Siku ya 23 — Mwana Aliyetoroka

“Akaondoka, akaenda kwa babaye. Alipokuwa angali mbali, baba yake alimwona, akamwonea huruma, akaenda mbio, akamwangukia shingoni, akambusu sana.”

— Luka 15:20

Muda mfupi baada ya hadithi ya kondoo aliyepotea, Yesu alisimulia hadithi nyingine, kuhusu baba mmoja na wanawe wawili.

Mwana mdogo alikuwa amechoka kuishi nyumbani. Alimwendea baba yake akasema, “Nipe sehemu ya mali inayoniangukia.” Kwa maneno mengine, Nataka sehemu yangu ya pesa zako sasa hivi. Sitaki kungoja mpaka ufe. Hilo lilikuwa neno la ufidhuli mkubwa, tena lenye kuumiza sana.

Lakini baba akampa pesa hizo. Mwana akafunga mizigo yake, akahamia nchi ya mbali, akatumia kila senti kwa “maisha ya anasa.” Sherehe, starehe, chochote alichotaka.

Kisha pesa zikaisha. Wakati huohuo, njaa kuu ikaingia katika nchi ile, na chakula kikawa haba. Mwana alikata tamaa kiasi kwamba alichukua kazi ya kulisha nguruwe, naye alikuwa na njaa sana hata chakula cha nguruwe kilimtamanisha.

Hatimaye, “akazingatia moyoni mwake.” Akawaza, Watumishi wa baba yangu wana chakula tele, nami hapa ninakufa kwa njaa! Nitarudi nyumbani niseme, “Baba, nimekosa. Sistahili kuitwa mwana wako. Nifanye tu kama mmoja wa watumishi wako.”

Basi akaanza safari ndefu ya kurudi nyumbani kwa miguu. Na hapa ndipo sehemu ya kushangaza kuliko zote katika hadithi. “Alipokuwa angali mbali, baba yake alimwona.” Lazima baba alikuwa akiitazama njia, siku baada ya siku, akitumaini kwamba mwanawe atarudi nyumbani.

Na alipomwona, baba akaenda mbio. Siku zile, wazee hawakwenda mbio. Halikuwa jambo la heshima. Lakini baba huyu hakujali. Alikwenda mbio kwa mwanawe, akamkumbatia na kumbusu, kabla mwana hajamaliza hata maneno yake.

Kisha baba akafanya sherehe! Akampa mwanawe vazi lililo bora, pete na viatu vipya. “Huyu mwanangu alikuwa amekufa, naye amefufuka! Alikuwa amepotea, naye ameonekana!”

Yesu alikuwa akituonyesha jinsi Mungu alivyo. Haijalishi umetangatanga mbali kiasi gani, haijalishi umefanya nini, Mungu anaitazama njia akikungoja. Unapomrudia, hakulazimishi ujitahidi kustahili kurudi. Anakuja mbio kukulaki.

Fikiri juu ya hili: Mwana alitarajia kutendewa kama mtumishi, lakini baba alimkaribisha kama mwana. Hilo linakuambia nini kuhusu Mungu?

Jaribu hili: Ikiwa kuna jambo ulilofanya ambalo umekuwa ukimficha Mungu, mwambie leo. Yeye anakuja mbio kukulaki.

Baba mpendwa, asante kwamba wewe ni kama baba katika hadithi ya Yesu. Asante kwamba hata nikitangatanga mbali kiasi gani, wewe unanitazamia, na unakuja mbio kunikaribisha nyumbani. Samahani kwa nyakati ambazo nimefuata njia yangu mwenyewe. Asante kwa kunipenda. Kwa jina la Yesu, Amina.