ምዕራፍ 15 · 17 ደቂቃ ንባብ · 21 ደቂቃ ማዳመጥ
የካምፕ ስብሰባ ትዝታዎች
የመጀመሪያው አገር አቀፍ የቅድስና የካምፕ ስብሰባዬ በጁላይ ወር 1870 በኦኪንግተን፣ ሜሪላንድ የተደረገው ነበር። የዚህን ስብሰባ ማስታወቂያ በጋዜጣ ባየሁ ጊዜ መሄድ ደስ ይለኛል ብዬ አሰብሁ። ግን ያን ጊዜ ድሀ ልብስ አጣቢ ነበርሁ፤ እንዴት ልሄድ እችላለሁ? ወይዘሮ ማርጋሬት ክላርክ በዶሚኒክ ጎዳና ይኖሩ በነበረ ጊዜ ጥቂት ቀናት ልሠራላቸው ሄድሁ፤ እርሳቸውም በዱዌን ሜቶዲስት ቤተ ክርስቲያን ከሚንበለበሉት አባላት አንዷ፣ የጥንቱም ዓይነት የካምፕ ስብሰባ ሴት ነበሩ። አንድ ቀን፦ «እኅት ስሚዝ፣ በኦኪንግተን ወዳለው የካምፕ ስብሰባ መሄድ አለብሽ» አሉኝ።
እኔም፦ «ጥቂት ነገር እንዳገኝ የማረፊያውን ድንኳን የምጠብቅበት፣ ወይም በምግብ ድንኳኑ አስተናጋጅ የምሆንበት ሥራ ባገኝ መሄድ ደስ ይለኛል» አልሁ። የቤቴ ኪራይ በወር ስድስት ዶላር ነበር፤ ሁለት ሳምንት ሥራ ብቀርስ ምን አደርጋለሁ? ስለዚህ፦ «እስቲ ይጻፉልኝና ሥራ ያፈላልጉልኝ» አልኋቸው።
«እሺ፣ ይሁን» አሉ፤ «ነገር ግን በዚያ መንገድ ከስብሰባው ብዙ ጥቅም አታገኚም።»
«እንግዲህ» አልሁ፣ «በሌላ መንገድ መሄድ አልችልም።» እርሳቸውም፦ «መልካም» አሉ።
ወደ ቤቴ ሄጄ ጌታ መንገድ እንዲከፍትልኝ ጸለይሁ፤ ተስፋም አደረግሁ።
በሚቀጥለው ሳምንት ስሄድ ወይዘሮ ክላርክ ስለ ጻፉት ደብዳቤ መልካም ወሬ እሰማለሁ ብዬ ጠብቄ ነበር። እርሳቸው ግን ስለ ደብዳቤያቸው ገና መልስ እንዳልሰሙ ነገሩኝ፤ ደግሞም፦ «እኅት ስሚዝ፣ ለምን ጌታን አትታመኚውም፣ ሄደሽስ ከስብሰባው ጥቅም ለምን አታገኚም?» አሉኝ። ይህ አሳብ ልቤን ነካው፤ ላደርገው የምመኘው ልክ ይህንኑ ነበርና። ከዚያም፦ «ምን? ስለ ቤት ኪራዬ ጌታን ልታመን?» ብዬ አሰብሁ። እንዲህ ያለ ነገር ሰምቼ አላውቅም ነበር፤ እኔማ በእርግጥ አድርጌው አላውቅም። ለአንድ አፍታ አሰብሁና፦ «እታመናለሁ» አልሁ።
ከዚያም ወይዘሮ ክላርክ፦ «የራስሽን የፍራሽ ልባስ ይዘሽ ታስሞዪዋለሽ፤ በድንኳናችንም ውስጥ የምትተኚበት ቦታ ይኖርሻል፤ የምትከባከቢውም የእኛን ድንኳን ብቻ ነው» አሉ። ልቤ እንዴት በደስታ ዘለለ! ከዚያም እንዴት እንደማደርግ መከሩኝ፤ እኔም ተግቼ ሠራሁ፤ የቻልሁትን ሁሉ አሰባሰብሁ፤ እንዲሁም የደርሶ መልስ ትኬቴን ለመክፈል የሚበቃ አገኘሁ፤ ከዚያም የተረፈኝ ልክ አሥር ሳንቲም ብቻ ነበር። ጊዜው ሲደርስ ወይዘሮ ክላርክ፦ «ሳጥንሽን ወደ ቤታችን ላኪው፤ በማለዳ ከእኛ ዕቃ ጋር ይሄዳል» አሉኝ።
እንዲሁ አደረግሁ፤ ነገር ግን ሰውየው ጠዋት ከአሥራ ሁለት ሰዓት ትንሽ አልፎ እዚያ ሲደርስ ሁሉም ሄደው ነበር። ወደ ኮርትላንድ ጎዳና የጀልባ ማሻገሪያ ስደርስ ሳጥኔ በዚያ እንደሌለ አወቅሁ፤ ሰውየው ወደ ዲብሮስ ጎዳና የጀልባ ማሻገሪያ ወስዶት ነበር፤ ስለዚህ አንድ ሽማግሌ ሁለት ማይል ያህል ርቆ ወዳለው ወደ ዲብሮስ ጎዳና ብሄድ እንደሚሻለኝ ነገሩኝ። ልቤ ይመታ ነበር፤ ምን እንደማደርግ አላወቅሁም። «እጅግ ሩቅ ነው፤ እኔም በጣም ደክሞኛል፤ በእግሬ መሄድ አልችልም» ብዬ አሰብሁ። ባቡሩን እደርስበት ይሆናል ብዬ ስላሰብሁ የመንገድ ፈረስ ጋሪ ያዝሁ። ከዚያም፦ «ለመሄድና ለመመለስ አሥሩን ሳንቲም ብከፍል በጀልባው እንዴት እሻገራለሁ?» ብዬ አሰብሁ።
ተመለስሁ፤ ባቡሩ ግን እንደ ተጠበቀው አመለጠኝ። ከጠዋቱ ሁለት ሰዓት ገደማ እስከ አራት ሰዓት ተኩል ድረስ መጠበቅ ነበረብኝ። ሁሉ ነገር የተቃወመኝ መሰለ። ኧረ እንዴት አጥብቄ ጸለይሁ! ትኬቴን ልገዛ ስሄድ ሃያ አምስት ሳንቲም እንደ ጎደለኝ አወቅሁ፤ ይህም የጉብኝት ቅናሽ ትኬት ብገዛ ነው፤ ስለዚህ ምን እንደማደርግ አላወቅሁም። እንዲያበድረኝ እለምነው ዘንድ የማውቀውን ሰው እንዲያሳየኝ ጌታን ለመንሁት። በዚያው ባቡር ለመሄድ የሚጠባበቁ እጅግ ብዙ ሰዎች ነበሩ፤ ከእነርሱም መካከል በፓልመር ስብሰባዎች ብዙ ጊዜ ያገኘኋቸው ቄስ ሄንሪ ቤልደን፣ የአሥራ ሰባተኛው ጎዳና ሜቶዲስት ቤተ ክርስቲያን መጋቢ ቄስ አቶ ዌልስ፣ አቶ ፎክነር፣ ሌሎችም የቤተ ክርስቲያኒቱ አባላት ነበሩ። ሁሉም በጣም ደግ ሆኑልኝ። «ሃያ አምስቱን ሳንቲም ወንድም ቤልደንን ልለምናቸው ይሆን?» ብዬ አሰብሁ።
ልክ ዞር ብዬ ስመለከት፣ ማን እዚያ ቆሞ ቢሆን ጥሩ ነው? ወንድም ክላርክ!
