Olw’Abatukuvu Bonna

Olunaku Olw’omukaaga. OKULINDIRIRA KATONDA: Olw’Abatukuvu Bonna.

“Tewabeerawo n’omu akulindirira akwatibwa ensonyi.”— Zabbuli 25:3

KAAKANO, mu kufumiitiriza kwaffe okw’olwa leero, buli omu ku ffe yeerabire, alowooze ku kibiina ekinene eky’abatukuvu ba Katonda mu nsi yonna, abali naffe bonna nga bamulindirira. Era ffenna twegatte mu kusaba okw’amaanyi buli omu ku lw’omunne, nti, “Tewabeerawo n’omu akulindirira akwatibwa ensonyi.”

Lowooza akaseera ku kibiina ekinene eky’abo abalindirira abeetaaga okusaba okwo; nga bangi batya, abalwadde n’abakooye n’abali bokka, abaawulira ng’okusaba kwabwe tekuddibwamu, era abatandika oluusi okutya nti essuubi lyabwe linaakwatibwa ensonyi. Era nate, nga bangi batya abaweereza ba Katonda, abakulembeze b’ekkanisa oba ababaka, abasomesa oba abakozi, ab’amannya ag’enjawulo, abaggwaamu essuubi mu mulimu gwabwe, era abakyalindirira amaanyi n’omukisa nga tebannafuna. Era nate, nga bangi batya abaawulira ku bulamu obw’okuwummula n’emirembe emituukiridde, obw’ekitangaala ekinywevu n’omukwano, obw’amaanyi n’obuwanguzi, naye ne batasobola kuzuula kkubo. Mu bano bonna, tewali kirala wabula nti tebannayiga kyama kya kulindirira Katonda mu bujjuvu. Beetaaga kyokka, ffenna kye twetaaga, obukakafu obulamu nti okulindirira Katonda tekuyinza kubeera kwa bwereere. Tujjukire bonna abali mu kabi ak’okuzirika oba okukoowa, era ffenna twegatte mu kukaaba nti, “Tewabeerawo n’omu akulindirira akwatibwa ensonyi”!

Okwegayiririra kuno olwa bonna abalindirira Katonda bwe kufuuka ekitundu ky’okumulindirira kwaffe ku lwaffe ffennyini, tunaayambagana okwetikkiragana emigugu, bwe tutyo ne tutuukiriza etteeka lya Kristo.

Mu kulindirira kwaffe Katonda munaayingizibwamu ekitundu ekyo eky’obutefaako n’okwagala, ekiri ekkubo eridda ku mukisa ogusinga, n’omukwano ogusinga obujjuvu ne Katonda. Okwagala baganda baffe n’okwagala Katonda bisibiddwa wamu awatali kwawukana. Mu Katonda, okwagala Omwana we n’okutwagala biri bimu: “Okwagala kw’onjagadde, kubeere mu bo.” Mu Kristo, okwagala kwa Kitaawe gy’ali, n’okwagala kwe gye tuli, biri bimu: “Nga Kitange bw’anjagadde, nange bwe ntyo bwe mbaagadde.” Mu ffe, asaba nti okwagala kwe gye tuli kubeere okwaffe eri baganda baffe: “Nga bwe mbaagadde, nammwe mwagalanenga.” Okwagala kwa Katonda kwonna, n’okwa Kristo, kusibiddwa awatali kwawukana ku kwagala baganda baffe. Era tuyinza tutya, buli lunaku, okukakasa n’okukuza okwagala kuno mu ngeri endala okuggyako okusabira buli omu munne buli lunaku? Kristo teyanoonya kwerinako okwagala kwa Kitaawe; yakuyisa kwonna gye tuli. Okunoonya kwonna okw’amazima Katonda n’okwagala kwe ku lwaffe ffennyini, kunaasibibwa awatali kwawukana ku kulowooza n’okwagala baganda baffe mu kubasabira.

“Tewabeerawo n’omu akulindirira akwatibwa ensonyi.” Emirundi ebiri mu Zabbuli eno Dawudi ayogera ku kulindirira kwe Katonda ku lulwe ye; wano alowooza ku bonna abamulindirira. Olupapula luno lutwale obubaka eri bonna aba Katonda abagezesebwa era abakooye, nti waliwo abasaba ku lwabwe abasinga be bamanyi. Kibasitule era kitusitule mu kulindirira kwaffe tumalirire okwerabira oluusi, n’okugaziya emitima gyaffe, ne tugamba Kitaffe nti, “Bino byonna bikulindirira, era obiwa emmere yaabyo mu biseera byabyo.” Kituwe ffenna obuvumu obuggya—kubanga ani atali mulwadde oluusi okuzirika n’okukoowa? “Tewabeerawo n’omu akulindirira akwatibwa ensonyi” kye kisuubizo ekiri mu kusaba, nti, “Abakulindirira tebalikwatibwa nsonyi”! Okuva mu bajulizi abangi ennyo okukaaba kujja eri buli muntu ayagala obuyambi, muganda wange, mwannyinaze, gwe agezesebbwa, nti, “Lindirira Mukama; ddamu amaanyi, era anaanyweza omutima gwo; lindirira, ŋŋamba, Mukama. Mubeere n’obuvumu, era anaanyweza emitima gyammwe, mmwe mwenna abalindirira Mukama.”

Kitaffe ow’omukisa! tukwegayirira mu bwetoowaze, Tewabeerawo n’omu akulindirira akwatibwa ensonyi; nedda, n’omu. Abamu bakooye, era ekiseera eky’okulindirira kirabika nga kiwanvu. Abamu banafu, era tebamanyi bulungi ngeri ya kulindirira. Abamu beesibidde mu kufuba kw’okusaba kwabwe n’omulimu gwabwe, ne balowooza nti tebasobola kufuna kiseera kya kulindirira butakoma. Kitaffe! tuyigirize ffenna engeri y’okulindirira. Tuyigirize okulowooza buli omu ku munne, n’okusabira buli omu munne. Tuyigirize okulowooza ku ggwe, Katonda w’abo bonna abalindirira. Kitaffe! tewabeerawo n’omu akulindirira akwatibwa ensonyi. Ku lwa Yesu. Amiina.

“Emmeeme yange, lindirira Katonda yekka!”