በጦርነት ዘመን የተሰማ ድምፅ

«በእናንተ ስላለ ተስፋ ምክንያትን ለሚጠይቁዋችሁ ሁሉ መልስ ለመስጠት ዘወትር የተዘጋጃችሁ ሁኑ፥ ነገር ግን በየዋህነት … ይሁን።» — ከ1ኛ ጴጥሮስ 3

በ1939 ሌላ ታላቅ ጦርነት ተጀመረ። ጃክ አርባ ዓመቱ ስለ ነበር ለመዋጋት ዕድሜው አልፎ ነበር። ነገር ግን በጥቂት ቀናት ውስጥ ከቦምቦቹ ለመዳን ከለንደን የመጡ የተማሪ ልጃገረዶች ቡድን በኪልንስ ሊኖሩ መጡ። በሚቀጥሉት ዓመታትም ብዙ ልጆች መጡ። ጃክ ከልጆች ጋር ብዙም ግንኙነት ኖሮት አያውቅም ነበር፤ ነገር ግን በእነርሱ መደሰቱን አወቀ!

በ1940 አንድ እሑድ ቤተ ክርስቲያን ተቀምጦ ሳለ ጃክ ለአንድ መጽሐፍ ሐሳብ መጣለት። መጽሐፉ አንድ አሮጌ ሰይጣን አንድን ሰው ከእግዚአብሔር እንዴት እንደሚያርቀው ለአንድ ወጣት ሰይጣን የሚያስተምርባቸው ደብዳቤዎች ይሆናል። በውስጡ ያለው ነገር ሁሉ የተገለበጠ ነበር! «የስክሩቴፕ ደብዳቤዎች» ተባለ፤ ሰዎችም እጅግ ወደዱት። ደብዳቤዎቹ መጀመሪያ በጋዜጣ ላይ በወጡ ጊዜ ጃክ ለእያንዳንዳቸው ይከፈለው ነበር። እርሱም ገንዘቡን ባልቴቶችን ለመርዳት ሰጠ።

ከዚያም ቢቢሲ ጃክን በሬዲዮ ንግግሮችን እንዲያቀርብ ጠየቀው። በ1941፣ ጦርነቱ ገና እንደ ቀጠለ፣ በመላው ብሪታንያ ያሉ ሰዎች ሬዲዮኖቻቸውን ከፍተው ክርስቲያኖች የሚያምኑትን የሚያብራራውን ጥልቅና ወዳጃዊ ድምፁን ሰሙ። በማዕድ ቤት ጠረጴዛ ዙሪያ ቁም ነገር እንደሚያወራ ሰው በግልጽ ይናገር ነበር። በመቶ የሚቆጠሩ ሰዎች ጻፉለት። ንግግሮቹ በኋላ «ተራ ክርስትና» (Mere Christianity) የሚባል መጽሐፍ ሆኑ፤ ይህም መጽሐፍ እጅግ ብዙ ሰዎች ወደ እምነት እንዲመጡ ረድቷል።

ጃክ ደግሞ ወጣት የአየር ኃይል አባላትን ለማነጋገር ወደ አየር ኃይል ሰፈሮች ተጓዘ። መጀመሪያ ላይ እጅግ ከብዶት ነበር። ቀላል ቃላትን መጠቀምንና ጥያቄዎቻቸውን ማዳመጥን ተማረ።

ጃክ ታዋቂ ሆነ። ታዋቂ መሆን ሊያስታብየው እንደሚችል ያውቅ ነበር። ስለዚህ ለአሥራ ሁለት ዓመት በየሳምንቱ ማለት ይቻላል ኃጢአቱን አባ አዳምስ ለሚባሉ ጠቢብ አረጋዊ ካህን ይናዘዝ ነበር። ከመጻሕፍቱ የሚያገኘውንም ገንዘብ አብዛኛውን ለተቸገሩ ሰዎች ይሰጥ ነበር።

ጃክ ካህን አልነበረም፤ ነገር ግን ሰዎች በሚረዱት ቃል ስለ ኢየሱስ ለመናገር ዝግጁ ነበር። በኢየሱስ ያለህን ተስፋ ለሌሎች ለማካፈል ብልህ ወይም ታዋቂ መሆን አያስፈልግህም። ኢየሱስ ለአንተ ምን ማለት እንደ ሆነ ለአንድ ሰው በደግነት በቀላሉ ልትነግረው ትችላለህ።

ውድ ኢየሱስ ሆይ፣ ስለ አንተ ለሌሎች በየዋህነትና በደግነት ለመናገር ዝግጁ እንድሆን እርዳኝ። ከትዕቢትም ጠብቀኝ። አሜን።