«ኧረ» አልሁ፣ «የሄዱ መስሎኝ ነበር።»
«እኔ እስከ ቅዳሜ አልሄድም» አሉ፤ — ይህ ዕለተ ረቡዕ ጠዋት ነበር መሰለኝ፤ — «ወይዘሮ ክላርክ አንድ ነገር ረስተው ኖሮ ልወስድላቸው ተጣድፌ ተመለስሁ፤ እዚህ ስደርስ ግን ባቡሩ ገና ሄዶ ነበር፤ ስለዚህ አንቺ ትወስጂላቸዋለሽ።»
«አቶ ክላርክ፣ እባክዎ ሃያ አምስት ሳንቲም ያበድሩኛል?»
«ዝርዝር የለኝም» አሉ፤ «ያለኝ የሁለት ዶላር ኖት ነው፤ እርሱን እሰጥሻለሁ፤ ስመጣ ትመልሺልኛለሽ።»
ስለዚህ ትኬቴን በሰላም ገዛሁ። እነሆ በሮቹ ተከፈቱ፤ ግርግሩና ጩኸቱ — ያን ጊዜ ሁሉ ነገር ለእኔ እንዴት አዲስ ነበር! በመጨረሻ ገብቼ ተቀመጥሁ፤ ቅዳሜ ሲመጡ ለመልካሙ ወንድም ክላርክ ሁለቱን ዶላር እንዴት እንደምከፍላቸው እያሰብሁና እየተገረምሁ ተቀመጥሁ። «ጌታ ሆይ፣ እርዳኝ፤ መንገዱንም ክፈትልኝ» አልሁ።
ከዚያም ሰይጣን፦ «ያን የትራክት እሽግ ባትገዢ ኖሮ ያን ሁለት ዶላር መበደር ባላስፈለገሽ ነበር» አለኝ።
ከአንድ ሁለት ቀን በፊት ከመጽሐፍ ቅዱስ ቤት አንድ እሽግ የቅድስና ትራክቶች ገዝቼ ነበር — ዋጋቸው ሠላሳ ሳንቲም ነበር። ገንዘቤ እንዳጠረ አውቅ ነበር፤ ነገር ግን ቅድስና ለእኔ እጅግ ጣፋጭ ስለ ነበረ ሰው ሁሉ እንዲያገኘው ፈለግሁ፤ እነዚህ ትራክቶችም እውነቱን እጅግ ግልጽና ምክንያታዊ በሆነ ብርሃን ያቀርቡ ስለ ነበር፣ ለሰዎች በመስጠት ለጌታ ትንሽ ሥራ እሠራ ይሆናል ብዬ አሰብሁ፤ የገዛኋቸውም ስለዚህ ነበር። ዲያብሎስ ለነገሩ ቅድስናን አይወድም፤ እኔም የእርሱን ተንኰል የማላውቅ፣ በእንግዶችም መካከል የነበርሁ ሴት ነበርሁ። ከእኔ ጋር ጠብ ለመጫር የሚችለውን ሁሉ ሞከረ። ጥቂት ቆይቼ ጓዜን አወረድሁና ትራክቶቹን አውጥቼ ማንበብ ጀመርሁ፤ ይህም ሁሉ ሆኖ ደስ አለኝ፤ እነርሱን በመግዛቴም ትክክል እንዳደረግሁ ተሰማኝ። ባቡሩ ጉዞውን ቀጠለ። ብዙም ሳይቆይ አንድ ሰው መዘመር ጀመረ። በመዝሙሩ እንድተባበር ተጠየቅሁ፤ ወደ ካምፕ ስብሰባ ስንሄድ በእውነት ያማረ ጉዞ ነበረን። መዝሙሩ ካለቀ በኋላ አቶ ፎክነር ወደ ተቀመጥሁበት ወንበር መጥተው፦ «እማማ፣ ምን እያነበብሽ ነው?» አሉኝ። የትራክቶቹን እሽግ ሰጠኋቸው።
«እንዴ፣ ስለ ቅድስና ምንም ታውቂያለሽ?» አሉ።
ልቤ ወዲያው በእሳት ተያያዘ፤ ጌታ ያደረገልኝን ታላላቅ ነገሮች መናገር ጀመርሁ፤ እርሳቸውም ጥቂት ካዳመጡ በኋላ፦ «ከእነዚህ ትራክቶች ጥቂቱን ለመጋቢያችን ለወንድም ዌልስ መስጠት እፈልጋለሁ» አሉ፤ ልጃቸውና ሌሎች አንዳንድ ሴቶችም በጉዳዩ ላይ ፍላጎት እንዳላቸው የተናገሩ ይመስለኛል።
«መልካም ነው ጌታዬ» አልሁ፤ «የፈለጉትን ያህል ቢወስዱ በጣም ደስ ይለኛል።» ጨርሰው ሲያበቁም ያልተጠቀሙባቸውን መለሱልኝ።
«በጣም ጥሩ ናቸው፤ እግዚአብሔርም እንዲባርካቸው መጸለይ አለብሽ።»
ከዚያም የሁለት ዶላር ኖት ሰጡኝ። «ጌታዬ፣ እኔ አልሸጣቸውም» አልሁ።
ፈገግ ብለውም፦ «አንቺ ግን አትገዢያቸውም?» ብለው መለሱልኝ።
«አዎን፤ ነገር ግን ይህን ያህል አልከፈልሁባቸውም ጌታዬ።»
«ግድ የለም» አሉ፤ «ልትጠቀሚበት ትችያለሽ ብዬ እገምታለሁ፤ አትችይም እንዴ?»
