁ ወደ እኔ ብትመለሱና፦ አባት ሆይ! ብትሉ፥ እንደ ቅዱስ ሕዝብ እሰማችኋለሁ።» በሌላም ስፍራ እንዲህ ይላል፦ «ታጠቡ፥ ንጹሓንም ሁኑ፤ የነፍሳችሁን ክፋት ከዓይኔ ፊት አርቁ፤ ከክፉ መንገዳችሁ ተከልከሉ፥ መልካም ማድረግንም ተማሩ፤ ፍርድን ፈልጉ፥ የተገፋውን አድኑ፥ ለድሀ አደጉ ፍረዱ፥ ለመበለቲቱም ፍትሕ እንዲደረግላት ተመልከቱ፤ ኑ፥ እንዋቀስ። እንዲህም ይላል፦ ኃጢአታችሁ እንደ ደም ቢቀላ እንደ በረዶ አነጻዋለሁ፤ እንደ አለላም ቢሆን እንደ የበግ ጠጕር አነጻዋለሁ። ብትወዱና ብትሰሙኝ የምድርን መልካም ትበላላችሁ፤ እምቢ ብትሉና ባትሰሙኝ ግን ሰይፍ ይበላችኋል፤ የጌታ አፍ ይህን ተናግሮአልና።» እንግዲህ የሚወዳቸው ሁሉ የንስሐ ተካፋዮች እንዲሆኑ ወድዶ፣ ሁሉን በሚችል ፈቃዱ [እነዚህን ቃሎች] አጸና።