የንስሐ ምክር

ወዳጆች ሆይ፥ ይህን የምንጽፍላችሁ ግዴታችሁን ልናሳስባችሁ ብቻ ሳይሆን ራሳችንንም ልናስታውስ ነው። እኛ በአንድ የትግል ሜዳ ላይ ነንና፤ ያው ተጋድሎም ለሁለታችንም ተሰጥቶአል። ስለዚህ ከንቱና ፍሬ ቢስ የሆኑትን ጭንቀቶች ትተን ወደ ቅዱሱ መጠራታችን ወደ ከበረውና ወደ ተከበረው ሥርዓት እንቅረብ። በፈጠረን በእርሱ ፊት መልካም፣ ደስ የሚያሰኝና ተቀባይነት ያለው የሆነውን እናስብ። ወደ ክርስቶስ ደም አትኩረን እንመልከት፤ ስለ መዳናችን የፈሰሰው ያ ደም ለዓለም ሁሉ የንስሐን ጸጋ አቅርቦአልና በእግዚአብሔር ዘንድ ምን ያህል ክቡር እንደ ሆነ እንይ። ያለፉትን ዘመናት ሁሉ እንመርምር፤ ጌታም ከትውልድ እስከ ትውልድ ወደ እርሱ ለመመለስ ለሚወዱ ሁሉ የንስሐ ስፍራ እንደ ሰጠ እንማር። ኖኅ ንስሐን ሰበከ፤ የሰሙትም ሁሉ ዳኑ። ዮናስ ለነነዌ ሰዎች ጥፋትን አወጀ፤ እነርሱ ግን ከእግዚአብሔር [ቃል ኪዳን] የራቁ ባዕዳን ቢሆኑም ከኃጢአታቸው ንስሐ ገብተው በጸሎት እግዚአብሔርን አስታረቁ፤ መዳንንም አገኙ።