«ኧረ እችላለሁ ጌታዬ፤ አመሰግናለሁ፤ ጌታ ይመስገን።» ከዚያም ሄዱ።
እግዚአብሔር ጸሎቴን እንዴት እንደ መለሰና ከውዱ ወንድም ክላርክ የተበደርሁትን ሁለት ዶላር እንዴት እንደ ከፈለ አየሁ። «እንዲህም ይሆናል፤ ሳይጠሩ እመልሳለሁ፤ ገናም ሲናገሩ እሰማለሁ» (ኢሳይያስ 65:24)። ስለዚህ ወንድም ክላርክ ቅዳሜ ሲመጡ ሁለቱን ዶላር ለእርሳቸው በመስጠቴ ደስ አለኝ።
ያንን የካምፕ ስብሰባ ፈጽሞ አልረሳውም። እግዚአብሔር እንዴት ወዳጆችን ሰጠኝ፣ እንዴትስ ባረከኝ! እንዲህ ወዳለ ስብሰባ ስሄድ የመጀመሪያዬ ነበር። እንደዚያ ያሉ ምስክርነቶችንና ስለ ቅድስና እንደዚያ ያለ ስብከት ሰምቼ አላውቅም ነበር። የእሑድ ጠዋቱ የፍቅር ግብዣ ፈጽሞ አይረሳም። ታላቁን መዳን እንዴት እንዳገኘሁ ልምዴን እንድናገር ጌታ በልቤ ላይ አኖረው፤ ስናገርም እኔንም ሕዝቡንም እጅግ ባረከ። በመጨረሻ ወንድም ኢንስኪፕ ለትልቁ ድንኳን ወጪ አምስት መቶ ዶላር — መጠኑ እርሱ ነበር መሰለኝ — እንደሚያስፈልጋቸው ተናገሩ። አንድ ሰው መጠኑ በድርሻ እንዲከፋፈል ሐሳብ አቀረበ፤ ሰው ሁሉ እጅግ ደስተኛ ይመስል ስለ ነበር ከልብና በፍጥነት ምላሽ ተሰጠ፤ በአሥር ወይም በአሥራ አምስት ደቂቃ ገደማም መጠኑን ሞልተው ተረፋቸው። እኔም አንድ ነገር መስጠት ፈለግሁ፤ እጅግ ደስ ብሎኝና ሐሴት አድርጌ ስለ ነበር፣ ቢኖረኝ አሥር ዶላር መስጠት ደስ ይለኛል ብዬ አሰብሁ፤ ስለዚህ፦ «ጌታ ሆይ፣ ቢኖረኝ እንደምሰጠው ታውቃለህ፤ እባክህ በእኔ ፈንታ እንዲሰጥ በአንድ ሰው ልብ አኑረው» አልሁ።
ጸሎቱን ገና እንደ ጨረስሁ ውዱ ሽማግሌ ወንድም ጆን ማክግሊን ተነሥተው፦ «አሁን ለተናገረችው ለዚያች ጥቁር እኅት አሥር ዶላር» አሉ።
«ጌታ ይመስገን! ጌታዬ አመሰግናለሁ» ብዬ ጮኽሁ። ኧረ መብረር የምችል መሰለኝ።
የዚያን ጥቅስ ጥልቅ ትርጉም መማር የጀመርሁት በዚያ ነበር፦ «ለምኑ፥ ይሰጣችሁማል፤ ፈልጉ፥ ታገኙማላችሁ፤ መዝጊያን አንኳኩ፥ ይከፈትላችሁማል።»
ከሰዓት በኋላ ወንድም ፐርዲ ስብሰባ ይመሩበት ወደ ነበረው ድንኳን ገባሁ፤ ሙሉ መዳንን የሚሹትን ይመረምሩና ይፈትኑ ነበር፤ ወንድም ፐርዲንና አሠራራቸውን የሚያውቅ ሁሉ ይቅርታንም ሆነ ንጽሕናን የሚሻ ማንም ሰው በቀላሉ ከእጃቸው ሾልኮ እንደማያመልጥ ያውቃልና። ጌታ ይመስገን፣ እርሳቸው ጠልቀው ይመረምራሉ። አዳመጥሁ። የገዛ ልቤ ለእያንዳንዱ ፈተና እንደሚመጥን አውቅ ነበር፤ «ጌታ ይመስገን!» ማለትም ቻልሁ። ነፍሴ በቅዱስ የድል ደስታ ትንበለበል ነበር። ወደ ፊት ወጥቼ፦ «ወንድም ፐርዲ፣ መመርመሪያዎትን በእኔ ላይ ሊሞክሩት ይወዳሉ?» አልሁ።
እርሳቸው በጣም ደነገጡ፤ ሆኖም በዚያ ደስ በሚያሰኘው ጠባያቸው፦ «አዎን፤ ልትቋቋሚው ትችያለሽ አማንዳ?» አሉ።
«አዎን ጌታዬ፤» ብዬ የሰጧቸውን የተለያዩ ፈተናዎች
አንድ በአንድ አነሣሁና አለፍኋቸው። የጌታ ኃይል በላያችን ወረደ፤ ኧረ ምንኛ ያለ ስብሰባ ነበር! ኃጢአተኞች ተለወጡ፤ አማኞች ተቀደሱ። ስብሰባው የምሽቱ ስብከት ከጀመረ በኋላም እንኳ ለረጅም ጊዜ ቀጠለ። ሰዎች ከመላው የካምፑ ቦታ መጡ።
በዚያ ከጊዜ በኋላ እጅግ መልካም ወዳጆች የሆኑልኝን የፊላዴልፊያዎቹን አቶና ወይዘሮ ማርቲርን ለመጀመሪያ ጊዜ አገኘሁ። ሁለቱም አሁን በሰማይ ናቸው።
ቄስ ቢ. ኤፍ. አዳምስን ያየሁትም ያን ጊዜ ለመጀመሪያ ነበር። በእሑድ ጠዋት ድንቅ ስብከት ሰበኩ፤ የመቀደስን በረከት እንዴት እንዳገኙም ልምዳቸውን ተናገሩ። የመንፈስ ኃይል ተገለጠ። ወንድም አዳምስ በክብር ማዕበል መካከል ተቀመጡ። ያ እሑድ ሮም የፓፓውን አለመሳሳት የምታውጅበት ዕለት ራሱ ነበር። ወንድም ቡል በመንፈስ እንደ ተነዱ ያህል ዘለው ተነሡ፤ እርሳቸው ብቻ በሚችሉት አነጋገርም እንዲህ አሉ፦
«ዛሬ በሮም ፓፓውን የማይሳሳት ብለው ዘውድ እየደፉለት ነው፤ እኛም እንነሣና ‹ሁሉ የኢየሱስን ስም ኃይል ያወድሱ፤ በሁሉም ላይ ጌታ አድርገው ዘውድ ይድፉለት› ብለን እንዘምር፤ በልባችንም ለዘላለም ዘውድ እንድፋለት።»
ጉባኤውም ሁሉ በቅጽበት እንደ አንድ ሰው ሆኖ ተነሣ፤ እንደዚያ ያለ ዝማሬ ፈጽሞ ሰምቼ አላውቅም መሰለኝ — ያ የጥንቱ «ኮሮኔሽን» መዝሙር በዚያ ዕለት እንደ ተዘመረ ሲዘመር ሰምቼ አላውቅም። አዎን፤ የነገሥታት ንጉሥና የጌታዎች ጌታ አድርገን ዘውድ ደፋንለት። ሃሌ ሉያ፤ ሁሉን የሚገዛ ጌታ አምላካችን ነግሦአልና!
