አማንዳ ስሚዝ፦ የሕይወት ታሪክ
የእርሱ መገኘትና የእኔ መታዘዝ

ምዕራፍ 11 · 27 ደቂቃ ንባብ · 34 ደቂቃ ማዳመጥ

የእርሱ መገኘትና የእኔ መታዘዝ

አንድ ቀን ሥራዬን እየሠራሁ ሳስብና ከኢየሱስ ጋር ስነጋገር ነበር፤ ከኢየሱስ ጋር ኅብረት እንዲኖረን መነኩሲት መሆን ወይም ርቆ በሆነ ጥልቅ ብቸኝነት ተገልሎ መኖር እንደማያስፈልግ ተረድቼ ነበርና፤ እጆቻችሁ የዕለት ተዕለት ሥራችሁን በመሥራት ቢጠመዱም እንኳ፣ ያ ነፍስ ከኢየሱስ ጋር ኅብረት እንዳታደርግ እንቅፋት አይሆንም። በልብስ ማጠቢያ ገንዳዬና በካውያ ጠረጴዛዬ ላይ ሆኜ፣ አልጋዬን ሳነጥፍ፣ ቤቴን ስጠርግና ሳህኖቼን ሳጥብ ብዙ ጊዜ እጅግ የበለጸጉ በረከቶችን አግኝቻለሁ። ኦ፣ ይህን በማወቄ ምንኛ ደስ ይለኛል! አንዳንዶች እንደሚያስቡት የመቀደስ በረከት ከሕይወት ተፈጥሯዊና ተገቢ ተግባራት ሁሉ መገለል ማለት እንዳልሆነ በነገርኋቸው ጊዜ የስንቱን እናት ልብ አበረታቻለሁ! ፈጽሞ እንደዚያ አይደለም። ትርጉሙ እግዚአብሔር በእናንተ ውስጥ ሆኖ እንደ ባለ ጠግነቱ መጠን በክብር በክርስቶስ ኢየሱስ የሚያስፈልጋችሁን ሁሉ ይሞላባችኋል ማለት ነው፤ የጸጋ፣ የትዕግሥት፣ የጽናትና የቻይነት ፍላጎታችንን ጭምር፤ የራሳችንንና የሌሎችንም ድካም መሸከም ብቻ ሳይሆን ችሎ ማሳለፍንም መማር አለብንና።

ወደ ታሪኬ ልመለስ። እንዲህ እያሰብሁ እንደ ገና፦ «ጌታ ባጸደቀኝ ጊዜ ፈጽሞ ያልቀደሰኝ ለምን ይሆን? እርሱ አምላክ ነበር፤ ሊያደርገውም ይችል ነበር፤ ቢፈልግ ኖሮ ሁሉንም በአንድ ጊዜ ሊያደርገው ይችል ነበር» ብዬ ጠየቅሁ። ከዚያም፦ «እሺ፣ ታዲያ ለምን አላደረገውም?» የሚል ጥያቄ መጣ፤ እኔም መልስ አጣሁ። ያ ጥያቄ ከሰይጣን እንደ መጣ አምናለሁ፤ ስለ እግዚአብሔር ክፉ እንዳስብ ለማድረግ አስቦ ነበር። «እነሆ፣ ይህን ሁሉ ዓመት ስትታገዪ ኖርሽ፤ እግዚአብሔር ሁሉንም በአንድ ጊዜ ሊያደርገው ይችል ነበር፤ ታዲያ ለምን አላደረገውም?» «አዎ፣ እውነት ነው» አልሁ።

«እሺ፣ ታዲያ ለምን አላደረገውም?» እኔም እጅግ ስላዘንሁ ማልቀስ ጀመርሁና እንዲህ አልሁ፦ «ጌታ ሆይ፣ በነጻ ባጸደቅኸኝ ጊዜ ፈጽመህ

ለምን እንዳልቀደስኸኝ አላውቅም፤ ነገር ግን እንዳላደረግኸው አውቃለሁ።» በዚያን ጊዜ የተባረከው መንፈስ ቅዱስ በጣፋጭ ሁኔታ መጣና ሌላ ጥያቄ በመጠየቅ ለጥያቄዬ መልስ ሰጠኝ፦ «ኢየሱስ የዕውሩን ዓይን ለመጀመሪያ ጊዜ በዳሰሰ ጊዜ ለምን እንዲያይ አላደረገውም?» ከመጀመሪያው ዳሰሳ በኋላ ኢየሱስ እንዲመለከት አዘዘውና ምን እንደሚያይ ጠየቀው። እርሱም፦ «ሰዎች እንደ ዛፍ ሲመላለሱ አያለሁ» አለ።

ከዚያም እንደ ገና ዳሰሰው፤ እርሱም ሰውን ሁሉ አጥርቶ እንዳየ ተናገረ።

በሁለተኛው ዳሰሳ የነበረው ኃይል በመጀመሪያውም ዳሰሳ የነበረው ያው ክርስቶስ ነበር። ዕውሩን በመጀመሪያው ጊዜ አጥርቶ እንዲያይ ሊያደርገው ይችል ነበር፤ ነገር ግን አላደረገውም።

«ጌታ ሆይ» አልሁ፣ «አሁን ገባኝ፤ ስትለውጠኝ ፈጽመህ ለምን እንዳልቀደስኸኝ እኔን የሚመለከተኝ ጉዳይ አይደለም፤ እንዳደረግኸው ማወቄ ይበቃኛል።» ሥላሴን እያመሰገንሁ ወደ ብርሃንና ወደ ነጻነት ገባሁ። ስለ ገዛ ሥራው እግዚአብሔርን መጠየቄን ተውሁ። ይህ ድፍረት ነው ብዬ አስባለሁ፤ ቢሆንም ስንቶች ይህንኑ ነገር ያደርጋሉ! የሚያረካቸውም መልስ ባያገኙ ግራ ይጋባሉ፤ ከዚያም ስለዚህ ታላቅ መዳን አጠቃላይ ትምህርትና እውነት ወደ ጥርጣሬ ይወድቃሉ።

ወደ ሙሉ መዳን የተባረከ ብርሃንና ልምምድ ከገባሁ በኋላ በመጀመሪያ ካወቅኋቸው ነገሮች አንዱ ከዚያ በፊት ፈጽሞ ያላወቅሁት የጸናና የእግዚአብሔርን ተስፋዎች የራሴ የሚያደርግ እምነት ነበር። መጽሐፍ ቅዱስንና ተስፋዎቹን ሁሉ ምንጊዜም አምን ነበር፤ ነገር ግን ተስፋዎቹን ለነፍሴ ፍላጎት የራሴ ለማድረግ ኃይል ያለኝ አይመስልም ነበር፤ ብርሃኑ ሰብሮ ከገባና ጨለማዬ ከሸሸ በኋላ ግን ተስፋዎቹን ማመን ብቻ ሳይሆን የራሴ ማድረግ የሚያስችል ኃይል ተሰጠኝ።

ተስፋዎቹን ሳነብ፦ «ወይ ጉድ! ይህ የእኔ ነው፤ ያም የእኔ ነው» እል ነበር፤ መርከበኞች ሸራቸውን ሲጠቀልሉ እንደሚያደርጉት ያህል ነበር፤ ተስፋዎቹን ይዤ በዙሪያዬ ጠቀለልኋቸው፤ ምድሪቱንም ወርሼ ወዲያና ወዲህ ተመላለስሁባት። ሁሉ የእናንተ ነው፥ እናንተም የክርስቶስ ናችሁ ክርስቶስም የእግዚአብሔር ነው። እንዲህ ብዬ ዘመርሁ፦


«ሁሉ የእኔ ነው፤
እኔ የእርሱ ነኝና—
እንዴት ሳልዘምር እቀራለሁ?»

አንድ ቀን በክፍሌ ውስጥ ሥራ ይዤ ሳለሁ የኢየሱስ መገኘት በግልጽ የተሰማኝ መሰለኝ። በዓይኔ ምንም አላየሁም፤ ነገር ግን አንድ ቅዱስ አካል በአጠገቤና በዙሪያዬ እንዳለ የተገነዘብሁ መሰለኝ፤ ከእርሱም ጋር እነጋገር ነበር፤ እንዲህም እያልሁ ነበር፦ «እንግዲህ አንድ ሰው በመጽደቅና

በመቀደስ መካከል ያለውን ልዩነት እንድነግረው ቢጠይቀኝ እንዴት አድርጌ እነግረዋለሁ? ልዩነት አለ፤ አውቀዋለሁ፤ ይሰማኛል፤ ነገር ግን እንዴት እንደምገልጸው አላውቅም።» ውዱ ጌታ ኢየሱስም ሌላ ጥያቄ በመጠየቅ ለጥያቄዬ መልስ የሰጠኝ መሰለኝ። እንዲህም አለኝ፦ «በፀሐይ ብርሃንና በጨረቃ ብርሃን መካከል ያለው ልዩነት ምንድር ነው?» ወዲያውኑ ገባኝ። የውቡን የጨረቃ ብርሃን ውበት አውቅ ነበር። በብሩህነቱ አንብቤበታለሁ፤ ብዙ ጊዜም በሌሊት ሰፍቼበታለሁ፤ ያማረም ነበር። ያ የጸደቅሁበት ሁኔታዬ ነበር። በፀሐይ ብርሃን እንደሚታይ አጥርቼ ያልተረዳሁባቸው ጊዜያት ስንት ነበሩ! ጥልቁ ልምምድ ግን በኃይሉ በተፈጥሮው ዓለም እንዳለው የፀሐይ ብርሃን ነበር። እርሱ ጨለማ ማዕዘኖችን ሁሉ ዘልቆ ይገባል። በበር ላይ ትንሽ የሚስማር ቀዳዳ ወይም በየትም ቦታ ስንጥቅ ቢኖር እንኳ ፀሐይ ፈልጋ ታገኘዋለች፤ በእርሱም ታልፋለች፤ ከዚያም በዙሪያዋ ያለውን ሁሉ ታሞቃለች። የፀሐይ ብርሃን ባለበት ውርጭ ሊኖር አይችልም፤ ይልቁንም ሁልጊዜ እንደ ሞቃት አገር ነው። የጨረቃ ብርሃን ያልገለጣቸው ጥልቅ ስፍራዎች በልቤ ውስጥ ነበሩ፤ ታላቁ የመቀደስ የፀሐይ ብርሃን በመጣ ጊዜ ግን፣ እግዚአብሔር ያንን የመጀመሪያ ሥራ በነፍሴ ውስጥ የሠራበትን ጊዜ የሚያስታውሰው ጸንቶ የሚኖር ግንዛቤ ብቻ ካልሆነ በቀር፣ የጨረቃ ብርሃን የሆነውን የመጽደቅ ሁኔታ ሊጋርደው የቀረበ ያህል ነበር! ከዚያ ወዲህ ያንን የጥንት መዝሙር አልዘመርሁም፦


