በቤተ ክርስቲያን ያለው የአገልጋዮች ሥርዓት

ሐዋርያት ወንጌልን ከጌታ ከኢየሱስ ክርስቶስ ተቀብለው ሰበኩልን፤ ኢየሱስ ክርስቶስም [እንዲሁ ያደረገው] ከእግዚአብሔር [ተቀብሎ] ነው። እንግዲህ ክርስቶስ ከእግዚአብሔር ተላከ፤ ሐዋርያትም ከክርስቶስ። ሁለቱም ሹመቶች እንደ እግዚአብሔር ፈቃድ በሥርዓት ተደረጉ። ስለዚህ ትእዛዛቸውን ተቀብለው፣ በጌታችን በኢየሱስ ክርስቶስ ትንሣኤ ፈጽመው ተረድተው፣ በእግዚአብሔርም ቃል ጸንተው፣ በመንፈስ ቅዱስ ሙሉ መረዳት የእግዚአብሔር መንግሥት እንደ ቀረበች እያወጁ ወጡ። እንዲህም በየአገሩና በየከተማው እየሰበኩ የ[ድካማቸውን] በኵራት፣ አስቀድመው በመንፈስ ከፈተኑአቸው በኋላ፣ በኋላ ለሚያምኑት ኤጲስ ቆጶሳትና ዲያቆናት አድርገው ሾሙአቸው። ይህም አዲስ ነገር አልነበረም፤ በእርግጥ ከብዙ ዘመናት በፊት ስለ ኤጲስ ቆጶሳትና ዲያቆናት ተጽፎ ነበርና። መጽሐፍ በአንድ ስፍራ እንዲህ ይላልና፦ «ኤጲስ ቆጶሳቶቻቸውን በጽድቅ፥ ዲያቆናቶቻቸውንም በእምነት እሾማለሁ።»