በኦኪንግተን ለምድራዊ ነገሮች ጌታን መታመን ስለ ተማርሁ፣ እርሱም በዚያ ያህል ድንቅ ሁኔታ ስለ ባረከኝ፣ ወደ ሲንግ ሲንግ ስለ መሄድ መጸለይ ጀመርሁ፤ ጌታም እርዳታ ላከ። ስብሰባው ከመከፈቱ ጥቂት ቀናት በፊት የሃያ አራተኛው ጎዳና ሜቶዲስት ቤተ ክርስቲያኑ ወንድም መንሰን — እኔና ወዳጄ እኅት ስኮት አልፎ አልፎ ወደ እርሳቸው ክፍል እንሄድ ነበር — አንድ ጠዋት ወደ ከተማው መሀል ወርደው ነበር፤ ጌታም በኒው ዮርክ እኖርበት ወደ ነበረው ወደ አሚቲ ጎዳና ቍጥር 135 ላካቸው።
«እንዴት ነሽ እኅት ስሚዝ» አሉ፤ «ለካምፕ ስብሰባው ተዘጋጅተሻል?»
«መንገዱን እንዲከፍትልኝ ጌታን እየለመንሁት ነው።»
«እንግዲያው፣ እንዲረዳሽ እነሆ ሁለት ዶላር።»
ስለ ሌላ የፍቅሩ ቸርነት ምልክት ጌታን በእውነት አመሰገንሁ። የክፍላቸው አባል የሆነን የአንድ ወንድም ስም ጠርተው፣ ከፈለግሁ ቤተሰቡ በድንኳናቸው የምተኛበት ቦታ እንደሚሰጡኝ፣ አለዚያም በትልቁ የስብሰባ ድንኳን ውስጥ አንድ ጥግ ማግኘት እንደምችል ነገሩኝ። «ጌታ ይመስገን» አልሁ፤ «እርሱ ሁሉን ደኅና ያደርጋል። አሁን እንዴት እንደምሄድና ስለ ነገሩ ሁሉ ይንገሩኝ።»
እንዲሁ ነገሩኝና ሄዱ። ከሄዱ በኋላ ደስ የሚል ጊዜ አሳለፍሁ፤
ስለ ድንቅ ፍቅሩ እግዚአብሔርን እያመሰገንሁ። ሁሉም አዲስ ተሞክሮ ነበር፤ ነገር ግን በሁሉም ውስጥ የጌታን እጅ ስላየሁ እጅግ ያማረ ነበር። ቀኑ ደረሰ፤ እኔና ትንሿ ልጄ ሜዚ ወደ ካምፕ ስብሰባው ተጓዝን። ጌታ ብዙ ወዳጆች ሰጠኝ፤ አዲስ ትምህርቶችንም አስተማረኝ። በዚያ ዘመን የነበሩትን ብዙ ውድ ሰዎች አስታውሳለሁ፤ ምንም እንኳ ብዙዎቹ ከእግዚአብሔር ጋር ለመኖር ቢሄዱም። ያን ጊዜ የቤድፎርድ ጎዳና ቤተ ክርስቲያን መጋቢ የነበሩት ቄስ ጆን ኩክማን፣ ያ ድንቅ የእግዚአብሔር ሰው ቄስ ወንድም ሄድስትሮም፣ ወንድም ሙርሃውስና ሌሎችም ብዙዎች በዚያ ነበሩ። ውዱን ጆን ኩክማንን እንዴት በሚገባ አስታውሳለሁ! ያን ጊዜ እርሳቸው ታላቅ ኃይል ነበሩ። ሥራቸውን ሲፈጽሙ ወደ ሰማይ በመሄዳቸው ተቃውሞ የለኝም፤ ነገር ግን አባታቸውና የተባረከ መታሰቢያ ያላቸው ወንድማቸው አልፍሬድ ለረጅም ዘመን በወደዷትና ባገለገሏት በውዲቱ በጥንቲቱ ሜቶዲስት ቤተ ክርስቲያን በኩል ቢሄዱም በዚያው ያህል በደኅና ይደርሱ ነበር ብዬ እንደ ምንም ይሰማኛል፤ ይሁን እንጂ ጌታ ይመስገን፣ በሰማይ ምንም ዓይነት ቡድን የለም። ሃሌ ሉያ! ኧረ ያቺ ከተማ ከነገድና ከቋንቋ ከወገንም ሁሉ በደም በታጠቡ ነፍሳት ትሞላለች። «ያ ምንኛ ያለ የሕዝብ መሰብሰብ ይሆናል!»