«የበጋ እኩሌታ ፀሐይ ደብዝዞ ያበራል፤
ሜዳዎችም ደስ ብሎ ለመታየት በከንቱ ይጥራሉ፤
እኔ ግን በእርሱ ደስ ሲለኝ፣
ዲሴምበር እንደ ሜይ ያማረ ይሆናል።»

ይህ እንደ ጨረቃ ብርሃንና እንደ ፀሐይ ብርሃን እውነተኛ የሆኑ ሁለት የተለያዩ ሁኔታዎችን ያመለክታል። እውነት እንደ ሆነ አውቅ ነበር፤ ነገር ግን፣ ኦ፣ የምታበራውን ፀሐይ ማግኘት ስችል በልቤ ውስጥ ዲሴምበር ለምን ይኖራል? መንፈስ ቅዱስ በሚቀድስ ኃይል ወደ ነፍሴ በመጣ ጊዜ፣ በእምነት፣ በብርሃን፣ በብርታት፣ በኃይል፣ በምስጋና፣ በውዳሴ፣ በዕረፍት፣ በሰላምና በድል ለዘላለም እስከ ዘላለም እየጨመረ የሚሄድ የማያቋርጥ የሜይ ቀን መጀመሪያ ነበር። አሜን። አሜን።

ይህ የቻርልስ ዌስሊ የጥንት መዝሙር ምንኛ እውነት ነው፦


«በዝማሬ አገኘዋለሁ፤
በጸሎትም አገኘዋለሁ፤
በጣፋጭ ተመስጦ ውስጥ
ሁልጊዜ በዚያ አለ።
የዘወትር ጓደኛዬ ሆይ፣
ኦ፣ ከቶ አንለያይ፤
ክብር ሁሉ ለኢየሱስ ይሁን።
እርሱ በልቤ ውስጥ ያድራል።»

አንድ ቀን ስለ ቸርነቱ እያሰላሰልሁና እያሰብሁ ነበር። ጌታ ያደረገልኝን ሁሉ ሳስብ ልቤ በምስጋና ተሞልቶ ነበር፤ እኔም፦ «ኦ፣ ከአሁን በኋላ ቀድሞ እንደምጸልየው መጸለይ አያስፈልገኝም» አልሁ። በዚያን ጊዜ እነዚህ ቃሎች መጡልኝ፦ «የእስራኤል ልጆች በየማለዳው አዲስ መና ይሰበስቡ ነበር።» እኔም፦ «አዎ፣ ኢየሱስ» አልሁ። ነፍሴ የሚያስፈልጋት የዕለት እንጀራ መሆኑን ሊያስተምረኝ እንዳሰበ አወቅሁ፤ የሥጋ ፍላጎቴ በየቀኑ እንደሚሟላ ሁሉ፣ መንፈሳዊ ፍላጎቴም በጸሎት፣ ቅዱስ ቃሉን በማንበብና ተስፋዎቹን የራሴ በማድረግ መሟላት አለበት። ይህ ከሌለ ሌላው ሁሉ ምንም አይጠቅምም።

የሰይጣን ተንኮል ሁሉ ቢኖርም፣ መታዘዝን ሊያስተምረኝ እንዴት እንደ መራኝ ሳስብ እግዚአብሔር ለእኔ ያሳየው ትዕግሥት ምንኛ ያስደንቀኛል!

አንድ ቀን በላይኛው የከተማው ክፍል እሠራ ነበር፤ አንዲት ወይዘሮ አንዳንድ ብርድ ልብሶችን ማሳጠብ ፈልጋ ነበርና። የምሄድበት ቀን ጠዋት ትንሽ ዘግይቼ ተኛሁ። እዚያ መድረስ የነበረብኝ ከጠዋቱ በአንድ ሰዓት ነበር። ከአራተኛው ጎዳና እስከ ሃያ ሦስተኛው ጎዳና ረጅም መንገድ ነው። አንዳንድ በራሪ ጽሑፎችን እንድወስድ ተመራሁ። ሁልጊዜ ብዙ በራሪ ጽሑፎች በእጄ አስቀምጥ ነበር፤ ስወጣም እወስዳቸው ነበር፤ የምሰጠውን በትክክል እንዳውቅ አብዛኛውን ጊዜ እመለከታቸው ነበር። በዚያ ጠዋት ሰይጣን ያጣደፈኝ መሰለኝ፦ «በራሪ ጽሑፎቹን ለመለየት ብትቆሚ በጣም ትዘገያለሽ።»

«አዎ» አልሁ፣ «እንዳልዘገይ እፈራለሁ።» ከዚያም መንፈስ፦ «በራሪ ጽሑፎቹን ውሰጂ» የሚል ይመስል ነበር። ከዚያ አንድ እፍኝ አንሥቼ ማየት ጀመርሁ። ከዚያም በጣም ተረበሽሁ። ሰይጣን፦ «ጠዋት በአንድ ሰዓት እዚያ ካልደረስሽ ያቺ ሴት እንደማትከፍልሽ ታውቂያለሽ» አለ።

«አዎ» አልሁ፣ «ለነገሩ እርሷ በገንዘብ ጉዳይ ጨካኝ ናት።» ስለዚህ በራሪ ጽሑፎቹን አስቀምጬ ተነሣሁ፤ በዚያ ጠዋት እንዳየሁት በራሪ ጽሑፍ ልሰጥባቸው የምችልባቸውን ያን ያህል ብዙ አጋጣሚዎች ፈጽሞ ያየሁ አልመሰለኝም። ወደ ቤቱ በደረስሁ ጊዜ ወይዘሮዋ ብርድ ልብሶቹ በዚያ ቀን እንዲታጠቡ እንደማትፈልግ ነገረችኝ፤ በሚቀጥለው ሳምንት እንድመጣ አለችኝ። ሰይጣን እንዴት እንዳሰናከለኝም አየሁ። መልካሙን መንፈስ ሰምቼ በራሪ ጽሑፎቹን ስላልወሰድሁ ምንኛ አዘንሁ! ልብሱ በዚያ ቀን እንደማይታጠብ እግዚአብሔር ያውቅ ነበር፤ «በራሪ ጽሑፎቹን ውሰጂ» ብሎ ለልቤ በዚያ ያህል በለስላሳ ያንሾካሾከውም ስለዚህ ነበር። እኔ ባለመስጠቴ በረከቱን ያጣው ማን እንደ ሆነ አላውቅም፤ እኔ ግን ባለመታዘዜ በረከት እንዳጣሁ አውቃለሁ። ኦ፣ ጨለማ ቢሆንም እንኳ መታዘዝ እጅግ ያስተማምናል። ከጥቂት ቀናት በኋላ ሄድሁ፤ በራሪ ጽሑፎቼንም ለይቼ ስለ ነበር፣ ለማን እንድሰጣቸው ጌታ እንዲያሳየኝ ጸለይሁ፤ ምንኛ መልካም ጊዜም አሳለፍሁ! አንድ መልከ መልካም

ሰው አገኘሁ፤ ሳየውም ተንቀጠቀጥሁ፤ ወደ እኔ ሲቀርብ ግን፦ «ጌታ ሆይ፣ አሁን እርዳኝ» አልሁ። አንዳንድ ጥቁር ሰዎችን አግኝቼ በራሪ ጽሑፎችን ሰጥቻቸውና አንድ ቃል ተናግሬያቸው ነበር፤ ዲያብሎስም፦ «ያ ነጭ ጨዋ ሰው ነው፤ ይረግምሻል» አለ።

እርሱ በቀረበ ጊዜ ግን፦ «ይቅርታ ጌታዬ፤ በራሪ ጽሑፍ ይወስዳሉ?» አልሁ።

እጅግ የተደነቀ ይመስል ነበር፤ ነገር ግን በጣም ደስ የሚልና ትሑት ነበር። በራሪ ጽሑፉን ወስዶ አመሰገነኝ። ከሁለት ሳምንት ያህል በኋላ አንዲት ወዳጄ፦ «ባለፈው ሳምንት በስድስተኛው አቬኑ ለአንድ ወጣት በራሪ ጽሑፍ ሰጥተሽ ነበር?» አለችኝ።

«አዎ።»

«እንግዲያውስ» አለች፣ «አንቺ ነበርሽ ማለት ነው። ለወይዘሮ ኤ. እሠራ ነበር፤ እርሷም ልጅዋ እጅግ ደስ ብሎት ወደ ቤት እንደ መጣና አንዲት ጥቁር ሴት በራሪ ጽሑፍ እንደ ሰጠችው፣ እንደዚያ በራሪ ጽሑፍ የጠቀመው ነገር ከዚያ በፊት አንብቦ እንደማያውቅ እንደ ነገራት ነገረችኝ።»

ኦ፣ እናትና ልጅ በአንድነት ምንኛ ደስ አላቸው! ለረጅም ጊዜ የጸለየችለት ውድ ልጅዋ በጌታ ሰላምንና ደስታን አገኘ። በዚያ መንገድ መሆኑ ምንኛ እንግዳ ነው! ነገር ግን እግዚአብሔር ድንቆቹን ለማድረግ በምሥጢራዊ መንገዶች ይሠራል። ትንሽ ወደ ፊት ስሄድ ሁለት ሰዎችን አለፍሁ፤ ሙዚቀኞች ነበሩ። ቆመው ይነጋገሩ ነበር፤ ወደ እነርሱ ስቀርብም ለእነዚያ ሰዎች በራሪ ጽሑፍ እንድሰጥ ጥልቅ ስሜት መጣብኝ። ልቤ በፍጥነት ይመታ ነበር፤ ነገር ግን ልክ ወደ እነርሱ ስደርስ ምን ልሠራ እንዳለሁ የገመቱ ይመስል ተነሥተው ወደ ማዶ ተሻገሩ። እኔም፦ «ጌታ ሆይ፣ ለዚያ ሰው በራሪ ጽሑፍ እንድሰጠው ብትፈልግ፣ እንዲያገኘው የምትፈልገው ቃል ካለ፣ በሚቀጥለው መታጠፊያ እንደ ገና ተመልሶ እንዲሻገር አድርገው» አልሁ። ኦ፣ ምንኛ ጸለይሁ! በእርግጥም በሚቀጥለው መታጠፊያ ተሻግሮ ፊት ለፊት ተገናኘኝ፤ በራሪ ጽሑፍም ወሰደ፤ አመሰገነኝም፤ በጥልቅም የተነካ ይመስል ነበር። እግዚአብሔር ይመስገን።

