ክርስቶስ አለቃችን ነው፤ እኛም ወታደሮቹ ነን

እንግዲህ ወንድሞች ሆይ፥ እንደ ቅዱሳት ትእዛዛቱ በሙሉ ትጋት የወታደርነትን ሥራ እንሥራ። በአለቆቻችን ሥር የሚያገለግሉት የታዘዙትን በምን ያህል ሥርዓት፣ መታዘዝና መገዛት እንደሚፈጽሙ እናስብ። ሁሉም አዛዦች አይደሉም፤ ሁሉም የሺህ አለቆች ወይም የመቶ አለቆች ወይም የኀምሳ አለቆች ወይም የመሳሰሉት አይደሉም፤ ነገር ግን እያንዳንዱ በራሱ ማዕረግ ንጉሡና አለቆቹ ያዘዙትን ይፈጽማል። ታላላቆች ያለ ታናናሾች፣ ታናናሾችም ያለ ታላላቆች ሊኖሩ አይችሉም። በሁሉ ነገር አንድ ዓይነት መደባለቅ አለ፤ ከዚያም የጋራ ጥቅም ይገኛል። ሰውነታችንን ለምሳሌ እንውሰድ። ራስ ያለ እግሮች ምንም አይደለም፤ እግሮችም ያለ ራስ ምንም አይደሉም፤ እንዲያውም የሰውነታችን እጅግ ትንንሽ ብልቶች እንኳ ለሰውነቱ ሁሉ አስፈላጊና ጠቃሚ ናቸው። ነገር ግን ሁሉም በስምምነት አብረው ይሠራሉ፤ ሰውነቱም ሁሉ እንዲጠበቅ በአንድ የጋራ ሥርዓት ሥር ይገዛሉ።