ከዚያም ወንድም ቶም ሸርውድ፣ ወንድም ኖክስና ኪንግ ነበሩ። በፖሊሶቹ ድንኳን ስብሰባዎች ምንኛ ያሉ ጊዜያት እናሳልፍ ነበር! ወጣቶቹ ስብሰባቸውን ያደርጉ የነበረው በወንድም ጆን ማክሌን ድንኳን ነበር። በዚያ ሎራ ባውደንን (በኋላ ወይዘሮ ክሬን የሆኑትን) ለመጀመሪያ ጊዜ አየኋቸው፤ ሰማኋቸውም፤ ያን ጊዜ በኃይላቸው ጫፍ ላይ ነበሩ። ጌታ ምስክርነታቸውንና ምክራቸውን ለብዙ ሽማግሌዎችና ወጣቶች መዳን እንዴት ተጠቀመበት! እስከዚያ ጊዜ ድረስ የወጣቶችና የልጆች ስብሰባ አይቼም ሰምቼም አላውቅም ነበር። ይህ ሁሉ ለእኔ እጅግ አዲስ ነበር፤ ሆኖም ግሩም ነበር።
አንድ ቀን ወይዘሮ ዶ/ር በትለር እርሳቸውና ባለቤታቸው ብዙ ዓመታት ስላሳለፉበት በሕንድ ስላለው የዜናና ሥራ ሊናገሩ ነበር። ሚስ ባውደን ደግሞ የወጣቶችን ስብሰባ ሊመሩ ነበር። የወይዘሮ በትለር ስብሰባ በሌላው የካምፑ ክፍል ባለ ድንኳን ውስጥ የነበረ ሲሆን ለሴቶች ብቻ ነበር። ሚስ ባውደንን መስማት እጅግ ፈልጌ ነበር፤ ስለ ቅድስና ጉዳይ በጣም ግልጽ ነበሩና፤ ይህም የልቤ ደስታ ነበር፤ በሌላ በኩል ደግሞ ወይዘሮ በትለር ስለ ሕንድ ሲናገሩ መስማት ፈለግሁ። በሕይወቴ የሚስዮናዊ ንግግር ሰምቼ አላውቅም ነበር። በዚያን ጊዜ በቤተ ክርስቲያናችን የሴቶች የውጭ አገር ሚስዮን ሥራ አልነበረንም፤ ዛሬ ግን፣ እግዚአብሔር ይመስገን፣ ሁኔታው ተለውጧል።
ነገሩን ሁሉ አወጣሁ አወረድሁና ወደ ወይዘሮ በትለር ስብሰባ ለመግባት ወሰንሁ፤ እርሳቸው ሊሄዱ ነበር፤ ሚስ ባውደን ግን ለረጅም ጊዜ በዚያ ስለሚቆዩ እርሳቸውን ለመስማት ሌላ ዕድል ይኖረኛል። ወደ ወይዘሮ በትለር ስብሰባ ገባሁ፤ በትልቅ ድንኳን ውስጥ ነበር፤ በብዙ ያማሩና
የተዋቡ ልብሶችን በለበሱ ሴቶችም ተሞልቶ ነበር፤ በበሩ ሾልኬ ገብቼ ከኋላቸው ተቀመጥሁ። ወይዘሮ በትለር በፊታቸው ትንሽ ጠረጴዛ ነበረቻቸው፤ በላይዋም በሕንድ ይመለኩ የነበሩ ልዩ ልዩ የአሕዛብ አማልክት ነበሩ፤ እኔም እንዲህ ያለውን ነገር ከዚያ በፊት አይቼ አላውቅም ነበር፤ «የሰው ልጆች እንዲህ ያሉትን አስፈሪ ነገሮች አማልክት ብለው ሊያመልኩ አይችሉም» ብዬ አሰብሁ። ልቤ ቀለጠ፤ መራራ ልቅሶም አለቀስሁና፦ «ኧረ ሄጄ ያንን የታወቀውን የጥንት መዝሙር ‹ኢየሱስ ስለሚወደኝ እጅግ ደስ ብሎኛል› የሚለውን ብዘምርላቸው!» ብዬ አሰብሁ። ያን ጊዜ መዝሙሩ አዲስ ነበር፤ እኔም ብዙ ዘምሬው ነበር፤ እግዚአብሔርም ለብዙ ነፍሳት ባርኮት ነበር። «ሄጄ ይህን መዝሙር ብዘምርላቸው ሁሉም ወዲያውኑ ይለወጡ ነበር» ብዬ አሰብሁ፤ ነገር ግን ኧረ ስለ አሕዛብ አጉል እምነትና ልማድ ምንኛ ጥቂት አውቅ ነበር!
እንግዲህ በዓለም ላይ የነበረኝ ሁለት ዶላር ተኩል ብቻ ነበር፤ ይህም ለትንሿ ልጄ ጫማ ልገዛበት የያዝሁት ነበር። እርሷ በሣሩ ላይ ስትዘዋወር ጫማዋ ተጣሞ ተበላሽቶ ነበር። የወይዘሮ ቪኮን ትንሽ ልጅ ትጠብቅ ነበር፤ እኔም እነዚያን የማይመቹ የመሄጃ ጫማዎች እንድታደርግ አልወደድሁም፤ ስለዚህ በማግሥቱ ጠዋት ጫማዎቹን ለማምጣት ወደ መንደሩ ሰው ልልክ ነበር። ወይዘሮ በትለርን እያዳመጥሁ ተቀመጥሁ። እርሳቸውም ስለ ዜናና ሥራ ለሴቶቹ ልመና አቀረቡ፤ አንዲትን የመጽሐፍ ቅዱስ ሴት በሥራው መስክ ለአንድ ዓመት ለማቆየት ምንኛ ትንሽ ገንዘብ እንደሚበቃም ነገሩ። «ኧረ» ብዬ አሰብሁ፣ «ቢኖረኝ ሃያ ዶላር እሰጥ ነበር።»
ዝምታ ሆነ፤ በድንኳኑ ውስጥ ከነበሩት ከታላቅ ብዛት መካከል ለዚህ ልመና ምላሽ የሰጡት ጥቂቶች ብቻ ነበሩ። ይህ እጅግ እንግዳ ነገር መሰለኝ። ቆይተውም እጅግ ያማረ ልብስ የለበሱ ሁለት ሴቶች ተነሥተው ወጡ። ጥቁር ጥልቅ ዳንቴል የተጌጠባቸው ውድ የሌግሆርን ባርኔጣዎችንና ያማሩ ጥቁር የዳንቴል ሻሽ መደረቢያዎችን አድርገው ነበር። «ኧረ» አልሁ በልቤ፣ «እነዚህ ሴቶች ሃያ ዶላር መስጠት ይገባቸው ነበር፤ ሀብታሞች መሆን አለባቸው።» ከዚያም ወይዘሮ ቢ. ንግግራቸውን ሲቀጥሉ ሌሎችም ምንም ሳይሰጡ እየተነሡ ወጡ። ምንኛ አዘንሁ! ልክ በዚያን ጊዜ መንፈሱ በግልጽ፦ «ያንን ሁለት ዶላር ስጪ» አለኝ፤ እኔም፦ «እሰጣለሁ» አልሁ።
«አዎን» አለ ዲያብሎስ፤ «ሁለት ዶላር ብቻ ይዘሽ ወደዚያ ብትወጪ ያምርብሻል! አምስት ዶላር ቢኖርሽ ኖሮ ቢያንስ የሚያስቈጥር ነገር ይሆን ነበር።»
ከዚያም ሁለት ዶላር ለመስጠት አፈርሁ፤ ብቻ ሾልኬ መውጣት ብችል ብዬ አሰብሁ።
ከዚያም፦ «ወደዚያ የወጣቶች ስብሰባ ሄደሽ ቢሆን ኖሮ እንዲህ አይከፋሽም ነበር» ብሎ አሳብ አቀረበልኝ።
«አዎን» አልሁ፣ «ምነው ሄጄ በሆነ ኖሮ!»
«ሁለቱን ዶላር ስጪ» አለ መንፈሱ ደግሞ።
«ልጅሽ ጫማ ያስፈልጋታል፤ አንቺ ደግሞ ሌላ ገንዘብ የለሽም» አለ ዲያብሎስ። «የመጀመሪያው ግዴታሽ ለልጅሽ ነው።»
ያን ጊዜ ስለ እርሷ እንዴት ተጨነቀ!