በሌላ ጊዜ ደግሞ። አንድ ምሽት በጀልባ እየተሻገርሁ ነበር። በእጄ አንድ መልካም መንፈሳዊ ጋዜጣ ይዤ ነበር፤ በውስጡም አንድ መልካም ስብከትና አንዳንድ የሕይወት ምስክርነቶች ነበሩበት። «ይህን ወስጄ ለአንድ ሰው እሰጠዋለሁ፤ ወንዶች ከበራሪ ጽሑፍ ይልቅ ጋዜጣ ለመቀበል ፈቃደኞች ናቸው» አልሁ። በጀልባው ላይ አንድ መልከ መልካም ጎረምሳ ልክ ከእኔ ፊት ለፊት ተቀምጦ ነበር፤ ሳየውም መንፈስ፦ «ያንን ጋዜጣ ስጪው» አለ። እንደ ገና ተመለከትሁና፦ «ከመውረዳችን በፊት እሰጠዋለሁ» ብዬ አሰብሁ። ከዚያም አንድ ነገር፦ «ይበልጥ አሳቢ ለሚመስለው ለዚህኛው ሰው ስጪው» ያለኝ መሰለኝ።

«አይደለም» የሚል ወደ እኔ መጣ፤ «ለዚያ ጎረምሳ ስጪው።»

ተነሥቼ ሰጠሁት። ወስዶም ከአግዳሚው ወንበር

በታች ወረወረው። በዚያን ጊዜ ሰይጣን፦ «እነሆ ተሳሳትሽ፤ ለዚያ ሰው ብትሰጪው ይሻልሽ ነበር» አለ።

እኔ ግን ልቤን በጸሎት አንሥቼ፦ «ጌታ ሆይ፣ ያ ወጣት እንዲያውቀው የምትፈልገው ነገር በዚያ ጋዜጣ ውስጥ ካለ፣ እንዲያነሣው አድርገው። ጌታ ሆይ፣ እንዲወጣ አትፍቀድለት፤ ያንን ጋዜጣ እንዲያነሣ አድርገው» አልሁ። መጸለዬን ቀጠልሁ፤ ወደ ዳርቻውም እየቀረብን ነበር። ልጁ በጣም እንደ ተቅበጠበጠ አየሁ። ኦ፣ እንዲያነሣው ጌታን ምንኛ ለመንሁት! ለእርሱ የሚሆን ቃል በውስጡ እንዳለ ተሰምቶኝ ነበር። ልክ ጀልባዋ ወደቡን በመታች ጊዜ ጎንበስ ብሎ ጋዜጣውን አነሣና በኪሱ ከትቶ እየሮጠ ሄደ። በዚያን ጊዜ ያ ታላቅ ጥንታዊ ጥቅስ መጣልኝ፦ «ማናቸውንም ነገር በስሜ ብትለምኑ እኔ አደርገዋለሁ።» (ዮሐንስ 14:14)።

ኖቬምበር 1869 ይመስለኛል። አንድ ምሽት ከሥራ ወደ ቤቴ ስመለስ በስድስተኛው አቬኑ አንዲት ወዳጄን አገኘሁ። እርሷም፦ «ስሚዝ፣ ዛሬ ማታ ወደ ባዛሩ ትሄጃለሽ?» አለችኝ።

«አይ» አልሁ፣ «ደክሞኛል፤ አልሄድም።»

«ሁለት ትኬቶች አሉኝ፤ መሄድ ከፈለግሽ እሰጥሻለሁ።»

«እሺ» አልሁ፣ «ቤት ከደረስሁ በኋላ ደህና ከተሰማኝ እሄዳለሁ። ጌታ ለእርሱ አንድ ነገር እንዳደርግ ካልፈለገ በቀር ወደ እንደዚህ ዓይነት ስፍራ ፈጽሞ እንደማልሄድ ታውቂያለሽ።»

«እንግዲህ» አለች፣ «ብትሄጂ ደስ ይለኛል።»

በአሚቲ ጎዳና ቁጥር ሠላሳ አምስት ወዳለው ቤቴ ሄድሁ፤ ስጸልይና ጌታን ስጠይቅም መሄድ እንዳለብኝ በጣም ግልጽ ሆነልኝ። ምሽቱ እርጥበት ያለውና ዝናባማ ነበር፤ እኔም፦ «እንግዲህ በጣም እርጥብ ነው፤ አልሄድም» ብዬ አስብ ነበር። ከዚያም፦ «ሂጂ፤ አንዳንድ በራሪ ጽሑፎችን ውሰጂ» የሚል ወደ እኔ ይመጣ ነበር።

እንደምነቀፍ አውቅ ነበር፤ የቅድስናን በረከት በመመስከሬ ምክንያት በገዛ ወገኖቼ መካከል እንደ ዝንጉርጉር ወፍ ሆኜ ነበርና። «እነሆ አማንዳ ስሚዝ ደግሞ ከነመቀደሷ መጣች» የሚሉ አስተያየቶች ይሰነዘሩ ነበር። ስለዚህ የሚባለውን ሁሉ አውቅ ነበር፤ ነገር ግን፦ «ጌታ ሆይ፣ እርዳኝ፤ ስለ አንተም እሄዳለሁ። ምን እንዳደርግ እንደምትፈልግ ንገረኝ» አልሁ።

ገባሁ፤ በዚያም ብዙ ሰዎች ነበሩ፤ ሁሉም ወደ እኔ የተመለከቱ ይመስሉ ነበር፤ አስተያየቶች ተሰነዘሩ፤ ከዚያም ሁሉም እንደዚያ ስፍራ ልማድ ወደ ጉዳያቸው ቀጠሉ። ዞር ዞር አልሁና ለብዙዎች ተናገርሁ፤ ከዚያም ተቀምጬ ልቤን በጸሎት አንሥቼ፦ «ጌታ ሆይ፣ እዚህ ምንም ጉዳይ የለኝም፤ ለምንስ እቆያለሁ? ምን እንዳደርግ እንደምትፈልግ ግልጽ አድርግልኝ» አልሁ፤ እነዚህም ቃሎች ለልቤ በግልጽ ተነገሩ፦ «ሂጂና በመንገዱ ላይ ቁሚ።» ተነሥቼ ሄድሁና ሰዎች በሚወጡበት በደረጃው አናት ላይ ቆምሁ። ብዙ ሰዎች ወደ ላይ አለፉ፤ ከዚያም በደስታ የተሞሉ

ሁለት ወጣቶች መጡ። መንፈስ በተለይ አንዱን የመረጠ ይመስል፦ «ለዚያ ወጣት ተናገሪ» አለ። ተናገርሁት፤ በተቻለው መጠን አክብሮት አሳየኝ፤ ነገር ግን ለእርሱ ገና ብዙ ጊዜ እንዳለው ተናግሮ ራሱን ነቅንቆ ዞር አለ።

ለሌሎች ብዙ ሰዎች በራሪ ጽሑፎችን ሰጠሁ፤ ከዚያም ጌታ፦ «ወደ ቤትሽ መሄድ ትችያለሽ» ያለ መሰለኝ። ወጣሁ፤ የታዘዝሁትን እንዳደረግሁ ተሰማኝ፤ ነገር ግን ከዚያ በቀር ምንም አለማድረጌ ምንኛ እንግዳ ነበር! ወደ ቤት ሄጄ ያንን ወጣት በጸሎት ወደ እግዚአብሔር አቀረብሁት። ይህ ረቡዕ ምሽት ነበር ብዬ አስባለሁ። ቅዳሜ ዕለት አንዳንድ ልብሶችን ወደ ቤት ይዤ ስሄድ በስድስተኛው አቬኑ አንድ ሰው አገኘሁ፤ እነርሱም፦ «ቻርሊ ኤስ. እንደ ሞተ ሰማሽ?» አሉኝ።

«አልሰማሁም።»

«እንግዲያውስ ሞቷል፤ ዛሬ ጠዋት በአልጋው ላይ ሞቶ ተገኘ፤ በሌላው ሌሊት ደህና ሆኖና ተደስቶ በባዛሩ ነበር።» ሄጄ አየሁት። እነሆ በዚያ ሞቶ ነበር፤ ምንም የሕመም ምልክት አልነበረበትም፤ እግዚአብሔርም እንድናገረው የላከኝ ያው ወጣት ነበር። የተኛ ይመስል ነበር። ኦ፣ ምንኛ ያሳዝን ነበር! ቢሆንም ወጣቱ ቢሰማም ባይሰማም፣ በዚያ ምሽት ጌታን ለመታዘዝና እርሱ እንደ መራኝ ያሰብሁትን ለማድረግ ብርታት ስለ ተሰጠኝ ምንኛ ደስ አለኝ!

የወንድሞችንና የእኅቶችን አለመጣጣም ከዚያ በፊት ካየሁት እጅግ በበለጠ ያየሁ መሰለኝ። አብዛኞቹ ሰዎች እንደሚያደርጉት ቀድሞም አንዳንዱን አይቼ ነበር። የራሴን አለመጣጣም፣ ጌታም ከምን እንዳዳነኝ አየሁ፤ ሰው ሁሉ ወዲያውኑ እንዲድን ፈለግሁ። በረከቱን በተቀበልሁበት ጊዜ ወንድም ፓተርሰን የሱሊቫን ስትሪት የአፍሪካ ሜቶዲስት ኤጲስ ቆጶሳዊ ቤተ ክርስቲያን (A. M. E.) ፓስተር ነበር። እርሱ ልምምዱን ያጣጥም ነበር፤ ትምህርቱንም ይሰብክ ነበር። ነገር ግን ጥቁሮች እንደ አንዳንድ ነጮች ናቸው፤ ቤተ ክርስቲያኒቱ በእርሱ አመራር ብትበለጽግም፣ በሁለቱም ዓመታት ድንቅ መነቃቃት ቢኖረንም፣ ቤተ ክርስቲያኒቱም ብትገነባና ብትታነጽም፣ ብዙዎቹ ግን አልወደዱትም ነበር። እርሱ ከሄደ በኋላ ቄስ ኔልሰን ተርፒን ወደ እኛ ተላከ። እርሱ ኃይለኛ ነበር። ስለ ሙሉ መዳን በረከት ያለውን ትምህርትና ልምምድ በግልጽ ተቃወመ፤ አወገዘም፤ ምንም እንኳ በቤተ ክርስቲያኒቱ ውስጥ ልምምዱ እንዳላቸው የሚናገሩ ብዙ ሰዎች፣ ከእነርሱም አንዳንዶቹ ከዋና ዋና አባላት መካከል ቢኖሩም። በብዙኃኑ ዘንድ እጅግ ተወዳጅ ነበር። ቤተ ክርስቲያኒቱ ትጨናነቅ ነበር። በዚያን ጊዜ በፍቅር ግብዣ ወይም በአጠቃላይ የክፍል ስብሰባ ላይ በግልጽ ለመመስከር የደፈርን እኛ ምስኪኖች ኃይለኛ ወቀሳ ይጠብቀን ነበር፤ በተለይም ቤተ ክርስቲያኒቱ በምትጨናነቅበት በእሁድ ምሽት ቀድሞ ያውቃቸው ስለ ነበሩ ስለ አንዲት የተቀደሰች እኅት ወይም

