Ebibala eby’Olubeerera

Nze nabalonda, mulyoke mubale ebibala ate ebibala eby’olubeerera—Yokaana 15:16

Waliwo ebibala ebimu ebitasobola kuterekebwa. Ekika ekimu ekya pea oba eky’apo kirina okuliibwa amangu ddala; ekika ekirala kisobola okuterekebwa okutuusa omwaka ogujja. Bwe kityo ne mu mulimu gw’Ekikristaayo mulimu ebibala ebitawangaala. Wayinza okubaawo ebingi ebisanyusa era ebizimba, kyokka ne watabaawo kabonero ka lubeerera ke kaleka ku maanyi g’ensi oba ku mbeera y’Ekkanisa. Ku luuyi olulala, waliwo omulimu ogulekawo akabonero kaagwo okumala emirembe egiddiriŋŋana oba okutuuka emirembe n’emirembe. Mu gwo amaanyi ga Katonda gawulirwa nga tegaggwaawo. Bye bibala Pawulo by’ayogerako bw’annyonnyola engeri bbiri ez’obuweereza: “Okubuulira kwange n’okuyigiriza tebyali mu bigambo bya magezi ebisendasenda, naye byali mu maanyi ne Mwoyo Mutukuvu; okukkiriza kwammwe kuleme kuba kw’amagezi ga bantu wabula kwesigame ku maanyi ga Katonda.” Omuntu n’amagezi ge n’amaanyi ge gy’akoma okweyongera, obunywevu gye bukoma okukendeera; Omwoyo wa Katonda gy’akoma okweyongera, okukkiriza okwesigama ku maanyi ga Katonda gye kukoma okweyongera.

Ekibala kyolesa obutonde bw’omuti mwe kiva. Kyama ki eky’okubala ebibala eby’olubeerera? Eky’okuddamu kyangu. Obulamu bwaffe bwe bubeera mu Kristo, ffe bwe tubeera mu Ye, n’ebibala bye tubala bwe bibeera eby’olubeerera. Gye tukoma okukkiriza byonna ebiva mu kwagala n’amaanyi g’omuntu okusalibwako n’okulongoosebwa Omulimi ow’omu ggulu, gye tukoma okwekutula ennyo ku by’ebweru, Katonda alyoke akole mu ffe olw’Omwoyo we; kwe kugamba, gye tukoma okubeera mu Kristo ddala, n’ebibala byaffe gye bikoma okubeera eby’olubeerera.

Nga kirowoozo kya mukisa! Yakulonda, n’akuteekawo okubala ebibala, era ebibala byo bibeere eby’olubeerera. Teyagenderera n’akatono ettabi lye lyonna okubala ebibala ebitali bya lubeerera. Gye nkoma okuyingira mu kigendererwa kino eky’ekisa kye ekyannonda, obwesige bwange gye bukoma okunywera nti nsobola okubala ebibala eby’obulamu obutaggwaawo, ku lwange n’abalala. Gye nkoma okuyingira mu kigendererwa kino eky’okwagala kwe okwannonda, gye nkoma okutegeera ekiyunga ekigendererwa ekyava emirembe n’emirembe n’ebibala eby’emirembe n’emirembe: okubeera mu Ye. Ekigendererwa kikye, alikituukiriza; ebibala bibye, alibizaala; okubeera kukwe, alikukuuma.

Buli eyeeyita omukozi w’Ekikristaayo ayimirire akakkanye. Weebuuze obanga olekawo akabonero ak’olubeerera ku abo abakwetoolodde. Si kubuulira kwo oba kuyigiriza kwo, si maanyi ga kwagala kwo oba obusobozi bwo okukyusa abalala, ebinaakituukiriza kino. Byonna byesigama ku kuba n’obulamu bwo obujjudde Katonda n’amaanyi ge. Era ekyo nakyo kyesigama ku kubeera kwo mu bulamu obw’ettabi ddala obw’okubeera mu Kristo—okussa ekimu ne Kristo okw’okumpi ennyo okutakutuka. Lye ttabi, eribeera mu Ye, eribala ebibala bingi, ebibala eby’olubeerera.

Mukama Omutendereze, nkwegayiridde, bikkulira emmeeme yange nti wannonda okubala ebibala bingi. Kino kibeere obwesige bwange, nti ekigendererwa kyo kiyinza okutuukirira—ggwe wannonda. Kino kibeere amaanyi gange okuleka byonna ne nneewaayo gy’oli. Ggwe kennyini olituukiriza ekyo kye watandika. Nsikiriza nnyo okubeera mu kwagala n’obukakafu obw’ekigendererwa ekyo eky’olubeerera, amaanyi ag’emirembe n’emirembe gantwale, n’ebibala bye mbala bibeere eby’olubeerera.

Mulyoke mubale ebibala. Ayi Omuzabbibu wange ow’omu ggulu, kitandise okutangaalira emmeeme yange nti ebibala, ebibala ebisingawo—ebibala bingi—ebibala eby’olubeerera kye kintu kimu ky’olina okumpa, era kye kintu kimu nze ng’ettabi kye nnina okukuwa! Nze wuuno. Mukama Omutendereze, tuukiriza ekigendererwa kyo mu nze; ka mbale ebibala bingi, ebibala eby’olubeerera, olw’ekitiibwa kyo.