ልውጣ ብዬ አሰብሁ፤ ልነሣ ስል ግን መንፈሱ፦ «የምትወጪበትን ምክንያት እግዚአብሔር ያውቃል፤ ያንን ሁለት ዶላር መስጠት ስለማትፈልጊ ነው» አለኝ።
ኧረ ጮኼ ልጣራ ያህል ተሰማኝ፤ ስለዚህ እንደ ሕፃን እየተንሰቀሰቅሁ ወደ ወይዘሮ በትለር ወጣሁና፦ «ወይዘሮ በትለር» አልሁ። እርሳቸውም ተመለከቱኝ፤ እኔም፦ «ወደ ሕንድ መሄድ እችላለሁ?» አልሁ።
«ብትችዪ ደስ ባለኝ ነበር» አሉ በታላቅ ደግነት።
«እንግዲያው» አልሁ፣ «ሁለት ዶላር ይቀበሉኛል?»
«አዎን፣ እቀበላለሁ» አሉ፤ «ደግሞም አንድ ጋዜጣ እሰጥሻለሁ።»
ጋዜጣው «የአሕዛብ ሴት ወዳጅ» የሚባለው ነበር። ከዚያ በፊት አይቼው አላውቅም ነበር፤ ሄጄም ተቀመጥሁ፤ ኧረ እንዴት ያለ የክብር ማዕበል በነፍሴ ላይ ጠረገ! «ጌታ ሆይ፣ ትክክል እንዳደረግሁ አምናለሁና አመሰግንሃለሁ» አልሁ።
ልክ በዚያን ጊዜ ዲያብሎስ፦ «ለእርሱ ስለ ሆኑት ይልቁንም ስለ ቤተ ሰዎቹ የማያስብ ማንም ቢሆን፥ ሃይማኖትን የካደ ከማያምንም ሰው ይልቅ የሚከፋ ነው» አለ። እንደ ጥይት መታኝ፤ ቃሉ በመጽሐፍ ቅዱስ ውስጥ ነበርና፤ እኔም አንብቤው ነበር፤ ምን እንደማደርግ አላወቅሁም። ዓይኖቼን ጨፍኜ ልቤን ወደ እግዚአብሔር አነሣሁና፦ «ጌታ ሆይ፣ አልገባኝም፤ ነገር ግን እንደ ምንም ትክክል እንዳደረግሁ ይሰማኛል» አልሁ። ከዚያም ጌታ ሌላ የበረከት ዝናብ በነፍሴ ላይ ላከ። ኧረ እንደ ዘይትና እንደ ማር በመላ ሰውነቴ ዘለቀ! ጌታ ለእኔ ምንኛ ቸር ነበር፤ ደግሞም ልክ በዚያች ቅጽበት! ሃሌ ሉያ! ምንኛ ያለ አዳኝ ነው!
ከቀትር በኋላ ስምንት ሰዓት ተኩል ላይ በስብከቱ መድረክ ደወሉ ለስብከት ተደወለ። በዝግታ ወረድሁ፤ እዚያ ስደርስም አንድ ሰው ለሕዝቡ ይበልጥ እንዲመቹ የውኃ ማጠራቀሚያዎቹን በኮረብታው ላይ ለማኖር ሃያ ዶላር ወይም ከዚያ በላይ እንዲሰጥ እየለመነ ነበር። አንድ ለስላሳ ሹክሹክታ፦ «ያንን አምሳ ሳንቲም ስጪ» አለኝ።
«ያንን ብትሰጪ ሞኝ ትሆኛለሽ» ብሎ ዲያብሎስ አሳብ አቀረበ፤ «ምናልባት አንድ ሰው ሁለት ዶላር ይሰጥሽ ይሆናል፤ ያን ጊዜ ጫማዎቹን የምትገዢበት አምሳ ሳንቲም ይኖርሻል።»
«አዎን» አልሁ በልቤ፣ «ነገሮቹን እያየሁና እየሰማሁ ስሜቴ ሳይነካ አልቀረም መሰለኝ።» ስለዚህ ሙዳዩ ሲያልፍ ቀና ብዬ እንዳላይ ዓይኖቼን ጨፍኜ ዞር አልሁ። ሰውየው ግን መጥቶ ሙዳዩን ልክ ከፊቴ ሥር አሳለፈው፤ እኔም ተነሥቼ አምሳውን ሳንቲም ወደ ሙዳዩ ወረወርሁና፦ «ስለ ምንም ነገር ክብር ለእግዚአብሔር ይሁን፤ ስለ ሁሉ ነገር ሃሌ ሉያ፤ ኢየሱስ አሁንም አለኝና» አልሁ፤ ኧረ እንዴት ያለ የመዳን ማዕበል በነፍሴ ውስጥ ጠረገ! «ጌታ ሆይ፣ ትክክሉን እንዳደርግ ስለ ረዳኸኝ አመሰግንሃለሁ» አልሁ።
ቆይቶም ሰባኪው ጀመረ። አዳመጥሁ። ቄስ ጆን ኩክማን ስለ ቅድስና ከሚሰብኳቸው ብርቱ ስብከቶቻቸው አንዱን ሰበኩ። እኔም
እጅግ ተባረክሁ፤ ነገር ግን አልፎ አልፎ ዲያብሎስ ያጠቃኝ ነበር፤ እኔም፦ «ጌታ ሆይ፣ እርዳኝ፤ ትክክል እንዳደረግሁ አምናለሁ» እል ነበር። እርሱም ይበልጥ ባረከኝ። ውጊያ ነበር፤ ነገር ግን ድል መንሣትን ለሚሰጠን ለእግዚአብሔር ምስጋና ይሁን።
ስብሰባው ካለቀ በኋላ ሻያችንን ለማዘጋጀት ወደ ድንኳኔ ሄድሁ። ጊዜው ከምሽቱ አሥራ ሁለት ሰዓት ገደማ ነበር፤ ልክ ተቀምጠን መብላት እንደ ጀመርን ከውጭ አንድ ድምፅ እንዲህ ብሎ ተጣራ፦
«ወይዘሮ ስሚዝ፣ ወይዘሮ ስሚዝ፣ አያቴ አንቺና ሜዚ መጥታችሁ እራታችሁን እንድትበሉ ይላሉ።»
ልጁ የመልካሙ ሽማግሌ የአባ ብረመል ትንሽ የልጅ ልጅ ነበር።
«ቢሊ፣ ለአያትህ አመሰግናለሁ በልልኝ፤ ነገር ግን እራታችንን እየበላን ነው፤ ሌላ ጊዜ እንመጣለን።»
የሄደ መሰለኝ፤ ነገር ግን ከጥቂት ደቂቃዎች በኋላ ደግሞ እንዲህ ብሎ ተጣራ፦
«ወይዘሮ ስሚዝ፣ አያቴ አንቺና ሜዚ ወደዚያ መጥታችሁ እራታችሁን እንድትበሉ ይላሉ።»
ስለዚህ ሜዚ፦ «እንግዲህ እማዬ፣ ብንሄድ ይሻላል» አለች።
የተከተፈ ኮክ ነበረን። «ኮካችንን ምን እናድርገው?» አልሁ።
«ኧረ» አለች፣ «ለጠዋት እንተወው።»
«መልካም» አልሁ። ወደ ውዱ ወንድም ብረመል ድንኳን ስንገባም፦ «ነዪ እኅት ስሚዝ፣ እዚህ ተቀመጪ» ብለው ወንበሩን አመለከቱኝ። ያን አፍቃሪና ደግ ፊታቸውን ፈጽሞ አልረሳውም። ወደ ውስጥ አልፈን በማዕዱ ዙሪያ ተቀመጥን። ሳህኔን ስገለብጥ ከሥሩ ሦስት የአንድ ዶላር ኖቶች ነበሩ፤ ይህም ከሰጠሁት በአምሳ ሳንቲም የሚበልጥ ነበር። እንግዲህ በዚያን ጊዜ አሮጌው ሰይጣን ተገረፈ! ጌታ ይመስገን! በስብከቱ አገልግሎት ጊዜ እንደዚያ ያጠቃኝ ለዚህ ነበር፤ ኢየሱስ ግን ከእጁ እንዴት በጣፋጭነት አዳነኝ! ስሙ ለዘላለም ይመስገን!
