Mtu Asiyelala Kamwe

“Alfajiri na mapema sana akaondoka, akatoka akaenda zake mahali pasipokuwa na watu, akaomba huko.” — kutoka Marko 1

Kazi ya John ilikuwa katika vijiji vya Punjab. Alisafiri kwa treni, kwa farasi na kwa mikokoteni midogo, na mizigo yake ilibebwa kwa mkokoteni wa ng’ombe. Wengi wa watu waliomjia Yesu huko walikuwa maskini sana. Watu wengine waliwadharau, na hawakutaka hata kuwagusa.

Lakini John aliwapenda. Aliwasalimu kwa kuwakumbatia, akiweka mkono wake kwanza juu ya bega moja na kisha juu ya bega jingine. Aliishi pamoja na wahubiri Wahindi aliofanya kazi nao, akala na kulala pamoja nao. Mtu mmoja alisema, “Upendo ulimpatia ushindi.”

Usiku mmoja John alilazimika kukesha usiku mzima akiandaa somo la Biblia. Somo hilo lilikwenda vizuri. Lakini baadaye wazo moja likamjia. Alikuwa ametumia usiku mzima kuuandaa ujumbe wake. Je, hakupaswa pia kutumia usiku mmoja kujiandaa yeye mwenyewe, kwa kuomba? Basi akafanya hivyo. Alifurahia sana hata akafanya tena usiku uliofuata, na watu wengine wakaja kuungana naye.

John aliendelea kuandaa masomo yake kwa uangalifu. Lakini mara nyingi alisema kwamba kumwandaa mjumbe ni muhimu sawasawa na kuuandaa ujumbe.

John aliamka mapema sana ili kuomba na kusoma Biblia yake. Alipopiga magoti, Biblia yake ilikuwa wazi mbele yake na mikono yake ikiwa juu yake. Usiku aliwasha taa yake ili asome mstari mmoja na kuzungumza na Mungu. Ndiyo maana watu wa Punjab walimpa jina: “mtu asiyelala kamwe.” Kwa kweli hilo halikuwa kweli kabisa. Alilala! Lakini si sana.

Wewe unahitaji usingizi wako! Lakini unaweza kuanza kila siku kama John, kwa kumsalimu Mungu asubuhi na kumwomba akuandae kwa ajili ya siku hiyo.

Mungu mpendwa, habari za asubuhi! Tafadhali niandae kwa ajili ya leo, na unisaidie kumpenda kila mtu nitakayekutana naye, kama wewe unavyowapenda. Amina.