በታማኝ እጆች ወደ አገሩ ተወሰደ

«የቅዱሳኑ ሞት በእግዚአብሔር ፊት ክቡር ነው።» — ከመዝሙር 116

በኦገስት 1872 ዴቪድ ከሱሲ፣ ከቹማ፣ ማጅዋራ ከሚባል አንድ ብላቴና፣ እንዲሁም በልጅነቱ ከባርነት ነጻ እንደ ወጣው እንደ ያዕቆብ ዌይንራይት ካሉ አዳዲስ ረዳቶች ጋር እንደ ገና ጉዞ ጀመረ። ለብዙ ሳምንታት ረግረጋማ ቦታዎችን በእግራቸው አቋረጡ፤ አንዳንድ ጊዜም ውኃው እስከ ደረታቸው ይደርስ ነበር። ዴቪድ እጅግ ስለ ደከመ ወዳጆቹ ከምሰሶዎች በተሠራ አልጋ ላይ አድርገው ተሸከሙት።

በኤፕሪል 1873 መጨረሻ ላይ ወደ ቺታምቦ መንደር ደረሱ። እኩለ ሌሊት ገደማ ዴቪድ ሱሲን ጠራው፤ ሱሲም መድኃኒቱን እንዲያገኝ ረዳው። ከዚያም፣ ሱሲ እንደሚያስታውሰው፣ ዴቪድ ሁሉም ደህና እንደ ሆነና አሁን መሄድ እንደሚችል ነገረው።

ጎሕ ሳይቀድ፣ ሁልጊዜ በዴቪድ በር አጠገብ የሚተኛው ብላቴናው ማጅዋራ፣ ዴቪድ ራሱን በእጆቹ ይዞ እንደሚጸልይ ሆኖ ከአልጋው አጠገብ ተንበርክኮ አየው። በኋላም ዴቪድ ከቦታው እንዳልተንቀሳቀሰ አይቶ ሌሎቹን ጠራ። ዴቪድ በሌሊት ሞቶ ነበር፤ ምናልባትም በሜይ 1 ቀን 1873። ወዳጆቹ፣ በሕይወቱ ዘመን ሁሉ በየቀኑ ይጸልይ እንደ ነበረ፣ እየጸለየ እንደ ሞተ አመኑ።

ወዳጆቹ ሱሲንና ቹማን መሪዎቻቸው አድርገው መረጡ፤ የገዛ ወገኖቹ እንዲቀብሩት ዴቪድን ወደ አገሩ ተሸክመው ለመውሰድም ወሰኑ። ልቡን በአፍሪካ፣ በአንድ ትልቅ ዛፍ ሥር ቀበሩት፤ ያዕቆብም የዴቪድን ስም በዛፉ ላይ ቀረጸ። ከዚያም በጥንቃቄ የተጠቀለለውን አስከሬኑን አንድ ሺህ ማይል ያህል ተሸክመው ወደ ባሕሩ ዳርቻ ወሰዱት። አንድ እንግሊዛዊ መኰንን ባሉበት ቦታ እንዲቀብሩት በነገራቸው ጊዜ እንቢ አሉ።

በኤፕሪል 1874 ዴቪድ በዌስትሚኒስተር አቢ ተቀበረ። ያዕቆብ ዌይንራይት የሬሳ ሣጥኑን በመሸከም ረዳ። በመቃብሩ ላይ ዴቪድ «በታማኝ እጆች በየብስና በባሕር ላይ ተጓጉዞ የመጣ» እንደ ሆነ ተጽፏል። በ1886 ሱሲ ተጠመቀ፤ ዴቪድ የሚለውንም ስም ወሰደ።

ዴቪድ ከሞተ ከአንድ ወር በኋላ በዛንዚባር የነበረው ታላቁ የባሪያ ገበያ ተዘጋ፤ ቀድሞ ሰዎች ይገዙና ይሸጡ በነበረበት ቦታ ላይም ቤተ ክርስቲያን ተሠራ። ዛሬ እርሱ በተመላለሰባቸው አገሮች በአፍሪካውያን የሚመሩ ታላላቅ አብያተ ክርስቲያናት አሉ።

ኢየሱስ አንድ ዘር ከማደጉ በፊት ወደ መሬት መውደቅ እንዳለበት ተናግሯል። ዴቪድ የሕይወቱን ፍሬ ለማየት በሕይወት አልቆየም፤ እግዚአብሔር ግን አየው።

ውድ እግዚአብሔር ሆይ፣ ስለ ዴቪድ ሊቪንግስተንና ስለ ታማኝ ወዳጆቹ ሁሉ አመሰግንሃለሁ። በሕይወቴ ዘመን ሁሉ ለአንተና ለምትሰጠኝ ሰዎች ታማኝ እንድሆን እርዳኝ። አሜን።