በትንሣኤ ተስፋ

እንግዲህ ይህ ተስፋ ስላለን ነፍሳችን በተስፋ ቃሉ ከታመነ፣ በፍርዱም ጻድቅ ከሆነው ከእርሱ ጋር ትተሳሰር። እንዳንዋሽ ያዘዘን እርሱ ራሱማ ከቶ አይዋሽም፤ ከመዋሸት በቀር በእግዚአብሔር ዘንድ የሚሳነው ነገር የለምና። ስለዚህ በእርሱ ያለን እምነት በውስጣችን እንደ ገና ይነሣሣ፤ ሁሉም በእርሱ ዘንድ ቅርብ እንደ ሆነ እናስብ። በግርማው ቃል ሁሉን አጸና፤ በቃሉም ሊገለብጠው ይችላል። «ምን አደረግህ? የሚለው ማን ነው? ወይስ የብርታቱን ኃይል የሚቃወም ማን ነው?» በወደደው ጊዜና እንደ ወደደው ሁሉን ያደርጋል፤ እርሱ ከወሰናቸውም ነገሮች አንዳቸውም አያልፉም። ሁሉ በፊቱ የተገለጠ ነው፤ ከምክሩም አንዳች ሊሰወር አይችልም። «ሰማያት የእግዚአብሔርን ክብር ይናገራሉ፤ ጠፈርም የእጁን ሥራ ያወራል። ቀን ለቀን ነገርን ይናገራል፥ ሌሊትም ለሌሊት እውቀትን ያስታውቃል። ድምፃቸው የማይሰማበት ቃል ወይም ንግግር የለም።»