Jina Jipya

“Hata imekuwa, mtu akiwa ndani ya Kristo amekuwa kiumbe kipya; ya kale yamepita; tazama, yamekuwa mapya.” — kutoka 2 Wakorintho 5

Huko Sierra Leone, Ajayi alipelekwa katika kijiji kiitwacho Bathurst. Aliishi nyumbani kwa mmisionari, Bwana Davey, na mke wake. Kila jioni Bi. Davey alimfundisha kwa nusu saa.

Ajayi alijifunza haraka sana. Baada ya miezi sita tu aliweza kusoma Agano Jipya! Muda si mrefu akafanywa kiranja, yaani aliwasaidia kuwafundisha watoto wadogo. Alilipwa peni saba na nusu kwa mwezi. Kila alipojifunza jambo, alitaka kuwafundisha wengine.

Shuleni na kanisani, Ajayi alisikia habari za Yesu. Baadaye alisema kwamba “ilimpendeza Bwana kuufungua moyo wangu.” Alielewa kwamba alikuwa ametenda mabaya na alihitaji msamaha wa Mungu, naye alitaka msamaha ambao Yesu hutoa. Tarehe 11 Desemba 1825 alibatizwa.

Alipobatizwa alichukua jina jipya: Samuel Crowther. Lilikuwa jina la kasisi mmoja huko London. Bi. Davey alikuwa mwalimu wa shule ya Jumapili katika kanisa lake, naye ndiye aliyemchagulia mvulana jina hilo. Lakini Samuel hakulisahau kamwe jina lake la Kiyoruba. Maisha yake yote alijiandika Samuel Ajayi Crowther.

Huko Bathurst kulikuwa pia na msichana aitwaye Asano. Yeye alikuwa ameokolewa kutoka katika meli nyingine ya watumwa, naye alisoma katika shule ile ile. Miaka kadhaa baadaye, mwaka 1829, Samuel na Asano walioana. Walikaa katika ndoa kwa miaka hamsini na moja na walipata watoto sita.

Unapokuwa wa Yesu, unafanywa mpya ndani yako. Lakini bado ni wewe! Mungu hamtupi mtu aliyemuumba. Anamfanya mpya.

Yesu mpendwa, tafadhali ufungue moyo wangu nikusikie, kama ulivyoufungua moyo wa Samuel. Asante kwa kuwa unanisamehe na kunifanya mpya. Amina.