ስለ አንድ የተቀደሰ ወንድም አንዳንድ አስቂኝ አለመጣጣም ለመናገር ልዩ ጥረት ያደርግ ነበር። ስለ እኅት ከሆነም እንዲህ ይል ነበር፦ «ቀለል ያለ ቆብና ሻሽ ያደርጋሉ፤ ፊታቸውንም ያጨልማሉ፤ ነገር ግን የተቀደሱ ሰይጣኖች ናቸው።» ከዚያም ዓይን ሁሉ ወደ እኅት ስኮትና ወደ እኔ ይዞር ነበር፤ በተገለጸው ሁኔታ የምንለብስ እኛ ብቻ ማለት ይቻል ነበርና። ከዚያም በቤቱ ሁሉ ሳቅ ይሰማ ነበር። ስንቱን ነገር መጋፈጥ ነበረብኝ! ቤተ ክርስቲያኒቱን ለመተው የተፈተንሁትም ስለዚህ ነበር። በዚያ ላይ ባዛሮችንና በዓላትን፣ ሌላውንም ሁሉ አልወድም ነበር። ነገር ግን እግዚአብሔር በእነዚህ ነገሮች በአንዱም ወደ ኋላ ከማፈግፈግ አዳነኝ። በዚያን ጊዜ ለልብሶቼ ባሪያ ነበርሁ፤ ለሌሎች ሰዎችም ልብሶች ባሪያ ነበርሁ። ልብሳቸው ይሆናል ብዬ ባሰብሁት መንገድ በትክክል ካልተሰፋ ያስጨንቀኝ ነበር፤ በጸሎት ስብሰባ ሲናገሩና ሲጸልዩ ባልሰማቸውም ግድ አልነበረኝም። ከእነዚህ ያጌጡ ሰዎች ጋር በቅዱስ ቁርባን ላይ ባልንበረከክ እመርጥ ነበር። በዚያ ላይ ወንድም ተርፒንን እፈራው ነበር። መጀመሪያ ላይ በጣም ደግ ነበር፤ ከጥቂት ጊዜ በኋላ ግን ሁልጊዜ ሊሸሸኝ ይሞክር ነበር። እኔ ግን እከታተለው ነበር፤ ሊጠይቀኝ እንዲመጣም እለምነው ነበር፤ እኅት ተርፒንንና ልጆቹንም ልጠይቅ እሄድ ነበር። እርሱ ግን ሁልጊዜ በጣም ሥርዓት የጠበቀና ቀዝቃዛ ነበር። ወይ ጉድ! ምንኛ ፈራሁት! ስለዚህ አንድ ቀን እማማ ጆንስ፦ «እኅት ስሚዝ፣ እኔ አንቺን ብሆን ስለ መቀደስ ምንም አልናገርም ነበር። ታያለሽ፣ ሰዎች አይወዱትም፤ ያሳድዱሻል፤ እኔም ሲያሳድዱሽ መስማት አልወድም» አለችኝ።

«ነገር ግን እማማ ጆንስ» አልሁ፣ «ጌታ እንዲህ ባርኮኛልና ዝም ማለት አልችልም።» እርሷም ሳቀችና በደግነት ያዘችኝ፤ «እኔ አንቺን ብሆን ስለዚያ ምንም አልናገርም ነበር» አለችኝ።

ስለዚህ ወደ ቤት ሄጄ እማማ ጆንስ ምንኛ እንዳዘነችልኝ አሰብሁ። ስለዚህ በምስክርነቴ ግልጽ ያልሆነ መናገር ጀመርሁ። ሰዎቹ የሚወድዱትን ቃላት መረጥሁ። «እኔ ሙሉ በሙሉ የጌታ ነኝ» እል ነበር። እነርሱም «አሜን!» ይሉ ነበር። ወይም «ኢየሱስ ፈጽሞ ያድነኛል» ወይም «ደሙ ያነጻል» ብል፣ ለዚያም «አሜን!» ይሉ ነበር። «መቀደስ» የሚለውን ቃል ብጠቀም ግን በደረቁ አጥንቶች መካከል ሽክሽክታ ይሆን ነበር። ከዚያም በሚቀጥለው ምስክርነት ተጠንቀቁ፤ በተለይም በአጠቃላይ የክፍል ስብሰባ ወይም በፍቅር ግብዣ ላይ ከሆነ። እግዚአብሔር ይመስገን፤ በረከቱን ካገኘሁ ከሦስት ሳምንት በኋላ ብቻ ለጸሎት መልስ ሆኖ የክፍል መሪዬን ሄንሪ ዲ ሺልድስን ወደ ልምምዱ መራው። ስለዚህ ረዳት የክፍል መሪ የነበረው «ፖፕ» ስኮት ፈጽሞ በግልጽ ባይወጣም፣ ወንድም ዲ ሺልድስ ለእኔም ለብዙዎችም ኃይልና ታላቅ ረዳት ነበር። እስከ አሁንም በኒው ዮርክ ይኖራል፤ ይህን በምጽፍበት ጊዜም በሙሉ መዳን ብርሃን እየተመላለሰ ነው። ቢሆንም ወንድም ተርፒንን እፈራው ነበር። ከዚያም ጨለማ መጣብኝ፤ ደስታውና

ሰላሙም ሁሉ የጠፋ መሰለ። ምን እንደ ሆንሁ አላወቅሁም። ስለዚህ የዚህን ጨለማ ምክንያት ለማወቅ ዓርብን ለጾምና ለጸሎት ለየሁ። ሰይጣን ብዙ ነገሮችን አሳሰበኝ፤ እኔ ግን ጸንቼ ብርሃንና እርዳታ እንዲሰጠኝ ወደ እግዚአብሔር ጮኽሁ። ስለዚህ በዚያ ቀን ሥራዬን አቁሜ ገለል ብዬ ብዙ ጊዜ ብጸልይም፣ ከሰዓት በኋላ ስምንት ሰዓት ገደማ መጽሐፍ ቅዱሴን ይዤ ለመጸለይ ተንበረከክሁ። እንዲህም አልሁ፦ «ኦ! ጌታ ሆይ፣ ምን እንደ ሆነ አሳየኝ። ይህ ጨለማ በአእምሮዬ ውስጥ ለምን ሆነ? ኦ! ጌታ ሆይ፣ ግልጽ አድርግልኝ።» መንፈስም፦ «አንብቢ» ብሎ በጣም በግልጽ የተናገረኝ መሰለኝ። መጽሐፍ ቅዱሴን ገለጥሁ፤ ዓይኖቼም በእነዚህ ቃሎች ላይ አረፉ፦ «ፍጹም ፍቅር ፍርሃትን አውጥቶ ይጥላል። የሚፈራም ሰው ፍቅሩ ፍጹም አይደለም።» እኔም፦ «ጌታ ሆይ፣ ፍጹም ካልሆንሁ አሁን እሆናለሁ» አልሁ። ያን ጊዜ ምን እንደ ሆነ አየሁ። ፍርሃት ነበር! እኔም እንዲህ አልሁ፦ «ኦ! ጌታ ሆይ፣ ሰውን የመፍራትን መንፈስ ሁሉ ከእኔ አውጣ። ስላደረግህልኝ አመሰግንሃለሁ፤ ነገር ግን ከፍርሃት አድነኝ። ሴትን የመፍራትን መንፈስ ሁሉ ከእኔ አውጣ፤ በዚህም ፍርሃት ላይ ፍጹም ድልን ስጠኝ።» ጌታ ይመስገን፤ አደረገውም። የተለየ መገለጥ አልነበረም፤ ነገር ግን ጌታ እንዲያደርግልኝ የለመንሁትን እንዳደረገው በልቤ ውስጥ ጥልቅ እርግጠኝነት ነበር፤ እኔም አመሰገንሁት። ከዚያም ወደ እኔ መጣ፦ «በእሁድ ወደ ላይኛው ከተማ ወደ ዩኒየን ቤተ ክርስቲያን ሄደሽ በግልጽ ትመሰክሪያለሽን?»

«አዎ ጌታ ሆይ፣ ብትረዳኝ፣ ብርታትህንም ብትሰጠኝና ከእኔ ጋር ብትሄድ እሄዳለሁ።» ስለዚህ በልቤ ጸጥታና ሰላም ሆነ። በላይኛው ከተማ የነበረችው የዩኒየን ቤተ ክርስቲያን የጥቁሮች ቤተ ክርስቲያን ነበረች። በቅድስና ትምህርት የሚያምን አንድም አባል በውስጧ አልነበረም፤ እንደዚህ ያለውን በረከት በመመስከሬም ከዚያች ቤተ ክርስቲያን ታላቅ ነቀፌታ ደርሶብኝ ነበር። የእሁድ ጠዋት ደረሰ። የፍቅር ግብዣው ከጠዋቱ አሥራ ሁለት ሰዓት ላይ ነበር። ከዚያ በፊት የሄድሁት አንድ ጊዜ ብቻ ነበር። ተዘጋጅቼ ሄድሁ። ልቤ ተንቀጠቀጠ፤ ጉልበቶቼም ተንቀጠቀጡ። ነገር ግን ቀጠልሁ፤ «ጌታ ሆይ፣ አሁን እርዳኝ፤ እኔም እሄዳለሁ» አልሁ። ገብቼ ተቀመጥሁ። ቤተ ክርስቲያኒቱ በደንብ ሞልታ ነበር። ብዙ እንግዳ አገልጋዮች በመሠዊያው ስፍራ ተቀምጠው ነበር። ዓይን ሁሉ ወደ እኔ ተመለከተ። ስብሰባው ከተከፈተ በኋላ ምስክርነቱ ተጀመረ። አገልጋዮቹ ሁሉም ሰው አጭር እንዲያደርግ አሳሰቡ፤ በብዙዎቹ ምስክርነቶች ውስጥም ወደ እኔ የተሰነዘሩ አስተያየቶችና ሽሙጦች ነበሩ። ዝም ብዬ ተቀምጬ ጸለይሁ። ኦ! ምንኛ ጸለይሁ! ከዚያም በጣም መጮኽ ጀመሩ። እልል አሉ፤ አመሰገኑም። እኔም ለጌታ፦ «ጌታ ሆይ፣ እነዚህን ሰዎች ጸጥ ብታሰኛቸው ስለ አንተ እናገራለሁ። ጌታ ሆይ፣ ጸጥ አሰኛቸው። ታላቅ ጫጫታ ሲኖር መናገር አልችልም፤ አንተም ስለ አንተ እንድናገር ወደዚህ ልከኸኛል፤ እኔም

