የምንጸድቀው በእምነት እንጂ በራሳችን ሥራ አይደለም

እያንዳንዱን ነገር በቅንነት የሚመረምር ሁሉ በእርሱ የተሰጡትን ስጦታዎች ታላቅነት ይገነዘባል። በእግዚአብሔር መሠዊያ የሚያገለግሉ ካህናትና ሌዋውያን ሁሉ ከእርሱ ወጥተዋልና። ጌታችን ኢየሱስ ክርስቶስም በሥጋ ከእርሱ [ተወለደ]። ከእርሱም ከይሁዳ ወገን ነገሥታት፣ መሳፍንትና ገዦች [ተነሡ]። ሌሎቹ ነገዶቹም በትንሽ ክብር አይደሉም፤ እግዚአብሔር፦ «ዘርህ እንደ ሰማይ ከዋክብት ይሆናል» ብሎ ተስፋ ሰጥቶ ነበርና። እንግዲህ እነዚህ ሁሉ የከበሩትና ታላቅ የሆኑት ስለ ራሳቸው ወይም ስለ ሥራቸው ወይም ስለ ሠሩት ጽድቅ ሳይሆን በፈቃዱ አሠራር ነው። እኛም ደግሞ በክርስቶስ ኢየሱስ በፈቃዱ ተጠርተን፣ በራሳችን ወይም በራሳችን ጥበብ ወይም ማስተዋል ወይም እግዚአብሔርን በመምሰል ወይም በልብ ቅድስና በሠራነው ሥራ አንጸድቅም፤ ነገር ግን ሁሉን የሚችል እግዚአብሔር ከመጀመሪያ ጀምሮ ሰዎችን ሁሉ ባጸደቀበት በዚያ እምነት ነው፤ ለእርሱ ከዘላለም እስከ ዘላለም ክብር ይሁን። አሜን።