ቀን 24 — ማርያም እሺ አለች

«ማርያምም። እነሆኝ የጌታ ባሪያ እንደ ቃልህ ይሁንልኝ አለች። መልአኩም ከእርስዋ ሄደ።»

— ሉቃስ 1:38

ማርያም ናዝሬት በምትባል ትንሽ ከተማ የምትኖር ወጣት ሴት ነበረች። ምናልባትም ገና በአሥራዎቹ ዕድሜ የምትገኝ ልጃገረድ ነበረች። ዮሴፍ ለሚባል አንድ አናጢ ታጭታ ነበር። ተራ ሕይወት ለመኖር ታቅድ ነበር።

ከዚያም አንድ ቀን መልአኩ ገብርኤል ተገለጠላት። እንዲህም አላት፦ «ደስ ይበልሽ፥ ጸጋ የሞላብሽ ሆይ፥ ጌታ ከአንቺ ጋር ነው።»

ማርያም ግራ ተጋባች፤ ፈራችም። ይህ ምን ማለት ነው?

ገብርኤልም አንድ አስደናቂ ነገር ነገራት፦ እግዚአብሔር የልጁ እናት እንድትሆን መርጧታል። ልጅ ትወልዳለች፤ ስሙንም ኢየሱስ ትለዋለች። እርሱም የልዑል ልጅ ይባላል፤ ለመንግሥቱም መጨረሻ የለውም።

ማርያምም «ይህ እንዴት ይሆናል?» ብላ ጠየቀች። ገና አላገባችም ነበር። ገብርኤልም ይህን የሚያደርገው መንፈስ ቅዱስ እንደ ሆነ አስረዳት። «ለእግዚአብሔር የሚሳነው ነገር የለምና።»

እግዚአብሔር ማርያምን ምን እየጠየቃት እንደ ነበረ እስቲ አስቢ። ሰዎች ላያምኗት ይችላሉ። ስለ እርሷ ሊያሙ ይችላሉ። ዮሴፍም ላይረዳት ይችላል። ሕይወቷ በሙሉ ይለወጣል። ድንቅ ነገር ይሆናል፤ ነገር ግን ከባድም ይሆናል።

ማርያምም በመጽሐፍ ቅዱስ ውስጥ ካሉት እጅግ ደፋር ቃላት አንዳንዶቹን መለሰች፦ «እነሆኝ የጌታ ባሪያ እንደ ቃልህ ይሁንልኝ።»

በሌላ አነጋገር፦ እሺ፣ እግዚአብሔር ሆይ። የምትፈልገውን ሁሉ አደርጋለሁ። በአንተ እታመናለሁ።

ማርያም ሁሉ ነገር እንዴት እንደሚሆን አላወቀችም። ሁሉንም አልተረዳችም ነበር። ቢሆንም ለእግዚአብሔር እሺ አለች።

እምነት ማለት ይህ ነው። ለጥያቄዎች ሁሉ መልስ ማግኘት አይደለም። ወደ ፊት የሚሆነውን ባታውቂም እንኳ እሺ እስክትዪ ድረስ በእግዚአብሔር መታመን ነው።

እግዚአብሔር ማርያምን የጠየቃትን ነገር አንቺን ላይጠይቅሽ ይችላል። ነገር ግን በብዙ መንገዶች እሺ እንድትዪው ይጠይቅሻል። አንድን ሰው ይቅር ለማለት እሺ። እውነትን ለመናገር እሺ። ማንም ለማይወዳት ልጅ ደግ ለመሆን እሺ። ጓደኞችሽ ባይከተሉትም እንኳ እርሱን ለመከተል እሺ።

እውነተኛ ታሪክ፦ ሜሪ ስሌሰር በስኮትላንድ በድህነት ያደገች ልጅ ነበረች። ገና የአሥራ አንድ ዓመት ልጅ ሳለች በፋብሪካ ውስጥ መሥራት ጀመረች፤ ልትገራው የሚገባት ቁጡ ባሕርይም ነበራት። ነገር ግን ለእግዚአብሔር እሺ አለች፤ ባደገችም ጊዜ ስለ ኢየሱስ ለሰዎች ለመንገር በመርከብ ተጉዛ በአፍሪካ ወደምትገኘው ወደ ካላባር ሄደች። በዚያ አገር መንትያ ሕፃናት እንደ ተረገሙ ይታሰብ ስለ ነበር በጫካ ውስጥ ይጣሉ ነበር። ሜሪ ይህ ክፉ ውሸት ነው ብላ አሰበች። መንትያ መወለዳቸውን በሰማች ቁጥር ወደ ጫካው፣ ወደ ጨለማውና ወደ ተቈጡ ሰዎች መካከል እየሮጠች ትገባ ነበር፤ ሕፃናቱንም ተሸክማ ወደ ቤት ታመጣቸው ነበር። አንዲት ደፋር ሴት ለእግዚአብሔር እሺ ስላለች፣ መንትያዎችን የመግደሉ ልማድ መቆም ጀመረ። ሙሉ ታሪኳን ለእግዚአብሔር ደፋር በተባለው መጽሐፍ ውስጥ ማንበብ ትችያለሽ።

አስቢበት፦ እግዚአብሔር «እሺ ጌታ ሆይ፣ በአንተ እታመናለሁ» እንድትዪው ሊጠይቅሽ የሚችልበት አንዱ የሕይወትሽ ክፍል የትኛው ነው?

ሞክሪው፦ ዛሬ የማርያምን ጸሎት ጸልዪ፦ «እነሆኝ የጌታ ባሪያ እንደ ቃልህ ይሁንልኝ።» ከዚያም እግዚአብሔር በፊትሽ ለሚያስቀምጠው ነገር ሁሉ እሺ በዪ።

ውድ እግዚአብሔር ሆይ፣ እንደ ማርያም ለአንተ እሺ ማለት እፈልጋለሁ። እኔ ባሪያህ ነኝ። የምታደርገውን ሁልጊዜ ባልረዳውም በአንተ እታመናለሁ። በየቀኑ ለአንተ እሺ እንድል እርዳኝ። በኢየሱስ ስም፣ አሜን።