ሕዝቡ ይሰሙ ዘንድ። ጌታ ሆይ፣ ጸጥ አሰኛቸው።» አንዳንድ ጊዜ ሦስት ወይም አራት ሰዎች መሬት ላይ ሆነው በአንድ ጊዜ ይናገሩ ነበር። አገልጋዮቹም፦ «ጌታ ሁላችሁንም ይሰማችኋል። አንዱ ሌላውን አይጠብቅ» እያሉ ያበረታቷቸው ነበር። እኔ ግን፦ «ጌታ ሆይ፣ ጸጥ አሰኛቸው፤ ጸጥ አሰኛቸው» ብዬ ጸለይሁ። ከዚያም ጸጥታ ሆነ። እኔም ተነሣሁ። ከዚያ እንደ ገና እልል ማለት ጀመሩ፤ ድምፄንም ዋጡት። ስለዚህ ዝም ብዬ ቆምሁና፦ «ጌታ ሆይ፣ ሕዝቡን ጸጥ አሰኝ» ብዬ ጸለይሁ። እርሱም አደረገው። እኔ በጀመርሁ ጊዜ አንድም ሰው እስከማይናገር ድረስ ረጋ አሉ። ጀመርሁና ስለ ቅድስና በግልጽ የሚናገሩትን፣ ይህንንም ጸጋ ለሚፈልጉት እግዚአብሔር የሰጠውን ተስፋ፣ በእምነትም እንዴት እንደሚገኝ የሚያሳዩትን በርካታ የመጽሐፍ ቅዱስ ክፍሎች ጠቀስሁ። እነርሱም አዳመጡ። አገልጋዮቹ እርስ በርሳቸው ተነካኩ። መናገሬን ቀጠልሁ፤ ቆየት ብዬም አንድ ጣት ምላሴን የነካው የመሰለኝ ደረጃ ላይ ደረስሁ፤ የእግዚአብሔርም ኃይል በሚያስደንቅ ሁኔታ በላዬ ወረደ፤ ለአሥር ደቂቃ ያህል የተናገርሁ መሰለኝ። ሰዎቹ የደነገጡ ይመስሉ ነበር። እኔ ስገባ እንደዚያ በትችት ዓይን ያዩኝ የነበሩት በመሠዊያው ውስጥ የተቀመጡት አገልጋዮች፦ «አሜን! ሁሉን የምትችል ጌታ ሆይ፣ ያችን እኅት ባርካት!» እያሉ እልል ማለት ጀመሩ። ከዚያም እሳቱ በሕዝቡ ሁሉ ላይ የወደቀ ይመስል ነበር። ከጨረስሁ በኋላ መልእክቱን እንደ ጌታ ፈቃድ እንዳደረስሁ እየተሰማኝ ተቀመጥሁ። በዚያ ቀን ስለ ሰጠኝ ብርታት ክብር ሁሉ ለስሙ ይሁን። አሜን። አሜን።

አንድ ቀን እኅት ስኮት መጣች፤ እጅግም ደስ ብሏት ነበር። አንዳንድ ነጭ እኅቶች ቤቷ መጥተው እንደ ጸለዩና እንደ ዘመሩ፣ በመንፈስ ቅዱስም የተሞሉ እንደ ነበሩ ነገረችኝ። አለባበሳቸው እጅግ ቀላልና ንጹሕ ነበር። በኒው ዮርክ ከተማ በላይኛው ክፍል በአንድ ቦታ የምትገኘው የነጻ ሜቶዲስት ቤተ ክርስቲያን አባላት ነበሩ። እርሷንም ወደ አንዳንድ ስብሰባዎቻቸው እንድትመጣ ጠየቋት። እኔም፦ «ኧረ! ለምን ይዘሻቸው ወደ እኔ አልመጣሽም?» አልኋት። እርሷም፦ «አንድ ቀን አንቺን ወደ ቤተ ክርስቲያናቸው ይዤሽ እንደምመጣ ነግሬአቸዋለሁ» አለች። ስለዚህ እሑድ ዕለት አብሬአት ሄድሁ። ከምኖርበት ሁለት ማይል ያህል ይርቅ ነበር። በማለዳ ተነሣን፤ እንደ ልማዳችንም መንገዱን ሁሉ በእግር ሄድን። እሑድ በጎዳና ባቡር መሳፈር አስከፊ ነገር መስሎ ይታየን ነበር። አሁንም ቢሆን መራቅ በምንችልበት ጊዜ ሁሉ ማድረግ የለብንም ብዬ አስባለሁ። ነገር ግን በዚህ ነገር እንኳ እንደ ቀድሞው በባርነት ውስጥ አይደለሁም። ጌታ ይመስገን! ቤተ ክርስቲያኑ ደረስን። በኒው ዮርክ ሁሉ የታወቀው አቶ ማኪ በዚያን ጊዜ በዚያች ቤተ ክርስቲያን እጅግ ተወዳጅና ታዋቂ ነበር፤ ለጥቁር ሰዎችም መልካም ወዳጅ ነበር። በኒው ዮርክ በሚገኘው የጥቁሮች መጦሪያ ቤት ለብዙ ዓመታት ስብሰባዎችን ይመራ ነበር። ወደ ቤተ ክርስቲያኑ ስንገባ እርሱ በዚያ ነበር፤ ስላየንም እጅግ ደስ አለው። ጨበጠን፣ አስቀመጠን፣ እጅግም ደግ ሆነልን።

«ዋ!» አልሁ በልቤ፣ «እነዚህ ሰዎች እንዴት ደጎች ናቸው!» በነጮች ቤተ ክርስቲያን እንዲህ ያለ አቀባበል ለጥቁር ሰዎች የተለመደ አልነበረምና። ደግሞም ቤተ ክርስቲያኑ እጅግ ያማረና ቀላል ነበር። ባለ ቀለም መስተዋት ወይም ትራስ፣ ፓይፕ ኦርጋንና የአራት ሰዎች መዘምራን አልነበሩም። እኅቶቹም ሁሉ አለባበሳቸው ቀላል ነበር። እኔም እንደዚያው ነበርሁ፤ በረከቱን ከማግኘቴ በፊት እንኳ ስለ ወደድሁትና ቁጠባም ስለ ነበረ በኩዌከሮች ዓይነት አለባበስ እለብስ ነበርና። ደግሞም በዚያ እሑድ ጠዋት የሰበከው አቶ ጄምስ የሚባል ሰው ነበር፤ በሸሚዙ ላይ የወርቅ ቁልፍ፣ በጣቶቹም ላይ ቀለበት አልነበረውም። ፊቱ የረጋና ብሩህ ነበር። ስለ ቅድስናም እንዴት ያለ ስብከት ሰበከ! ነፍሴ ጠገበች፤ ሰዎች ቤተ ክርስቲያኒቱን እንዲቀላቀሉ እንዲጋብዝ በአገልጋዩ ልብ እንዲያኖርለት ወደ ጌታ ጸለይሁ። ይህችን ቤተ ክርስቲያን መቀላቀል እንዳለብኝ ተሰማኝ። እውነተኛ ቤተ ክርስቲያን ነበረች። ያም ዓይነቱ ስብከት ከአርባ ዓመት በፊት ይሰሙት እንደ ነበር አባቴ ሲናገር የሰማሁት ነበር። እንግዲህ ጸለይሁ። በረከቱን ከተቀበልሁበት ጊዜ ጀምሮ ቀደም ብሎ በጸለይሁ ቁጥር ጌታ በሆነ መንገድ ቶሎ ይመልስልኝ ነበር። በዚህ ጠዋት ግን የመለሰልኝ አይመስልም ነበር፤ አሁን ግን መልስ እንደ ነበረ አያለሁ። አንዳንድ ጊዜ ጌታ ልመናን ሲከለክል፣ ሲሰጠው ያህል መልስ ነውና። ለብዙ ዓመታት የአፍሪካ ሜቶዲስት ቤተ ክርስቲያን አባል ብሆንም፣ በዚያ ጠዋት ያለ ደብዳቤ በሙከራ አባልነት ለመግባት ፈቃደኛ ነበርሁ። እንዲህም አልሁ፦ «ከቤተ ክርስቲያኔ ደብዳቤዬን ማግኘት እንደምችል አውቃለሁ፤ ነገር ግን ምክንያቱን ሁሉ ማወቅ ይፈልጋሉ፤ እኔ ደግሞ መናገር አልፈልግም። ወደዚህች ቤተ ክርስቲያን መግባት ብቻ ነው የምፈልገው። እነዚህ ሰዎች እንዴት ደጎች ይመስላሉ! ልክ ትክክለኛዎቹ ዓይነት ሰዎች ናቸው።» ስለዚህ መጸለዬን ቀጠልሁ። ስብከቱ አለቀ። ከዚያም የጸሎት ስብሰባ አደረጉ፤ ወንድም ኧርቪንም ጸለየ። ኧረ! እንዴት ያለ ጸሎት ነበር! መቼም አልረሳውም። እርሱ የታወቀ፣ አስደናቂ ኃይል ያለው ሰው ነበር። እኔም አሰብሁ፦ «መቀላቀል የሚፈልግ ሰው አለ ወይ ብለው ሳይጠይቁ ይዘጉ ይሆን! ተነሥቼ ሄጄ እንዲቀበሉኝ እጠይቃቸዋለሁ። ነገር ግን ያን ጊዜ ደብዳቤዬን ለምን እንዳላመጣሁ ይገረማሉ፤ ምን እላለሁ? ጌታ ይርዳኝ!» እርሱም ረዳኝ፤ ነገር ግን በዚያን ጊዜ እኔ እንደ ፈለግሁት አልነበረም፤ ይልቁንም፦ «ጌታን ለማወቅ ብትከታተሉ ታውቃላችሁ» ተብሎ እንደ ተጻፈ ነበር። ስብሰባውም ተዘጋ፤ ማንም ሊቀላቀል ይፈልግ እንደ ሆነ አልተጠየቀም። ወዳጆቹ ግን በእኔና በእኅት ስኮት ዙሪያ ተሰብስበው ጨበጡንና ስላዩን ደስ እንዳላቸው ነገሩን። አገልጋዩም ጨብጦን እንደ ገና እንድንመጣ ጠየቀን። ሁሉም እጅግ ደጎች ነበሩ። ነጻ ሜቶዲስቶች እንደ መሆናቸው እልል ይሉ ነበር፣ ነጻም ነበሩ። ወንድም ኧርቪን ወደ እኔ መጥቶ ስለ ነጻ ሜቶዲስት ቤተ ክርስቲያን አመጣጥና ትምህርት የሚናገሩ በርካታ ትንንሽ ጽሑፎችን ሰጠኝ። ቤተ ክርስቲያኒቱ በባርነትና