ይህም እርሱ ካዳነኝ ከብዙ ጊዜያት አንዱ ብቻ ነው። ጌታ ሆይ፣ አመሰግንሃለሁ።
ሁለቱን ዶላር ለወይዘሮ በትለር ከሰጠሁ በኋላ በማግሥቱ ጠዋት ወደ ከተማ ልኬ ልክ እንዳሰብሁት ለትንሿ ልጄ ጫማዎቹን አስመጣሁ። ከቀትር በኋላ ሰባት ሰዓት ላይ እኅት ጄን ፊ፦ «ጥቂት ጸጥታ አግኝተን አብረን የምንጸልይበት አንድ ቦታ እንሂድ» አሉኝ።
መጽሐፍ ቅዱሳችንን ይዘን ከካምፑ ቦታ ርቀን ወደ አንድ አሮጌ የፖም ዛፎች ቦታ ሄድን። ከሕዝቡ ዓይን የተሰወረ፣ ድምፃቸውም ሊሰማ በማይችልበት ርቀት ያለ አንድ ትልቅ ዛፍ አገኘን። በዚያ ተቀምጠን ቃሉን አነበብን። ኧረ እንዴት ጣፋጭ ነበር! አብረን አለቀስን፤ ጸለይን፤ ጌታንም አመሰገንን፤ ልመናችንንም አስታወቅን፤ እርሱም
ሰማን። አንድ ሰዓት ካሳለፍን በኋላ ወደ ካምፑ ቦታ ተመለስን። ቁርሴ ቀላል ብቻ ስለ ነበረ፣ ጊዜውም አሁን ከቀትር በኋላ ስምንት ሰዓት ስለ ሆነ በጣም ርቦኝ ነበር!
በአንዱ መንገድ ስንወርድ ሁለት ሰዎች ቆመው ይነጋገሩ ነበር። ወደ እነርሱ ስንደርስ አንዱ እጁን ዘርግቶ፦ «እኅት አማንዳ ስሚዝ ነሽ፣ መሰለኝ» አለኝ።
«አዎን» አልሁ፣ «ስሜ እርሱ ነው ጌታዬ።»
«ብዙ ጊዜ ስለ አንቺ ሰምቻለሁ። እንግዲህ እኅት ስሚዝ፣ እንዴት ነሽ?»
«ኧረ ደኅና ነኝ፤ ጌታ ይንከባከበኛል።»
«ታዲያ ምሳሽን በላሽ?» ብሎ ጠየቀኝ።
«የለም» አልሁ፣ «ገና አልበላሁም።»
«እነሆ ሁለት ዶላር። ወደዚያ ሂጂ፤ (ወደ አንድ ድንኳን እያመለከተ)፤ ያ የወንድም ሲ. ድንኳን ነው። እኔ አሁን ምሳዬን በልቼ መጣሁ፤ ጥሩ ማዕድ አላቸው።»
በደግነት አመሰገንሁት፤ ጌታንም አመሰገንሁ።
«ነገር ግን» አልሁ፣ «ይህን ሁለት ዶላር ሁሉ አልበላውም፤ መልስ ይኖራል። የት ላገኝዎ እችላለሁ?»
«ኧረ ስለዚያ ግድ የለሽም» አለ፤ «ልትይዢው ትችያለሽ፤ የቻለውን ያህል አብቃቂው።»
እንዲህ ጌታ በዚያን ቀን እረኛዬ ነበር።
ማታ አሥራ ሁለት ሰዓት ላይ የጥንቱ የሁለተኛው ጎዳና ድንኳን ወይም የፖሊሶቹ ድንኳን ተብሎ በሚጠራው ቦታ የጸሎት ስብሰባ ተደረገ። ወንድም ኪንግ፣ ወንድም ስሚዝና ሌሎች ብዙዎች ተሳተፉ። እግዚአብሔር በመካከላችን ነበር። ጌታ በዝማሬ፣ በጸሎትና በምክር ረዳን። የቀድሞ ወዳጆቻችንን ማስታወስ ምንኛ የተባረከ ነው! ወንድም ቶም ሸርውድ በዚያ ታላቅ «አሜን»፣ «ጌታን ባርኩ»፣ «ክብር ለእግዚአብሔር» በሚለው ጩኸታቸው ብዙ ጊዜ ጫካውን ያስተጋቡት ነበር።
በማግሥቱ ጠዋት የማለዳው የጸሎት ስብሰባ ሲያልቅ ከአንድ ሰው ጋር ቆሜ እያወራሁ ሳለ አንድ ሰው ወደ እኔ መጥቶ፦ «ቁርስሽን በላሽ?» አለኝ።
«የለም» አልሁ፣ «ገና አልበላሁም።»
«እንግዲህ እኔ ወደ ቤቴ እሄዳለሁ፤ አንዳንድ የምግብ ትኬቶች አሉኝ፤ ጌታ ለአንቺ እንድሰጣቸው ይፈልጋል ብዬ እገምታለሁ። የካምፕ ስብሰባው እስኪያልቅ ድረስ ይበቃሉ።»
«እግዚአብሔርን አመሰግናለሁ፤ እርስዎንም አመሰግናለሁ» አልሁ፤ «ነገር ግን እኔ ጥቁር ሴት ስለ ሆንሁ በዚያ ድንኳን ምግቤን እንዳልበላ ይቃወሙ ይሆናል።»
«የሚቃወሙ አይመስለኝም» አለ፤ «ምንም ተቃውሞ ይኖራል ብዬ አላስብም፤ ቢሆንም ሄጄ አያለሁ።»
እንዲሁም አደረገ፤ ነገሩም መልካም ሆነ። እኔንና ልጄን እጅግ በደግነት ያዙን፤ ምስጢሩም እነርሱ ልባዊ ክርስቲያኖች መሆናቸው ነበር።
እነዚህ ከጌታ ሥራዎች ጥቂቶቹ ናቸው፤ ድንቆችም ናቸው። ሃሌ ሉያ! በመንፈስም በአእምሮም ዘመርሁ፦
«በአንድም በሌላም መንገድ ጌታ ያዘጋጃል፤
የእኔ መንገድ ላይሆን ይችላል፤ የአንተም መንገድ ላይሆን ይችላል፤
ነገር ግን በራሱ መንገድ ጌታ ያዘጋጃል።»
ከዚያ በፊት ፈጽሞ ባላደረግሁት ሁኔታም ለመንፈሳዊ በረከቶች ብቻ ሳይሆን ለምድራዊ በረከቶችም እርሱን መታመን ጀመርሁ። ኧረ ጌታዬ ምንኛ ታማኝ ነበር! እኔንና ለእርሱ ያደረግሁትን ያን ጥቂቱን ሁሉ እንዴት ባረከ!
