Omulimi

Ate Kitange ye mulimi—Yokaana 15:1

Omuzabbibu gwetaaga omulimi okugusimba n’okugulabirira, okukungula ebibala byagwo n’okubisanyukira. Yesu agamba nti: “Kitange ye mulimi.” Ye yali “omuzabbibu Katonda gwe yasimba.” Byonna bye yali ne bye yakola yabiweebwa Kitaffe; mu byonna yanoonya kwagala kwa Kitaffe n’ekitiibwa kye kyokka. Yali afuuse omuntu atulage ekitonde kye kisaanidde okubeera eri Omutonzi waakyo. Yatwala ekifo kyaffe, era omwoyo gw’obulamu bwe mu maaso ga Kitaffe bulijjo gwali ogwo gw’ayagala okufuula ogwaffe: “byonna biva gy’ali, era biyita mu ye era bidda gy’ali.” Yafuuka Omuzabbibu ogw’amazima, ffe tulyoke tubeere amatabi ag’amazima. Ku Kristo ne ku ffe, ebigambo bino bituyigiriza ebintu bibiri: okwesigama ku Katonda mu byonna, n’okumwesiga okutuukiridde.

Kitange ye mulimi.—Kristo bulijjo yabeeranga mu mwoyo gw’ekyo kye yagamba lumu nti: “Omwana taliiko ky’akola ku bubwe.” Ng’omuzabbibu bwe gwesigama ku mulimi olw’ekifo mwe gulina okukulira, olw’okugukomera, okugufukirira n’okugusalira. Kristo yawulira nga yeesigamye ddala ku Kitaffe buli lunaku okufuna amagezi n’amaanyi okukola Kitaffe by’ayagala. Nga bwe yagamba mu ssuula eyasooka (14:10): “Ebigambo bye mbategeeza si byange ku bwange, wabula biva eri Kitange abeera mu Nze, era akola emirimu ng’ayita mu Nze.” Okwesigama kuno okujjuvu kwalina ku ludda lwakwo olulala obwesige obw’omukisa ennyo nti teyalina ky’atya: Kitaffe teyayinza kumulekerera. Ng’alina Kitaffe ng’Omulimi we, yayinza okuyingira mu kufa ne mu ntaana. Yayinza okwesiga Katonda okumuzuukiza. Byonna Kristo by’ali ne by’alina, abirina si mu ye yennyini, wabula okuva eri Kitaffe.

Kitange ye mulimi.—Ekyo kya mazima ag’omukisa gye tuli nga bwe kiri eri Kristo. Kristo anaatera okuyigiriza abayigirizwa be nti bo matabi. Nga tannaba na kukozesa kigambo ekyo, oba okwogera n’akatono ku kubeera mu Ye oba ku kubala ebibala, akyusa amaaso gaabwe ne gatunula waggulu eri Kitaffe abalabirira era akola byonna mu bo. Ku kikolo ddala eky’obulamu bw’Omukristaayo bwonna kwe kuli ekirowoozo nti Katonda y’alina okukola byonna, nti omulimu gwaffe kwe kwewaayo ne twerekera mu mikono gye, nga twatula nti tetuliiko kye tusobola era nti twesigamye ku ye, era nga tukakasa nti atuwa byonna bye twetaaga. Ekibulamu ekinene mu bulamu bw’Omukristaayo kwe kuba nti, ne bwe twesiga Kristo, Katonda tumuleka bweru. Kristo yajja okututuusa eri Katonda. Kristo yawangaala obulamu bw’omuntu ddala nga ffe bwe tulina okubuwangaala. Kristo Omuzabbibu asonga ku Katonda Omulimi. Nga bwe yeesiga Katonda, naffe twesige Katonda nti byonna bye tusaanidde okubeera ne bye tusaanidde okuba nabyo, ng’abo abali ku Muzabbibu, tulibiweebwa okuva waggulu.

Isaaya yagamba nti: “ennimiro ey’emizabbibu ebaze ebibala; Nze Mukama Katonda, ennimiro nze ngirabirira era nze ngifukirira buli kiseera. Ngikuuma emisana n’ekiro Waleme kubaawo n’omu agikola akabi.” Nga tetunnatandika kulowooza ku bibala oba ku matabi, emitima gyaffe gijjule okukkiriza kuno: nga Omuzabbibu bwe gulina ekitiibwa, n’Omulimi bw’atyo. Okuyitibwa kwaffe nga bwe kuli okw’awaggulu era okutukuvu, bw’atyo Katonda alikutuukiriza kwonna bw’ali ow’amaanyi era ow’okwagala. Nga Omulimi bwe yafuula Omuzabbibu ekyo kye gwalina okubeera, bw’atyo bw’alifuula buli ttabi ekyo kye lirina okubeera. Kitaffe ye Mulimi waffe, Omweyimirizi w’okukula kwaffe n’ebibala byaffe.

Kitaffe Omutendereze, tuli nnimiro yo. Oh, ofune ekitiibwa olw’omulimu gw’emikono gyo! Ai Kitange, njagala okuggulira omutima gwange essanyu ly’amazima gano ag’ekitalo: Kitange ye Mulimi. Njigiriza okukumanya n’okukwesiga, n’okulaba nti okufaayo okwo okw’omunda kwe walabiriramu Omuzabbibu era kwe wagusanyukiramu, kutuuka ku buli ttabi, ne ku nze.