በምሥጢራዊ ማኅበራት ምክንያት ራሷን እንዴት እንደ ለየች ይገልጹ ነበር። ይህ ሁሉ ለእኔ አዲስ ነበር፤ ነገር ግን ልክ የሚስማማኝ ነበር። ከዚያም ስለ ቀላል አለባበስ የሚናገር ጽሑፍ ሰጠኝ። ኧረ! ያንን እንዴት አድርጌ አጠናሁት! ወንድም ኢ. እኔ ከምኖርበት ከአሚቲ ጎዳና ብዙም በማይርቀው በከተማው ታችኛ ክፍል በዶሚኒክ ጎዳና ይኖር ነበር። በሳምንቱ መካከል በአንድ ምሽት በቤቱ የክፍል ስብሰባ ያደርግ ነበር፤ ስለዚህ እንድንመጣ ጠየቀን። ማክሰኞ ምሽት ሄድሁ። ሞቃት ነበር፤ በጠረጴዛው ላይም አንድ ማንቆርቆሪያ ውኃ ተቀምጦ ነበር፤ ከወንድሞችም አንዱ በየጥቂቱ፦ «ክብር ለእግዚአብሔር» ብሎ እልል ይልና አንድ ብርጭቆ ውኃ ይጠጣ ነበር። እንግዲህ ይህ አስከፊ ነገር መሰለኝ። «እኛ እንዲህ አናደርግም። ውኃ ሳንጠጣ ክፍሉ እስኪያልቅ ድረስ መቆየት እንችላለን» ብዬ አሰብሁና። ደግሞም ማራገቢያ መጠቀም ስሕተት እንደ ሆነ አስብ ነበር። ስለዚህ በቤተ ክርስቲያን ሳለሁ ራሴን ከማራገብ ይልቅ በሙቀት መሠቃየትን እመርጥ ነበር። ደግሞም እጅግ አላስፈላጊ ጩኸት ያሰሙ ነበር። በገዛ ወገኖቼ ዘንድ ያልወደድሁት ይኸው ነበር። እኔ ደግሞ የተለየ ይሆናል ብዬ አስቤ ነበር።

ነገር ግን ይህችን ቤተ ክርስቲያን ለመቀላቀል ቁርጥ ሐሳብ አድርጌ ነበር። ስለዚህ በሚቀጥለው ሳምንት እንደ ገና ሄድሁ፤ እነርሱም የጸሎት ስብሰባ ያደርጉ ነበር። በክፍሉ መካከል አንድ ትልቅ ግዙፍ የጋሪ ነጂ በአንድ ወንበር አጠገብ ተንበርክኮ ነበር። በግራና በቀኙ አንድ አንድ ወንድም፣ አንዱ ከኋላው፣ ሌላውም ከፊቱ ነበሩ፤ እልል እያሉ፣ እየደበደቡና ሰውየው አምናለሁ እንዲል ለማድረግ እየሞከሩ ነበር። «ታምናለህ! ሃሌ ሉያ በል።» «ጌታ ይመስገን።» ከዚያም፦ «አሜን!» ይሉ ነበር። ከዚያም ተነሥተው ሰውየውን ይዘው በእግሩ አቆሙትና፦ «ጌታ ይመስገን» አሉ። እርሱ ግን ከባድ ነበር፤ ሊለውም አልፈለገም።

እኔም፦ «እንግዲህ በገዛ ወገኖቼ ላይ የምነቅፈው ይህንኑ ነው። እነዚህ ሰዎች ደግሞ መልካም ሰዎች ናቸው፤ ነገር ግን እንደ ሌሎች ሰዎች ሁሉ ድካም አለባቸው። ስለዚህ ባለሁበት ብቆይ ይሻለኛል» አልሁ። ከዚያም በመካከላቸው ምንም ዓይነት የዘር ጥላቻ እንደሌለ፣ ጥቁር ሰዎች ሁልጊዜ በመልካም እንደሚያዙ ነገሩኝ። በዚህም ደስ አለኝ። ስለዚህ በሚቀጥለው ሳምንት እንደ ገና ሄድሁ። በዚያ ምሽት ክፍሉን የመራው ወንድም ጄምስ ነበር። በዚያን ዘመን ጨዋ ሰዎች እንደሚለብሱት ያለ እጅግ ዘመናዊ ሻል በትከሻዎቹ ላይ ጣል አድርጎ ነበር፤ በእርሱም ላይ ብሩህ ሆኖ የሚያንጸባርቅ በጣም የሚያምር የብረት መርፌና ሰንሰለት ነበር።

እኔም፦ «እንግዲህ ወንድም ጄምስ ይህን ይለብሳል ብዬ አላሰብሁም ነበር» አልሁ።

ከዚያም አንዲት እኅት ገባች። በዚያ ምሽት አብራኝ እንድትሄድ ያግባባኋትን እኅት ቶምፕሰንንና እኔን ባየች ጊዜ ፊቷን አጨፍግጋ ጀርባዋን ሰጠችን። እኔም፦ «እንግዲህ የዘር ጥላቻ የለብንም ይላሉ። እርሷ ግን ለማንኛውም ልክ እንዳለባት ታደርጋለች። ለካ ባልቀላቀል ይሻለኝ ይሆናል» ብዬ አሰብሁ።

ከዚያም አንዲት ውድ ሴት ተነሥታ እጅግ የሚያምር ምስክርነት ሰጠች፤

መንፈሷም እጅግ ጣፋጭ ነበር። ምስክርነቷ እንዴት ረዳኝ! ኧረ! ነገር ግን ወንድም ጄምስ ስለ አለባበሷ እንዴት ያለ ወቀሳ አወረደባት! ሃምሳ ሳንቲም የሚያወጣ ቀላል ጥቁር የገለባ ኮፍያ አድርጋ ነበር፤ በመካከሉ አንድ ቁራጭ ጥቁር ሪባን ተሻግሮ በጎኑ ላይ ትንሽ ቋጠሮ ነበረው። አንድም አበባ ወይም ምንም ዓይነት ቀለም አልነበረውም። እርሷም፦ «እንግዲህ ወንድም ጄምስ፣ ስለዚህ ነገር ምንም አስቤ አላውቅም። ገበያ ለመሄድ እንድለብሰው ኮፍያ ሰፊዋ እንድታስተካክለው አድርጌ ለበስሁት» አለች። እርሱ እንደዚያ በምሬት ያወገዘውን ቋጠሮ እኔ ምንም ልብ ብዬው አላውቅም ነበር። እርሱ ግን አልተዋትም። ምስክርነቷን ቁርጥራጭ አድርጎ በተነው። እንዴት አዘንሁላት! እርሱ እንደዚያ ከወቀሳት እኅት ይልቅ በእርሱ ጠባይ፣ በዚያ በተንቆጠቆጠ ሻልና ወዲያና ወዲህ በሚወዛወዘው የብረት መርፌና ሰንሰለት ውስጥ እጅግ የበዛ ራስ ወዳድነትና ቁጡ መንፈስ እንዳለ አሰብሁ። ቀጥሎ ጀርባዋን ወደ ሰጠችን እኅት ደረሰ። እርሷ በአጭሩ ተናገረች፤ ጀርባዋንም እንደ ሰጠችን ቆየች። ወደ እኔ በደረሰ ጊዜ ተነሥቼ፦ «እናንተ ሰዎች በጥቁር ሰዎች ላይ የዘር ጥላቻ እንደሌላችሁ ተረድቼ ነበር» አልሁ።

ወንድም ኢ.፦ «አዎ» ይላል።

«እንግዲህ የማስበውን በትክክል ብናገር ተገቢ ይሆናል?»

እርሱም፦ «አዎ፣ በእርግጥ። እኛ ነጻ ሜቶዲስቶች ነን፤ ስለዚህ ሐሳብሽን በነጻ መናገር ትችያለሽ» አለ።

እኔም፦ «እንግዲህ እንደ ሌሎች ሰዎች ሁሉ በመካከላችሁ የዘር ጥላቻ መንፈስ ያለ ይመስለኛል። የተሳሳትሁ አይመስለኝም፤ የዚህ ስብሰባ መንፈስ ለእኔ እጅግ ግልጽ ሆኖ ይታየኛልና» አልሁ።

በምድጃው መደርደሪያ ላይ ሦስት ወይም አራት ትንንሽ የታጨቁ ወፎች ነበሩ። ስለዚህ እንዲህ አልሁ፦ «እነዚያ የታጨቁ ወፎች በዚያ መኖራቸው ትክክል አይመስለኝም። መጽሐፍ ቅዱስ በሰማይ ወይም በምድር ወይም በውኃ ውስጥ ያለውን የማናቸውንም ነገር ምስል እንዳይኖረን ይላል።» እንግዲህ በዚያን ጊዜ ጥቅሱን በትክክል አውቀው ነበር። ይህን ከተናገርሁ በኋላ ወንድም ኢ.፦ «እንግዲህ እኅት ስሚዝ፣ እግዚአብሔር ይባርክሽ። የዘር ጥላቻ አለ ስለ ማለትሽ ተሳስተሻል፤ ስለ ምስሎቹ ግን ትክክል ነሽ» አለ።

ከዚያም ወንድም ኢ. በክፍሉ ውስጥ ሚስቱን መራ፤ እንዲህም አላት፦ «እንደ ቀድሞው ብዙ እንደማትጸልዪ አውቃለሁ። ብዙ ጊዜ በከተማው ታችኛ ክፍል በቢሮዬ ሳለሁ መቼ እንደምትጸልዪ ማወቅ እችል ነበር።» ከዚያም በሕዝቡ ሁሉ ፊት እንዲህ አድርጎ ተናገራት።

