Harusi Hospitalini

“Kule kuomba kwa imani kutamwokoa mgonjwa, na Bwana atamwinua.” — kutoka Yakobo 5

Huko New York aliishi mwandishi mwenye akili nyingi aitwaye Joy Davidman. Alikua bila kumwamini Mungu. Usiku mmoja mwaka 1946, mumewe alipokuwa na matatizo na hakuweza kurudi nyumbani, Joy alikuwa peke yake na mwenye hofu pamoja na wavulana wake wawili wadogo. Kwa mara ya kwanza maishani mwake, alihisi kwamba Mungu alikuwa pale pamoja naye. Akajikuta amepiga magoti, akiomba.

Joy alisoma vitabu vya Jack, na mwaka 1950 akamwandikia barua. Naye akamjibu. Mwaka 1952 alikuja Uingereza, nao wakakutana kula chakula cha mchana huko Oxford. Joy alikuwa mcheshi na jasiri, naye aliweza kubishana na Jack na kushinda! Warnie naye alimpenda. Baadaye alikuja kuishi Uingereza pamoja na wanawe, David na Douglas, na ndoa yake ya kwanza ikavunjika.

Mwaka 1954 Jack akawa profesa katika Chuo Kikuu cha Cambridge, lakini alirudi nyumbani Kilns mwishoni mwa juma.

Mwaka 1956 Joy aliambiwa kwamba hangeweza kuendelea kukaa Uingereza. Jack hakutaka yeye na wavulana wake warudishwe walikotoka. Kwa hiyo alimwoa katika sherehe fupi na rahisi katika ofisi ya serikali, ili aweze kubaki. Aliona jambo hilo kuwa ni kumsaidia rafiki.

Lakini miezi michache baadaye mfupa wa mguu wa Joy ulivunjika, na madaktari wakagundua kwamba alikuwa na saratani. Hawakudhani kwamba angeishi muda mrefu. Kisha Jack akatambua jambo fulani: alimpenda! Alitaka kuwa ameoana naye kweli, mbele za Mungu.

Tarehe 21 Machi 1957, kasisi aitwaye Peter Bide, aliyewahi kuwa mwanafunzi wa Jack, aliwafungisha ndoa katika chumba cha Joy hospitalini. Kisha akaweka mikono yake juu yake na kumwombea apone. Madaktari wake walishangaa sana, kwa kuwa Joy alianza kupata nafuu! Mifupa yake ilianza kupona, na kufikia mwisho wa mwaka aliweza kutembea kwa fimbo.

Jack na Joy waliamini kwamba Mungu alikuwa amesikia maombi yao. Mungu haponyi watu kila mara kwa njia tunayoomba. Lakini yeye hutusikia daima, na sisi tunaweza daima kuwaleta kwake watu tunaowapenda.

Mungu mpendwa, asante kwa kuwa unasikia maombi yetu. Tafadhali uwe pamoja na wote walio wagonjwa, na unisaidie kuwaombea. Amina.