በጦርነት ጊዜ የተገባ ቃል

«ለእግዚአብሔር ስእለትን በተሳልህ ጊዜ ትፈጽመው ዘንድ አትዘግይ።» — ከመክብብ 5

በ1917 ጃክ በኦክስፎርድ ዩኒቨርሲቲ ለመማር ሄደ። ነገር ግን ታላቅ ጦርነት ነበር፤ አብዛኞቹ ወጣቶችም ለመዋጋት ሄደው ነበር። ጃክ ከአየርላንድ የመጣ ስለ ነበረ ወደ ሠራዊቱ እንዲገባ አይገደድም ነበር። ቢሆንም በራሱ ምርጫ ገባ።

ጃክ ኪብል በሚባል ኮሌጅ የጦር መኰንን ለመሆን ሠለጠነ። ፓዲ ሙር ከሚባል ወጣት ጋር አንድ ክፍል ተጋራ። ፓዲ በዕድሜ ከጃክ ጋር ከሞላ ጎደል እኩያ ነበር፤ እንደ እርሱም አየርላንዳዊ ነበር። የፓዲ እናት ወይዘሮ ሙር ከልጇ አጠገብ ለመሆን ከትንሿ ሴት ልጇ ከሞሪን ጋር ወደ ኦክስፎርድ መጥታ ነበር። ወይዘሮ ሙር ሞቅ ያለችና ደግ ሴት ነበረች፤ ጃክንም በደስታ ተቀበለችው።

ጃክና ፓዲ እርስ በርሳቸው ቃል ተገባቡ። ከሁለቱ አንዱ በጦርነቱ ቢገደል፣ በሕይወት የቀረው የሌላውን ወላጅ ሊንከባከብ ተስማሙ። ሞሪን ከብዙ ዓመታት በኋላ ይህን ቃል ኪዳን ታስታውሰው ነበር።

ጃክ በፈረንሳይ ወደሚገኙት የጦር ምሽግ ጉድጓዶች የደረሰው በአሥራ ዘጠነኛ የልደት ቀኑ፣ ኖቬምበር 29 ቀን 1917 ነበር። ብርድ፣ ጭቃና እጅግ ከባድ ነበር። በኤፕሪል 1918 በአንዲት የፈረንሳይ መንደር አጠገብ ውጊያ ሆነ። ስድሳ ያህል የጠላት ወታደሮች እጃቸውን ወደ ላይ አንሥተው ከጢሱ ውስጥ ወጡና ለጃክ እጃቸውን ሰጡ። እርሱም እጃቸውን ለመስጠት በመፈለጋቸው ደስ ብሎኛል ብቻ አለ!

በማግሥቱ፣ ኤፕሪል 15 ቀን 1918፣ አንድ የመድፍ ጥይት ከጃክ አጠገብ ፈነዳ። በእጁ፣ በእግሩና በደረቱ ላይ ቆሰለ። ጃክን ይንከባከብ የነበረው ሃሪ ኤርስ የሚባል ደግ ሳጅን ከአጠገቡ ቆሞ ነበር፤ እርሱም ተገደለ። ጃክ በሆስፒታል ዳነ፤ ነገር ግን አንዲት ትንሽ የብረት ፍንጣሪ ለብዙ ዓመታት በደረቱ ውስጥ ቀረች።

ፓዲ ወደ ቤቱ አልተመለሰም። በማርች በውጊያው ውስጥ ደብዛው ጠፍቶ ነበር፤ በኋላም ቤተሰቡ እንደ ተገደለ ሰሙ። ዕድሜው ገና አሥራ ዘጠኝ ዓመት ብቻ ነበር።

ጦርነት እጅግ አሳዛኝ ነገር ነው፤ ጃክም ስለ እርሱ መናገር አይወድም ነበር። ነገር ግን ገና በእግዚአብሔር ባላመነበት ጊዜ እንኳ እግዚአብሔር ሕይወቱን በእጁ ይዞ ነበር። ጃክም ቃል ገብቶ ነበር። አሁን ያንን ቃል መጠበቅ ይኖርበታል።

ውድ እግዚአብሔር ሆይ፣ እባክህ ዛሬ በጦርነት ምክንያት በአደጋ ውስጥ ካሉት ሁሉ ጋር ሁን። ከባድ ቢሆንም እንኳ የገባሁትን ቃል እንድጠብቅ እርዳኝ። አሜን።