እርሱ ሲጨርስ እርሷ ተነሥታ ወደ ላይኛው ፎቅ ወጣች፤ በሩንም በኋላዋ ጓ አድርጋ ዘጋችው። እኔም፦ «እንግዲህ ይህ እኔ በሩን በኋላዬ ጓ አድርጌ ስዘጋ የማስበውን ማለት ነው» አልሁ። ያም ሆኖ ለብቻዋ ሊነግራት ይገባ ነበር ብዬ ያሰብኋቸውን ብዙ ነገሮች ነግሯት ነበር። ስለዚህ፦ «እንግዲህ እነዚህ ሰዎች ልክ እንደ ገዛ ወገኖቼ ናቸው። ስለዚህ የማልቀላቀል ይመስለኛል» አልሁ።

ስንወጣ ከእኅቶቹ አንዲቱ ከእኛ ጋር ወጣች። እርሷ

መልካም እኅት ነበረች። ወደ እኔ መጥታ ያዘችኝና፦ «እኅት ስሚዝ፣ ስለዚያ የዘር ጥላቻ ጉዳይ ትክክል ነሽ። ያቺ የጠቀስሻት እኅት የዘር ጥላቻ አለባት፤ እጅግም ተበሳጭታ ነበር፤ ዛሬ ማታ ስትመጣም ጥቁሮቹ በዚያ እንዳይገኙ ተስፋ እንደምታደርግ ተናገረች። እነርሱ መምጣታቸውን አትወድም» አለችኝ። እኔም፦ «ትክክል እንደ ሆንሁ አውቅ ነበር። ነገር ግን ወንድም ኢ. ይህን አያውቅም፤ አይደለም እንዴ?» አልኋት።

«ኧረ! አያውቅም፤ ለእነርሱ አትናገርም፤ ለእኔ ግን ተናግራለች፤ እኔም አውቃታለሁ።»

ስለዚህ ዳግመኛ ወደዚያ አልሄድሁም።

በዚያን ጊዜ ቄስ ጆሹዋ ዉድላንድ በብሩክሊን የአፍሪካ ሜቶዲስት ኤጲስ ቆጶሳዊ ቤተ ክርስቲያን (A. M. E.) መጋቢ ነበር። እርሱ የእግዚአብሔር ሰው ነበር፤ ወንጌልንም ይሰብክ ነበር። ስለዚህ እንዲህ አልሁ፦ «በገዛ ቤተ ክርስቲያኔ ለነፍሴ እውነተኛ ምግብ ማግኘት ስለማልችል ወደ ብሩክሊን ሄጄ የወንድም ዉድላንድን ቤተ ክርስቲያን እቀላቀላለሁ። ለመሄድና ለመመለስ ጥቂት ገንዘብ ማውጣቱ አይቀርም፤ ነገር ግን በዚህ በኩል በእግሬ ሄጄ በጀልባ እሻገራለሁ፤ በዚያኛውም በኩል በእግሬ ወደ ቤተ ክርስቲያን እሄዳለሁ፤ ደግሞም በሳምንት አንድ ጊዜ የምሰማው ስብከት ይረዳኛል፤ እዚህ በኒው ዮርክም ወደ ክፍሌ መሄዴን እቀጥላለሁ።» ስለዚህ ለሦስት ሳምንት ብርሃንና መመሪያ ለማግኘት ጸለይሁ። በመጨረሻ አንድ ቀን፦ «ጌታ ሆይ፣ ምን ማድረግ እንዳለብኝ በቃልህ በኩል በመንፈስህ አሳየኝ። ፈቃድህን ብቻ ማድረግ እንደምሻ ታውቃለህ» አልሁ። መጽሐፍ ቅዱሴንም ገለጥሁ፤ ስመለከትም ዓይኖቼ በእነዚህ ቃላት ላይ አረፉ፦ «አትፍሩ፤ ቁሙ፤ የእግዚአብሔርንም ማዳን እዩ።» በልቤም የብርሃንና የሰላም ጎርፍ መጣ። ተነሥቼም ጌታን አመሰገንሁ። ቤተ ክርስቲያኔን ፈጽሞ አልተውሁም፤ ነገር ግን ትተው የሄዱ የብዙዎችን አሳዛኝ ፍጻሜ አይቻለሁ። አንዳንዶቹ ምናልባት መልካም አድርገው ይሆናል፤ ሌሎች ግን በአሳዛኝ ሁኔታ ወድቀዋል። እንዴት ያሳዝናል! በኒው ዮርክ አውቃቸው የነበሩ በርካታ ነጭ ሰዎችን፣ ወጣት ወንዶችንና ሴቶችን ማስታወስ እችላለሁ፤ ኧረ! አንዲቱን ቤተ ክርስቲያን ትተው ሌላዋን እየተቀላቀሉ በሕይወታቸው እንዴት ወደቁ! ጌታ ጸንቼ እንድቆም ስላደረገኝ ይመስገን። አሜን።

ብዙ ጊዜ፦ «ወይዘሮ ስሚዝ፣ ነገሮች እንዴት ይቃኑልሻል፤ ሰው ሁሉ እጅግ በደግነት የሚይዝሽ ይመስላል፤ ሁልጊዜም መልካም የሚሆንልሽ ይመስላል» ይሉኛል።

እኔም፦ «አዎ፤ እናንተ የምታስቡት ይህ ነው፤ ነገር ግን ከምታስቡት እጅግ የበለጠ የምታገለው ነገር አለኝ» አልሁ። እነርሱም፦ «ኧረ፣ ቢሆንም ማንም በክፉ አይይዝሽም» አሉ። እኔም፦ «ነገር ግን አማንዳ ስሚዝ የምትታገለውን ነገር በትክክል ማወቅና መረዳት ከፈለጋችሁ፣ እስቲ ጥቁር ሁኑና እኔ እንደምዞረው ዙሩ፤ ያን ጊዜ ወደ ሌላ መደምደሚያ ትደርሳላችሁ» አልሁ። አንዳንድ

ሰዎች ለሃያ አራት ሰዓት ያህል ጥቁር መሆን ቢችሉ የመቀደስ ጸጋን ዋና ፍሬ ነገር ይረዱ ነበር ብዬ አስባለሁ። መለኪያውን ወደ እኛ እንዳናወርደው ሳይሆን፣ ፍጹማን እንድንሆን፣ በሁሉም አቅጣጫ ከዳር እስከ ዳር ወደ ክርስቲያኖች መለኪያ ከፍ እንድንል በጥልቅ መዳን ያስፈልገናል፤ በአፍሪካም ሽማግሌው ወንድም ኩፐር ይል እንደ ነበረ፦ «ጌታ ሆይ፣ ሕዝቡ እንዲያዩ እርዳቸው።» አሜን።

አንድ ቀን አንዲት ሴት ጥቁር ሰዎች ሁሉ ነጭ መሆን የሚፈልጉ አይመስልሽም ወይ ብላ ጠየቀችኝ። እንደዚያ እንደማላስብ ነገርኋት፤ አላስብምም ነበር። እኔ እስከማስታውሰው ድረስ ነጭ ብሆን ብዬ የተመኘሁት አንድ ጊዜ ብቻ ነው፤ ያም ከብዙ ዓመታት በፊት ነበር። በላንካስተር በአንድ የነጮች ሜቶዲስት ቤተ ክርስቲያን ነበርሁ፤ በሰገነቱ ላይ ተቀመጥሁ። አዲሱ አገልጋይ መጥቶ ነበር። ይህ የመጀመሪያው እሑዱ ነበር። በላይም ጎዳና በኮሎኔል ሄንሪ ማክግሮው ቤት እኖር ነበር፤ ቤተ ክርስቲያኑም ከምኖርበት ሁለት ብሎክ ያህል ይርቅ ነበር። አባል የነበርሁበትና የምሄድበት የጥቁሮች ቤተ ክርስቲያን ግን ከቤታችን በጣም ይርቅ ነበር። አቶ ማክግሮው ቤት በሚሆንበት ጊዜ እሑድ ሁልጊዜ የማበስለው ትልቅ ምሳ ነበረኝ። አብሮት እንዲመገብ ሁልጊዜ የሚወደው አቶ ጄምስ ሬይኖልድስ የሚባል እጅግ ውድ ወዳጅ ነበረው። ብዙውን ጊዜ እሑድ ጠዋት ቤተ ክርስቲያን መሄድ እወድ ነበር፤ ነገር ግን ሄጄ ምሳዬን በሰዓቱ ለማድረስ እንድችል ለመመለስ በጣም ሩቅ ነበር። ምሳዬን በሰዓቱ በማቅረቤ ሁልጊዜ እጅግ እኮራ ነበር፤ ስለዚህም ብዙ ጊዜ እሑድ የምወጣው ማታ ብቻ ነበር። በዚህ እሑድ ሄጄ አዲሱን አገልጋይ ልስማ ብዬ አሰብሁ። ወጣቶቹ ሁሉ ብዙውን ጊዜ ፎቅ ላይ ይቀመጡ ነበር፤ ጥቁር ሰው ደግሞ ለእነርሱ የመዝናኛና የትችት ዒላማ ነበር። ይህን መንፈስ የሚቀሰቅስ ምንም ነገር እንዳላደርግ እጠነቀቅ ነበር፤ ቢሆንም ብዙውን ጊዜ የሚበቃኝን ያህል አገኝ ነበር።

ጥቅሱ ምን እንደ ነበረ አላስታውስም፤ ነገር ግን ኧረ፣ ሰባኪው የተናገረበትን ኃይልና የፊቱን ጣፋጭነት እንዴት አድርጌ አስታውሳለሁ! ሲሰብክ ጌታ በሚያስደንቅ ሁኔታ ባረከኝ፤ «ጌታ ይመስገን» ብዬ እልል ማለት እጅግ ፈልጌ ነበር፤ «ምነው ነጭ በሆንሁ፣ ‹ክብር ለኢየሱስ› ብዬ እልል እል ነበር» ማለቴንም አስታውሳለሁ። ነጮቹን አይመለከቷቸውም ነበር፤ ስለ እልልታቸውም አስተያየት አይሰጡም ነበር፤ እነርሱ ደግሞ እልል ይሉ ነበርና! እኔ እልል አላልሁም፤ ነገር ግን፦ «በጎ ፈቃድ ቢኖር፥ እንዳለው መጠን የተወደደ ይሆናል እንጂ እንደሌለው መጠን አይደለም» ብዬ አሰብሁ። በሕይወቴ ነጭ መሆን የፈለግሁት ያን ጊዜ ብቻ ነበር። ነገር ግን ጌታ ይመስገን! አሁን መንፈሱ በገፋፋኝ ቁጥር እልል እላለሁ። አይደለም፣ እኛ ንጉሣውያን ጥቁሮች በዚህ ጽኑ ቀለም ለእኛ በሰጠን ስጦታው እጅግ ረክተናል። እኔ በበኩሌ አንዳንድ ጊዜ እጅግ የማይመች ቢሆንም ስለ ሰጠኝ ነገር አመሰግነዋለሁ። ለምሳሌ፦ ከአንድ ዓመት በፊት ባለፈው ጃንዋሪ ወደ ካሊፎርኒያ ስሄድ ነጭ ብሆን ኖሮ በሆቴል ማረፍ እችል ነበር፤ ነገር ግን

