“Sistahili”

“Humwinua mnyonge kutoka mavumbini, … Awaketishe pamoja na wakuu.” — kutoka 1 Samweli 2

Wamisionari huko London waliamua kwamba makanisa yaliyokuwa kando ya Mto Niger yalihitaji askofu, yaani kiongozi wa makanisa yote na wachungaji wote. Waliamua kwamba askofu huyo awe Mwafrika. Wakamchagua Samuel.

Familia yake ilikumbuka kwamba Samuel hakutaka kabisa kuwa askofu. “Sistahili,” alisema. Alitaka kubaki mtumishi mnyenyekevu. Lakini mwishowe alikubali, akisema, “Ndiye Bwana; na afanye alionalo kuwa jema.”

Tarehe 29 Juni 1864, katika Kanisa Kuu kubwa la Canterbury huko Uingereza, Samuel Ajayi Crowther aliwekwa wakfu kuwa askofu wa kwanza Mwafrika wa Kanisa la Anglikana. Mvulana aliyekuwa ameuzwa kama mtumwa sasa alikuwa askofu!

Bibi kizee mmoja alikuja kwenye ibada. Inasimuliwa kwamba alipomkuta mtu mwingine kwenye kiti chake, alikataa kuondoka. Alisema alikuwa na haki kamili ya kiti kile, kwa sababu yeye ndiye aliyemfundisha askofu mpya alfabeti! Alikuwa Bi. Davey, mwalimu wake wa Bathurst, ambaye sasa aliitwa Bi. Weeks.

Kuwa askofu hakukumfanya Samuel kuwa na kiburi. Aliwaomba watu wasimwite “Bwana Wangu.” Kama kulikuwa na kiti kimoja tu chumbani na mwalimu wa shule akaingia, askofu alisimama na kumpa mwalimu kiti chake.

Mungu hupenda kuwainua watu wanyenyekevu. Huhitaji kuwa mtu muhimu ili Mungu akutumie. Unahitaji tu kumwambia ndiyo.

Mungu mpendwa, tafadhali unifanye mnyenyekevu kama Samuel. Unisaidie kuwatanguliza wengine na kusema ndiyo kwa lolote utakaloniomba nifanye. Amina.