Kijana Aliyevunja Vitu

“Wanadamu huitazama sura ya nje, bali Bwana huutazama moyo.” — kutoka 1 Samweli 16

Zamani sana, zaidi ya miaka mia tatu kabla hujazaliwa, aliishi mtu mmoja ambaye leo tunamwita Ndugu Lawrence. Kabla mtu yeyote hajaanza kumwita “Ndugu,” alikuwa mtumishi kijana.

Alifanya kazi ya mtumishi wa nyumbani kwa mtu mmoja mashuhuri, mweka hazina aitwaye Monsieur Fieubert. Kazi ya mtumishi huyo ilikuwa kumhudumia bwana wake, kubeba vitu, kuleta vitu na kuweka kila kitu nadhifu na safi.

Lakini kulikuwa na tatizo. Lawrence alikuwa mkubwa wa mwili, tena hakuwa stadi hata kidogo. Yeye mwenyewe alisema hivyo. Alijiita “mtu mkubwa mzito, asiye stadi, aliyevunja kila kitu.” Hebu mwone akijaribu kubeba sinia la vikombe vizuri, kisha anagonga mlango. Pa! Hebu mwone akinyosha mkono kuchukua sahani, kisha anaangusha jagi la maji. Chubwi!

Watu wengi wasingedhani kwamba kijana huyu asiye stadi angekumbukwa siku moja duniani kote. Wasingedhani kwamba watu wangeendelea kusoma habari zake hata baada ya miaka mia kadhaa. Lakini Mungu hakuwa akiitazama mikono yake isiyo stadi. Mungu alikuwa akiutazama moyo wake.

Na jambo fulani lilikuwa karibu kuutokea moyo huo.

Je, wewe huwa unajiona si stadi, au si hodari katika mambo fulani? Labda unamwaga kinywaji chako, au unaangusha mpira, au unakosea jibu. Hilo halimzuii Mungu kukupenda wala kukutumia. Yeye anautazama moyo wako.

Mungu mpendwa, asante kwa sababu hunipendi kwa kuwa mimi ni mwerevu au mwangalifu, bali kwa sababu mimi ni wako. Tafadhali uutunze moyo wangu. Amina.