ጥቁር በመሆኔ፣ ብቸኛ ሴት ብሆንም፣ ከምሽቱ አራት ሰዓት ላይ ብደርስም በኦስቲን፣ ቴክሳስ በመጠባበቂያ ክፍሉ ሌሊቱን ሙሉ ለማደር ተገደድሁ፤ ብዙ ጊዜም በፊላዴልፊያ ወይም በኒው ዮርክ ወይም በባልቲሞር ወይም ከታላቋና ታሪካዊቷ ቦስተን በቀር በማንኛውም ሌላ ቦታ ስሆን በሆቴል ወይም በምግብ ቤት ገብቼ አንድ ሲኒ ሻይ መጠጣት ወይም ምሳ መብላት አልችልም ነበር። በእነዚህ ከተሞች ጥቁር ሰዎች የሚስተናገዱባቸው ቦታዎች ይኖሩ ይሆናል፤ ነገር ግን በአብዛኛው የተከለከሉ ናቸው፤ ይህም አንዳንድ ጊዜ ነገሩን እጅግ የማይመች ያደርገዋል። ዋጋውን መክፈል እችላለሁ — አዎ፣ ያ መልካም ነው፤ እንዴት መሆን እንዳለብኝ አውቃለሁ — አዎ፣ ያ መልካም ነው፤ ያማርሁ መስዬ እንድታይ ከሁሉ የሚሻለውን ልብሴን ልለብስ እችላለሁ — አዎ፣ ያ መልካም ነው፤ ክርስቲያን ሴት በመሆኔ እታወቃለሁ — አዎ፣ ያ መልካም ነው፤ የምይዘው አንድ ወንበር ብቻ ነው፤ የማንንም ሰው ሳሕን ወይም ሹካ አልነካም — አዎ፣ ያ መልካም ነው፤ ነገር ግን አንቺ ጥቁር ነሽ! እንግዲህ ጥቁር መሆን ብዙ ጊዜ ነገሩን ለእኛ የማይመች አላደረገውም ማለት እውነት አይሆንም፤ ነገር ግን እንደ እኛ ከንጉሣዊ ዘር የሆንን እንደ መሆናችን ለአሁኑ ይህን ችግር በድፍረት ለመቋቋምና እነዚህ ትንንሽ ነገሮች ሁሉ ከፍጹም ትንሽነታቸው የተነሣ ወደሚጠፉበት ወደ ታላቁና ሰፊው መጪ ዘመን ለማለፍ አስበናል! ጌታ ያንን መጪ ዘመን እንዲገናኘን ይላከው! አሜን።

በኦሽን ግሮቭ አንዲት ሴት ወደ ጎን ወስዳኝ፦ «እንግዲህ አማንዳ ስሚዝ፣ በቅንነት ልጠይቅሽ እፈልጋለሁ፤ አንቺ ልትሆኚ እንደማትችዪ አውቃለሁ—» አለችኝ።

«አሁን ደግሞ ምንድር ነው?» አልሁ በልቤ።

«ነጭ ልትሆኚ እንደማትችዪ አውቃለሁ፤ ነገር ግን ብትችዪ ኖሮ ከጥቁር ይልቅ ነጭ መሆንን አትመርጪም ነበር?»

እኔም፦ «አይ፣ አይ፤ ሕያው እግዚአብሔርን! ነጭ ሆኜ ሳልድን ከመኖር ይልቅ ጥቁር ሆኜ ፍጹም መዳንን እመርጣለሁ፤ እንዲህ ጥቁር ሆኜ እንኳ የከፋሁ ነበርሁ፤ ነጭ ብሆን ኖሮ አሥር እጥፍ የከፋሁ እሆን ነበር» አልኋት። እንዴት በሳቅ ተንፈቀፈቀች! እርሷ ምንም ክፋት አልነበረባትም፤ ነገር ግን ጥቂት ልትፈትነኝ ብቻ የፈለገች ይመስለኛል። አዎ፣ እግዚአብሔር ይመስገን፣ በቀለሜ ረክቻለሁ። በዚህ ጉዳይ ምርጫ ስላልነበረኝ ደስ ይለኛል፤ ምርጫ ቢኖረኝ ኖሮ እንደማልረካ እርግጠኛ ነኝና፤ ልጃገረድ ሳለሁ የአተር አረንጓዴ ቀለምን እጅግ አጥብቄ እወድ ነበር፤ ምርጫው ለእኔ ቢተው ኖሮ አረንጓዴ መሆንን እመርጥ ነበር፤ የእግዚአብሔር ቀለም ግን ከሁሉ የሚሻልና እጅግ ጽኑ እንደ ሆነ እርግጠኛ ነኝ። ነጭነትን የሚያመጣው ደሙ ነው። ሃሌ ሉያ!


«ደሙ ተረጭቶልኝ
ጸድቄአለሁ፤
በውጭም በውስጥም ድኛለሁ፤
የኢየሱስ ደም ያነጻኛል
ከኃጢአት ዱካ ሁሉ።»


አዝማች—«በኢየሱስ ደም ኃይል አለ፣
በኢየሱስ ደም ኃይል አለ፣
በኢየሱስ ደም ኃይል አለ
እንደ በረዶ ነጭ አድርጎ ሊያጥበኝ።»


«ለብዙ ዓመታት የናፈቀው ልቤ
ቃተተ፣ ለማወቅም ናፈቀ
እንደ በረዶ ነጭ አድርጎ የሚያጥበውን
የአዳኙን ደም ብርታት።»

አንድ ቀን በኒው ዮርክ ወደ ማክሰኞው የፓልመር ስብሰባ ገባሁ። አንዲት ሴት ገባች፤ በአጠገቤም እጅግ የሚመች መቀመጫ ነበረ፤ ሌላ ቦታ ለማግኘት ዙሪያውን ከተመለከተች በኋላ በመጨረሻ በአጠገቤ ያለውን ለመያዝ ወሰነች፤ ነገር ግን እንዳልተመቻት አየሁ። ታራግብ፣ ትቁነጠነጥ፣ ትቅበጠበጥና ራሷን ታናፍስ ስለ ነበር ሌላ ቦታ በሄደች ብዬ በልቤ ተመኘሁ። ስብሰባው ከመዘጋቱ በፊት ተነሥቼ ተናገርሁ፤ ጌታ ረዳኝ፣ ሕዝቡንም ባረከ። በስብሰባው መጨረሻ ይህቺ ሴት በደስ የሚል ፈገግታ ተሞልታ ወደ እኔ ዞረችና፦ «ኧረ፣ በአማንዳ ስሚዝ አጠገብ እንደ ተቀመጥሁ አላወቅሁም ነበር፤ እጅግ ታላቅ ክብር ተሰማኝ» አለች። ተመለከትኋትና አዘንሁላት፤ ነገር ግን ቅር አለኝ! በልቤም፦ «ከባዶነትና ከማስመሰል ሁሉ፣ ቸሩ ጌታ ሆይ፣ አድነን!» አልሁ።

አንድ ቀን በኦኪንግተን የካምፕ ስብሰባ አንዲት ሴት ምስክርነቷን ስትሰጥ ሰማሁ። እንዲህም አለች፦ «የፍጹም መቀደስን በረከት ለማግኘት ከአምስት መቶ ማይል በላይ ተጉዤ ወደዚህ ስብሰባ መጥቻለሁ። ይህን ተሞክሮ ማግኘት መብቴ እንደ ሆነ አምናለሁ፤ ነገር ግን አላገኘሁትም። በዚህ ርዕስ ላይ የተጻፉትን መጻሕፍት ሁሉ አንብቤአለሁ፤ ቀንና ሌሊትም በትጋት ፈልጌአለሁ፤ ያም ሆኖ ብርሃኑን አላገኘሁም።»

ኧረ፣ በመጻሕፍቱ ውስጥ እንደሌለ ልነግራት እንዴት ፈለግሁ! ጌታ እንድናገር የፈለገ ስለ መሰለኝ ልናገርና ልነግራት ተነሣሁ፤ ነገር ግን ሌሎች መናገር የሚፈልጉ ስላሉ እንድቀመጥ ተነገረኝ። ለመናገር የነበረኝ ፍላጎት የጌታ ገፋፊነት እንደ ሆነ እርግጠኛ ስለ ነበርሁ ትንሽ አዘንሁ፤ ነገር ግን በሥልጣን ላሉት መታዘዝን መማር ነበረብኝ። ይህን ማድረግ እንድችል ላበቃኝ ጸጋ ጌታ ይመስገን። ሃሌ ሉያ! ደግሞም ከተቀደሰ ሕይወት ምስክርነት ጋር የሚስማሙ ብዬ የማልጠራቸውን አንዳንድ ነገሮች አየሁ። ያልተጠበቀ ነበር፤ እኔም በተሞክሮው ገና ጀማሪ ስለ ነበርሁ ትንሽ ደነገጥሁ፤ ነገር ግን ብዙዎች በሕይወት ውስጥ ከቅድስና ምስክርነት ጋር የማይስማሙ ነገሮች ሲገጥሟቸው እንደሚያደርጉት፣ ከዚህ መርሕ ወደ ኋላ ከማፈግፈግ እግዚአብሔር አዳነኝ። ፈጽመን

ከተቀደስን በኋላ እንኳ የምንታገለው ብዙ ሰብአዊ ባሕርይ አለ፤ ስለዚህ ውብ የሆነውን የትዕግሥትን ጸጋ ሁልጊዜ እንፈልጋለን። «የእግዚአብሔርን ፈቃድ አድርጋችሁ የተሰጣችሁን የተስፋ ቃል እንድታገኙ መጽናት ያስፈልጋችኋልና።» (ዕብራውያን 10:36)።

ቀዳሚ ቀጣይ