ሲላ

«ሁለት ከአንድ ይሻላሉ፤ ለድካማቸው መልካም ዋጋ አላቸውና።» — ከመክብብ 4

በ1864 በአየርላንድ በቤልፋስት ከተማ አቅራቢያ ፕሪሲላ ሊቪንግስተን ስቱዋርት የተባለች ሴት ሕፃን ተወለደች። ወዳጆቿ ሲላ ብለው ይጠሯት ነበር። ሞቅ ያለ ልብ ያላት፣ ንቁና ተጫዋች ሆና አደገች።

በወጣትነቷ ሕይወቷን ለኢየሱስ ሰጠች፤ ወደ ቻይናም ለመሄድ ራሷን አቀረበች። ሃድሰን ቴለርና ወዳጆቹ በ1887 ዓመት ውስጥ መቶ አዳዲስ ሚስዮናውያን እንዲላኩ ጸልየው ነበር። በዚያ ዓመት መጨረሻ መቶ ሁለቱ በመርከብ ተጉዘው ነበር! ፕሪሲላ ከእነርሱ አንዷ ነበረች። ለቻይና ሴቶች ስለ ኢየሱስ ለመንገር ከሌሎች ሦስት ወጣት ሴቶች ጋር በአንድ ታላቅ ሐይቅ አጠገብ ባለች ከተማ ልትኖር ሄደች።

ቻርሊ በጥልቅ ወደዳት። በኋላ ሁለቱም ማን ማንን ለጋብቻ እንደ ጠየቀ እየተነጋገሩ ይስቁ ነበር። ቻርሊ ሁልጊዜ እርሷ እንደ ጠየቀችው ይናገር ነበር። ፕሪሲላ ደግሞ ሁልጊዜ እርሱ እንደ ጠየቃት ትናገር ነበር!

በ1888 መጀመሪያ ታጩ። ከዚያም ፕሪሲላ በጠና ታመመች፤ ቻርሊም ራሱ ከሕመም ገና እያገገመ ቢሆንም እንኳ ከእርሷ ጋር ለመሆን ተጓዘ። በዚያው ዓመት የጸደይ ወራት ተጋቡ። አብዛኞቹ ዘገባዎች ሠርጉ የተደረገው በቲየንጂን ከተማ እንደ ነበር ይናገራሉ። ያጋባቸው አንድ ቻይናዊ ፓስተር ነበር፤ የተለመደውን የቻይና ልብሳቸውን ለብሰው እንደ ነበርም ይነገራል።

ከሠርጉ በፊት ቻርሊ ለእርሷ ያስቀረውን ገንዘብ ለፕሪሲላ ሰጣት። ፕሪሲላ ግን የትዳር ሕይወታቸውን እርሱ እንደ ጀመረው፣ በእግዚአብሔር ብቻ በመታመን ለመጀመር ፈለገች። ስለዚህ ሁሉንም ለመዳን ሠራዊት ሰጠች! ሁለቱም በባንክ ምንም ሳይኖራቸው ትዳራቸውን ጀመሩ፤ በዚህም ተጸጽተናል ብለው ፈጽሞ አያውቁም።

መጽሐፍ ቅዱስ እርስ በርሳቸው ሊረዳዱ ስለሚችሉ ሁለት ከአንድ ይሻላሉ ይላል። ቻርሊና ፕሪሲላ ለአርባ ዓመት እርስ በርሳቸው ተረዳዱ። እግዚአብሔር ብቻችንን ደፋሮች መሆን እንዳያስፈልገን ቤተሰቦችንና ወዳጆችን ይሰጠናል።

ውድ እግዚአብሔር ሆይ፣ ስለ ቤተሰቤና ስለ ወዳጆቼ አመሰግንሃለሁ። እርስ በርሳችን እንድንረዳዳና በአንድነት በአንተ እንድንታመን እርዳን። አሜን።