Okunoonya Katonda
Ennyanjula

Essuula 1 · eddakiika 2 ez’okusoma · eddakiika 2 ez’okuwuliriza

Ennyanjula

Kino kitabo ekyekenneenya obulamu obw’omunda mu ngeri ey’obukugu, nga kiwandiikiddwa omutima ogulumwa ennyonta ya Katonda, ogwegomba okutegeerako waakiri embiriizi z’amakubo ge, obuziba bw’okwagala kwe eri aboonoonyi, n’obugulumivu bw’obukulu bwe obutasemberekeka—era kyawandiikibwa omusumba omukozi ennyo ow’omu Chicago!

Ani ayinza okulowooza nti Dawudi yandiwandiikidde Zabbuli ey’amakumi abiri mu esatu ku South Halsted Street, oba nti omusamize w’omu Mirembe egy’Omu Makkati yandifunidde okuluŋŋamizibwa mu kisenge ekitono eky’okusomeramu ku mwaliiro ogw’okubiri ogw’ennyumba ey’embaawo, wakati mu kibuga ekyo ekigazi era ekyetegeke ng’olubaawo lw’omweso, olw’enguudo ezitaggwaawo

Amakubo g’obulamu gye gasalaganira nga gajjudde abantu,
Ebiwoobe by’amawanga n’ebika gye biwulirwa,
Mu bifo eby’obunaku n’obwetaavu,
Ku miryango egiddugaze olw’entiisa,
Ne mu makubo omwekwese ebisendasenda eby’omululu ...

Naye nga Dr. Frank Mason North ow’e New York bw’agamba mu luyimba lwe olutaliggwaawo, ne Omwami Tozer bw’atyo bw’agamba mu kitabo kino:

Waggulu w’oluyoogaano lw’empaka ez’okwefaako,
Tuwulira eddoboozi lyo, Ayi Omwana w’Omuntu.

Okumanya kwange ku muwandiisi kukoma ku kumukyalirako kaseera katono n’okussa ekimu naye mu kwagala mu kkanisa ye. Eyo gye nnasanga omuyivu eyeesomesa yekka, omusomi asoma buli kintu, alina etterekero ly’ebitabo ery’ekitalo ery’ebitabo by’eby’eddiini n’eby’okwewaayo eri Katonda, era omuntu eyalabikanga ng’atuula ekiro kyonna ng’anoonya Katonda. Ekitabo kye kyava mu kufumiitiriza okw’ebbanga eddene n’okusaba okungi. Si kibinja kya bubaka bwe yabuulira. Tekyogera ku kituuti na ntebe za kkanisa, wabula ku mmeeme erumwa ennyonta ya Katonda. Essuula zaakyo zisobola okufunzibwa mu kusaba kwa Musa nti, “Ndaga ekitiibwa kyo,” oba mu kwewuunya kwa Pawulo nti, “Kale nga Katonda wa kitalo, ng’amagezi ge mangi n’okutegeera kwe kungi!” Eno ddiini etali ya mutwe wabula ya mutima.

Mulimu okutegeera okw’obuziba, olulimi olutali lwa kwekulumbaza, n’endowooza enzigule eri Abakristaayo bonna, ekintu ekiwummuza omutima. Omuwandiisi tajuliza nnyo bigambo bya balala, naye amanyi abatukuvu n’abo abaanoonyanga Katonda mu mirembe gyonna—Augustine, Nicholas ow’e Cusa, Thomas à Kempis, von Hügel, Finney, Wesley n’abalala bangi. Essuula ekkumi zeekebejja omutima, era okusaba okuli ku nkomerero ya buli emu kwa mu kisenge eky’ekyama, so si kwa ku kituuti. Nnawulira Katonda ng’ali kumpi nange bwe nnali nga nzisoma.

Kino kitabo kya buli musumba, buli muminsani, na buli Mukristaayo eyeewaayo eri Katonda. Kyogera ku bintu bya Katonda eby’obuziba n’obugagga bw’ekisa kye. Okusinga byonna, kirimu eddoboozi ery’amazima n’obwetoowaze.

Samuel M. Zwemer

New York City


Ekiddako