Huru!

“Nafsi yetu imeokoka kama ndege katika mtego wa wawindaji; mtego umevunjika, nasi tukaokoka.” — kutoka Zaburi 124

Siku tatu baada ya Betsie kufariki, Corrie alisikia jina lake likiitwa wafungwa walipopangwa mstari ili wahesabiwe. Alikuwa akiachiliwa! Lakini kwanza ilimbidi angoje katika hospitali ya kambi mpaka miguu yake iliyovimba ipone.

Hospitalini alilala msichana mdogo aitwaye Oelie, aliyekuwa na ulemavu wa akili. Alikuwa mgonjwa sana na alikuwa akimlilia mama yake. Usiku baada ya usiku Corrie alimweleza habari za Yesu. Usiku wa mwisho Oelie aliweza kusema, kwa maneno yake mwenyewe, kwamba Yesu alimpenda na alikuwa akimwandalia mahali. Ndipo Corrie alipoelewa kwa nini alikuwa amelazimika kungoja. Miaka ile yote ya kufundisha madarasa yake maalum huko Haarlem ilikuwa imeleta jambo hili.

Mwishowe Corrie alitoka nje kupitia lango. Safari ya kurudi nyumbani kupitia Ujerumani ilichukua siku kadhaa. Hakuwa na chakula karibu kabisa, na baadhi ya watu hawakumtendea wema, lakini wengine walimsaidia na kumpa chakula.

Katika mji wa Groningen nchini Uholanzi, alikwenda hospitalini. Mmoja wa wauguzi aliwahi kuwa kiongozi katika vikundi vya wasichana vya Corrie! Walimpa chakula, wakamwogesha na kumpa nguo safi, naye akalala katika kitanda halisi. Aliposikia muziki tena, alilia. Alihisi kwamba maisha yake yamerudishwa kwake kama zawadi.

Miaka mingi baadaye Corrie aliambiwa kwamba aliachiliwa kwa makosa. Hakuna anayejua kwa hakika. Lakini Corrie hakuwahi kutilia shaka ni nani aliyemweka huru. Alikuwa Mungu.

Kama ndege aliyetolewa mtegoni, Corrie alikuwa huru. Wakati mwingine hatujui hasa jinsi Mungu anavyotusaidia, lakini sikuzote tunaweza kumwambia asante kwa ajili ya msaada huo.

Mungu mpendwa, asante kwa kila mara uliponisaidia, hata nisipojua jinsi ulivyonisaidia. Nisaidie kuyatumia maisha yangu kuwasaidia wengine. Amina.