Mtoto Wakati wa Kulala

“Nani ajuaye kama umeufikia ufalme kwa ajili ya wakati kama huu?” — kutoka Esta 4

Tarehe 10 Mei 1940, Corrie alipokuwa na miaka arobaini na minane, jeshi la Ujerumani liliingia Uholanzi. Baada ya siku tano za mapigano, jeshi la Uholanzi lililazimika kujisalimisha, na askari wa Kijerumani wakatembea katika barabara za Haarlem.

Ujerumani ilitawaliwa na Wanazi, waliowachukia Wayahudi. Hatua kwa hatua walitunga sheria mpya za ukatili. Wayahudi hawakuruhusiwa kuingia katika bustani za umma, wala sinema, wala shule za kawaida. Mwaka 1942 walilazimishwa kuvaa nyota ya manjano kwenye nguo zao. Papa, aliyekuwa na zaidi ya miaka themanini, alitaka kwenda kuchukua nyota naye mwenyewe aivae, ili asimame pamoja na majirani zake Wayahudi. Familia yake ililazimika kumshawishi asifanye hivyo! Kisha Wanazi walianza kuzichukua familia za Wayahudi kwa treni, nao hawakurudi tena.

Jioni moja Corrie alikuwa amemtembelea daktari mmoja Myahudi nyumbani kwake. Walipokuwa wakizungumza, binti yake mdogo aliita kutoka juu ya ngazi. Baba alikuwa amesahau kuja kumfunika kitandani! Daktari aliharakisha kupanda juu, na Corrie akamsikia akicheza na watoto wake kabla hawajalala.

Alipokuwa ameketi akingoja, Corrie aliwaza: polisi wa siri wangeweza kuja kuichukua familia hii usiku wowote. Naye akaamua moyoni. Angewasaidia Wayahudi kwa kila njia aliyoweza.

Punde watu wenye hofu walianza kubisha hodi mlangoni pa Beje. Walikuwa wamesikia kwamba familia ya fundi saa ingewasaidia. Akina ten Boom waliwakaribisha kwa usiku mmoja au miwili na kuwapa chakula, huku wakiwatafutia mahali salama zaidi pa kukaa. Papa alikuwa hodari sana wa kuwafariji watu waliokuwa na hofu.

Mungu hakuwahitaji akina ten Boom ili awaokoe watu wake. Lakini alikuwa amewaweka katika nyumba ile, katika mji ule, wakati ule. Mungu amekuweka nawe mahali pako, naye anaweza kukutumia kumsaidia mtu anayehitaji msaada.

Mungu mpendwa, asante kwa kuniweka mahali nilipo. Fungua macho yangu nione ni nani anayehitaji msaada, na unipe ujasiri wa kumsaidia. Amina.