በስብሰባዎቹ በተለይም ነጮች በተገኙበት መሳተፍ አልለመድሁም ነበር፤ ስለዚህ በጣም ያሸማቅቀኝ የነበረ ፍርሃትና ዓይናፋርነት ነበረብኝ፤ ነገር ግን በተጠራሁ ቁጥር ጌታ እንዲረዳኝና ፍርሃቱን ከእኔ እንዲያወጣልኝ እለምነው ነበር፤ እርሱም በየጊዜው ረዳኝ።
አንድ እሑድ ትዝ ይለኛል፤ በጠዋቱና በምሽቱ አገልግሎት መካከል ባለው ሰዓት እጅግ ብዙ ሕዝብ ተሰብስቦ ነበር። በዚያን ጊዜ ጥሩ ድምፅ ነበረኝ፤ በጣም ጮክ ብዬም መዘመር እችል ነበር። ወይዘሮ ኤል. ወደ ድንኳናቸው እንድሄድ ጠየቁኝ፤ በመንገዴም ብዙዎች ከበውኝ እንድዘምር ለመኑኝ። በአጠገቡ አንድ ትልቅ ጉቶ ነበር። በኒው ዮርክ የጥንቱ የሁለተኛው ጎዳና ቤተ ክርስቲያን የክፍል መሪ የነበሩት ወንድም ስሚዝ፦ «እኅት ስሚዝ፣ ሕዝቡ በተሻለ እንዲሰማሽ በዚያ ጉቶ ላይ ውጪ» ብለው ተጣሩ። በዚያን ጊዜ አራት መቶ ያህል ሰዎች ከብበውኝ ነበር። አንድ ሁለት መዝሙሮች ከዘመርሁ በኋላ — ከእነርሱም አንዱ በጣም የታወቀና ለብዙዎች በረከት የሆነው ነበር —
«የምፈልገው፣ የምፈልገው፣
በኢየሱስ ትንሽ ተጨማሪ እምነት ብቻ ነው» የሚለው፤
ወንድም ስሚዝ፦ «እኅት ስሚዝ፣ ለሕዝቡ ልምድሽን፣ ጌታ እንዴት እንደ ለወጠሽ ብትነግሪያቸውስ?» አሉ።
እኔም ጌታ ያደረገልኝን በመመስከር እርሱን እንዳከብረው ፈቃዱ ከሆነ እንዲረዳኝ ለመንሁት። እንደሚረዳኝም ተሰማኝ፤ ስለዚህ በእርሱ ታምኜ ለመናገር ደፈርሁ። እየቀጠልሁ ስሄድ ልቤ ሞቀ፤ የመንፈስም ኃይል በላዬ አረፈ፤ ብዙዎቹ ሰዎች አለቀሱ፤ እንደዚያም
ከዚያ በፊት ሆነው በማያውቁት ሁኔታ ልባቸው በጥልቅ የተነካና ቀልባቸው የተሳበ መሰሉ። እግዚአብሔር በጥንቱ የሲንግ ሲንግ የካምፕ ቦታ በዚያ ትልቅ ጉቶ አጠገብ የተደረገውን ያንን ስብሰባ ባርኮታል ብዬ አምናለሁ። ምንም እንኳ እጅግ ብዙ ዘመን ቢያልፍም፣ ሳስበው ያ ሁሉ አሁንም ምንኛ እውን ሆኖ ይታየኛል! አንድ ሁለት ቀን ቆይቶ የካምፕ ስብሰባው አለቀ፤ እኔና ሜዚ ወደ ኒው ዮርክ፣ ወደ ውድ ቤቴ በመርከብ እየተመለስን ነበር፤ ቤቴም ከስድስተኛው አቨኑ ትንሽ ከፍ ብሎ፣ አሁን ሦስተኛው ጎዳና ተብሎ በሚጠራው በአሚቲ ጎዳና ቍጥር 135 ከኋላ በኩል ያሉ ሁለት ትናንሽ ክፍሎች ነበሩ። ውድ ቤቴ የምለው ጌታ በዚያ ብዙ ጊዜ ጸሎቴን ስለ መለሰ፣ የገዛ ነፍሴንም ስለ ባረከ፣ ለብዙ ነፍሳትም መወለጃ ስላደረገው ነው። እነዚያ ከጣሪያው ሥር ያሉ ሁለት ትናንሽ ክፍሎች ለዘላለም ውድ ይሆኑልኛል፤ እንደ ጥንቱ ሰውም እንዲህ ማለት ይሰማኛል፦ «ብረሳሽ ቀኜ ትርሳኝ፤ ከአሜሪካ፣ ከእንግሊዝ፣ ከስኮትላንድ፣ ከሮም፣ ከግብፅ ወይም ከአፍሪካ ያማሩ ተራሮች ሁሉ አስበልጬ ባልወድሽ።»
«አቤንኤዘሬን በዚህ አቆማለሁ፤
በረድኤትህ እዚህ ደርሻለሁ፤
በበጎ ፈቃድህም ወደ ቤቴ
በደኅና እንድደርስ ተስፋ አደርጋለሁ።» አሜን።