“Mama!”

“Ndiwe uliyekuwa msaidizi wa yatima.” — kutoka Zaburi 10

Mwaka 1846 Samuel alikwenda kuishi Abeokuta, mji mpya katika nchi ya Wayoruba. Alikwenda huko kuanzisha kanisa na shule. Ilikuwa mara ya kwanza kuishi kati ya watu wake mwenyewe tangu alipokuwa mvulana.

Alikuwa amekaa huko chini ya wiki tatu mtu alipomletea habari za ajabu. Mama yake alikuwa hai! Alikuwa akiishi pamoja na dada zake katika mji wa jirani. Samuel akatuma watu wamlete mara moja.

Tarehe 21 Agosti 1846, mama yake alifika. Asubuhi ile Samuel alikuwa amesoma mstari wa Biblia: “Wewe ndiwe Msaidizi wa yatima.” Alisema hakuwahi kuhisi ukweli wake kama alivyouhisi siku ile.

Mama yake alipomwona, alitetemeka. Hakuweza kuyaamini macho yake. Walishikana na kutazamana kimya, huku machozi makubwa yakitiririka mashavuni mwake yaliyokonda. Alimwita kwa majina ya kubembeleza ambayo bibi yake alikuwa akimwita alipokuwa mdogo. Ilikuwa imepita miaka ishirini na mitano tangu walipotenganishwa kwa nguvu.

Mama yake Samuel alikuwa ameishi maisha magumu sana. Kwa miaka mingi kati ya hiyo alikuwa mtumwa. Sasa alikuja kuishi pamoja na mwanawe. Alikwenda kanisani, akajifunza habari za Yesu. Mwaka 1848 alibatizwa, akachukua jina Hana. Samuel alipomwambia kwamba kazi yake ingempeleka mbali mara kwa mara, alisema, “Wewe si mwanangu tena, bali u mtumishi wa Mungu.” Alitaka aende akamtumikie Mungu bila kumhangaikia yeye.

Mungu hakumsahau Samuel, wala hakumsahau mama yake Samuel. Hakusahau wewe pia.

Mungu mpendwa, asante kwa ajili ya familia yangu. Asante kwa kuwa hunisahau kamwe, na kwa kuwa unawasaidia watu walio wapweke au waliompoteza mtu wanayempenda. Amina.